Linkin Park, nagbabalik, may bagong vocalist na

ni Eli San Miguel @Entertainment | September 8, 2024

Nagbabalik ang bandang Linkin Park na may bagong lineup at nag-debut ng kanilang unang bagong musika mula nang pumanaw ang kanilang lead singer na si Chester Bennington noong 2017.

Nitong nakaraang Huwebes lamang, sinimulan ng banda ang isang livestream na ipinapakilala ang bagong singer na si Emily Armstrong at drummer na si Colin Brittain. Sila ang makakasama sa mga dating miyembro na sina Mike Shinoda, Brad Delson, Phoenix, at Joe Hahn sa bagong lineup ng Linkin Park.

Sina Shinoda at Armstrong ay parehong magkakaroon ng vocal roles. Ang bagong lineup ay nag-debut ng bagong single na “The Emptiness Machine” sa simula ng livestream. Inanunsiyo rin ng bagong Linkin Park ang bagong album na “From Zero” na ilalabas sa Nobyembre 15.

Isa sa pinakamatagumpay na grupo noong 2000s ang rock-rap band, sa tulong ng boses ni Bennington. Sa edad na 41, siya ay namatay sa 'suicide' matapos ang paglabas ng huling album ng grupo na "One More Light."

Isa sa youngest richest celebs... Selena Gomez, may P1.3 B na

ni Angela Fernando @Entertainment News | September 7, 2024

Nakasali na ang dating Disney child star at international singer na si Selena Gomez sa billionaire index ng Bloomberg dahil umakyat na ang fortune worth nito sa $1.3-bilyon.

Ayon sa ulat, ang yaman ni Selena ay pangunahing nagmula sa kanyang kumpanya ng beauty cosmetics na Rare Beauty, na itinatag niya limang taon na ang nakalipas. Tinatayang ang kanyang bahagi sa kumpanya ay nasa $1-bilyon.

Naging rason ang tagumpay ng brand ng singer para mapabilang sa listahan ng isa sa mga "youngest female self-made" na mayaman kasama sina Taylor Swift at Rihanna.

Nakilala ang Rare Beauty sa kanilang liquid blush at lip tint na sumikat sa social media, at naiulat na kumita ng net sales na $400-milyon mula sa nakaraang 12 buwan hanggang Pebrero.

Kumita rin si Gomez ng milyong dolyar mula sa mga endorsement deals kasama ang mga kilalang luxury brands tulad ng Louis Vuitton, Coach, at Puma, ayon sa Bloomberg.

Kim Taeyeon at Sam Smith, may bagong bersyon ng "I'm Not The Only One"

ni Angela Fernando @Entertainment News | August 30, 2024

Nagsama ang Korean idol na si Kim Taeyeon at si Sam Smith para sa bagong bersyon ng hit song na "I'm Not The Only One," at bumenta agad ito sa mga tagasuporta ng dalawang artists.

Dinagdagan ng lider ng K-pop group na Girls' Generation na si Taeyeon ang lyrics ng bagong version upang mas maging emosyonal pa ang kanta lalo na para sa mga Korean fans ng awitin.

Matatandaang naunang nagpahayag si Smith na makikipagtulungan siya sa Korean idol para sa 10th anniversary edition ng kanilang album na "In The Lonely Hour." Matatandaang inilabas ang nasabing album nu'ng Enero 2014, kasama na dito ang mga kilalang awitin ni Sam Smith na "Stay With Me," "Leave Your Lover," at "Lay Me Down."