Garcia, lubayan na ang paghamon kay Pacquiao

ni Gerard Peter - @Sports | December 16, 2020

Pinayuhan ni veteran boxing trainer Robert Garcia ang kapatid nitong si four-division World champion Mikey Garcia na simulan ng maghanap ng ibang makakalaban at tuluyan ng lubayan ang paghahabol kay Filipino boxing icon Manny “Pacman” Pacquiao dahil tila walang patutunguhan ang pag-aasam nito.

“It’s a possibility that he could be wasting his time because honestly Pacquiao is also turning 42 [this] month,” pahayag ni Garcia sa panayam ng PBC Podcast. “So Pacquiao may just consider getting easier fights against MMA/UFC guys, like they’ve talked about with (Floyd) Mayweather did and make just tons of money and not take any chances. You never know what Pacquiao might do. If it doesn’t happen, Mikey has to think of something else. We have to plan other stuff.”

Hindi lingid sa lahat ang pursigidong kagustuhan na hamunin ni Mikey Garcia (40-1, 30KOs) ang Pambansang Kamao, kung saan kabilang ito sa mga napipisil na makakalaban ni Pacman, ngunit dahil sa pag-usbong ng mapaminsalang novel coronavirus disease (Covid-19) pandemic sa buong mundo ngayong taon, tila lumabo na ang tsansa ng pakikipag-ugnayan ng dating lightweight champion.

Inihayag ni Robert Garcia na walang anumang indikasyon na may patutunguhan pa ang negosasyon sa laban kay Pacquiao (62-7, 39KOs) o anumang malalaking laban na kahalintulad ng sa Filipino boxing legend.

“If the pandemic continues the way it is and they start shutting down everything down again we might have to do something smaller (fight) than big,” saad ng nakatatandang kapatid na Garcia. “As of right now, there’s nothing really. There’s nothing lined up. There’s not even any talk (about any other fight). Pacquiao, that’s the only one­…we haven’t really heard much.”

Nagtataka lang umano ang matandang Garcia kung bakit ayaw munang kumuha pansamantala ng mga tune up matches ng kapatid, gayundin ang kaharapin ang iba pang world champions. Huling lumaban ang 32-anyos na American boxer noong Pebrero 29 laban kay Jessie Vargas na nagresulta sa unanimous decision victory sa Ford Center sa The Star Frisco, Texas sa Estados Unidos.

Hinabilinan na lamang nito na mas makabubuting bumaba na lamang ito ng 140-pound division o light-welterweight, dahil naniniwala itong maaari niyang simulan ang kanyang karera sa naturang weight division.

Bubble Olympic training camp, aprub na sa IATF

ni Gerard Peter - @Sports | December 16, 2020

Binigyan nang basbas ng Inter-Agency Task Force on Emerging Infectious Disease (IATF-EID) ang kahilingan ng Philippine Olympic Committee (POC) na magsagawa ng ‘bubble-type training’ camp ang mga bumubuo ng national team na sasalang para sa mga darating na Olympics sa susunod na taon.

Inihayag ni Presidential Spokesperson Harry Roque, Martes ng umaga sa press briefing, ang resolusyon bilang 88 na nagbibigay karapatan sa mga miyembro ng pambansang koponan na magpatuloy sa kanilang gagawing pagsasanay sa ilalim ng sinasabing ‘Bubble’ camp, kung saan planong ilagay ang tatlong koponan mula sa Boxing, Karate at Taekwondo sa Inspire Sports Academy sa Calamba, Laguna sa unang linggo ng Enero.

“The request of the POC to resume the training of national athletes vying for the Tokyo Olympics in a ‘bubble-type’ setting is approved,” ayon sa lumabas na rekomendasyon ng IATF mula sa anunsyo ng Presidential Communications.

Kinakailangan umanong masusing makipag-ugnayan at maipaalam sa mga regional task force at local government unit ng mga pagdarausang ‘bubble training camp.’ Gayunpaman, hindi naging malinaw sa pahayag ni Roque kung tinutukoy nito ang mga Olympic hopefuls na naghahanda para sa pagsasanay sa darating na mga qualifying tourneys, gayundin ang mga sasabak para sa Asian Indoor Martial Arts Games (AIMAG), at 31st Southeast Asian Games sa Hanoi, Vietnam simula Nobyembre 20-Disyembre 2, 2021.

