Ngayong araw, maghanda ka na...

Mga puwedeng hilingin at dapat gawin para matupad ang wish sa geminid shooting stars

ni Sr. Socrates Magnus II - @Karunungang Lihim| October 18, 2020

Bigyang-daan natin ang kahalagahan ng magaganap ngayong araw, Oktubre 18, na nasa todong-lakas ang dami ng mga bulalakaw na mas kilala sa tawag na Geminid meteor shower.

Sa mga shooting star lovers, watch out dahil ngayon ang pagkakataon na muli nating makikita ang tila pag-ulan ng mga bulalakaw sa kalangitan.

Ang salitang “Geminid” ay mula sa salitang Gemini na isa sa mga zodiac signs. Dahil dito, ang mga hiling na puwedeng bigyan ng katuparan ng mga suwerteng dala-dala ng zodiac sign na Gemini ay ang mga sumusunod:

1. Pananalo sa mga pakikipagsapalaran kung saan mismong kapalaran ang nakataya, tulad ng games of chance, sugal, puwede rin ang lotto at iba pa.

2. Mabilis na pagkita ng pera tulad ng pag-aahente o sa mga pinansiyal na aktibidad kung saan pinaiikot ang puhunan. Gayundin, puwedeng-puwede ang pakikipagsapalaran sa stock market.

3. Hindi sinasadyang makapulot ng pera sa kalsada o kung nasaan ka man at puwede ring biglang naabutan ng bag na may malaking halaga ng pera.

4. Ang mga suwerte sa love life ay isa sa kayang ipagkaloob ng Geminid shooting star sa kondisyon na ang hihiling ay dapat masaya, palakuwento, maharot, mapagbiro at mapagbigay.

5. Kung ang hihilingin ay hindi pansarili, puwede ring magkatotoo. Halimbawa, suwertehin sa trabaho ang mahal sa buhay, makaahon sa kahirapan at magkapera ang malapit sa puso ng hihiling.

6. Sa panahon din ng pagpapaulan ng Geminid shooting star, ang mga kahilingan na gumaling ang mga sakit o karamdaman ay bagay na bagay.

Ang rekomendasyon para makatiyak na ang mga hiling ay makakamit ay ang mga sumusunod:

• Huwag kalimutang maglagay ng barya sa bulsa o wallet.

• Magsuot ng damit na may kislap.

• Kailangan din ang masayang persnalidad kung saan dapat may ngiti sa labi at mukha.

• Inirerekomendang mamigay ng pera sa mga hindi kakilala, pero hindi naman malaking halaga, kahit magkano ay okey na.

• Puwede ring mamigay ng pera sa mga bata, ngunit mas maganda sa mga batang masayang naglalaro.

• Maligo sa umaga at gabi bago matulog.

• Sa pagtulog, okey lang isuot ang damit na panlakad.

Ang pinakamahalaga ay ang pagdarasal kung saan ang unang sasabihin ay ang papuri sa iyong kikinilalang Diyos, kasunod ang pasasalamat at ang dulo ay pagsasabi ng mga kahilingan sa buhay. Siyempre, may salitang “Amen” o “Siya nawa” o “Mangyari nawa.”

Good luck!

Para gumanda ang kapalaran...Mga bagay na puwedeng hilingin sa bulalakaw sa Oktubre 20

ni Sr. Socrates Magnus II - @Karunungang Lihim| October 11, 2020

Bigyang-daan natin ang kasalukuyang nagaganap na pagpapakita ng mga bulalakaw sa kalangitan na kung tawagin ay Draconid meteor shower.

Nagsimulang magpamalas ng nakamamanghang pag-ulan ng mga bulalakaw noong ika-7 ng Oktubre at hanggang ngayon ay may nakikita pang mga bulalakaw sa kalangitan.

Ayon sa tradisyon, ang mga request sa shooting stars ay nagkakatotoo o nangyayari, kaya noon pa man at hanggang ngayon, patuloy ang paghiling ng tao sa mga bulalakaw.

Hindi namamatay ang ganitong paniniwala dahil marami ang nagpapatunay na natupad ang kanilang “wish upon the stars.”

Anu-anong mga hiling ang nagkakatotoo?

Numero-uno na ang hiling na magkaroon ng asawa o kasintahan. Ang totoo nga, pagbabantay sa kalangitan para makita ang mga bulalakaw ang unang ginawa ng mga dalaga o binata na gusto nang magkaroon ng love life.

Dahil marami sa kanila ang natupad ang hiling, nagsimulang dumami ang mga nagwi-wish sa mga bulalakaw.

