FIFA President Infantino, nagpositibo rin sa COVID-19

ni Gerard Peter - @Sports | October 31, 2020

Ibinunyag ng Football world governing body na nasapol ng mapanganib na novel coronavirus disease (Covid-19) si FIFA President Gianni Infantino upang maging panibagong biktima sa listahan ng mga kilalang personalidad sa mundo ng football.

Nakararanas ng katamtamang simtomas ang football chief at mananatiling nasa isolation sa loob ng 10 araw. “All people who came into contact with the FIFA President during the last few days have been informed accordingly and they are being requested to take the necessary steps,” pahayag ng FIFA sa statement. “FIFA sincerely wishes President Infantino a speedy recovery,” dagdag nito.

Huling nasaksihan ang paglabas ni Infantino sa publiko noong Compliance Summit ng FIFA na nagtapos nito lamang Oktubre 16, kung saan lahat ng mga dumalo ay kasama sa isang online video session.

Nagsimula muling tumaas ng doble ang mga kaso ng naoospital at mga nasasawi sa COVID-19 sa Switzerland-based na organisasyon sa buwan ng Oktubre.

Inaantay na lamang ang mga desisyon ng pamahalaan ng Switzerland sa mga bagong hakbang upang mapigilan ang pagkalat ng nakamamatay na virus, habang inaasahan itong ia-anunsyo sa anumang mga araw.

Nang dahil din sa naturang virus ay hindi nasaksihan ang paghaharap sa football field nila superstars Cristiano Ronaldo ng Portugal at Lionel Messi ng Argentina sa Champions League matapos sipain ang Juventus striker ng Covid-19 kasunod ng pagpopositibo ngayong pagbubukas ng buwan.

Napabilang din sa mga bagong kaso ng mapaminsalang Covid-19 si Brazilian legendary striker Ronaldinho nang magpositibo ito sa naturang sakit.

Ilang mga sikat na football players at stars na rin ang nabiktima ng COVID-19 ngayong taon sa Europa, kabilang na si Manchester United midfielder Paul Pogba ng France; Brazilian star Neymar at dalawa pang teammates sa French club na Paris St-Germain kasunod ng postseason vacation sa bansang Spain.

Nagpositibo rin ang dalawa pang manlalaro ng Peru national team na dahilan upang hindi makasali sa qualifying game laban sa Brazil nitong Martes ng gabi. Tinamaan din ang reigning champion ng England’s Premier League na Liverpool ng ilang positive cases ng COVID-19 sa mga manlalaro nito kabilang sina Thiago Alcantara at Sadio Mane’, habang false positiveang nangyari kay Xherdan Sagiri.

NFL Team Titans, pinagmulta dahil sa COVID-19 outbreak

ni Gerard Peter - @Sports | October 30, 2020

Pinagmulta ng National Football League (NFL) ng America ang koponan ng Tennessee Titans ng $350,000.00 sa paglabag sa mga protocols na nagdulot sa liga ng pagkakaroon ng kauna-unahang Covid-19 outbreak sa kasagsagan ng season.

Inamin ng isang taong pamilyar sa naturang sports na makakatanggap ng naturang penalty ang 1999 AFC conference champion dahil umano sa pagpapahintulot na kumalat ito sa kanilang koponan na naging sanhi ng pagsiklab ng karamdaman.

Umabot na sa 24-katao, kabilang ang 13 manlalaro nito ang nagpositibo sa Covid-19 sa pagitan ng Setyembre 24 at Oktubre 11. Dahil sa outbreak ay napilitan ang NFL na ipagpaliban ang dalawang laro ng Titans at ilipat ang mga laro nito laban sa Pittsburgh Steelers at Buffalo Bills.

Nagsagawa na ang mga opisyales ng NFL at players association nito, kabilang ang mga eksperto sa mga infectious disease sa Nashville upang suriin ang mga videos at panayam sa mga manlalaro, coaches at iba pang mga tauhan ng nasabing koponan.

