Pagadian at Roxas, nagpalakas agad sa CTG VisMin Super Cup

ni Gerard Peter - @Sports | July 09, 2021

Isang makapigil-hiningang pagtatapos ang ipinamalas ng parehong Pagadian Explorers at Roxas Vanguards sa ikalawang araw ng kompetisyon sa pagbubukas ng Mindanao division ng Chooks-to-Go Pilipinas VisMin Super Cup na nagtapos sa 82-80 pabor sa Explorers sa overtime game sa Ipil Provincial Gym sa Ipil Heights, Zamboanga Sibugay.

Isinalpak ni Von Lloyd Dechos ang isang napakalaking tres sa 25.50 segundo ng overtime upang ibigay sa Explorers ang unang panalo sa liga at iunsyami ang unang panalo ni dating PBA forward Eddie Laure na nagtitimon sa Vanguards.

May ilang pagkakataon ang Roxas na maitabla o makuha ang kalamangan mula sa 3-pt shot ni James Castro sa 8segundo at 2-pt shot ni Chito Jaime sa buzzer-beater shot, ngunit parehong pumalya.

Ito lamang ang ikalawang pagkakataon na nagkaroon ng overtime game simula ng makamit ng Dumaguete Warriors ang panalo kontra sa Tabogon Voyagers, 67-65 sa step -ladder playoffs na napagwagian ng Warriors sa Visayas leg.

Limang manlalaro ang kumamada ng double-digits para sa Explorers sa pangunguna nina John Edros Quimado at Kean Caballero na parehong nagtapos ng tig-12 puntos, habang nagbuslo ng tig-10 puntos sina Dechos, Christian Manalo, at Rich Guinitaran.

Nabalewala naman ang double-double scoring at rebounding nina dating NCAA MVP at PBA pro na si Leo Najorda na may 15pts at 11 rebounds, at Ernesto Bondoc Jr sa 15 pts at 13 rebs, 3 assts at 2 steals.

Nasayang ang pagkakataon na madala ni Manalo ang panalo sa 4th quarter ng magmintis ito sa ikalawang freethrow sa nalalabing 41.80 seconds. Parehong nabigo ang dalawang panig na maiselyo ang panalo.

Sunod na lalabanan ng Explorers ang Zamboanga City sa Martes sa first game sa ala-1:00 ng hapaon habang susubukang makabawi ng Vanguards sa darating na Linggo kontra sa Clarin Sto Nino sa 3pm game.

Samantala, binuhat ni dating Blackwater Bossing guard Renz Palma ang Kapatagan Buffalo Braves para makuha ang bwena-manong panalo kontra Iligan City Archangels, 64-56, Miyerkules ng gabi.

Pagbalasa sa larong Hockey pinalagan sa TOPS

ni Gerard Peter - @Sports | July 09, 2021

Hindi matanggap ng mga dating national team members at opisyal ng Larong Hockey sa Pilipinas (LHP) na mawawala sa kanila ang pampalakasan na minahal at pinagbuhusan ng atensyon nang mapalitan ang mga ito.

Naglabas ng sama ng loob ang mga dating national athletes na sina Denizelle Ann Rasing at Marvin Lianza, higit na si dating secretary-general ng LHP na si Jing Arroyo matapos ang umano'y ginawang hakbang ng kasalukuyang nakaupo sa puwesto na si Peping Cojuangco Jr., na sila’y palitan sa hindi maipaliwanag na kadahilanan.

“Early this month tinanggal nila ang mga players. Sila na ang nagsakripisyo at naghirap, suddenly naglagay ng players at head coach na hindi naman certified. They put new ones,” wika ni Arroyo, kahapon ng umaga sa lingguhang TOPS Usapang Sports on Air. “Ang kinakasama ng loob namin, nag-medal sa 2019 SEAG, walang formality, at pinost lang sa facebook page. Kung sino-sino na lang ang inilagay nila, parang mga anak ng kumpare, nag-jogging lang, kinuha na as national team member at balita namin ay nakakatanggap na ng allowance,” dagdag ni Arroyo. Sinubukang hingin ng Bulgar Sports ang panig ng LHP, mula sa bagong secretary-general nitong si dating Philippine Canoe Kayak-Dragon Boat Federation head Joanne Go, ngunit tumangging magbigay ng salaysay hinggil sa isyu.

