Wala sanang magka-COVID-19 sa atletang pa-Tokyo Olympics

ni Gerard Peter - @Sports | July 07, 2021

Pinaalalahanan ang lahat ng national athletes na sasabak sa Summer Olympic Games na manatiling ligtas at umiwas na madapuan ng delikadong coronavirus disease (COVID-19) upang hindi mabalewala ang lahat ng pinaghirapang pangarap na makatuntong sa prestihiyosong kompetisyon.

Dahil wala ng makapipigil pa sa pagdaraos ng Olympic Games na magsisimula sa Hulyo 24-Agosto 8 sa Tokyo, Japan, tanging ang mga atleta na lang sa buong mundo ang hinihintay na magpakita at maglaro rito sa kabuuang 339 events sa 33 sports, habang nasa 11 National Sports Association (NSAs) sa bansa ang maghahangad at magsusumikap na makuha ang kauna-unahang gintong medalya ng bansa sa loob ng 97 taon.

“Ang preparation ng Olympics is always Go and the athletes are raring to go and ready to compete. Ang apprehensions lang natin is baka 'di sila agad pumasa sa tests or RP PCR tests, 'yun lang ang kinakabahan tayo, kase sayang naman 'yung pinaghirapan. Ilang taon ang pinaghirapan nila, and because of this (COVID-19) hindi sila makapag-compete,” ani 2020+1 Tokyo Olympics Chef de Mission Mariano “Nonong” Araneta sa panayam dito ng Radyo Pilipinas 2.

“Yun ang nais nating iparating sa mga atleta na alagaan mo yung sarili nila for the next day’s bago mag-competition. Yun ang concern natin, kaya panay ang paalala natin na sundin ang playbook na wala ng despedida parties, walang kahit ano, basta focus on the Olympics,” dagdag ni Araneta, na tinukoy ang nangyaring kaso sa dalawang Ugandan athletes mula weightlifting, kung saan ang 8 delegasyon nito kasama ang boxers ay may close contact at inatasang manatili muna sa Izumisano Hotel sa Osaka para sa quarantine. Ang mga naturang atleta ay naturukan na ng dalawang doses ng AstraZeneca vaccines bago tumulak ng Japan.

Ito na rin mismo ang nakikitang magiging problema ng lahat ng delegasyon sa Tokyo Olympics dahil hindi paniguradong ligtas sa COVID-19 ang bawat atleta, kaya’t kinakailangang sunding mabuti at maging istrikto sa pagpapatupad ng playbook sa lahat ng atleta, coaches at officials.

Olympian Suarez, sakalam handa na sa int'l fight

ni Gerard Peter - @Sports | July 06, 2021

Nagpahayag ng kanyang kahandaan sa national at regional pro title si 2016 Rio Olympian at unbeaten pro boxer na si Charly “King’s Warrior” Suarez kasunod ng dominasyong panalo laban kay Eduardo “The Nightmare” Mancito nitong nakalipas na Hulyo 3 sa Urdaneta Cultural Sports Complex sa Urdaneta City, Pangasinan.

Asam ngayon ng dating three-time Southeast Asian Games gold medalist na makamit ang anumang titulo sa Philippine Boxing Federation (PBF), Philippines Games and Amusement Board (PGAB) at international lightweight title sa kanyang susunod na laban.

“Kung ano po ang magandang opportunity, naka-ready po ako,” pahayag ni Suarez sa panayam ng Bulgar Sports sa online messaging. “Kahit sino po. May mga plano na po akong laban sasusunod dito sa Pilipinas at international fights,” dagdag ng 32-anyos mula Sawata, Davao del Norte.

Nakamit ng 2014 Incheon Asian Games silver medalist ang napakahusay na performance nang gulpihin at ihatid sa ikalawang sunod na pagkatalo ang 28-anyos mula Iligan City, Lanao del Norte para sa 99-90, 98-92, at 100-89 na 10th round lightweight match para sa 7th straight na panalo kasama ang 5 kncokouts sa pro ranks, habang bumagsak naman sa 18-12-2 at 9KOs ang Davao del Sur-born na si Mansito.

Maging ang trainer at manager ni Suarez na si dating national mainstay at titlist Delfin Boholst ay nais ng maisabak sa isang title eliminator o title fight ang international amateur medalist na minsang nakalaban ni two-time Olympic gold medalist at dating 3-division World champion Vasyl “Loma” Lomachenko ng Ukraine noong amater ranks ng 2013.

Ang main event boxing match na pinamagatang “Relentless: Fists of Fire” boxing showdown ay inihatid nina Robert Hill ng VSP Boxing at Cucuy Elorde ng UKC Pro Boxing Edition na kinatampukan ng 10 boxing matches.

2 tankers, pasok sa 19 na pa-Tokyo Olympics

ni Gerard Peter - @Sports | July 03, 2021

Umabot na sa 19 ang kabuuang bilang ng national athletes na sasabak sa 2020+1 Tokyo Olympics matapos opisyal na ideklara ng International Swimming Federation (FINA) ang pagkakasama nina Pinoy swimmers Luke Michael Gebbie at Remedy Alexis Rule sa quadrennial meet.

Lalangoy ang 2 Filipino-Foreign swimmers sa prestihiyosong Summer Olympic Games sa Hulyo 24-Agosto 8 sa Tokyo, Japan, kasunod ng pagbibigay ng Universality Places ng International Olympic Committee (IOC).

Kakarera sa tubigang 24-anyos na silver at bronze medalist ng SEA Games sa men’s 100m freestyle matapos makuha ang 828 FINA points, habang ang Texas Longhorns standout at double silver at bronze medalist sa 2019 SEAG ay sasalang sa women’s 200m butterfly sa nakolektang 830 FINA points.

Pinapurihan ni Philippine Swimming Inc. (PSI) president Lani Velasco ang pagpasok ng 2 Fil-Foreign athletes na nanguna sa top-ranked swimmers sa bansa kasunod ng mga nilahukang qualifying tournaments.

“We congratulate the two swimmers for making it to the Philippine Olympic team! We thank them for their continuing dedication and sacrifice to serve our country well and we wish them all the best at the coming Olympic Games!” pahayag ni Velasco sa Facebook page, na pinuri rin ang ibang swimmers na sumabak sa mga qualifying tournaments gaya nina 2019 SEAG men’s 100m breaststroke gold medalist Jimmy Deiparine at 2-time Olympian at many-time SEAG medalist Jasmine Alkhaldi.

“We also wish to commend all our other swimmers who gave their best to qualify for the Games, despite the recent circumstances. We hope you can all continue working towards achieving that Olympic dream in the coming years,” wika ni Velasco.

Makakasama nina Gebbie at Rule ang 17 pang atleta sa Olympiad na binubuo nina Ernest Obiena; Carlos Yulo; Eumir Marcial, Irish Magno, Nesthy Petecio, at Carlo Paalam; Chris Niervarez; Kurt Barbosa; Margielyn Didal; 2016 Rio Olympics silver medalist Hidilyn Diaz at Elreen Ando sa weightlifting; shooter Jayson Valdez; women’s judoka Kiyomi Watanabe; sprinter Kristina Knott; at golfers Juvic Pagdanganan, 2021 US Open champion Yuka Saso at Bianca Pagdanganan.