Banned Team at players dahil sa 'game fixing' sa Super Cup

ni Gerard Peter - @Sports | April 17, 2021

"Wag natin babuyin ang basketball na pinakamamahal ng Pinoy.”

Ito ang mabigat na mensaheng binitawan ni Pilipinas Vis-Min Super Cup Chief Operating Officer Rocky Chan sa mga delingkwente at mapang-abusong koponan, players at coaches na umano'y sangkot sa "malawakang bentahan ng laro" nitong nagdaang Miyerkules ng hapon na naging sanhi ng tuluyang pagpapatalsik at pagbabawal na makabalik sa liga, kasunod ng sangkaterbang suspensiyon at multa sa Alcantara Civic Center sa Alcantara, Cebu.

Magkakabilang parusa ang binitawan ng pamunuan ng Vis-Min Super Cup sa koponan ng Siquijor Mystics at ARQ Builders Lapu Lapu City Heroes na umano'y kinakitaan ng mga sablay na lay-ups at sinadya umanong pagmintis sa mga free throws na natigil sa 27-13 sa pagtatapos ng halftime pabor sa Heroes, na siyang naging ugat ng paghihinala ng malawakang game-fixing at point-shaving.

Tuluyan nang pinatalsik sa liga ang buong koponan ng Mystics na binubuo nina Joshua Alcober, Ryan Buenafe, Vincent Tangcay, Jan Penaflor, Gene Bellaza, Michael Calomot, Frederick Rodriguez, Jopet Quiro, Isagani Gooc, Miguel Castellano, Juan Aspiras, Peter Buenafe, at Michael Sereno, kabilang din si head coach Joel Palapal at ang buong coaching staff nito.

“It’s disgraceful acts to the sport we love the most,” sambit ni Chan sa isang video statement noong nagdaang Huwebes ng hapon sa Alcantara, Cebu kasama sina Cielito Caro at Technical director Rey Canete. “Itinayo namin ang liga na ito to provide a livelihood to players, coaches, utilities and other people behind. Sana 'wag nating sirain because of the sacrifice that we’ve made is not that easy,” dagdag ng sports official.

Pinatawan ng isang buong season na suspensyon at multang P15,000 si Rendell Senining, ang kontrobersyal na nagpalipat-lipat ng kanan-pakaliwa na tira sa free throw, habang sinuspinde rin ng kabuuan ng first rounds at P15,000 na multa sina Hercules “Jojo” Tangkay, Reed Juntilla, Monbert Arong, Dawn Ochea, at Ferdinand Lusdoc, kabilang si head coach Francis Auquico, na binigyan naman ng P30,000 na multa at parehong suspensyon.

Hindi rin nakalampas sa naturang hagupit sina assistant coaches Jerry Abuyabor, Alex Cainglet, John Carlo Nuyles, Hamilton Tundag, at Roger Justin Potpot na pinatawan rin ng P20,000 kada isa. “This is a clear statement of the Pilipinas VisMin Super Cup. Any deliberate actions by any player and coach is not tolerated in this league,” wika ni Chan. “If ginagawa n'yo po ito sa ibang liga, 'wag n'yong gawin dito sa VisMin Super Cup.”

Nagpalabas na rin ng Memorandum ang liga sa iba pang nalalabing limang koponan sa Visayas at 10 sa Mindanao na huwag tularan ang ginawa ng Siquijor na pinatawan ng tuluyang pagpapalayas sa liga at multang P1,000,000.00.

“This is a strong message to everyone who is involved. Hindi namin gusto o tolerate yung wrong doings. We will fine and sanctioned everything na nakita naming mali,” saad ni Canete.

Mystics at Heroes, 'pambarangay ang laro', suspended muna sa Super Cup

ni Gerard Peter - @Sports | April 16, 2021

Ipinagpaliban muna ang mga laro ng Chooks-to-Go Vis-Min Super Cup, Huwebes, kasunod ng kontrobersyal na laban sa pagitan ng ARQ Builders Lapu Lapu City Heroes at Siquijor Mystics na nagtapos sa dalawang quarters noong Miyerkules ng hapon.

Hindi muna natuloy kahapon ang bakbakan sa pagitan ng KCS Computer City Mandaue City at Tabogon Voyagers sa 2:00 pm schedule, MJAS Zenith Talisay City Aquastars at Mystics na nakatakda sa second game sa 5:00pm at ang main game na salpukan ng Tubigon Bohol Mariners at Dumaguete Warriors sa 8:00 pm.

