E-Sports at Jiu-jitsu, asam na manaig muli sa overall title sa 31st SEAG

ni Gerard Peter - @Sports | October 21, 2020

Susubukang mapatunayan ng dalawa sa apat na pampalakasan na nabigyan ng pagkakataong maidagdag sa listahan ng mga 40 sports events sa 31st Southeast Asian Games sa Hanoi, Vietnam na kakayanin nilang maipagtanggol ang kanilang kampeonato, gayundin ang makapag-ambag sa pagnanais na masungkit ang ikalawang sunod na overall title sa biennial meet.

Aminado si Philippine E-Sports Organization (PESO) interim Secretary-General Joebert Yu na hindi magiging madali ang kanilang pagdaraanan sa susunod na edisyon ng SEAG sa Vietnam dahil magdedepende pa umano ito sa gustong mga events na ipalagay ng host country, matapos ihayag ng SEAG Federation Council ang pagkakasama ng E-Sports, Jiu-jitsu, Bowling at Triathlon sa 36 sports na naunang pagdesisyunang laruin sa Vietnam Games.

Gayunpaman, lubos-lubos ang kaligayahan ng kanilang samahan na muling nakabalik ang ‘bagong laro’ ng mga kabataan sa Vietnam Games, kasunod ng pagkakakuha nila ng Associate member sa Philippine Olympic Committee (POC).

“We’re very excited and happy. Sino bang hindi matutuwa na mapasama sports mo, knowing na maraming gustong makapasok na sports. Hopefully na we can help defend the overall medal tally,” pahayag ni Yu sa panayam ng Bulgar Sports sa telepono.

Inaasahan na ni Yu, na siya ring pinuno ng E-Sports National Association of the Philippines (ESNAP) na ilalagay ng host country ang mga events na malakas ang Vietnam gaya ng Pro Evolution Soccer at Arena of Valor, habang kasama ang Dota 2, kung saan nagkampeon ang 'Pinas sa 30th edisyon sa bansa noong isang taon at nakakuha ng bronze medal ang Vietnam, sa mga 3-out-of-6 na mga laro sa Hanoi meet na nakatakdang buksan simula Nobyembre 22-Disyembre 2, 2021.

Idinagdag pa nito na mababa ang tsansa na muling makabalik ang larong Tekken 7, habang hindi pa rin sigurado kung kasama ang pinaka-hihiligan ng mga Pinoy na Mobile Legends: Bang Bang (MLBB). Nakuha ng koponan ang top spot sa Manila meet sa mga ginto sa Dota 2, Starcraft II at MLBB, gayundin ang tiga-isang silver at bronze sa Tekken 7. “Regardless kung anong ilagay nila, we will make sure na may representatives tayo. We’re going to try in helping our country win again that top spot in the medal tally and hopefully the overall title,” paliwanag ni Yu.

Nagbunga naman ang panunuyo ng Vietnam Jiu-jitsu Federation (VJF) upang makumbinseng maisamang muli ang kanilang sports sa SEA Games, ayon kay Jiu-jitsu Federation of the Philippines (JJFP) secretary-general Ferdinand Vergara Agustin.

Minsan na umanong nagsagawa ng isang torneo na nilahukan ng maraming jiu-jitsu clubs sa Vietnam sa kompetisyon na Vietnam Jiu-jitsu National Championship noong nakalipas na Hulyo 15-20 na ginanap sa Thu Dau Mot, capital city ng Binh Duong Province.

2 Pinoy Boxer wagi sa Miami; isa, natalo sa Las Vegas

ni Gerard Peter - @Sports | October 20, 2020

Dalawang Filipinong boksingero ang pinatumba ang kani-kanilang mga katunggali sa boxing event sa Miami, Florida, habang kabaligtaran naman ang kinalabasan sa isa pang Pinoy sa Las Vegas sa Nevada nang malasap nito ang knockout loss, Sabado ng gabi (Linggo ng umaga sa Pilipinas) sa pagpapatuloy ng mga aksyon sa boksing sa gitna ng nararanasang novel coronavirus disease (Covid-19) pandemic sa buong mundo.

Pinabagsak nina Sanman stables Mark “Machete” Bernarldez (21-4, 15KOs) at Jameson “Bring Home The” Bacon (25-4, 16KOs) sina Argentinians Julian “Chispita” Aristotle (34-14, 17KOs) sa 3rd round ng 8 round lightweight bout at 2nd round lamang si Gonzalo Carlos Dallera (6-9, 4KOs) sa scheduled 8 round welterweight battle, ayon sa pagkakasunod, sa Manual Airtime Community Center Theater sa Miami, Florida.

