Jr L'weight Defense ni Berchelt naunsiyami dahil sa COVID-19

ni Gerard Peter - @Sports | November 9, 2020

Mauudlot pansamantala ang mungkahing pagtatapat nina WBC junior lightweight titleholder Miguel “The Scorpion” Berchelt ng Mexico at mandatory challenger Oscar Valdez sa Disyembre 12 matapos magpositibo sa novel coronavirus disease (Covid-19) ang champion Mexican boxer.

Inihayag ng boxing writer na si Salvador Rodriguez mula sa ESPN na nagpositibo ang 28-anyos mula Cancun, Quintana Roo, Mexico-native matapos magpakuha ng testing nitong linggo. Sumasailalim ngayon sa quarantine si Berchelt (37-1-1, 34KOs) sapul ng magpositibo.

Ang tapatan nina Berchelt at wala pang talong si Valdez (28-0, 22KOS) ang isa sa mga pinakanananabikang bakbakan sa pampalakasan dahil sa mataas na knockout percentage ng dalawa, gayundin ang bitawan ng mga suntok at estilo ng pakikipaglaban na tiyak na inaabangan ng karamihan. Nakatakda sanang maganap ang kanilang 12-round title fight showdown sa MGM Grand sa Las Vegas, Nevada sa Estados Unidos, na pangunahing ilulunsad ng Top Rank at ipapalabas sa ESPN.

Muling idedepensa ng The Ring No.1 contender sa 130-pounds ang kanyang titulo sa WBC sa ikapitong sunod na pagkakataon laban kay Valdez sapol ng mapanalunan niya ito kay Francisco Vargas sa pamamagitan ng 11th round TKO victory noong Enero 28, 2017 sa Fantasy Springs Casino sa Indio, California. Matagumpay na naipagtanggol nito ang titulo kina Takashi Miura ng Japan, Maxwel Awuku ng Ghana, Jonathan Victor Barros ng Argentina, Miguel Roman at muli kay Vargas ng Mexico at 4th round KO win kay Jason Sosa noong Nobyembre 2, 2019. Nagkaroon naman ito ng laban na hindi pinahihintulutan ng Mexico City Boxing Commission dahil sa Covid-19 pandemic restrictions nitong Hunyo 27, 2020 laban kay Eleazar Valenzuela ng Mexico na nagresulta sa 6th round TKO sa Mexico City.

Ang dating 2008 Guadalajara AIBA Youth World Boxing Featherweight Champion at World Amateur Championships bronze medalists na si Valdez ay huling sumabak nitong Hulyo 21, 2020 laban kay Jayson Valdez ng Puerto Rico via 10th round TKO sa MGM Grand sa Las Vegas, Nevada.

Napagdesisyunan ng 29-anyos na Nogales, Sonora, Mexico-native na bitawan ang kanyang WBO featherweight title para umangat sa super-featherweight kung saan matagumpay na pinatumba nito si American Adam Lopez via 7th round stoppage noong Nobyembre 30, 2019.

Magramo nabigo sa target na WBO title

ni Gerard Peter - @Sports | November 8, 2020

Bigong masungkit ni Filipino flyweight contender Giemel “Pistolero” Magramo (24-2, 20KOs) ang bakanteng World Boxing Organization (WBO) flyweight championship matapos mapabagsak ni undefeated Japanese slugger Junto Nakatani (21-0, 16KOs) kasunod ng 8th round stoppage, Biyernes ng gabi sa Korakuen Hall sa Tokyo Japan at maging kauna-unahang boxing event sa naturang bansa sa kasagsagan ng novel coronavirus disease (Covid-19) pandemic.

Naging ika-anim na Filipinong boksingerong biktima ang 26-anyos mula Paranaque City ng mas matangkad at mabilis na Japanese boxer ng itigil ni referee Nobuto Ikehara ang laban sa 2:10 minuto ng 8th round mula sa kambal na straight left ni Nakatani. Ngunit bago nito tuluyang tapusin ang laban ay nagawa muna nitong payukuin sa round 7 mula sa sangkaterbang kumbinasyon dulot ng body shots, uppercuts at iba’t ibang klaseng atake para talunin ang WBO Oriental at WBO International 112-pound titlist.

“I landed some good punches in the first round. Magramo is a good fighter but I had a good approach today. He is really tough, but I was able to establish a good distance from him and in that sense, I felt I boxed well tonight,” pahayag ng Japanese flyweight titlist sa panayam ng kyodonews.net. “Now that I'm a flyweight champ, I have to look toward other objectives, and one of those is to win a title unification fight,” dagdag ng 6th best flyweight ng The Ring.

