Tuloy ang sakripisyo ni duathlete Fornea para sa SEAG

ni Gerard Peter - @Sports | March 22, 2021

File photo from facebook @Pawie Fornea

Walang imposible sa isang pangarap kung ito’y iyong pinagsumikapan at hindi sinukuan, anuman ang kaharaping hirap at balakid sa buhay.

Ang pagpapatunay na lahat ng hirap sa simula ay may kapalit na tagumpay sa oras na makamit ang lahat ng ninanais na pangarap – at para kay Navy Ensign Mary Pauline “Pawie” Fornea, hindi balakid ang kahirapan at pasakit makamit lamang ang mga inaasam na hangarin.

Dahil sa pagsusumikap ng 27-anyos na Davaoena, nakamit nito ang kanyang limang taon na pag-aaral bilang foreign school cadet ng Philippine Military Academy (PMA) sa the United States Naval Academy (USNA) kung saan nagtapos ito ng may parangal sa kursong Bachelor of Science Degree majoring in Naval Architecture and Marine Engineering and Robotics and Controls Engineering – isang parangal na minsan lamang ang isang Filipino na makatanggap ng ganitong klase ng papuri.

Bukod dito ay isinasabay ng University of the Philippines (UP) Mindanao Food and Technology graduate ang pagiging parte ng Philippine national team matapos magwagi ito ng bronze medal sa nakaraang 2019 Southeast Asian Games Mixed relay event ng Duathlon kasama sina women’s individual gold medalist Monica Torres, Efriam Inigo at Emmanuel Comendador.

“It is really my passion to serve Filipino people on my own way,” wika ni Fornea noong Huwebes ng umaga sa TOPS: Usapang Sports sa Sports on Air webcast, na patuloy na nagsisilbi bilang miyembro ng Front-liners na lumalaban upang masugpo ang mapaminsalang coronavirus disease (Covid-19). “Focus kami sa pagbibigay ng serbisyo sa taong bayan kaya maituturing kong special yung pagiging athlete at frontliner.”

Ikinuwento ni Fornea ang karanasan niya ng mga panahong nagsasanay at nag-aaral ito sa USNA na sa tindi ng pinagdaanang paghihirap ay maging ang pagtulog ng tama sa oras ay hindi na niya magawa dahil sa rami ng mga ginagawa. “Kadalasan talaga kulang na kulang iyong tulog namin kada gabi. Dalawa hanggang tatlong oras lang ang tulog ko tapos overload pa ako every semester at walang summer breaks dahil tuloy pa rin ako sa pag-aaral,” kwento ni Fornea.

Ibinahagi rin ni Fornea ang kanyang dinanas na kakulangan sa pinansyal nung mga panahong salat ito sa salapi at kinailangang itaya ang naitatabing allowance sa isang kompetisyon na kinalauna’y nagwagi at kumulekta ng sapat para sa isang buwang gastusin.“Iyong natitira kong allowance, ipinambayad ko bilang entry fee sa isang 10k marathon. Isinugal ko talaga para sumapat iyong panggastos ko sa isang buwan. Ibinuhos ko talaga yung lakas ko para manalo kaya iyon nanalo naman,” paliwanag ni Fornea, na idinagdag pang nagsimulang maging atleta sa edad na 9-anyos sa pagiging atleta, ngunit hindi pinalad na mapabilang sa national team kung kaya’t lumipat ito sa Triathlon at Duathlon sa edad na 15 lamang.

Olsim ng Team Lakay, nagpasuko sa ONE Strawweight Division

ni Gerard Peter - @Sports | March 21, 2021

Agad na nagpakilala sa ONE Championship si Team Lakay member Jenelyn Olsim ng patapikin nito ang top-ranked contender sa women’s strawweight division, Biyernes ng gabi sa ONE: Fist of Fury III sa Singapore Indoor Stadium.

Pinatapik ng 2019 Southeast Asian Games Muay silver medalist si No.5 strawweight fighter Maira Mazar ng Brazil sa bisa ng mahigpit na guillotine choke sa 41 seconds ng third round para sa unang panalo sa ONE at maipaghiganti ang pagkatalo sa ONE Warrior Series 7 noong 2019.

Bago ang impresibong debut sa ONE strawweight fight, mahigit isang taong hindi lumalaban ang 24-anyos na Muay Thai national team member, matapos ang pagkatalo kay Caitlin McEwen noong 2019 mula sa submission.

Higit na ipinagmamalaki si Olsim ng Muay Association of the Philippines (MAP) mula sa impresibong panalo, kung saan buong-buo ang suporta sa kanyang pangarap na umasenso sa mundo ng MMA.

“We’re very proud of Jen! She has come a long way and we can see how she has matured as an athlete. We were confident that it would be a favorable outcome. And this cannot come at a perfect time that in celebration of women’s month,” pahayag ni MAP secretary-general Pearl Managuelod sa panayam ng Bulgar Sports sa online messaging. “Jen and I are close and I’ve always encouraged her to pursue her dreams. MAP is very supportive of her endeavours outside Muaythai and the national team. Whatever the outcome is, there is always something to learn and to improve on. And we are always proud of her achievements and hard work,” dagdag ni Managuelod, na siya ring Philippine Olympic Committee (POC) board member.

Matindi na ang mga pinakawalang mga patama ni Olsim sa mukha at katawan ng Brazilian fighter, kung saan napabagsak niya ito kasunod ng kumbinasyon ng low kick at right cross sa panga. Gayunpaman, patuloy pa ring nakipagsabayan si Mazar sa Filipina fighter at magawa pang makakabangon sa mga sumunod na round.

Zamboanga, susubukin ang tibay ni SoKor Champ Ham sa ONE Grand Prix

ni Gerard Peter - @Sports | March 17, 2021

Iba nga talaga magbiro ang tadhana para kay ONE women’s Atomweight No.1 contender Denice “The Menace” Zamboanga dahil ang pinaka-aabangan at pinaka-eksperyensyadong fighter na si dating UFC fighter at Road FC women’s Atomweight champion Seo Hee “Hamderlei Silva” Ham ng South Korea ang unang susubok sa tatag at tikas ng undefeated Pinay sa ONE Grand Prix na magsisimula sa Mayo 28.

Tila iginuhit ng tadhana ang maaagang pagtatapat ng isa sa mga itinuturing na paghahandaan ng husto ng 24-anyos na Sentoukaikan Karate fighter dahil sa lawak ng karanasan nito sa larangan ng mixed martial arts. “Siya (Ham) sa tingin ko ang pinaka-aabangan ko talaga kase siya yung No.1 atomweight in the world. Siya rin yung may pinakamaraming experience sa aming walo, gayundin yung taga-US (Alyse Anderson) at yung tiga-Japan (Itsuki Hirata), halos lahat pero sa akin yung si Ham,” esplika ni Zamboanga sa Sports on Air podcast.

Nakahanda ang 5-foot-2 Pinay fighter na paghahandaan ng todo at aaralin lahat ang mga kakayanan at kayang gawin sa laban ng dating DEEP, Smackgirl, ROAD FC at Jewels fighter, dahil paniguradong ito na marahil ang isa sa mga mabibigat na kalaban niya sa unang round pa lamang.

Hindi biro umano ang mga makakatapat niyang mga katunggali sa Grand Prix, dahil sakaling makalampas man ito sa mabigat na pagsubok sa unang round ay maaaring makatapat nito ang magwawagi kina dating ONE Atomweight Muay Thai at Kickboxing World champion Stamp “Nong Stomp” Fairtex (5-1) ng Thailand at Ukrainian fighter Alyona Rassohyna (13-4).