Kanselado ang laban: Ex-Olympic Gold Medalist Campbell may COVID-19

ni Gerard Peter - @Sports | November 14, 2020

Isasantabi muna pansamantala ang nakatakdang paghaharap nina undefeated American Ryan “The Flash” Garcia at 135-pound title contender Luke “Cool Hand” Campbell ng Great Britain para sa boxing lightweight bout sa Disyembre 5 sa U.S. nang magpositibo sa (COVID-19) ang British boxer.

Hahanapan na lang ng panibagong petsa ang inaabangang sagupaan ng pambato ng Golden Boy Promotions ni Oscar Dela Hoya at ng dating 2012 London Olympics bantamweight gold medalist ni Matchroom Promotions Eddie Hearn “Unfortunately, Luke Campbell tested positive for COVID-19. He has completed isolation and resumes training shortly but will not be fit for Dec 5,” pahayag ni Hearn sa isang website. “We are working on a new date with Golden Boy and DAZN and only anticipate a very short delay to this great fight.”

Paglalabanan nina Garcia (20-0, 17KOs) at Campbell (20-3, 16KOs) ang karapatang maging mandatory No.1 contender sa titulo ni World Boxing Council (WBC) undefeated lightweight champion Devin “The Dream” Haney (25-0, 15KOs) ng America na idedepensa ang titulo sa ikatlong pagkakataon kasunod ng mga panalo kina Alfredo Santiago ng Dominican Republic at Yuriorkis Gamboa ng Cuba sa pamamagitan ng unanimous decision nito lamang nakalipas na Nobyembre 7 sa Hard Rock Live, Hollywood, Florida.

Gigil na muling makabalik ng boxing ring ang 22-anyos mula Victorville, California na muling napanatili ang WBC Silver lightweight title kontra kay Francisco Fonseca via 1st round knockout noong Pebrero 14, 2020 sa Honda Center, sa Anaheim, California.

Ang tanging pinakamatagal na knockout victory nito ay kay Noe Martinez Raygoza ng Mexico sa 1:45 ng huling round sa scheduled 8th round fight para sa WBC-NABF at WBO-NABO super featherweight titles. Ang tatlong decision victory nito ay nanggaling naman kina Mexican Christian Jesus Cruz, Jayson Velez ng Puerto Rico at Carlos Morales ng Mexico.

Ex-champ Tapales, balik-laban sa closed-door sa Gensan

ni Gerard Peter - @Sports | November 12, 2020

Muling magbabalik sa ibabaw ng ring si dating World Boxing Organization (WBO) bantamweight titlist Marlon “The Nightmare” Tapales para tapatan ang kapwa Filipinong si Eden “Manila’s Golden Boy” Sonsona sa pambungad na closed-door 10-round lightweight main event ng Sanman Promotions na “The Restart” sa Nobyembre 21 sa Sanman Gym sa General Santos City sa panahon ng (Covid-19) pandemic.

Mahigit isang taon ng huling sumalang ang 28-anyos mula Tubod, Lanao del Norte sa isang laban, susubukan ni Tapales (33-3, 16KOs) na maibalik ang dating galaw laban kay Sonsona (36-11-2, 13KOs), na nagnanais makabangon sa 5-fight losing streak na huling nakatikim ng laban noong pang Oktubre 16, 2019 sa isang TKO lost kay Adones Aguelo sa Calbayog City para sa bakanteng Philippine Boxing Federation lightweight title.

Kasalukuyang nasa No. 4 si Tapales sa IBF ranking ng junior featherweight na hawak ni unified IBF/WBA super-bantamweight Murodjon Akhmadaliev (8-0, 6KOs) ng Uzbekistan. Huling lumaban ang Filipino southpaw boxer laban kay Ryosuke Iwasa ng Japan para sa bakanteng interim IBF 122-pound title via 11th round TKO noong Disyembre 7, 2019 sa Barclays Center sa New York City.

