Kung noon, akala ay wa’ ‘wenta... dandelion, gamot sa sakit sa atay at ‘di matunawan

ni Sir Govinda Jeremaya - @Halamang Gamot | September 2, 2020

Ang dandelion.

Noong unang panahon, ang dandelion ay inaayawan ng mga tao dahil sa pag-aakalang damo lang ang mga ito at nakagugulo sa kapaligiran. Dahil dito, ito ay binubunot, hindi pinahahalagahan, itinatapon at kasama sa mga sinisindihang mga dahon na nagkalat sa paligid.

Pero nang magdatingan ang mga Chinese, laking-gulat ng mga tao dahil ang dandelion pala ay isang mahusay na halamang gamot sa maraming karamdaman tulad ng mga ito:

• Kayang lunasan ng dandelion ang sakit sa tiyan at maging ang karamdaman o sakit sa atay o liver.

• Kapag hindi matunawan, dandelion lang ang katapat.

• Kapag mahinang kumain o hindi makakain, dandelion lang din ang lunas.

• Ang hindi matanggal-tanggal na taghiyawat ay madaling masolusyunan ng decoction o pinakuluang dandelion kung saan ang tubig na ginagamit sa pagpapakulo ay ang ipanghuhugas sa mukha ng may taghiyawat.

• Ito rin ang paraan para mawala ang eczema at iba pang sakit sa balat.

• Sa pag-inom ng tubig na ginamit sa paglalaga ng dandelion, ang masamang cholesterol ay nakokontrol.

• Ito rin ang paraan para makontrol ang sugar level ng mga may diabetes.

• Ang mga sakit na heartburn, sakit sa bituka o ulcer ay nalulunasan din ng dandelion.

Sa Chinese, ang tawag sa dandelion ay “pu gong ying”, habang sa Ayurvedic Medicine, ito ay “simhadanti” at sa French, ang dandelion ay “pissenlit”.

Ang mga pangalan na ito ng dandelion ay direktang tumutukoy sa ugat ng dandelion na isang napakagaling at napakalakas na diuretic o madalas magpaihi kahit na ikaw ay natutulog. Gayundin, ito ay tinuturing na “water herbal pills” dahil ito ay diuretic.

Kaya ang dandelion ay unang panlunas ng mga Tsino sa high blood pressure, heart failure, kidney problems, STD, UTI, muscle cramps, pagkahilo at sakit sa ulo.

Ang katas ng dandelion ay panlaban sa Ultraviolet Rays, kaya kung maliligo sa dagat at mainit, maglagas muna ng katas ng dandelion sa katawan.

Sa kasalukuyan, pinag-aaralan ang ugat o roots ng dandelion bilang gamot sa cancer. Ang mga paunang resulta ay masasabing positibo naman.

Nakita na ang ugat ng dandelion ay may kakayahang labanan ang cancer cells na sumisira sa selula at kaya rin ng dandelion na buhayin muli ang nasirang mga selula. Gayunman, hindi pa tapos ang pag-aaral sa bisa ng ugat ng dandelion.

Tulad ng nasabi na, hindi pa tapos ang pag-aaral, subalit marami na sa mga nagka-cancer ang nagpatunay na dahil sa pag-inom ng tubig mula sa pinakuluang ugat ng dandelion, nawala ang cancer cells sa kanilang katawan

Good luck!

Garden rose tea, epektib na panlaban sa insomnia

ni Sir Govinda Jeremaya - @Halamang Gamot | August 30, 2020

Ang garden roses.

Ano ang kaibahan ng hybrid rose sa garden rose?

Ang hybrid rose ay kadalasang ipinangreregalo para sa mga mahal sa buhay. Sa totoo lang, kaya nilikha ang hybrid rose ay para ialay o ibigay sa mga mahal sa buhay.

Maselan ang pag-aalaga ng hybrid rose, sobrang pag-aasikaso ang kailangan para ito ay tumubo nang maganda at inaalagaan din ito ng chemical fertilizers at spray. Malambot ang mga dahon, petals at maging ang tangkay nito kung ikukumpara sa mga garden rose.

Ang garden rose naman ay ang mga nasa hardin o halamanan, bakuran, parke at bulaklaking lugar. Kadalasan, ang garden rose ay direktang nakatanim sa lupa. Puwedeng hindi na ito lagyan ng chemical na pataba at spray. Kumbaga, mas malakas at matibay ang garden rose kaysa sa hybrid.

Ayon sa kasaysayan, kaya dumami ang garden roses sa buong mundo ay dahil ito ay dala-dala ng mga Tsino, kaya naman kung saan sila manirahan ay may garden roses dahil sa sole purpose na ito ay gawing tea roses.

Kaya lang naman gagawing garden ang isang lugar ay para hindi maubos ang suplay ng rose, gayundin upang hindi mawalan ng rose para sa tsaa.

Ang mga garden rose sa Europe tulad sa United Kingdom, Germany, Sweden at iba pa ay mula mismo sa mga Chinese na nanirahan doon.

