Ravena, balik aksiyon na sa Neo Phoenix, matapos magka-COVID

ni Gerard Peter - @Sports | December 14, 2020

Muli nang nakabalik sa pagsasanay si dating 3-time UAAP champion at Japan B-League player na si Ferdinand “Thirdy” Ravena III matapos magnegatibo na ito sa testing sa nakahahawang novel coronavirus disease (Covid-19).

Matagumpay na nakuha ng 23-anyos mula Ateneo Blue Eagles ang mga pamantayan ng Ministry of Health, Labor and Welfare ng bansang Japan at nabigyan nang abiso na kanselahin na ang home medical treatment nito galing Medical Institution ng Toyohashi. Malaya na ulit itong makakabalik sa pagsasanay kasama ang kanyang koponang San-En Neophoenix na nakaranas ng magkakasunod na pagkatalo.

“Thirdy Ravena met the standards of Ministry of Health, Labor and Welfare has and he received notification of cancellation of home medical treatment from the medical institution in Toyohashi. He tested negative from Covid-19, so he is back in practice,” pahayag ng San-En Neophoenix sa twitter.

Maaari na ring mabigyan ng pagkakataon ang 3-time UAAP Finals MVP na makapaglaro sa susunod na laban ng koponan laban sa kulelat ring Levanga Hokkaido (4-15) sa Sabado at Linggo, ngunit magdedepende ito sa Neophoenix kung paglalaruin nila ang shooting guard Filipino import.

Pinawi ng nakababatang kapatid ni NLEX road warrior point guard Kiefer Ravena, ang pag-aalala ng mga malapit sa kanya, gayundin ang mga tagasubaybay at tagahanga na nasa maayos na kondisyon ito kasunod ng balitang tinamaan ito ng coronavirus noong isang buwan.

“All good over here. Appreciate all the love and concern over the past 24 hours. I feel well already but have to follow quarantine protocols indefinitely,” pahayag ni Ravena sa kanyang twitter account, sabay paalala sa lahat na huwag balewalain ang lupit ng naturang sakit at kinakailangang mag-ingat dahil nasa paligid lamang ang virus. “Just a reminder that the virus is still out there so let’s not take it for granted. Stay safe everyone! Much love,” ika nito.

Kasalukuyang kumakamada si Ravena sa San-En ng 12.0 points sa 36% shooting, kabiang ang 4.8 rebounds at 1.4 assists sa kabuuang 23.7 minuto ng paglalaro sapol ng unang beses itong maglaro sa koponan nitong buwan ng Nobyembre. Gayunman, nahihirapan ang kanyang koponan na makaangat sa team standings sa kartadang 2-17 sa dulo ng B-League 2020-21 season.

Nat'l athletes, uunahing bakunahan vs. COVID-19

ni Gerard Peter / ATD - @Sports | December 13, 2020

Pangunahing prayoridad ng Philippine Sports Commission (PSC) ang mabakunahan ang mga miyembro ng Pambansang atleta sakaling buksan na ito sa merkado, habang optimistikong madaragdagan pa ang bilang ng mga qualified athletes sa Olympiad.

Umaasa si PSC chairman William “Butch” Ramirez na magkakaroon ng sapat na pondo ang ahensiya upang makabili ng vaccines para sa lahat ng mga atleta. Nakatuon ang atensyon nito na mahanapan ng paraan upang pagkuhanan ng badyet na pambili ng bakuna laban sa novel coronavirus disease (Covid-19) na patuloy na nagpapahirap at kumikitil ng buhay sa buong mundo at ng nararanasang krisis dulot ng pandemya.

Sinabi pa ng 70-anyos na sports official na naaangkop lamang umano ang pagdating ng bakuna laban sa Covid-19 sa bansa sa Hunyo, 2021 dahil mabibigyan nito ng panahon ang mga atleta at coaches upang makapaghanda sakaling makapagkuwalipika sa paparating na 2021 Summer Olympic Games na sisimulan sa Hulyo 23-Agosto 8 sa Tokyo, Japan.

Inilabas na rin umano ang ilang protocols sakaling simulang muli ang pagsasanay ng national athletes na naghahanda sa qualifying tournaments sa 2021. Pinaalalahanan ng Davaoeno na patuloy na sumunod sa mga ipinag-uutos at panuntunan ng PSC at ng Inter Agency Task Force on Emerging Infectious Disease (IATF-EID), dahil baka pagmulan pa ito ng pagkalat ng karamdaman.

