Iba’t ibang dahilan ng mabahong utot

ni Jersy L. Sanchez - @Life & Style| April 12, 2022

Karamihan sa atin ay umuutot nang lima hanggang 15 beses kada araw. Marami ba? Well, normal lang yan at mayorya niyan ay wala namang amoy.

Ayon sa mga eksperto, ang ‘gas’ o utot ay may hydrogen sulfide, carbon dioxide, ammonia at methane, na natural na napo-produce sa digestion, habang tinutunaw ng bacteria sa gut ang mga pagkain.

Pero kung karaniwang walang amoy ang utot, bakit naman may mga pagkakataong mabaho ito? Well, narito ang iba’t ibang dahilan kaya mabaho ang utot:

1. DIET. Kabilang ang diet at eating habits sa mga karaniwng sanhi ng mabahong utot. Sey ng experts, ang mabilis na pagkain ay posibleng dahilan para makalunok ka ng maraming hangin kasama ng pagkain, at ito ang dahilan kaya mas maraming hangin o ‘gas’ sa iyong digestive tract at ito ang dahilan ng mabahong utot. Samantala, ang mga pagkaing mayaman sa sulfur, kabilang ang sibuyas, broccoli at repolyo ay puwedeng maging sanhi ng mabahong utot. Upang maiwasan ito, inirerekomendang nguyain nang maayos ang pagkain upang mas madali itong ma-digest.

2. FOOD INTOLERANCE. May ilang pagkain na hirap ang digestive track na tunawin, na nagiging sanhi ng food intolerance. Una na rito ang lactose intolerance na nangyayari ‘pag hirap ang katawan na mag-produce ng enzyme na kailangan upang matunaw ang lactose— ang uri ng sugar na nakikita sa gatas at iba pang dairy products. Dahil dito, kung sa tingin mo ay may food intolerance ka, mabuting kumonsulta sa doktor. Gayundin, inirerekomendang gumamit ng food journal para malaman kung anu-anong mga pagkain ang nakaka-trigger dito.

3. CONSTIPATION. Ang ‘stool’ o poop ay fiber na hindi nada-digest. Ayon sa mga eksperto, ‘pag nanatili ito sa colon nang higit sa 36 hours, patuloy na sinisira o tinutunaw ng bacteria ang fiber, na nagiging dahilan para ilabas ang gas. Gayunman, hindi ito nangangahulugan na may bowel movement. Dahil dito, inirerekomenda na tutukan ang sanhi ng constipation. Tiyaking nakokonsumo ang sapat kailangang fiber sa isang araw— 25 grams para sa kababaihan, habang 38 grams naman para sa mga lalaki. Gayundin, uminom ng maraming tubig at regular na mag-ehersisyo.

4. GAMOT. Kung mayroon kang bagong medication at napansin mong may kakaibang amoy ang iyong utot, awtomatikong ito na ang dahilan. Sey ng experts, maraming gamot at supplement na nakakaapekto sa paggalaw ng mga pagkain sa iyong digestive tract. Kung hindi mo kinakaya ang epektong ito, alamin sa iyong doktor kung puwedeng bawasan, baguhin o itigil ang pag-inom ng naturang mga gamot. Samantala, bagama’t maliit na side effect lamang ang pag-utot, kung may malala na itong epekto sa araw-araw mong pamumuhay, kailangan mo nang kumonsulta sa iyong doktor.

5. MEDICAL CONDITION. Mahirap umanong tuntunin ang sanhi ng mabahong utot. Pero kung wala namang pagbabago sa iyong diet o medication ngunit nakararanas ka nito, dapat ka nang humingi ng tulong mula sa mga eksperto.

Normal lang naman ang umutot, at kung mabaho man ito, for sure na nabanggit sa itaas ang dahilan.

At ayon sa mga eksperto, kung gusto mo talagang malaman ang espisipikong dahilan nito, mabuting gumamit ng food journal, kung saan dito mo ililista ang lahat ng iyong nakain.