Dito natagpuan ng NFL na hindi sumusunod sa tamang health at safety protocols ang Titans matapos pumalyang magsuot ng mga masks sa lahat ng oras at walang sapat na kalinawan sa lahat ng manlalaro tungkol sa hindi pagkakaroon ng pagpupulong at pagsasaayos sapul ng isara ang pasilidad. Dahil rito ay maaaring mawalan ng ng draft picks o kaya’y mabigyan pa ng mga posibleng parusa. Ito ang mga naging dahilan upang magdesisyon ang NFL na pagmultahin ang Titans.

Magno, pinaghahandaan ang mga makakasagupa sa 2021 Olympics

ni Gerard Peter - @Sports | October 30, 2020

Bilang paghahanda sa kanyang mga makakalaban sa 2021 Tokyo Olympics, tinutukang maigi ni Irish “Aye’ Magno ang mga boksingerong magiging malaking balakid sa pangarap nitong makamtan ang inaasam na medalya sa Summer Games.

Pinag-aralang mabuti ng 28-anyos mula Janiuay, IloIlo ang mga posibleng makatapat sa women’s under-51kgs flyweight category, partikular na ang mga boksingera mula sa bansang China at India.

Tinukoy ng kauna-unahang Filipina na nagkuwalipika sa Tokyo Olympics na magiging hadlang sa kanyang pag-aasam na matulungan ang bansa na makuha ang mailap na unang gintong medalya sa Olympiad sina six-time flyweight world champion at 2012 London Olympics bronze medalist na si “The Magnificent Mary” Mery Kom Hmangte ng India at 2018 Jakarta Palembang Asian Games gold medalist at 2014 Youth Olympics champion Chang Yuan ng China.

Inaabangan din ni Magno si 2019 Southeast Asian Games flyweight champion Nguyen Thi Tam ng Vietnam na tumalo sa kanya sa 30th Manila edisyon, na hindi pa rin nakakapasok sa quadrennial meet, bunsod ng nangyaring novel coronavirus disease (Covid-10) pandemic.

Bukod kina Mary Kom at Yuan, mahigpit ding makakatapat ng Bachelor of Science in Criminology sa University of Baguio sina Tsukimi Namiki ng Japan, Huang Hsiao-Wen ng Chinese Taipei, Tursunoy Rakhimova ng Uzbekistan, Roumaysa Boualam ng Algeria, rabab Cheddar ng Morocco, at Christine Ongare ng Kenya. “Gusto ko talagang makabawi sa Olympics. Alam kong maraming threat at malalakas na kalaban pero kailangan kong maging handa sa lahat ng makakaharap ko,” pahayag ni Magno, Huwebes ng umaga sa lingguhang TOPS: Usapang Sports on Air sa Facebook page nito na suportado ng GAB, PSC at Pagcor, “Matagal na rin akong nasa boxing at alam kong sa panahon ngayon ng pandemic, tanging sarili ko lang ang tutulong sa akin para mas maging handa. Alam kong hindi sapat yung ginagawa namin na training ngayon, pero kailangan push lang,” dagdag ni Magno, na 12-taon sa amateur sa ilalim ng Association of Boxing Alliances of the Philippines (ABAP).

Inamin ng silver medalist na hindi sapat ang kanilang ginagawang pagsasanay sa pamamagitan ng online-virtual training ng national team, na nagsusumikap na mag-ensayo ng dalawang beses sa isang araw, hiwalay pa ang weights training.“Kulang na kulang talaga ang ginagawa naming training. Nahihirapan ako kahit online kase unang kalaban namin is yung internet connection at yung actual training talaga gaya ng box-off ang kailanagn namin. Pero ang sabi na lang lagi sa amin ni coach Boy (Velasco) na mag-antay lang at matatapos din ang pandemic, habang hinahanapan kami ng training bubble ng ABAP,” paliwanag ni Magno sa online session.