Naghihintay na lang ang ahensiya sa ‘go-signal’ ng Task Force hinggil sa bubble training camp sa Inspire Sports Academy sa Calamba, Laguna, na hihigpitan din ang safety measures at health protocol guidelines.

Malaki rin aniya ang inaasahan ng bansa na madaragdagan ang mga atletang papasok sa Tokyo Games matapos mauna ng makakuha ng ticket sina Pole Vaulter Ernest Obiena, gymnasts Caloy Yulo at national boxers Irish Magno ng women’s flyweight at amateur at pro-boxer Eumir Felix Marcial, na sasabak sa 4-round pro bout sa Disyembre 17 sa Los Angeles, California laban kay American Andrew Whitfield.

May pagkakataon pang madagdagan ang nasa listahan ng mga qualified athletes sa katauhan nina 2016 Rio Olympics silver medalists Hidilyn Diaz ng weightlifting, 4-time Southeast Asian Games champion Kiyomi Watanabe ng judo; 2019 AIBA women’s World boxing champion Nesthy Petecio, karatekas, Junna Tsukii, Jamie Lim at Joanne Orbon; Taek jins Pauline Lopez at Olympian Kirstie Elaine Alora, at 2018 Asian Games gold medalist Margielyn Didal ng skateboarding.

Donaire, nagka-COVID-19, out na sa World title fight

ni Gerard Peter - @Sports | December 11, 2020

Tila ang mga orihinal na maglalaban para sa World title fight ang mismong nabura sa listahan ng mga maglalaban para sa isang main event sa Disyembre 19 sa Mohegan Sun Arena sa Uncasville, Connecticut sa Estados Unidos – matapos tuluyan nang tinanggal sa listahan si dating five-division World champion Nonito “The Filipino Flash” Donaire nang magpositibo ito sa mapaminsalang novel coronavirus disease (Covid-19).

Iniatras na sa kanyang darating na laban ang 38-anyos na Talibon, Bohol-native laban kay dating bantamweight titlist Emmanuel “El Matador” Rodriguez para sa bakanteng World Boxing Council (WBC) bantamweight title. Ang tunay na may hawak ng titulo na si undefeated Nordine Oubaali (17-0, 12KOs) ng France ay hinubaran ng titulo matapos mabigong maidepensa ito laban kay Donaire (40-6, 26KOs) kasunod ng pagkakaroon din ng coronavirus noong isang buwan.

May posibilidad na itapat ang dating 2010 Youth Olympic gold medalists na si Rodriguez (19-1, 12KOs) sa ibang laban, kung saan isa pang Filipino sa katauhan ni Reymart Gaballo (23-0, 20KOs), na may nakatakdang laban kay Jose Velasquez (28-6-2, 19KOs) ng Chile ang nakatakdang sumalang sa undercard match para sa Showtime triple header event, ang may tsang umakyat sa main event fight.

Inihayag ng boxingscene.com na wala pang kalinawan kung papayagan ng WBC na maglaban para sa bakanteng titulo sina Rodriguez at Gaballo. Kasalukuyang nasa 26th ranked ang 24-anyos mula Polomolok, South Cotabato ang dating WBA interim bantamweight titlist. Ayon sa listahan ng WBC ratings, hindi ‘eligible’ si Gaballo na lumaban sa no. 4 ranked na si Rodriguez.

Naghahanda sana ng maige si Donaire sa pagiging mandatory challenger para sa titulo ni Oubaali na 118-pounds ng tamaan ito ng Covid-19, hanggang sa palitan ng 28-anyos na Puerto Rican. Inihayag ng WBC na “champion in recess” si Oubaali sa oras na tanggalin siya sa laban kay Donaire, na may indikasyon na maaari itong pumili kung idedepensa niya ito sa Pebrero sa magwawagi sa Donaire-Rodriguez. Sakaling talunin ni Oubaali ang isang optional na kalaban sa Pebrero na deadline, kakalabanin niya ang mananalo sa Donaire-Rodriguez bout upang matupad niya ang tungkulin na mandatory fight.

Nabago rin ang undercard match sa nakatakdang Dec.19 fight card ng palitan ang kalaban ng welterweight Philadelphia native na si Jaron Ennis na si Thomas Dulorme ng America kasunod ng pagpopositibo rin nito sa coronavirus. Pinalitan ito ni Chric Van Heerden ng South Africa para sa 10-round bout.