Gayunman, kung nakakaranas ka na ng discomfort, mapa-physical symptoms man ‘yan tulad ng bloating o social awkwardness, mabuti pa ring kausapin ang inyong doktor.

Pero tandaan, pansamantala lang naman ang amoy ng utot at hindi ito dapat ikaalarma. Gets mo?

5 Tips para mapanatili ang positibong pagbabago sa buhay

ni Jersy L. Sanchez - @Life & Style| March 28, 2022

Maraming pagbabago sa ilalim ng ‘new normal’, at unang-una na r’yan ang ating pamumuhay. Gayundin, ito ang dahilan para mag-reflect kung paano natin haharapin ang mga nakaka-stress na pagkakataon. Isa pa, natutunan natin kung paano pahalagahan ang self-care at upang mag-invest tayo sa ating mga sarili.

In short, hindi man naging maganda ang simula ng pandemya, kinaya nating magkaroon ng mga positibong pagbabago sa ating buhay. Pero ang tanong, paano natin mapapanatili ang mga pagbabagong ito?

1. TAMANG PAGPRAYORIDAD NG ORAS. Dahil mas dependent na tayo sa teknolohiya, naapektuhan na rin ang abilidad nating magpokus dahil mas madali na tayong nadi-distract dahil sa tuluy-tuloy na video o online meetings at phone notifications, at umaabot sa punto na nao-overwhelm na tayo. Ngunit kung sisikapin nating ma-manage ang ating oras base sa kahalagahan ng isang gawain, mas malinaw kung ano ang mga dapat nating unahin at pagtuunan ng pansin.

2. SELF-CARE. Nalaman at naunawaan na natin ang kahalagahan ng self-care. At bes, ‘di lang ito tungkol sa pagbibigay ng oras sa iyong sarili tuwing pagkatapos ng nakaka-stress na araw o linggo kundi naging mahalagang parte na ito ng pamumuhay. Kapag naglalaan tayo ng oras at pinahahalagahan natin ang self-care, mas aware tayo sa ating mental health at sa mga bagay na dapat nating i-appreciate.

3. HANDA SA EMERGENCY. Natutunan din nating maging handa sa anumang puwedeng mangyari. Halimbawa nito ang pagtatabi ng pera na magagamit sa hindi inaasahang pagkakataon o pagkakaroon ng emergency fund, gayundin ang pag-i-stock ng mga mahahalagang bagay o pagkain na magagamit sa panahon ng emergency.

4. BAGONG PARAAN PARA MAPANATILI ANG MGA KONEKSIYON. Hindi man natin pisikal na nakakasama ang ating mga kaibigan at mahal sa buhay, kinakaya nating manatiling konektado sa isa’t isa at siyempre, ‘yan ay dahil sa tulong ng social media at internet. Ilan sa mga paraan para mapanatili ang koneksiyon ay ang pakikipag-video call, watch parties at virtual gatherings ‘pag may mga selebrasyon.

5. SUMUBOK NG MGA BAGONG BAGAY. Madalas tayong mawalan ng motibasyon ‘pag tila routine na lang ang mga nangyayari sa ating buhay, kumbaga, paulit-ulit na lang. Pero mga bes, pagkakataon na rin ito para maghanap ng bagong hobby at mag-aral ng bagong skills. Sa ganitong paraan kasi, posibleng mabawasan ang ating stress, gayundin, mag-i-improve ang ating emotional health.

Marami tayong natutunan dahil sa pandemya at gaya ng nabanggit, kabilang na rito kung paano natin inaalagaan at pinahahalagahan ang ating sarili.

Siguro, ‘yung iba ay nagsisimula pa lamang at napapaisip kung kakayanin ba nilang ipagpatuloy ang mga pagbabagong ito.

Beshie, kalmahan mo lang at ‘wag kalimutang sundin ang mga tips na ito para ma-sustain ang positibong pamumuhay sa kabila ng pakikipaglaban natin sa pandemya. Keri?

