Boxing 2020 Yearender: 4 ang wagi 3 ang bigo sa pandemic fights

ni Gerard Peter - @Sports | December 30, 2020

Napabilang sa listahan ng mga Filipinong kampeon si Reymart “Assassin” Gaballo matapos maitakas ang split decision win laban kay dating IBF 118-pound titlist Emmanuel “Manny” Rodriguez ng Puerto Rico upang makuha ang WBC interim bantamweight championship nitong Disyembre sa U.S.

Maaaring makaharap ni Gaballo si “WBC champion in recess” undefeated Nordine Oubaali (17-0, 12KOs) ng France sa 2021 para sa WBC 118-pound title. Nagpositibo naman sa Covid-19 si Nonito Donaire nitong buwan, upang ibigay kay Gaballo ang oportunidad para labanan si Rodriguez para sa interim title.

Makakabilang ang 24-anyos mula Polomolok, South Cotabato sa mga Filipino world champion na sina Taduran, Casimero, IBF junior-bantamweight champion Jerwyn Ancajas at nag-iisang eight-division world titlist at WBA welterweight (super) title holder Manny “Pacman” Pacquiao.

Parehong hindi nakalaban ang 28-anyos mula Panabo, Davao del Norte at Fighting Senator ngayong taon bunsod ng perwisyong coronavirus pandemic. Ilang plano ang naunsyami sa mga dapat makakalaban ni Pacman, kung saan kabilang sina Mikey Garcia (40-1, 30KOs), Danny Garcia (36-3, 21KOs), WBC/IBF 147-pound titlist Errol Spence Jr. (27-0, 20KOs) at WBO welterweight Terrence “Bud” Crawford (37-0, 28KOs). Nakaplano na rin na makatapat ni Pacquiao (62-7-2, 39KOs) sa 2021 si two-division UFC champion Conor “Notorious” McGregor.

Naging matagumpay din sa kani-kanilang laban sina Filipino featherweight fighter Mark “Magnifico” Magsayo (21-0, 14KOs) para mapanatili ang undefeated winning streak nang makamit ang split decision victory laban kay Mexican American Rigoberto Hermosillo (11-3-1, 8KOs) sa 10-round main event ng Premier Boxing Champions (PBC) noong Oktubre sa U.S.

Nakabawi si Sanman stable Mark “Machete” Bernarldez (21-4, 15KOs) nang pabagsakin si Argentinian Julian “Chispita” Aristotle (34-14, 17KOs) sa 3rd round ng 8 round lightweight bout sa Manual Airtime Community Center Theater sa Miami, Florida. Dito rin unang nasilayan sa kanyang unang U.S. fight si Jameson “Bring Home The” Bacon (25-4, 16KOs) laban kay Gonzalo Carlos Dallera (6-9, 4KOs).

Napanatili ni featherweight prospect John Leo Dato ang kanyang unbeaten streak ng maaga nitong tapusin si Mexican Angel Guevara sa loob lamang ng ikatlong round noong Agosto 31 sa Mexico.

2020 Yearender: Online competitions, namayagpag

ni Gerard Peter - @Sports | December 28, 2020

Naging mapanghamon ang taong 2020 hindi lamang sa maraming aspeto ng pamumuhay ng tao, kundi maging sa larangan ng pampalakasan.

Kabi kabilang pagkakansela at pagpapaliban ng mga iba’t ibang palaro sa loob at labas ng Pilipinas, tulad ng 32nd edisyon ng Summer Olympic Games na gaganapin sana sa Tokyo, Japan nitong Hulyo hanggang sa mga professional leagues.

Malaki ang naging epekto ng kautusan, higit na sa Pilipinas ng malawakang pagpapatigil sa lahat ng pagsasanay at kompetisyon sa kautusan ng Philippine Sports Commission (PSC) mula sa rekomendasyon ng Inter-Agency Task Force on Emerging Infectious Disease (IATF-EID).

Ngunit isang liwanag ang tila dumapo sa madilim na parte ng nararanasang pandemya sa pagpasok ng malawakang lockdown sa buong mundo at Pilipinas – ang Online Virtual tournaments at competitions.

Dito umusbong ang mga pangalan ng dating Karate national team member na si Orencio James “OJ” De Los Santos, Poomsae artists na sina Ernesto Guzman Jr., Rodolfo Reyes Jr at mag-amang Jocel Lyn at June Ninobla na humakot ng magkakahiwalay na kampeonato at medalya sa pandaigdigang online competition.

Nakahanap pa rin ng ibang paraan na maipagpatuloy ang pinakamamahal na palakasan sa kabila ng paghihigpit dulot ng community quarantines na ipinapatupad sa bansa, kung saan, natutong sumabay sa binansagang “New Normal” ang sports world.

Sumampa sa 36 titulo ang nahahakot ng 30-anyos na dating 2017 Southeast Asian Games bronze medalist sa individual kata form sa mga nilahukang iba’t ibang online virtual kata competitions simula ng magkaroon ng lockdown sa bansa.

“I know this may sound unpopular because of the situation the whole world is in, but I would say that I was able to find an opportunity and use it to make 2020 a great year for me. My love for the sport karate is what kept me going,” pahayag ni De Los Santos sa panayam ng Bulgar sa online interview.

“I can’t say what will happen in the future. But I personally think that virtual tournaments are the new normal, and it can be an opportunity for athletes to compete internationally just from their home,” wika ni De Los Santos, na wala pa sa mga plano ang magbalik sa national team at tanging ang pagtutuunan ng pansin ang mga virtual competitions. “Honestly, I can’t answer that. That’s something only time can tell. Right now, I’m focusing on what’s in front of me, which are these virtual tournaments.”