Bukod kay Magramo, kabilang sa mga listahan ng mga Filipinong boksingero na pinatumba ng 22-anyos mula Sagamihara, Japan sina Joel Taduran, Jeronil Borres, Dexter Alimento, Philip Luis Cuerdo at Milan Melindo.

Makailang beses naudlot ang paghaharap ng dalawang boksingero dahil sa Covid-19 pandemic, kung saan noong nakalipas na Abril 4 dapat sila unang maghaharap, hanggang sa mapapayag na ang Japan Boxing Commission na gawin na ito.

Dahil sa pagkatalong ito, naputol ang 7-fight winning streak ni Magramo na nagsimula noong Mayo 28, 2017 laban kay John Rey Lauza sa Elorde Sports Complex. Ito ang ikalawang pagkatalo ni Magramo sa kanyang mahigit walong taong karera sa pro-boxing, kung saan unang nalasap nito ang unanimous decision lost kay Muhammad Waseem noong Nobyembre 27, 2016 sa South Korea para sa WBC Silver flyweight crown.

Karateka, inaasam nang mabuksan ang bubble training at ensayo sa abroad

ni Gerard Peter - @Sports | November 6, 2020

Naghihintay na lamang ng pinal na pag-apruba ang Karate Pilipinas Sports Federation Inc. (KSFP) na manggagaling sa Philippine Sports Commission (PSC) at Philippine Olympic Committee (POC) hinggil sa isasagawang bubble training camp sa Inspire Sports Academy sa Calamba, Laguna bilang paghahanda sa nalalapit na Olympic Qualifying Tournament.

Inihayag ni KSFP president Richard Lim na umaasa silang masisimulan na ang planong isolation training para sa mga Pinoy karatekas upang makuha na nila ang tamang timing, spacing, reaction at diskarte sa pakikipag-sparring na tiyak na malaking tulong para maihanda ang anim na national team member sa World Olympic qualifying sa Hunyo 11-13, 2021 sa Paris, France.

Ang anim na karateka na ito ay binubuo nina 2019 Southeast Asian Games gold medalists Junaa Tsukii (women’s 50kgs kumite) at Jamie Lim (women’s +61kgs), at biennial meet bronze medalists Joane Orbon (women’s -61kgs), Sharief Afif (men’s +75kgs), Ivan Agustin (men’s -75kgs) at Alwyn Batican (men’s -67kgs).

“We’re hoping that they can finally bring our athletes sa bubble so that we can do the proper timing, distancing and the reactions, but in terms of fitness and conditioning, they are in tip top shape 100%. and I’m pretty sure about that cause I seen their meetings,” pahayag ni Lim, kahapon sa lingguhang TOPS: Usapang Sports online session na hatid ng GAB, Pagcor at PSC, kasama si international karateka Joane Orbon.

Gayunpaman, hindi kumbinsido si Lim sa gaganaping training sa loob ng bubble camp, bagkus ay kinakailangan nila ng mga bigating makakalaban o sparring partners para mas lalo pang mahasa ang kanilang mga kakayanan at husay sa pakikipaglaban sa bansang Turkey. “We submitted a request to PSC, that our athletes must train abroad as early as January and February, in Istanbul all of the players,” saad ni Lim. “But since training partners are a little bit scarce in the Philippines, we need to have training partners abroad, who are world class karatekas. Yung training system na ginagawa nila maa-adopt natin and at the same time nasusukat na natin yung level natin kung saan tayo,” paliwanag ni Lim.

Inamin ni Lim na inaasahan nilang malaki ang tsansa ng tinagurian niyang ‘Triple J’ na sina Junaa, Jamie at Joane na sasabak sa 55kgs, -61kgs at over 61kgs category dahil wala na sa qualifying tournaments ang malalakas na makakalaban nitong mga Turkish national team members na sina Serap Ozcelik, Merve Coban at Meltem Hocaoglu, ayon sa pagkakasunod, dahil kwalipikado na ang mga ito sa ranking at point system.“I’m rooting in having 1 or 2 athletes to get in the Olympics, but we have more chances with the triple J, (Junaa, Jamie and Joanne),” saad nito. “May chance na maka-train nila ito, and it give them a big boost for the team. So napakagandang exposure to them, at the same time training ground in preparation for the pre-qualifying.”