Pumapangalawa, pero halos ganundin karami ang bilang ng nagwi-wish na suwertehin. Ang nasa isip ay suwertehin sa aspetong pampinansiyal at dahil din may mga nagpapatunay na sila ay sinuwerte, halimbawa, nanalo sa sugal, dumami nang dumami ang humihiling nito.

Dahil nagkakatotoo ang paghiling sa mga bulalakaw, ang mga hindi magkaanak ay nag-wish din at marami sa kanila ang nabiyayaan ng mga anak.

Kaya bakit hindi mo subukan mag-wish upon the star?

Gusto mo ba ng bagong gadget tulad ng cellphone, laptop o netbook? Try mong humiling sa mga bulalakaw.

Gusto mo ba ng bagong kotse? Why not try the shooting star magic?

Wala ka bang trabaho? Baka matulungan ka ng mga bulalakaw.

Auman ang gusto mo, puwede itong hilingin sa mga bulalakaw.

Papatapos na ang Draconid meteor shower, pero huwag kang mawalan ng pag-asa dahil sa darating na Oktubre 20 at mga susunod na araw, magaganap naman ang Orionids meteor shower.

At kung mawala sa isip mo ang Orionids meteor shower sa Oktubre 20, may pag-asa ka pa dahil sa ika-29 ng buwan, magaganap naman ang Southern Taurids meteor shower.

Masayang mabuhay at mas magiging masaya ka kapag humiling ka sa mga bituin.

Good luck!

Paglaki at pagliit ng buwan, may kinalaman sa ani ng mga pananim

ni Sr. Socrates Magnus II - @Karunungang Lihim| October 4, 2020

Bigyang-daan natin ang ilang impormasyon tungkol sa Full Moon ngayong Oktubre, 2020.

Ang Full Moon ngayong buwan ay naganap noong ika-2 ng Oktubre at tinatawag itong “Harvest Full Moon.”

Ang nagpangalan ng Full Moon ay ang mga sinaunang magsasaka dahil ito ay sobrang maliwanag kung saan kahit gabi ay nagagawa nilang mag-harvest dahil maliwanag na maliwanag ang paligid dahil sa buwan, at dito nakuha ang pangalan na “Harvest Full Moon.” Sa ganitong katotohanan, makikita na ang mga bagay sa kalangitan ay may epekto sa buhay ng mga tao sa lupa.

Ito rin ang nagpapawalang-bisa sa sinasabi ng ilan na ang mga bagay sa kalangitan ay walang kakayahang kontrolin ang buhay ng mga tao sa lupa.

Tuwing sasapit ang Full Moon, ang mga bunga ng halaman o punong-kahoy ay makikita “in full”, tulad ng buko, kapag binuksan ito sa Full Moon, makikita mong umaapaw ang sabaw, kaya marami kang makukuha.

Ang sabaw ng buko ay ang ginagawang “tuba”, isang matamis na likido mula sa bunga ng niyog. Gayunman, ang sabaw ng buko at tuba ay ginagawang suka o vinegar.

Kapag kakaunti ang makukuhang sabaw ng buko, maaaring tumaas ang presyo ng suka na gawa mula sa sabaw nito dahil may batas sa economics na kung tawagin ay “supply and demand” kung saan kapag kakaunti ang supply at marami ang demand, tiyak na mataas ang presyo ng nasabing produkto.

Dahil dito, makikita agad na ang buwan ay puwedeng makaapekto, hindi lang sa buhay ng bawat isa kundi pati sa ekonomiya ng bansa.

Habang papaliit ang buwan o nagaganap na ang “waning of the moon”, lumiliit din ang volume ng tubig sa mga halaman at punong-kahoy. Sa iba, isang mahiwagang kaganapan ito, pero sa mga nakaaalam ng natural Astrology, ito ay simpleng kaalaman na puwedeng pakinabangan ng sinumang interesado.

Gusto mo bang makinabang sa mga katotohanan na makukuha sa kalagayan ng buwan? Simulan mo na ngayon, kung ang mga naritong kaalaman ay iyong mapakikinabangan.

Kapag Full Moon, ang kababaihan ay mas madaling mabuntis at habang lumiliit naman ito, lumiliit din ang tsansa na magkaanak.

Kapag Full Moon, ang kababaihan ay nakagugulat dahil sila ay may biglaang paglakas ng karisma na magpahanga at parang may malakas na gayuma. Tingnan mo, baka ito ay puwede mong pakinabangan.

Tinatawag din ang buwan na “Luna”, dahil ang buwan sa wikang Latin ay Luna. Mahirap paniwalaan, pero marami ang magpapatotoo na ang mga tinatawag na “lunatic” ay nasa todong-lakas ang pagiging lunatic sa panahon ng full moon.

Good luck!