Dahilan kaya ‘di basta nakikita ang “The One”

ni Sr. Socrates Magnus II - @Karunungang Lihim| November 22, 2020

Bigyang-daan natin ang e-mail ni Miss Taurus ng Dalandalan, Valenzuela City.

Dear Señor,

Ako ay 28-anyos na, gusto kong malaman kung ano ang magiging kapalaran ko sa love life? Minsan kasi aaminin ko, naiinggit ako sa iba dahil may boyfriend sila, tapos ‘yung ibang officemate ko, may masayang pamilya. Saan ko ba matatagpuan ang aking life time partner? May 2, 1992 ang birthday ko.

Naghihintay,

Miss Loveless

Sa iyo, Miss Loveless,

Alam mo, iha, ang nakikita ng ating mga mata minsan ay hindi ang tunay na larawan ng isang bagay o pangyayari dahil ang mga nakikita lang naman natin ay ang panlabas na larawan at hindi ang natatagong katotohanan.

Minsan, nakita natin na masaya ang dalawang nagmamahalan pero ang hindi natin nakikita ay nagkukuwanri lang ang isa kanila at may pagkakataon pa na silang dalawa ay parehong nagkukuwanri.

Minsan, nakakikita tayo ng akala natin ay matatamis na ngiti mula sa mga labi ng isang nagmamahal, pero ang hindi natin alam, sa likod pala ng kanyang mga ngiti ay mapapait na karanasan.

Minsan, nakikita natin na ang mag-asawa may magandang bahay, may mga sasakyan at mga kabuhayan, pero ang hindi natin nakikita ay isa sa kanila ay nagdudusa dahil sa kalungkutan.

Minsan pa nga, may mga nakikita tayong masayang-masaya sa harap ng mga tao, pero ‘pag nasa bahay nila, hindi naman pala gaanong nag-uusap na parang hindi magkakilala.

Ang mga ganitong relasyon ay masasabing mali at wala sa lugar dahil hindi rin naman nila nasunod ang dapat na dikta ng kanilang kapalaran. Pero kung hahayaan natin na ang kapalaran ang magdikta sa ating buhay, lalo na sa ating love life, tiyak na ang kaligayahan ay mapapasaatin.

Ang mga isinilang sa Earth Signs, tulad mo na nasa Taurus ay dapat maghintay, kumbaga, mas maganda na hintayin mo ang lalaking talagang para sa iyo. Ibig sabihin ng “maghintay” ay huwag kang maghanap. Oo, huwag kang maghanap dahil ang mapapangasawa mo ay kusang ilalapit sa iyo ng tadhana. Dahil din dito, makararanas ka ng kabiguan kapag nagpilit kang maghanap. Hindi rin ipinapayo na magmahal ka ng tao na nasa malayo. Kaya ang isa pang tiyak ay hindi rin maganda para sa iyo ay ang “long distance relationship.”

Ang isa pang ibig sabihin ng huwag kang maghanap at magmahal ng nasa malayo ay dapat malapit lang sa iyo ang iyong mapapangasawa. Ang una sa listahan ay ang inyong mga kapitbahay, kababata, sa kabilang kanto, ka-barangay, kasamahan sa trabaho at iba pa na malapit lang sa iyo.

Puwede ring mapangasawa mo ang iyong matalik na kaibigan, pero ang mga pangkaraniwang kaibigan ay hindi kasama sa listahan.

Puwede ka rin namang magmahal sa hindi binanggit sa unahan dahil ang pagmamahal, minsan ay mahirap pigilan. Ito ang tunay na dahilan kaya sobrang daming bigo sa love life.

Gayunman, bilang pagtatapat at payo sa iyo, kung sakaling hindi inaasahan na ma-in love ka sa mga hindi nabanggit sa itaas, ‘wag kang mawalan ng pag-asa dahil puwede pa ring magmahal muli. Kumbaga, kung makaranas ka ng masakit na kabiguan, alalahanin mong muli ang payo ng iyong Señor— ang dapat mong mahalin ay ang isang nilalang na “malapit” sa iyo.

Good luck and God bless!

Ayos ng opisina na suwerte sa negosyo

ni Sr. Socrates Magnus II - @Karunungang Lihim| November 08, 2020

Bigyang-daan natin ang kaalaman na magagamit sa pagbubukas ng mga business offices.

Pagkatapos magsara ng mga negosyo dahil sa COVID-19 pandemic, ngayon ay sabay-sabay na muling magbubukas ang mga opisina. Takot man ang mga tao, wala tayong magagawa kundi buhayin ang ekonomiya dahil kapag buhay at masigla ito, ganundin ang mga tao.

Sa negosyo, hindi puwedeng walang opisina, kaya maoobliga ang mga negosyante na magbukas din ng offices.

Narito ang ilang kaalaman para makabangon ang negosyo gamit ang tama at masuwerteng ayos ng mga opisina.

