Aquastars, nandurog; Voyagers nagpasuko

ni Gerard Peter - @Sports | April 24, 2021

Patuloy na napanatili ng MJAS Zenith-Talisay City Aquastars ang malinis na kartada nito nang muling durugin ang wala pa ring panalong Tubigon Bohol Mariners, 97-65, habang nabiktima ng Tabogon Voyagers ang ARQ Builders Lapu-Lapu City Heroes, 76-73, para kumuha ng isang malaking upset, Huwebes, sa pagbubukas ng ikalawang elimination round ng Visayas leg ng Chooks-to-Go Pilipinas Vis-Min Super Cup sa Alcantara Civic Center sa Cebu.

Nakatakdanng sumabak ang anim na koponan ng Visayas division ngayong araw, kung saan unang magsasagupa ang Voyagers at ang win-less na Mariners sa unang laro NG 2 p.m. habang susubukang makaulit ng Lapu-Lapu City Heroes sa hilahod na Dumaguete Warriors sa 5 p.m. samantalang pipiliting mabahiran ng KCS Computer Specialist Mandaue City ng pagkatalo ang unbeaten na Talisay City Aquastars sa main game sa 8 p.m.

Sa takbo ng mga laro, hindi mapigilan sa pagratsada ang Aquastars sa pagkamit ng ika-anim na panalo nang ilublob muli ang Voyagers na kanilang tinalo sa inaugural game noong Abril 9 sa pamamagitan ng 104-66 na dominasyon, sa pagkakataong ito ay tila naulit ang pagdurog nang kuminang para sa Aquastars ang Quadruple-threat nitong sina Patrick Jan Cabahug, Val Acuna, Jaymar Gimpayan at Jaymo Eguilos.

Kumana ng 13 points at tig-2 rebounds at assists si Cabahug, habang nanguna sa opensa si dating UE sharpshooter Acuna sa 14 points, katulong sina Gimpayan na may 13-7 puntos at Eguilos na may 11 puntos, samantalang nanguna sa Mariners si Jonathan Ibarra na may 16 puntos at umalalay sina league scoring leader Joseph Marquez na may 14 pts at double-double ni Pari Llagas sa 13pts.

Naisalba ng Aquastars ang malamyang simula at naghabol sa 24-35 sa second period, ngunit, sapat ang lakas at determinasyon ng Talisay City squad, sa pangunguna nina Acuña at Gimpayan sa naibabang 11-0 run para agawin ang bentahe sa 48-41 sa kaagahan ng third period.

KCS Mandaue at ARQ Lapu-Lapu, matibay at masigasig sa Super Cup

ni Gerard Peter - @Sports | April 23, 2021

Sinelyuhan ng KCS Computer Specialist Mandaue City ang unang round na nakakapit sa matibay na ikalawang posisyon at mairehistro ang ika-apat na sunod na panalo nang takasan ang Dumaguete Warriors, 79-73, habang sa sumandal sa masigasig na fourth quarter run ang ARQ Builders Lapu-Lapu City Heroes para panatilihing walang panalo ang Tubigon Bohol Mariners, 61-55, sa pagtatapos ng unang round ng eliminasyon ng Chooks-to-Go Pilipinas Vis-Min Super Cup sa Alcantara Civic Center sa Cebu.

Hindi naging problema sa Computer Specialist ang magkasunod na laro para itarak ang panibagong panalo bago pumasok ang second round game nito ngayong araw laban sa 3rd placer na Heroes na tiyak na babalik na ang mga nasuspindeng mga manlalaro sa isang kontrobersyal game noong nakaraang linggo.

Bumanat ng double-double performance si dating Magnolia Hotshots at TNT Tropang Giga forward Gryann Mendoza ng 20 points at 10 rebounds na pagbuhat sa koponan upang pangunahan ang opensa ng KCS, habang umalalay sina dating CESAFI stalwart Rhaffy Octubre na may 13 points at si Cebuano rising star Dyll Roncal sa 11 points at 2 assists para sa 4-1 kartada.

Sinubukang maghabol ng Warriors sa pagpasok ng huling quarter kasunod ng 52-65 lead ng KCS, sa paglatag ng 16-2 run sa pagtutulungan nina Jaybie Mantilla, Ronald Roy Mark Doligon para tuluyang agawin ang kalamangan sa 68-67. Ngunit patuloy na kumapit ang KCS sa pakikipambuno sa Warriors hanggang sa maitabla ang laban sa 71-all sa nalalabing minuto ng laban.

Nakaungos ang Mandaue mula sa split free throw ni Mendoza may 1:18 na nalalabi sa laro. May pagkakataaon ang Dumaguete na maagaw ang bentahe sa sumunod na mga play, ngunit sumablay ang tira ni Doligon na naging daan para sa transition play ni Roncal para sa 74-71 bentahe may 28 segundo ang nalalabi sa laro.

Vismin Super Cup: Aquastars nangwalis; KCS, nagpatibay

ni Gerard Peter - @Sports | April 22, 2021

Winalis ng MJAS Zenith-Talisay City Aquastars ang unang round ng elimination matches nito sa Chooks-to-Go Pilipinas Vis-Min Super Cup Visayas leg nang lunurin ang Tabogon Voyagers sa iskor na 85-65, habang pinatibay ng KCS Computer Specialist Mandaue City ang posisyon sa ikalawang puwesto nang talunin ang ARQ Builders Lapu Lapu City Heroes, 77-66, Martes, sa Alcantara Civic Center sa Cebu.

Kinumpleto ng Aquastars ang makasaysayang sweep namg pangunahan ng mga dating Adamson standouts na sina Patrick Jan Cabahug at Egie-Boy Mojica ang opensiba ng koponan na kumubra ng tig-13 puntos at 4 rebounds, habang nasayang ang double-double performance ni dating Far Eastern University big man Arvie Bringas na may 16 points at 10 boards, kasama pa ang 2 assists at steals, gayundin si Gayford Rodriguez sa 18pts at 5 boards.

Bahagyang nakadikit ang Voyagers sa pagtatapos ng first half, 34-39 matapos ang magandang opensiba sa second quarter, ngunit pinatunayan ng Aquastars na sila ang paboritong koponan na magwagi ng Visayas leg dahil sa pagkakaroon ng solido at buong koponan na nagmula pa sa ibang liga na pinangunahan ng mga dating PBA-players at ABL stars na si Paolo, Hubalde, Cabahug, Val Acuna, Dave Moralde at Lester Alvarez para ituhog ang 28-10 run sa pagtatapos ng ikatlong quarter para sa 67-44.

Hindi na nagpaawat pa sina Cabahug, Mojica at power forward Jaymar Gimpayan para unti-untiing tapusin ang pag-asa ng Voyagers para selyuhan ang malinis na kartada tungo sa susunod na round katapat muli ang wala pang panalong Tubigon Bohol Mariners bandang alas-4:00 ng hapon, ngayong araw, na kanilang inilampaso sa opening game ng unang araw ng kompetisyon sa bisa ng 104-66. Maglalaban naman para sa solo third place ang Voyagers at Lapu-Lapu Heroes sa main game bandang alas-7:00 ng gabi.

Team Standings W L

MJAS-Talisay 5 0

KCS-Mandaue 3 1

ARQ-Lapu Lapu 2 2

Tabogon 2 3

Dumaguete 1 3

Tubigon 0 4