Nagwagi ng bronze medal noong 2019 SEA Games ang women’s team kasama ang 22-anyos na si Rasing. “Gusto naming makabalik, kase naghirap na kami. As a team, ang dami na naming challenges and we deserve to stay dahil malaking part na ito sa amin. Gusto naming irepresent ang bansa, which is our goal is to win more medals for the country. Mahirap bitawan ang isang sport na naging part ka ng foundation,” paliwanag ni Rasing, na minsang naglaro sa NCAA women’s volleyball sa koponan ng Aguinaldo College.

“May pinasa na yung NSA nila last January pa na line up and effective na ang allowances nila last February pa which they requested,” wika ni PSC Executive Director Atty. Guillermo Iroy hinggil sa isinumiteng listahan ng LHP ng mga national team members noon pang Enero at may monthly allowance nang P10,000 sa panayam ng Bulgar Sports sa telepono.

VisMin Cup opening: Basilan inilampaso ang Zamboanga

ni Gerard Peter - @Sports | July 08, 2021

Wala sa plano ng Jumbo Plastic-Basilan Peace Riders na magpatumpik-tumpik sa mga makakatapat nito kaya’t agad-agad itong nagpakita ng dominasyon matapos ilampaso ang ALZA Alayon Zamboanga Del Sur sa iskor na 82-48, kahapon sa pagbubukas ng Chooks-to-Go Pilipinas VisMin Super Cup Mindanao division sa Ipil Provincial Gym sa Ipil Heights, Zamboanga Sibugay.

Kasunod ng natanggap na go-signal mula nitong Martes mula sa local government unit at Games and Amusement Board (GAB), nagdesisyon si Chief Operating Officer Rocky Chan na tuluyan ng simulan ang Mindanao leg matapos makumpleto ang mga kinakailangang health screening, drug testing at iba pang mga importanteng dokumento mabigyan ng clearance ang mga ito.

“We are just happy that Ipil, Zamboanga Sibugay accepted us without hesitation as we tip-off our Mindanao leg,” wika ni Chan. “We would like to thank the city mayor and governor for hosting our games and the Games and Amusements Board, headed by Chairman Baham Mitra, for giving us the necessary licenses to resume our league.”

Simula pa lamang ng laro ay ipinadama na ng Peace Riders ang kanilang bagsik sa pagtatapos ng unang kalahati ng laro sa 40-14 sa pagtutulungan nina dating San Miguel Beermen forward at Jose Rizal University standout Michael Mabulac, Hessed Gabo, Chris Bitoon at Michael Juico. Mas lalo pang ibinaon ng Peace Riders ang Alayon Zamboanga del Sur sa third canto ng isalpak ang 30-point lead sa 61-31.

Pinangunahan ni Mabulac ang opensiba ng dating koponan na Basilan Steel sa 16 points, 11 rebounds at 3 assists, habang sinegundahan naman ito nina Gabo sa 14pts, 2rebs, 2asst, Bitoon sa 12pts, 2 rebs at 4 asst at Juico sa 11pts at 6 rebs. Tumayong nag-iisang kumana ng double digit si Dan Sara para sa Zamboanga del Sur sa 17pts at tig-isang 1reb at assist.

Maglalaban naman ngayong araw, Huwebes ang koponan ng Roxas Vanguards at Pagadian Explorers sa unang laro sa ganap na ala-1:00 ng hapon, habang susundan ng main event game na Clarin Sto.Nino at Misamis Oriental Brew Authoritea sa alas-3:00 ng hapon.