Gayunpaman, muling ipapalabas ang mga laban ng Computer Specialist at Voyagers, Biyernes ng 4:00pm at salpukan ng Mariners at Warriors sa 7:00pm.

Ipinatigil ang laban ng Lapu Lapu City Heroes at Mystics bago magsimula ang second half matapos magkaroon ng technical difficulties bunsod ng pagkawala ng kuryente sa Alcantara Civic Center sa Cebu. Lamang noon ang Lapu Lapu Heroes sa pagtatapos ng halftime sa 27-13 ng biglang mawala ang buong kuryente.

Subalit, kapansin-pansin umano ang takbo ng laro na tila mayroong kakaibang napansin ang mga manonood at taga-hanga sa naging laban. Dahilan upang magsagawa ng isang imbestigasyon ang pamunuan ng Games and Amusement Board (GAB).

Ayon sa ulat na inilabas ng batikan at nirerepestong sports columnist at writer na si “The Dean” Quinito Henson sa kanyang twitter account nitong Biyernes, sinabi nitong tuluyan ng pinagbabawalan ang koponan ng Siquijor Mystics at pagsuspinde ng ilang manlalaro ng Heroes dahil sa kontrobersyal na laro.

“GAB Chairman (Abraham) Mitra said Siquijor has been banned from Vis-Min Cup and Some Lapu Lapu players will be suspended in wake of farcical game that was called off at halftime in Alcantara, Cebu yesterday – through probe will be made and charges may be filed – what a disgrace to game!”

Habang isinusulat ang istoryang ito, inihayag ni Vis-Min Chief Operating Officer (COO) Rocky Chan na maglalabas sila ng official statement sa naturang hakbang. Tumanggi itong magpa-interview sa Bulgar Sports at hintayin na lamang ang kanilang posisyon sa kontrobersyal na pangyayari.“We will come out with official statement. After that official statement, then I can do an interview,” pahayag ni Chan.

Heroes, nanatiling matibay sa 2nd win ng Cebu Super Cup

ni Gerard Peter - @Sports | April 14, 2021

Nanatiling walang talo ang ARQ Builders Lapu-Lapu City Heroes ng kunin nito ang ikalawang sunod na panalo laban sa win-less na Dumaguete Warriors, 67-57, Martes ng hapon sa pagpapatuloy ng elimination round ng Visayas leg ng 2021 Chooks-to-Go Pilipinas VisMin Super Cup sa Alcantara Sports and Civic Center sa Cebu.

Pina-apoy ng 36-anyos na dating PBA at MPBL guard Reed Juntilla ang opensa ng Heroes sa third quarter ng ibuslo nito ang lahat ng 12 puntos sa third quarter upang tulungan ang koponan na dumistansya sa madikit na Warriors na nakuha ang pangalawang sunod na pagkatalo upang manatiling wala pang panalo sa kauna-unahang professional league sa katimugan.

Nag-ambag din ng 4 rebounds at 3 assists ang Carmen, Cebu-native na si Juntilla na huling beses naglaro sa Bataan Risers. Sumuporta sa pagbigay ng puntos si Ferdinand Lusdoc na may 14 points at tig-isang assist at steal, samantalang nasayang ang mainit na mga kamay ni John Monteclaro na bumitaw ng 6-out-of-11 sa three point line para pangunahan ang Warriors sa 20 points at 4 rebounds.

Naging mababa lamang ang scoring output ng dalawang koponan sa unang dalawang quarter, kung saan kumamada lang ng 8 at 6 na puntos sa second quarter ang dalawang koponan para magtapos sa 25-23 sa Halftime.

Sa third quarter nagsimulang mag-init si Juntilla katulong sina Lusdoc, Vincent Minguito, Dawn Ochea at Hofer Mondragon para ibigay ang malaking kalamangan sa Heroes sa 4th quarter sa 16 sa 61-45, sa fourth quarter.

Sunod na makakalaban ng Heroes para sa target na 3rd straight win ang Siquijor Mystics, ngayong araw sa unang laro sa 2:00 pm, habang pupuntiryahing makasikwat ng unang panalo ng Warriors laban sa powerhouse na MJAS Zenith Talisay City Aquastars sa main event sa 8:00pm.