Masaklap na pagbabalik sa ibabaw ng ring ang sumalubong kay Filipino super-featherweight John Vincent “Mulawin” Moralde (23-4, 13KOs) nang pahigain ito ni Mexican prospect Jose Enrique “El Ejecutor” Vivas (20-1, 11KOs) sa unang round pa lang sa bubble venue facility ng MGM Grand sa Las Vegas, Nevada.

Tatlong beses munang pinaluhod ng 26-anyos mula General Santos City na si Bernarldez ang journeyman na si Aristotle bago nito malasap ang 3rd round KO victory. Naiganti ni Bernarldez ang nakaraang pagkatalo kay undefeated Albert Bell (16-0, 5KOs) sa pamamagitan ng unanimous decision defeat noong Hulyo 2 sa loob ng “The Bubble” sa MGM Grand Garden Arena sa Las Vegas, Nevada.

Matagumpay sa kanyang unang pagsalang sa U.S. ang Mandaue City-native na si Bacon na kinailangan lang ng 2 rounds para tapusin ang Argentinian boxer. Muling nakabalik sa winning form ang 30-anyos na Cebuano boxer kasunod ng unanimous decision na talo nito kay Darragh Foley (18-4-1, 9KOs) ng Ireland noong isang taon.

Matapos patumbahin ng mabagsik na coronavirus disease (Covid-19) nitong nagdaang Hulyo, tila muling naulit ang pagbagsak ng 26-anyos na Davao City-native na si Moralde sa mga kamay ni Vivas sa 1:16 ng first round ng undercard match sa pagitan ng unification fight nina Vasyl Lomachenko and Teofimo Lopez.

Tinamaan ng matinding kaliwang suntok sa mukha si Moralde na nagpabagsak sa kanya, ngunit sinubukan pa nitong tumayo at lumaban, subalit muli itong nalugmok sa mga body punches ni Vivas. Naputol ang 2-fight winning streak ni Moralde na nahawa ng Covid-19 noong Hulyo na dahilan upang ma-ipagpaliban ang laban kay Mexican Alexis del Bosque noong Hulyo 16.

Pare-parehong ginabayan ng mahusay na boxing trainer na si Moro Hernandez ng Cuba sa ilalim ng Sanman Promotions ni JC Manangquil.

Nakaligtas sa COVID-19, Striegl, pinatumba ng Russian sa UFC Debut

ni Gerard Peter - @Sports | October 19, 2020

Hindi naging matagumpay sa kanyang kauna-unahang salta sa Ultimate Fighting Championship (UFC) si 2019 Southeast Asian Games Combat Sambo gold medalist Mark “Mugen” Striegl matapos malasap ang 1st round knockout laban kau Said Nurmagomedov ng Russia sa kanilang bantamweight preliminary undercard fight, kahapon sa UFC Fight Night sa Flash Forum Arena sa Yas Island, Abu Dhabi, United Arab Emirates.

Tinamaan ng isang kaliwang counter punch ang 32-anyos mula Baguio City upang mapabagsak ito hanggang sa tapusin ng Dagestani fighter sa pamamagitan ng ground and pound sa 51 seconds ng unang round. Walang nagawa si Striegl sa mga serye ng suntok na patama ng 28-anyos na Makhachkala, Russia-native, kung kaya’t sumaklolo na si referee Lukasz Bosacki upang ihinto ang laban.

“I feel great,” wika ni Nurmagomedov matapos ang laban. “I didn’t have to et injured or anything, it was over very quick. I have great balance. I’m good on the ground,” dagdag ng dating AFC Bantamweight champion sa undercard match ng main event fight nina Brian “T-City” Ortega (14-1-1) at “The Korean Zombie” Chan Sung Jung (16-5) ng South Korea, na nagresulta naman sa unanimous decision sa una.

Wala sa plano ng dating Universal Reality Combat Championship (URCC) featherweight champion na mabigo sa kanyang UFC-debut kasunod ng pagwawagi nito laban naman sa novel coronavirus disease (Covid-19) nitong nakalipas na Agosto, na nakatakda sanang sumabak sa unang laban sa Ruso ding si Timor Valiev na natalo naman sa kapalit ni Striegl na Trevin Jones sa pamamagitan ng knockout, ngunit kalauna’y pinatawan ng No Contest matapos magpositibo sa Marijuana ang American fighter.

Naputol ang 5-fight winning streak ni Striegl (18-3-1) na nakuha naman ang ikatlong pagkatalo sa kanyang MMA career dahil sa 2 submissions mula kina Jang Yong Kim ng Korea sa Pacific X-treme Combat dahil sa Kimura armbar at Reece Mclaren ng Australia sa pamamagitan naman ng rear-naked choke sa ONE Championship.