Grupong sumusuporta kay Isko, lumipat kay Robredo

ni Jasmin Joy Evangelista | April 6, 2022

Inanunsiyo ng grupong nag-endorso sa presidential bid ni Manila Mayor Francisco “Isko Moreno” Domagoso na si Vice President Leni Robredo na ang kanilang susuportahan.

Sa isang press conference, sinabi ni Ikaw Muna (IM) Pilipinas Visayas lead convenor Nick Malazarte na si Robredo lamang ang may tsansang pigilan ang pagbalik ng mga Marcos sa kapangyarihan.

Ayon pa kay Malazarte, lumipat kay Robredo ang national leadership ng IM Pilipinas dahil hindi maganda ang resulta ng mga survey kay Moreno.

“There is a danger of the Marcoses getting back to power, that is why if we believe Yorme (Moreno) is the best, we have somebody better (Robredo) because the alternative is the worst, who is BBM (Ferdinand Marcos Jr.),” aniya.

Nakipag-ugnayan na sa kampo ni Robredo ang grupo upang ipaalam ang kanilang pagsuporta sa kampanya ng bise presidente. Nagpadala na rin sila ng sulat sa campaign manager ni Moreno hinggil sa kanilang desisyon.

Ang IM Pilipinas ay isa sa mga unang grupo na hinikayat si Moreno na tumakbo sa pagkapangulo.

Ayon pa kay Mazarte, ang naturang announcement ay napagkasunduan ng mga leader nito sa mga pagpupulong na kanilang isinagawa mula noong nakaraang linggo hanggang noong Linggo ng gabi.

Nanawagan din si Malazarte sa mga parallel organizations na sumusuporta sa ibang kandidato na mag-shift na ng suporta kay Robredo at pigilan ang pagbabalik ng Marcos sa pagiging pangulo.

Nakatakdang magsagawa ang grupo ng house-to-house campaign para kay Robredo.

Mayroong mahigit 2,000 miyembro ang IM Pilipinas sa Visayas pa lamang.

Gamitin ang mga nae-expire na bakuna sa house-to-house vaxx drive — P-Duterte

ni Jasmin Joy Evangelista | April 6, 2022

Iminungkahi ni Pangulong Rodrigo Duterte na gamitin sa house-to-house vaccination drive ang mga bakunang malapit nang ma-expire.

Sa kanyang weekly “Talk to the People” briefing nitong Martes, sinabi ng pangulo na ang mga naturang bakuna ay hindi excess orders. Lahat ng ito ay ready to be used, at maraming Pilipino ang ayaw lamang magpabakuna.

“If there are many Filipinos who refuse to be vaccinated, it’s not the government’s fault for buying [vaccines] commensurate to the number of Filipinos we hoped to be vaccinated,” ani Duterte.

“The vaccines are here and ready to be utilized just in case a good number of the Filipinos remaining and refusing to be vaccinated would want them. Otherwise, there’s nothing we can do,” dagdag niya. “The most we can do is a last-minute program. We embark on a program to deliver the vaccines house-to-house in the countryside.”

Kasunod nito ay hinimok ng pangulo ang New People’s Army na ‘wag galawin ang healthcare workers na magsasagawa ng vaccination drive.

Arroyo hiling sa mga Kapampangan ang landslide win para kay Inday Sara

ni Jasmin Joy Evangelista | April 5, 2022

Isang araw bago ang kanyang ika-75 kaarawan, hiniling ni dating pangulong Gloria Macapagal-Arroyo sa mga kapwa-Kapampangan ang landslide win para kay vice presidential candidate Inday Sara Duterte-Carpio.

“For Bong Bong Marcos to be a good president, he needs a vice president like Sara. So let’s make her win by a landslide in Pampanga,” ani Arroyo sa wikang Kapampangan.

Ito ay kahalintulad ng kanilang apela sa publiko nang suportahan nila ang dating running mate ni Arroyo sa 2004 elections na si Noli de Castro.

Parehong nagwagi sina Macapagal-Arroyo at De Castro sa naturang eleksiyon.

“Kaya ngayon naman, tiyakin natin na UniTeam ang tutulungan natin. Kailangan ni BBM (Bongbong Marcos), kahit matalino siya, para maging magaling na presidente, kailangan niya si Mayor Inday Sara Duterte bilang bise presidente,” ani Macapagal-Arroyo.

Sinabi pa ni Arroyo na ang kanyang pahayag ay base sa kanyang karanasan. Masuwerte umano siya na naging vice president niya si Noli de Castro.

“It is difficult to serve as President but I got big help from Noli,” aniya.

Ayon pa rito, ang pagboto ng mga Kapampangan kay Duterte-Carpio ay pagbabalik lamang ng malaking suporta ni P-Duterte sa development ng Pampanga.

Inihayag naman ni Duterte-Carpio na malaki ang naging tulong sa kanya ni Arroyo nang magsilbi itong head ng Lakas-CMD. Hiling daw niya ang good health, happiness at long life para kay Arroyo.

Bukod pa rito, ibinahagi ni Macapagal-Arroyo na tinulungan ni Pangulong Rodrigo Duterte, ama ni Duterte-Carpio, ang lalawigan ng Pampanga.

“Pangalawa, sa laki ng tulong naman ni Presidente Rody Duterte dito sa atin sa Pampanga,” aniya.

“Kaya suklian natin siya… Dapat landslide si Inday Sara,” dagdag niya.

Si Macapagal-Arroyo ay ang president emeritus ng Lakas-CMD, ang partido kung saan tumatakbo si Duterte-Carpio bilang vice president.