Mahirap man dahil sa ‘new normal’… 5 Paraan para magkaroon ng tiwala sa mga kausap online

ni Jersy L. Sanchez - @Life & Style| March 21, 2022

Napakaraming nagbago sa buhay natin at ‘ika nga, ‘new normal’.

Ilan sa mga nawala sa atin ay ang ‘human connection’ dahil sa ‘new normal’.

Karamihan sa mga ganap ay online o virtual na lamang, kaya naman ang kawalan ng voice o facial expression ay ilan lamang sa mga side effect ng online communication at sa katagalan. Hindi na tayo sanay makisalamuha sa ibang tao at ang ending, nawawalan na rin tayo ng tiwala sa mga nakakausap natin online, maging kaibigan man ‘yan o mga katrabaho. Ang hirap, ‘di ba?

Dahil dito, kailangan nating maunawaan ang kahalagahan ng pagkakaroon ng tiwala sa pamamagitan ng pag-aaral kung paano epektibong makikipag-communicate gamit ang social connections, pero paano natin ito gagawin? Narito ang ilang paraan para magtiwala ulit sa ibang tao:

1. MAGING CONSISTENT. Madalas tayong nakapokus sa mga taong palaging nasa tabi natin, good o bad day man ito. Kaya naman importanteng regular na itsek ang ating mga kaibigan o katrabaho kung ayos lang ba sila, dahil nakatutulong ito upang pagkatiwalaan nila tayo. Gayundin, paraan ito upang malaman nila na hindi sila nag-iisa.

2. MAKINIG. May mga pagkakataong tila nasasapawan na natin ang taong nag-oopen sa atin, pero ‘di ba, mas mahirap ito ‘pag online na? Bagama’t ‘di naiiwasan ang mga pagkakataong nakikinig na lang tayo para makapagsalita pagtapos niya, mas mabuting makinig tayo in a curious way. Kumbaga, ipakita nating willing tayong makinig sa anumang sinasabi nila. Halimbawa, magtanong ka na konektado sa usapan ninyo at iwasang mag-open ng panibagong topic.

3. ‘WAG ITAGO ANG FEELINGS. May mga moment talaga na kailangan nating maging open sa isa’t isa kahit pa nakaka-stress na. Ang pagiging bukas sa iyong nararamdaman ay nakatutulong upang mas maintindihan tayo ng ibang tao, gayundin, mae-engganyo rin silang mag-open sa atin kahit hindi kayo personal na magkausap.

4. UMAMIN SA PAGKAKAMALI. ‘Ika nga, sa ‘virtual world’, required tayong ipakita ang best version of ourselves, kaya naman hindi madaling i-admit ang ating mga pagkakamali. Pero mga besh, ang pag-amin sa mga pagkakamali ay magandang paraan para ma-build ang tiwala sa atin ng ibang tao. Sabi nga, wala namang perpektong tao kaya normal na magkamali. Ang importante, kaya natin itong itama at natuto tayo.

5. MAG-SET NG BOUNDARIES. Ang pag-establish ng boundaries ay nakahihikayat na magkaroon ng tiwala sa ating sarili, gayundin, mas nagiging tapat ka sa ibang tao tungkol sa mga limits mo. Ang pagkakaroon ng boundaries sa oras na inilalaan mo sa pag-o-online at ang pagbibigay ng panahon sa iyong sarili para mag-unwind sa social media ay magandang halimbawa ng pagtatakda ng boundaries.

For sure, hindi na mawawala sa ating buhay ang ganitong sistema. Kaya naman imbes na hayaan nating mawala ang human connection, mas mabuting pag-aralan kung paano tayo magkakaroon ng tiwala sa isa’t isa, hindi man natin personal na makausap ang ating mga kaibigan o kasamahan sa trabaho.

Hindi man magiging madali para sa ilan, take it as a challenge para ‘di naman boring ang buhay. Gets mo?