3 Belt unification fight itataya sa Pacman-Truth

ni Gerard Peter - @Sports | June 01, 2021

Malaki ang posibilidad na magiging three-belt unification fight ang mega-bout battle sa pagitan ng nag-iisang eight division World champion Manny “Pacman” Pacquiao at WBC/IBF welterweight titlist Errol “Truth” Spence Jr., matapos magpahayag ang pamunuan ng World Boxing Association (WBA) na ibabalik nila ang “super” title belt ng Filipino boxing legend.

Sinabi ni WBA president Gilberto Mendoza na maaaring maibalik ang korona ng 42-anyos na Filipino Senator kasunod ng paglalagay dito bilang “Champion in Recess” nitong Enero, kasunod ng hakbang na ginawa ni MP promotions president Sean Gibbons na nagpadala ng pormal na liham upang hilinging maibalik ang titulo ni Pacman.

“(MP Promotions head) Sean Gibbons, who represents Manny, they’ve written a letter to be placed back in [as WBA “super” champion]. We’re working on it. There’s a high probability. It has to be run through a championship committee and voted before being taken to the president,” pahayag ni Mendoza sa TheBoxingVoice.

Mula sa naging desisyon ng WBA na pansamantalang hubaran ng titulo si Pacquiao (62-7-2, 39KOs), ipinasa ng pamunuan ang titulo kay dating “regular” champion Yordenis “54 Milagros” Ugas ng Cuba matapos mabigong maidepensa ng future Hall of Famer ang titulo na napanalunan laban kay Keith “One Time” Thurman noong Hulyo 20, 2019 sa 12-round split decision sa Las Vegas, dahil sa world pandemic.

Ayon pa kay Mendoza, pinilano rin ng WBA na itapat si Pacquiao kay Ugas, ngunit dahil sa magaganap na sagupaan nina Pacquiao at Spence (27-0, 21KOs) sa Agosto 21 sa Las Vegas, tila maiiba ang ihip ng hangin para kay Pacquiao. “Initially, the plan was for Ugas to fight Pacquiao,” saad ng 72-anyos na Venezuelan sports leader. “But now, the Spence fight was announced.”

Kasalukuyang mayg 3 kampeon sa WBA 147-pound division sa katauhan nina Pacquiao (Champion in Recess), Ugas (Super), at American Jamal James (27-1, 12KOs) na hawak ang regular title.

PBA players, best influencer sa fans para magpabakuna

ni Gerard Peter - @Sports | May 30, 2021

Mga manlalaro ng Philippine Basketball Association (PBA) ang kayang para makapagbigay ng tulong sa pamahalaan na mas mapahatid sa publiko ng kamalayan sa isinusulong na pagpapabakuna.

Binigyang halaga ng 58-anyos na si Metro Manila Development Authority (MMDA) chairman Benhur Abalos na ang impluwensiya ng mga basketball players ng kauna-unahang professional league sa Asya ang makatutulong sa kampanya na himukin ang mga Filipino na magpabakuna upang makamit ng bansa ang herd immunity kontra sa mapaminsalang coronavirus disease (Covid-19).

“We need media influencers, athletes for example, PBA players,” pahayag ni Abalos sa panayam ng ABS-CBN News Channel hinggil sa kung papaano matatanggal sa publiko ang pagpili ng mga brand ng bakuna. “We need media influencers to explain these things. I'll raise this up. PBA, the players, and the national athletes could really help here.”

Hinimok ni Abalos na makipagtulungan na ang publiko sa pamahalaan para mas maiusad ang vaccination drive, na binigyang halaga ang ginagawa ng medical frontliners at mga punong tagapamahala ng lokal na pamahalaan upang matuldukan ang pakikipaglaban sa Covid-19 pandemic na mahigit isang taon ng nilalabanan sa buong mundo.

“You know, our doctors, nurses, our mayors have been working for so long, seven days a week. They are very tired,” wika ni Abalos. “We do not really know what type of vaccines will come in. So in order for us to reach that herd immunity, we must all work together.”

“Bagsak na lang kami ng bagsak ng bakuna, trabaho na lang kami ng trabaho, 'yung mga tao, please just cooperate. Pumunta kayo, and whatever [vaccine] we have right there, sasabihin naman namin sa inyo,” paliwanag ng dating representatibo ng lone district ng Mandaluyong.

Samantala, nagpaplanong pahabain pa ng Blackwater ang kanilang training camp sa Tagaytay City matapos ang isang linggong pagsasanay sa Batangas City Sports Center para sa pagbubukas ng scrimmages at training na pinayagan ng Inter Agency Task Force on Emerging Infectious Disease (IATF-EID).

Gabuco, sure na sa bronze; Marcial, susubok sa gold

ni Gerard Peter - @Sports | May 29, 2021

Tatlong Filipino national boxers na lamang sa pangunguna ni Tokyo Olympics bound Eumir Felix Marcial ang natitirang may tsansang makakopo ng gintong medalya sa 2021 ASBC Asian Elite Men and Women’s Boxing Championships sa Grand Ballroom ng Le Meridien Hotel sa Dubai, United Arab Emirates, matapos malaglag sa kanyang semifinal battle si dating AIBA world champion Josie Gabuco.

Nabigo ang 34-anyos na five-time Southeast Asian Games gold medalist na makalusot sa kanyang laban kay Gulasal Sultonalieva ng Uzbekistan, 1-4, Huwebes ng gabi, gayunpaman, nakasisiguguro na ito ng tansong medalya sa women’s light-flyweight category.

Isa sa mga paborito ang 2012 Qinhunagdao World championships titlist na makakapasok sa finals match ng under48kgs, ngunit pumalya itong maidepensa ang 2019 edisyon na ginanap sa Bangkok, Thailand, habang naputol ang winning run nito kasunod ng gold winning performance sa nakaraang 2019 Manila SEA Games.

Susubukang makamit ng 25-anyos na si Marcial ang titulo para sa kanyang unang gintong medalya ngayong taon sa amateur fight, matapos magwagi sa kanyang unang professional bout noong isang taon kay Andrew Whitfield via 4-round unanimous decision sa middleweight class.

Huling beses nagkampeon si Marcial sa amateur ranks noong Asia-Oceania Olympic Qualifying Tournament sa Amman, Jordan nung Marso, 2020. Ngunit kinakailangan munang talunin ng Lunzuran, Zamboanga City native si Jafarov Saidjamshid ng Uzbekistan, na nagawa namang gulatin si no. 4 seed Omurbek Bekzhigit Uulu ng Krygyzstan sa quarterfinals.

Sasabak din sina light-flyweight Mark Lester Durens at bantamweight Junmilardo Ogayre sa kani-kanilang semifinal duel upang maitulak ang gold medal na kampanya.

Tatapatan ng 20-anyos na si Durens na sasabak sa unang overseas fight si Daniyal Sabit ng Kazakhstan sa 48 kgs division, habang makikipagbuntalan si Ogayre sa men’s 56 kg class kay top seed Mirazizbek Mirzahalilov ng Uzbekistan.