Noong nakaraang linggo ay inilabas ni Philippine Sports Commission (PSC) chairman William “Butch” Ramirez ang mga kakailanganing health at safety protocols upang payagan ang mga national athletes at coaches na magsimula ng mga aktuwal na pagsasanay. Idinagdag nitong magiging mahigpit sila sa pagpapatupad ng mga alituntuning inilabas para sa kaligtasan at kapakanan ng pambansang koponan.

Sinabi rin ng 70-anyos na sports official na mas magiging mahigpit ang kanilang ipatutupad na kautusan kung ikukumpara sa matagumpay na pagtatapos ng PBA Bubble sa Angeles City at Quest Hotel sa Clark sa Pampanga.

Matatandaang ipinatigil lahat ng ahensiya ng pampalakasan ang aktuwal na preparasyon at pagsasanay ng lahat ng bumubuo sa national team nitong Marso, gayundin ang lahat ng torneo kabilang ang 10th ASEAN Paragames, Philippine National Games, National Sports Summit, Batang Pinoy, UAAP, NCAA at iba pang mga pa-torneo ng national sports associations (NSAs), sapol ng pumutok ang Covid-19 pandemic sa buong mundo.

Kasalukuyang may apat na national atheletes ang pasok na sa 2021 Tokyo Olympics na binubuo nina pole vaulter Ernest Obiena, gymnast Caloy Yulo at boxers Eumir Felix Marcial at Irish Magno. Sina Obiena, Yulo at Marcial ay nagsasanay sa ibang bansa, partikular na sa Italya, Japan at U.S. ayon sa pagkakasunod, habang nasa bayan niya sa Iloilo ang women’s flyweight na si Magno.

SEAG gold medalist Dela Pisa, naka-2 ginto sa Hungary

ni Gerard Peter - @Sports | December 15, 2020

Sumungkit ng 2 gold medal sa nakalipas na 2020 Santa’s Cup si 2019 Southeast Asian Games Rhythmic gymnasts gold medalists Daniela Reggie Dela Pisa noong Disyembre 5 sa pagbabalik aksyon sa Budapest, Hungary.

Nakamit ng 17-anyos na grade 10 student mula Barcelona Academy ang ginto sa paboritong Hoops at Clubs event na kanyang napagwagian sa nakalipas na 30th edisyon ng SEA Games sa Pilipinas, kung saan nakuha nito ang gold medal sa Hoops at dalawang bronze medal sa Ball at Clubs sa Rhythmic event noong 2019.

Nagbigay din ng karangalan si national team member Brenna Labadan ng 1 gold at 2 silver medals sa parehong torneo. Nakamit ng 14-anyos mula Butuan City ang kampeonato sa Balls event at runner-up finishes mula sa ribbon at all-around event.

Ito ang kauna-unahang pagsalang sa labas ng bansa ng Cebuana teen wonder matapos maantala ang ilang mga kompetisyon dahil sa pananalasa ng novel coronavirus disease (Covid-19) pandemic sa buong mundo.

“I'm really grateful for God, my family and friends, to my supporters, coaches and of course to myself. We all had a really difficult time because of the situation right now but still being grateful for all the blessings,” pahayag ng ovarian cancer survivor sa panayam ng Bulgar sa online interview.

Makailang ulit na ring sumabak ang dalawang Pinay gymnasts sa ibang bansa, higit na sa Hungary, kung saan ginagabayan sila ni 38-time Hungarian rhythmic champion at Olympian Dora Vass. Nagawa na ring lumahok ng dalawang teen wonders sa naturang bansa nang kunin ang mga medalya sa 2019 Magic Cup Rhythmic Gymnastics meet noong isang taon, gayundin ang ilang torneo sa Europa.

Kahit pa man marami ng napanalunang medalya sa titulo sa loob at labas ng bansa, kabilang ang mga kampeonato sa Pinas na Batang Pinoy, Palarong Pambansa at Philippine National Games (PNG), aminado ang multi-titled gymnasts na kailangan pa nitong pagbutihan ang pagsasanay upang hasain pa ang kanyang kasanayan, gayundin umano ang kumpiyansya niya sa pagsasagawa ng kanyang mga routines.