1. Maglagay ng mga buhay na bagay at ang isa sa mga ito ay halaman. Kapag may bagay na buhay sa isang lugar, ang lugar mabubuhay. Kaya ngayon na muling bubuhayin ang mga negosyo, mas magandang maglagay ng halaman sa mga place of business, lalo na sa mga opisina.

2. Dahil mas maganda ang may buhay sa loob ng opisina, puwede ring maglagay ng mga aquarium na may mga isda.

3. Ang paglalagay ng munting water fountain ay isa ring napakagandang option. Ito ay dahil ang fountain na may tubig na dumadaloy o umaagos, ang tubig ay sinasabing “living water.”

4. Maganda rin na may naririnig na musika sa loob ng opisina dahil ang nota ng mga musika ay mga buhay na tunog.

5. Ang mga opisina ay dapat na may mga larawang pandekorasyon sa dingding. Ang mga larawan ay nagpapasigla sa mga nag-oopisina. Halimbawa nito ang magagandang bulaklak o ibon na lumilipad at iba pang mga hayop na nasa active mode.

6. Puwedeng-puwede rin ang mga larawan na may mga aktibidad ng tao na may kinalaman sa pagpapaganda ng buhay o pamayanan. Halimbawa, nagtatanin ng iba’t ibang halaman o bungang kahoy.

7. Puwedeng-puwede rin ang mga larawan na may kaugnayan sa harvesting o panahon ng pag-ani.

8. Ang mga larawan na sentimental ay hindi dapat mailagay, ganundin ang mga larawang may kaugnayan sa romance o love ay hindi rin ipinapayo na ilagay sa mga opisina.

9. Bawal ding maglagay ng mga iniidolong artista o mga sikat na tao na wala namang kinalaman sa line of business.

10. Hindi rin dapat na mailagay ang mga senaryo kung saan may malungkot na kapaligiran.

Sa ngayon, magbubukas na muli ang mga opisina. Huwag na huwag mong kalimutan na dapat ay may bagong pintura ang opisina. Bagong bukas, bagong magandang kapalaran ang hatid ng mga kaalaman sa itaas.

Good luck!

Pagbubukas ng bintana at pagsaboy ng asin, paraan para makabawi ang negosyo

ni Sr. Socrates Magnus II - @Karunungang Lihim| October 25, 2020

Bigyang-daan natin ang mga unang bagay na dapat gawin para mabilis na umasenso ang negosyo.

Ngayon, okey nang magbukas ng negosyo. Ang mga negosyante ay makikitang parang nakawala sa kulungan at mag-uunahan tulad sa karera ng kabayo.

Narito ang ilang kaalaman tungkol sa muling pagbubukas ng mga place of business.

• Dapat may sariwang hangin na makakapasok, kaya mas maganda na bukas ang bintana sa East at West o North at South. Kung walang mga bintana, mas magandang maglagay nito sa nasabing likas na daanan ng ihip ng hangin. Kung sarado naman tulad ng mga naka-aircon, inirerekomendang maglagay ng exhaust fan para mailabas ang hangin na naiipon sa loob.

• Hinihikayat din na maglagay ng mga halaman sa loob at labas ng place of business.

• Maganda na may fountain sa loob na may mga isdang naglalaro o naglalanguyan kung saan ang tubig ay awtomatikong nalalagyan ng oxygen.

• Sa umaga, ang payo ay magdasal muna ang mga empleyado kasama ang may-ari kung siya ay maaga ring pumapasok.

• Huwag kalimutang magsaboy o magkalat ng asin sa paligid.

• Kung puwede ay magsikain nang busog, ibig sabihin, kahit simple lang ang pagkain, kailangang busog ang kumain. Kaya kung puwede rin ay huwag magtipid dahil hindi naman kailangan ang malaking halaga ng pera sa simpleng pagkain. Ang mahalaga ay busog ang kakain. Sa salitang “busog”, ibig sabihin ay hindi nabitin sa pagkain.

• Ang paghuhugas ng mga kamay ay dapat isagawa at kailangang hugasan agad ang pinagkainan.

• Pagkatapos kumain, mas magandang magkaroon ng panandaliang pagtulog o pag-idlip. Kung hindi magagawa, ang ipinapayo ay gawin ang tinatawag na “Paghingang Ganap ng Mga Yogi” kung saan ilalabas ng hangin sa lungs at papasukin ang bago o sariwang hangin, gagawin ito ng ilang minuto bago muling simulan ang trabaho.

• Ang Paghingang Ganap ng Mga Yogi ay inirerekomenda rin sa mga empleyado at namamahala ng negosyo kapag napansin nila sa kanilang sarili na nababawasan ang aktibidad ng katawan, tinatamad o nananamlay.

• Bago mag-uwian, magdasal.

Good luck!