Puwede rin gawing rose tea ang hybrid rose, kaya lang, sinasabing mabilis mawala ang bisa ng medicinal value ng rose tea dahil ang hybrid rose ay hindi nilikha para maging rose tea.

May insomnia ka ba at matindi ito? Kumuha ka ng dalawang tasang petal ng garden rose, ibabad mo sa mainit na tubig na kakukulo pa lang. Inumin mo ang iyong rose tea at ito ang magsisilbing “magic tea” para mawala ang iyong insomnia.

Iniwanan ka ba ng mahal mo? Sobrang sakit ba ang nadama mo kaya ang sobrang kalungkutan ay iyong niyayakap, as in, depressed ka na?

Ang sagot sa depresyon ay “kaunting alak lang”, oo, kaunting alak lang, tapos ilagay mo ang ilang petal ng garden rose at ito ang iyong inumin. Ang tawag naman dito ay tonic garden rose.

Gawin mo ito sa loob ng dalawang linggo at magugulat ka dahil bigla kang sasaya. Wala na ang lungkot mo at ang isa pang maaaring ipagtaka mo ay parang gusto mo na namang magmahal.

Tama ang nabasa mo, kumbaga, feel mo na you are ready to love again. Ang dahilan ay ang katotohanan na ang garden rose tea ay isa ring mabisang aphrodisiac.

Good luck!

Hilaw na papaya, epektib na panlaban sa bakterya at mikrobyo sa katawan

ni Sir Govinda Jeremaya - @Halamang Gamot | August 26, 2020

Ang hilaw na papaya.

Isa sa pinakasikat kung halamang kinakain ang pag-uusapan ay ang papayang hilaw. Ito rin ay ang isa sa pinakamabili kung ang pag-uusapan naman ay ang kabuuang halaga ng pinagbilhan dahil ang hilaw na papaya ay araw-araw na makikita sa palengke at hindi tulad ng ibang paninda na depende lang sa panahon. Araw-araw, halos nauubos ang hilaw na papaya kaya kinabukasan ay bagong hilaw na papaya na naman ang tinda.

Ito ang numero-unong sangkap sa tinolang manok at ito ay sumasarap kapag may papaya. Pero hindi lang sarap ang dulot ng hilaw na papaya sa tinola dahil may munting kasaysayan ang hilaw na papaya, manok na pula at sabungero.

Noon, ang natalong panabong na tandang ay iuuwi ng nanalo sa sabong at ang natalong manok ay ititinola ng asawa ng sabungero. Gayunman, bago maging panlaban ang lalaking manok, umaabot ng halos isang taon at minsan ay eksaktong isang taon ang edad ng tandang at mayroon ding lagpas pa rito. Ito ay para hindi umatras o umayaw ang panlabang manok dahil kapag matanda ang manok, matigas na ang laman at hindi na niya gaanong iniinda ang tama ng tari. Ang tari ay ang parang espadang maliit na sobrang talim na inilalagay sa paa ng panabong.

Makapal, makunat at matigas ang laman ng manok na panabong, kaya kung ito ay lulutuin, ano ang katapat? Ayon sa asawa ng mga sabungero, ang dapat na kasama nito ay ang papayang hilaw.

Ito ang kaibahan ng papayang hilaw sa iba pang isinasangkap sa tinolang manok kung saan ang papaya ay numero-unong meat tenderizer.

Nagulat ka ba? Oo, kaya inilalagay ang hilaw na papaya sa tinolang manok ay dahil ito ay pampalambot ng karne. Bukod pa rito, ang hilaw na papaya ay isa ring sikat na herbal medicine at narito ang mga kaya niyang gawin:

1. Tumutulong ito para gumanda ang digestive system, lalo na kapag ang tao ay may sakit sa pancreas.

2. Mabilis na gumagaling ang mga sugat dahil numero-uno itong panlaban sa mga bakterya at iba pang mikrobyo sa katawan ng tao. Ito rin ay gamot sa ulcer.

3. Gusto mo bang bumata ang iyong balat? Ito na ang kasagutan dahil ang hilaw na papaya ay mabisang pampabata ng balat. Kayang-kaya rin nitong tanggalin ang black heads at iba pang abnormalities sa balat.

4. Ang pagkain ng hilaw na papaya ay tumutulong sa mga nanay na nagpapasuso sa kanilang mga sanggol dahil mas dumadami ang suplay ng kanilang gatas.

5. Kaya ring lunasan ng pagkain ng hilaw na papaya ang mga sakit na nagmumula sa buwanang-dalaw ng kababaihan.

6. Ang madalas na pagkain ng papaya ay naglalayo sa tao mula sa atake sa puso. Kaya ang hilaw na papaya ay friendly to the heart.

Kaya next time na magluluto ka ng tinolang manok, huwag ka nang magdalawang-isip. Hilaw na papaya na ang iyong gamtin dahil lalong sasarap ang manok at sabaw nito, gayundin, maganda pa sa health.

Good luck!