Grassroots sa fencing, susuyurin hanggang vismin

ni Gerard Peter - @Sports | May 05, 2021

Tiwala si Philippine national fencing head coach Roland Canlas na makakamit ng bansa ang inaasam na mataas na karangalan at magandang estado sa pandaigdigang kumpetisyon, higit na sa prestihiyosong Summer Olympic Games sa mga darating na panahon sakaling maging matagumpay ang pagpapatuloy ng magandang grassroots program ng kanilang national sports association (NSA).

Aminado ang dating national team member at Southeast Asian Games gold medalist na si Canlas na kailangan pa nilang makahanap at makapag-develop ng mga tulad ni Penn State University MVP at dating Juniors fencing champion Samantha Catantan na maaaring sumunod sa mga yapak nito at magpatuloy sa magandang programa ng Philippine Fencing Association (PFA) upang matupad ang pangarap na makarating ang isang national fencer sa Olympiad at kinalauna’y magwagi ng medalya rito.

“Ang nakita ko talaga na natutunan ko dun (Olympic Qualifying) is mas malaki ang chance natin na makapasok sa Olympics. Kaya nga ito sabi ko sa coaches na maghanap tayo ng kasing tapang ni Sam sa epee, sabre, mag-vision na tayo from now to Paris [Olympics], sundan natin yung iba,” pahayag ni Canlas, Martes ng umaga sa weekly PSA Forum webcast. “Sa Ormoc ang daming potential na bata. What if meron pala sa Mindanao, Visayas na magiging Olympians o Olympic champions.”

Nakikinita ni Canlas na darating ang panahon na mararating rin nilang makapagpadala ng atleta sa Olympiad, higit na ang sinisipat na 2024 Paris Olympics, kung saan malaki ang tsansa na mairepresenta ng mga Filipino, higit na si Catantan, na kinapos lamang ng bahagya sa Asia-Oceania Olympic Qualifying Tournament nitong nagdaang Abril sa Tashkent, Uzbekistan ng makuha ang bronze medal, na matupad ang matagal ng pinapangarap ng bansa, sa tulong ni PFA head Dr. Richard Gomez at ng yumaong si dating Philippine Olympic Committee (POC) president at pinuno ng Fencing Confederation of Asia Celso Dayrit.

Boxer Suarez, pinasuko si Canada sa VSP Bout Pangasinan

ni Gerard Peter - @Sports | May 03, 2021

Napanatili ni 2016 Rio de Janeiro Olympian boxer Charly Suarez ang malinis na kartada sa kanyang professional boxing career nang pasukuin sa 4th round si Pablito Canada Jr., Sabado, sa main event ng VSP Boxing na ginanap sa Urdaneta Cultural Sports Complex sa Pangasinan.

Pina-ayaw ng 32-anyos mula Sawata, Davao del Norte ang mas batang boksingero sa edad na 26-anyos mula Sampaloc, Manila sa 4th round ng kanilang 6th round super-featherweight bout nang magsimulang maghagis ng tuwalya ang kampo kasunod ng gulping inabot sa laban.

Nakatakda sanang makalaban ng 3-time SEA Games gold medalist ang Puerto Princesa City, Palawan-native na si Lorence Rosas, ngunit sa kasamaang palad ay tinamaan ito ng sikat na sakit kaya’t iniatras sa laban, habang ang makakalaban din sana ni Canada Jr. ay tinanggal rin sa boxing card na siyang dahilan ng biglaang pagtatapat ng dalawa.

“Praise the Lord for the victory ba ibinigay niya po sa akin. Ang tanging plano lang talaga namin is laruin kung ano yung naaakma ng galaw niya tsaka namin gagawin yung atake namin,” pahayag ni Suarez sa panayam ng Bulgar Sports sa online messaging na umakyat sa 6-0 (5KOs) ang kanyang marka.

Pinahirapan ni Suarez si Canada Jr sa mga binitawang kumbinasyon sa iba’t ibang bahagi ng katawan at ulo na naging dahilan upang mangapa ng todo ito sa diskarte ng Philippine national team member.

Ilang mga matitinding birada ang binitawan ng 2014 Incheon Asian Games silver medalist sa Pagadian City, Zamboanga del Sur-native para mapaluhod ito at sumubsub sa katawan ni Suarez upang maiwasan ang pagbagsak. Ngunit nagpatuloy sa atake si Suarez sa 4th round sa mga binitawang kaliwa’t kanang combination hook upang tuluyang umayaw ito sa nalalabing 16 segundo sa ika-4th round. “Wala naman pong plano na pabagsakin. Undercard dapat siya sa laban ko kaso nagkasakit kase yung dalawang boxer’s kaya kami ang naglaban,” esplika ni Suarez.

ARQ at Warriors, agawan sa semis ng VisMin Super Cup

ni Gerard Peter - @Sports | May 03, 2021

Dinomina ng No.5 seed Dumaguete ang No.4 ranked Tabogon sa overtime, 67-65, Sabado ng gabi para makausad sa stepladder playoffs ng Chooks-to-Go Pilipinas VisMin Super Cup Visayas leg sa Alcantara Civic Center sa Cebu.

Sumandal ang fifth seeded Dumaguete Warriors sa mapagmilagrong kamay nina Ronald Roy at Jaybie Mantilla upang silatin ang 4th placer na Tabogon Voyagers, sa kauna-unahang overtime game sa Visayas leg, habang naitakbo ng ARQ Builders Lapu-Lapu City Heroes ang panalo laban sa Tubigon Bohol Mariners, 73- 69, Sabado, sa stepladder playoffs.

Isinalpak ni dating Marikina Shoe Masters guard na si Roy ang naglalagablab na three-point shot sa 1:37 ng extension period habang ibinuslo ng dating 2017 CESAFI MVP na si Mantilla ang importanteng free throws para dalhin sa overtime ang laro at ang panuldok na technical freethrow para gulantangin ang Voyagers sa knockout playoff round.

Kumunekta ng double-double sina Roy na may 11 puntos, 12 rebounds, 3 assists at 3 steals; ang one-and-done player ng University of the Philippines at University of San Jose-Recoletos star na si Mantilla sa 24pts, 12 rebs, 3 assists at 4 steals, habang trumabaho rin si Mark Doligon na may 17pts, 10rebs, at 2 assts para sa Warriors, samantalang nasayang naman ang 18pts at 21rebs ni dating FEU center Arvie Bringas para sa Voyagers.

Nagkapit-kamay naman sa pagsaklolo sa Lapu-Lapu City Heroes sina dating PBA veteran Reed Juntilla at dating Adamson Soaring Falcons stalwart Dawn Ochea upang tuluyang patalsikin sa kumpetisyon ang Bohol Mariners at manatiling buhay ang pag-asang makakatapat sa semifinal round ang may bentahe ng twice-to-beat na KCS Computer Specialist Mandaue City sa Martes.