Kabilang din sa mga masasaksihan sa boxing event si dating WBO super-flyweight contender Aston “Mighty” Palicte (26-4-1, 22KOs) ng Bago City, Negros Occidental laban kay Reymark “The Machine Gun” Taday (10-12-1, 5KOs) ng Binan City, Laguna para sa 8-round bantamweight fight.

“We are happy to be back on air to give you non-stop Pinoy Boxing action. Sanman has made name by pitting out the bravest Filipino warriors against each other and against foreign opponents. We always guarantee a night of knockouts. Please watch us live,” pahayag ni Sanman CEO Jim Claude Manangquil.

Ayon kay Mananquil, makakaasa ang mga manonood ng naturang event via livestream ng Facebook account ng Sanman Promotions ng matinding bakbakan sa muling pagbabalik ng Sanman Boxing sa bansa.

Arum target pa rin ang laban ng Crawford-Pacquiao-Spence

ni Gerard Peter - @Sports | November 10, 2020

Ibinunyag ni Top Rank CEO at owner Bob Arum na hindi pa rin nawawala sa kanilang mga plano ang maitapat ang mga mabibigat na pangalan sa pambato nitong si WBO welterweight titlist Terrence “Bud” Crawford (36-0, 27KOs) sa susunod na taon, kabilang na ang laban sa nag-iisang eight-division World champion Manny “Pacman” Pacquiao (62, 7-2, 39KOs) at unified 147-pound title holder Errol “The Truth” Spence Jr.

Kahit pa man nakalinya na ang laban ng undefeated American boxer laban kay dating IBF welterweight champ Kell Brook (39-2, 27KOs) ng United Kingdom sa Nobyembre 14, 2020 sa MGM Grand Conference Center sa Las Vegas, Nevada sa Estados Unidos; puntirya pa rin ng 88-anyos na American lawyer at boxing promoter na maganap ang inaasam na salpukan ng kasalukuyan at dating alaga sa larangan ng boksing. “The next fight is going to be, as far as I can control things, we’re not going to fool around, it’s going to be Pacquiao or Spence,” wika ni Arum sa panayam ng ESPN.

Nauna ng inihayag ng Brooklyn, New York City-native na nagkaroon na ito ng maayos na ‘deal’ para ganapin ang Crawford-Pacquiao clash para sa unification title ng kanilang WBO at WBA titles sa Qatar, ngunit, umatras umano ang mga opisyales ng suporta dahil sa panganib na dulot ng novel coronavirus disease (Covid-19) outbreak, na nais muling buksan ng Hall of Famer promoter sa oras na umayos na ang sitwasyon.

Naniniwala ang Harvard Law School graduate na may posibilidad na muling mabuksan ang usapan sa pagitan ng Top Rank at promoter ni Pacman na Premier Boxing Champions (PBC) ni Al Haymon sa lupain ng Amerika, dahil parehong makikinabang ang dalawang promotional outfit sa kikitain ng salpukan ng dalawang kampeon. “It’s to everybody’s benefit for us to do it together. If the fighters want guarantees, I think Haymon would be reluctant to face that bill himself. If it cratered, he would lose a lot money. This way he would have a partner in the money,” saad ni Arum.

Gayunpaman, kinakailangan pang masigurado kung matutuloy ang sagupaan ng Fighting Senator at ni UFC two-division champion Conor ‘The Notorious” McGregor sa ibabaw ng ring sa 2021. Nagkaroon na rin ng usapan na maaaring magbalik sa loob ng octagon si McGregor para sa rematch nila ni Dustin Poirier sa Enero na kanyang tinalo noong UFC 178 sa pamamagitan ng 1st round TKO victory noong Setyembre 27, 2014 sa Las Vegas.

Hinggil naman kay Spence Jr (26-0, 21KOs), nakatakdang idepensa nito ang kanyang WBC at IBF title laban kay two-division champion Danny Garcia (36-2, 21KOs) sa Disyembre 5, 2020 sa AT&T Stadium sa Arlington Texas.