Online competitions rin ang naging daan sa 39-anyos na Tuguegarao-native na si Guzman para malampasan ang pananabik sa kanyang sport, gayundin ang pansamantalang pananatili sa Pilipinas bunsod ng lockdown.

Ibinulsa ni Guzman ang pambihirang husay sa recognized men’s Under 40 years old category para talunin ang mga kalaban mula South Korea, Iran at Chinese Taipei. Ito na ang ikatlong gintong medalya ng Cagayan State University graduate sa kursong Secondary Education matapos ang mga panalo sa 1st Daedo Online Championship at 1st Lents World wide Online Poomsae Championships.

“Parehong-pareho ang saya na naramdaman ko sa actual at online, ang kaibahan lang talaga ay walang crowd na nanuod pero ang performance at ang kaba ay parehong pareho dahil one time bigtime ang performance sa final online,” pahayag ni Guzman sa panayam ng Bulgar sa online interview.

Sumipa rin ng mga titulo ang biennial meet women’s recognized champion na si Jocel Lyn Ninobla sa 1st Online Daedo Open European Poomsae Championships noong Mayo at 2020 PTA National Online Taekwondo Poomsae Championships noong Hunyo.

Natuto na ring mag-adopt sa ‘new normal’ ang pamunuan ng Muay Association of the Philippines (MAP) sa paglulunsad ng kanilang kauna-unahang online-virtual national championships na kinalauna’y lumahok ang mga nagsipagwagi sa IFMA online World Championships.

Nagsagawa na rin ng kanilang sariling online tournaments ang Samahang Kickboxing ng Pilipinas (SKP) na kumana ng kauna-unahang online Musical Forms tournament sa bansa. Kinatampukan ito ng iba’t ibang martial arts mula sa Kickboxing, Karate at Taekwondo na may pagkakahalintulad sa Poomsae at Kata forms na ipamamalas ang techniques at skills sa dalawang klase ng istilo.

Gaballo, napalitan lahat ng sakripisyo at hirap nang manalo

ni Gerard Peter - @Sports | December 26, 2020

Malaki ang paniniwala ni bagong hirang na World Boxing Council (WBC) interim bantamweight champion Reymart “Assassin” Gaballo na lahat ng kanyang paghihirap at pagsusumikap ay may kabayarang tagumpay.

Ang lahat ng kanyang mga sakripisyo’t pagpapakasakit na manatili sa Estados Unidos at malayo ng halos isang taon sa kanyang mga mahal sa buhay ay napalitan ng pagdiriwang at magandang resulta kasunod ng malaking panalo nitong nagdaang linggo laban kay dating World Boxing Organization (WBO) 118-pound titlist Emmanuel “Manny” Rodriguez ng Puerto Rico sa pamamagitan ng split decision victory sa Mohegan Sun sa Uncasville, Connecticut.

“I was so blessed because with my hard work, I got this one,” wika ni Gaballo ng may pagsulyap sa kanyang bagong titulo sa panayam ng Ringtv.com. “My hard work. It pays off.”

Halos mag-iisang taon ng nasa U.S. ang 24-anyos na tubong Polomolok, South Cotobato, partikular sa Miami, Florida, sapol noong Enero, kung saan dinatnan ng novel coronavirus pandemic habang nagsasanay sa ilalim ng batikang trainer na si coach Osmiri “Moro” Fernandez ng Cuba.

Inulan ng maraming kritisismo at batikos ang kanyang panalo laban sa 28-anyos na Puerto Rican boxer matapos paburan ng dalawang huradong sina John Mackie at Don Trella na nagbigay ng 115-113 at 116-112 na iskor sa unbeaten Sanman Promotions boxer, habang ibinigay ni David Sutherland ang 118-110 sa dating kampeon; samantalang pinagmulan ng kontrobersiya ang mga salita ng mga komentarista ng Showtime at boxing’s unofficial judge Steve Farhood na 118-110, gayundin ang hindi makapaniwalang tagasunod sa social media.

“For me it was a close fight,” sambit ni Gaballo (24-0, 20 knockouts). “Even though I’m coming forward I’m always punching, so maybe they look at me like I won the fight.”

Hindi naman nararapat umano na isisi sa Filipino knockout artist ang nakuhang panalo kung ibigay man sa kanyang ang desisyon ng dalawang hurado dahil makikita namang agresibo ito sa kanyang mga atake. “You cannot win a fight by coming and trying to steal a decision and just moving backwards and occasionally trying to land some punches. Reymart dictated the pace, just kept coming and coming, that’s how I saw the fight,” saad ni MP Promotions President at international matchmaker Sean Gibbons, na naging co-promoter ni Gaballo at ang Sanman Promotions ni JC Manangquil. “It wasn’t Gaballo’s fault that one guy tried to stink it out and he tried to make the fight.”

Umaasa ang kampo ni Rodriguez na mabibigyan sila rematch bout ng WBC matapos itong umapila pagkatapos ng laban. Hindi matanggap ni Rodriguez at ng kampo nito ang ibinigay na desisyon ng dalawang hurado na para sa mga mata at pananaw ng kampo ni Rodriguez (19-2, 12KOs), siguradong nanaig ito laban at naniniwalang mula sa unang pitong rounds ay kanyang nakuha, habang naibulsa rin nito ang 9-12 rounds.

Hindi makaka-abot sa kanyang mga kapamilya sa kapaskuhan si Gaballo, ngunit maaaring makauwi ito sa Pilipinas sa pagpasok ng Bagong Taon. Naghahanda na rin umano itong muling makabalik sap ag-eensayo sa Sanman Gym sa General Santos City upang hasain pa ang kanyang mga kakulangan at kahinaan sa laban.“I’ve been training in Miami a long time. I miss the Philippines.”