Magno at Delos Santos sa TOPS; Donaire, target ang 5th title

ni Gerard Peter - @Sports | October 29, 2020

Pangungunahan ni Tokyo Olympics campaigner at boxing champion Irish Magno ang pagsasalita sa isa pang star-studded edition ng "Usapang Sports on Air" ng Tabloids Organization in Philippine Sports (TOPS) ngayong Oct. 29.

Si Magno, na naging ika-2 Pinay boxer na nakapasok sa Tokyo Olympics kasunod ni Eumir Marcial at fourth overall sa likod ni gymnast Carlos Yulo at pole vaulter EJ Obiena ay magkukuwento hinggil sa tsansa nila sa coronavirus-delayed Olympics. Makakasama ni Magno sa 10 a.m. public service program sina James de los Santos, ang World's No. 1 sa Kata Karateka at protege na si Fatima Hamsain; Kristopher Inting, pangulo ng United Kendo Federation of the Philippines.

Samantala, nais puntiryahin ni dating four-division World champion “Nonito “The Filipino Flash” Donaire ang kanyang ika-5th world title sa oras na matapos ang misyon nito sa kanyang susunod na laban kay WBC bantamweight champion Nordine Oubaali ng France sa Disyembre 12 sa Mohegan Sun Casino, Uncasville, Connecticut sa U.S.

Kahit pa man nalalapit na ang panahon ng pagsampay ng gloves nito na tutungtong sa edad na 38 sa susunod na buwan, determinado ang Talibon, Bohol-native na maidagdag sa kanyang flyweight, bantamweight, junior featherweight at featherweight titles ang isa pang titulo sa kanyang baywang.

Minsan ng nakakuha ng interim WBA super-flyweight title si Donaire (40-6, 26 KOs) ng mapagwagian niya ito kay Rafael Concepcion ng Panama at maipagtanggol ng dalawang beses kina Manuel Vargas at Herman Marquez sa magkasunod na knockout victory noong 2010; ngunit dahil sa pag-iwas ng mga katunggali sa 115-pounds ay nagdesisyon itong umakyat sa bantamweight ranks.

Dating WBC Heavyweight Champ Ukrainian Klitschko,may COVID-19

ni Gerard Peter - @Sports | October 29, 2020

Maituturing na isa sa mga matatagumpay na boksingero sa kasaysayan ang dating World Boxing Council (WBC) at The Ring Magazine Heavyweight champion Vitaly “Dr. Iron Fist” Klitschko, ang umaming naging biktima rin ng mapanganib na novel coronavirus (COVID-19).

Ang 49-anyos na retired Ukrainian boxer na si Klitschko (45-2, 41KOs) ay kasalukuyang Mayor ng capital city na Kiev ay napabalitang nagpositibo sa Covid-19, ilang araw bago ang local elections sa kanilang lugar kung saan inaasahang makukuhang muli nito ang puwesto.

“Coronavirus hit me at a most inconvenient moment. Tested positive today,” pahayag ni Klitschko sa kanyang social media account. “The Mayor’s work during the pandemic, of course, involves constant risk. Communication with people, hospital check. In particular, there was regularly in infectious departments where the sick of Covid-19. Tried to be aware. Given the specifics of the work, I regularly did tests. Today’s unfortunately is disappointing,” dagdag nito sa kanyang Instagram post.

Nagsilbing Mayor ng Kiev ang dating 1995 Rome Military World Games gold medalist sa super-heavyweight sapol noong 2014. Naging dating miyembro ng Ukrainian Parliament ang panganay na kapatid ni heavyweight great at dating 1996 Atlanta Olympics champion Wladimir Klitschko, at naging aktibo sa politika simula noong 2005, habang pinagsasabay ang pakikipagbakbakan sa ibabaw ng ring, hanggang sa magdesisyon itong magretiro noong 2013.

Ayon sa pinakabagong polls, nakalalamang ang 1995 Berlin World Championships silver medalist sa kanyang mga katunggali sa pagka-Mayor ng Kiev.

Naka-self isolate ang Russian-born boxer habang ipinagpapatuloy nito ang pagtatrabaho sa kanilang tahanan, habang hinikayat nito ang kanyang mga kababayan na sumunod sa mga alituntunin at panuntunan ng may kinalaman sa Covid-19, kung saan mayroon ng naitalang mahigit sa 337,000 kaso sa kanilang bansa at may 6,200 na nasawi. “Feeling good, but I have to go on self-isolation. Work from home. Please don’t ignore the rules and don’t ignore the threat! Take care of yourself!”

NBA 2021 season, target buksan sa Disyembre 21

ni Gerard Peter - @Sports | October 29, 2020

Tinatarget ng National Basketball Association (NBA) na muling buksan ang 2020-2021 season nito sa darating na Disyembre 22 upang umeksakto sa pagtatapos ng liga bago ang pagbubukas ng 2021 Tokyo Olympics na magsisimula sa Hulyo 23-Agosto 8 sa Japan.

Kinokonsidera umano ng board of governors ng liga ang planong buksan ang liga na magkakaroon lamang ng pinaigsing 70-72 na laro sa orihinal na 82 games nito at maaaring magtapos sa Hunyo, na sapat upang posibleng makalaro ang mga manlalaro nito sa Summer Olympic Games.

Ayon sa ulat na inilabas ng The Associated Press, inihayag ng isang indibidwal na may alam ng sitwasyon na pinaplanong magkaroon ng ‘Christmas Games’ at maaaring magkaroon ng mga manonood at mga tagahanga’t tagasubaybay sa loob ng mga basketball arenas, ngunit wala pang pinal na plano sa mga ito dahil balakid pa rin sa mga ito ang panganib na dulot ng novel coronavirus disease (Covid-19) sa mga panahon na nabanggit.

Malaking problema pa rin ng liga ang muling pagbangon ng kanilang mga benta, gayundin ang makatulong sa kanilang ekonomiya. Pinagpipilian rin umano na maghintay na lamang na magkaroon ng mas marami pang manonood sa mga Arenas hanggang kalagitnaan ng Enero, ngunit sakaling buksan ito ng Disyembre ay maaaring kumita ito ng $500 million.

Aabot na umano sa $1.5 billion ang nawawalang kita sa nasabing liga, ayon sa naturang indibidwal, dahil sa shutdown bunsod ng Pandemya, pagpapaliban ng 171 regular-games, pagsagawa ng season sa Walt Disney World ng walang fans, ang $200 million na nawalang kita sa pagpapatakbo ng NBA Bubble at sigalot sa pagitan ng Chinese government na hindi nagpalabas ng mga laro ng NBA sa kanilang telebisyon.

Pinag-aaralan din na makuha ang panig ng National Basketball Players Association (NBPA) hinggil sa mga plano na tiyak na magkakaroon ng epekto sa mga pinansyal na aspeto at usaping pera.

Hinggil naman sa Olympiad, opisyal ng kwalipikado ang USA Team, kabilang na ang Nigeria, Argentina, Iran, France, Spain at Australia na naglaro sa 2019 FIBA Basketball World Cup sa China, habang hinahantay pa ang 24 na koponan na maglalaban-laban para sa nalalabing 4 na slot para sa men’s basketball tournament na maaaring buksan ang qualifying sa Hunyo 22-Hulyo 4 sa Victoria, Canada; Split, Croatia; Kaunas, Lithuania; at Belgrade, Serbia.