Lomachenko, mas panig sa tikas ni Spence kaysa kay Pacman

ni Gerard Peter - @Sports | June 29, 2021

Hindi maitatanggi ni dating two-time Olympic gold medalist at three-division World champion Vasyl “Loma” Lomachenko ng Ukraine na napakahalagang agwat ang edad, lakas at kakayanan pagdating sa magiging tapatan sa pagitan ng nag-iisang eight-weight division titlist Manny “Pacman” Pacquiao at unified IBF/WBC welterweight title holder Errol “Truth” Spence sa Agosto 21 sa T-Mobile Arena sa Las Vegas, Nevada.

At tila sa madaling salita, mas pumapanig ito sa mas batang si Spence para sa nakatakdang 12-round unification battle na tinitignang pinakamalaking laban ng 31-anyos mula Dallas. Texas.

“Very interesting fight, very interesting fight. But, I don’t know about result because age, too young, too strong, too skilled, but I think age,” wika ni Lomachenko sa ESNEWS ng matanong hinggil sa bakbakang Pacquiao (62-7-2, 39KOs) at Spence (27-0, 21KOs).

Ipinaliwanag ni Loma na may nakikita itong bentahe pabor kay Spence dahil sa mga nabanggit na kadahilanan, habang halos dalawang taong hindi sumasabak sa laban ang 42-anyos na “Champion in Recess” ng WBA (super) matapos mapagwagian ang titulo noong Hulyo 20, 2019 laban kay Keith “One Time” Thurman sa pamamagitan ng split decision victory sa MGM Grand sa Las Vegas.

Huling sumagupa si Spence laban kay Danny “Swift” Garcia nung Disyembre 5, 2020 sa AT&T Stadium sa Arlington, Texas na nagawang dominahin ang buong 12-round battle para makuha ang unanimous decision victory. Malaki naman ang naging papel ni Pacman sa pagtulong sa bansa sa pagalalay sa pakikipaglaban ng Pilipinas sa mapamuksa at mapanganib na coronavirus disease (Covid-19) pandemic bilang Senador, kaya’t naatasan ng pamunuan ng WBA na ilipat ang korona nito kay Yordenis “54 Milagros” Ugas ng Cuba.

Folayang, taglay pa rin ang pusong palaban sa ONE

ni Gerard Peter - @Sports | June 27, 2021

Sa kabila ng mga magkakasunod na pagkabigo sa nagdaang tatlong sunod na laban, buhay pa rin ang pag-asa ni dating two-time ONE Championship lightweight champion Eduard “Landslide” Folayang na kaya pa rin nitong makipagsabayan sa kahit anong pagsubok higit na ang pag-aasam na makatapat ang isang katunggali na hindi pa niya nasusubukan.

Puntiryang makatapat ng 36-anyos na Baguio-native si dating 2002 Asian Games judo champion Yoshihiro “Sexyama” Akiyama upang subukin pa rin ang sarili na makabakbakan ang mga mahuhusay na mixed martial artists sa buong mundo.

Napurnada ang dapat na pagtatapat nina Folayang (22-11, 6KOs, 2 Subs) at Akiyama (15-7, 6KOs, 7Subs) sa ONE on TNT IV, ngunit nagtramo ng injury ang Japanese-Korean fighter sa kasagsagan ng kanyang paghahanda na naging dahilan ng pagpapaliban ng kanilang laban.

“If given the chance to face him, of course, I’d want to test him. I haven’t faced him before and I want to see how I fare against him,” wika ni Folayang. “Maybe in the proper time, maybe we’ll cross paths, and it will be an honor to finally face him,” ani Folayang na nagbiro pang siya ang hihiranging “sexier man” matapos ang kanilang laban.

Inamin ng three-time Southeast Asian Games wushu gold medalist na magsisilbing daan patungo sa kanyang malakas na pagbabalik sa dibisyon kung sakaling magtatagumpay sa 45-anyos mula Osaka, Japan.

Sinabi rin nitong mahaba ang tatahakin nitong landas upang makakuha itong muli ng tsansa na maging challenger sa ONE lightweight title ni Christian “The Warrior” Lee, na patuloy nitong pinapangarap muli na makamit upang maging isa sa mga ‘greatest comeback’ sa kasaysayan ng ONE Championship. “It’s still the champion. I still want to test myself against him in the future. I know that I am not in the position to call him out now, but still my eyes are on him,” saad ni Folayang. “I’ve seen how much Christian Lee has improved and grown through the years. I’m really impressed with how easily he transitioned from featherweight to lightweight, and from the tough opposition that he’s faced, he showed what he can truly do.”

Susuot sa butas ng karayom si Judoka Watanabe sa Olympics

ni Gerard Peter - @Sports | June 25, 2021

Bilang kauna-unahang Filipinang judoka sa Summer Olympic Games si 4-time Southeast Asian Games gold medalist Kiyomi Watanabe, isa rin sa mga ninanais ng pamunuan ng national judo team ay masungkit ng anumang medalya sa quadrennial meet.

Aminado si Philippine Judo Federation (PJF) President David Carter na mahirap na makamit ang naturang paghahangad sa Olympic Games, higit na sa darating na 2020+1 Tokyo Olympics, ngunit nakikinita nito na maaaring magkaroon ng tsansa ang 24-anyos na Filipino-Japanese na makapitas ng medalya sa Olympic Games na magsisimulang magbukas sa Hulyo 23-Agosto 8 sa Tokyo, Japan.

“We can’t predict the chances in judo. Prior to Asian Games 2018 (Jakarta-Palembang), nagkaroon ang mga Japanese official’s ng side na magiging Japan vs Japan ang labanan, but on that competition, only one pure Japanese is being played, and the other Japanese player na tinutukoy nila is Kiyomi, so anything can happen inside the mats,” pahayag ni Carter, kahapon sa lingguhang TOPS Usapang Sports on Air. “First time tayo nagkaroon tayo ng silver medal sa Asian Games, we don’t want her to pressure, generally all our national athletes, pero kapag andun na siya sa competition, hopefully palarin. I know she will do her best. Yung pinapakita niya sana galingan niya,” wika ni Carter.

Nakapasok ang Cebu City-born, Japan-based Pinay athlete sa bisa ng Asian Continental Quota na inanunsyo ng International Judo Federation (IJF) nitong nakalipas na Miyerkules. Pasok sa 41st ranking sa world 2017 European Open Championship sa pamamagitan ng 1,506 points sa women’s under’63kgs category.

Nabigo itong makakuha ng direct qualification sa nakalipas na 2021 World Judo Championships nitong nagdaang Hunyo 6-13 sa Laszlo Papp Sports Arena sa Budapest, Hungary matapos maagang maputol ang kampanya nito sa second round ng women’s under-63kgs category.

Ilan umano sa mabibigat na makakatapat ni Watanabe sa light-middleweight category ay sina World No.1 Clarisee Agbenenou ng France, 2016 Rio Olympics gold medalist Tina Trstenjak ng Slovenia, Miku Tashiro ng Japan, Olympics bronze medalist Sanne Vermeer ng The Netherlands at mga high-ranked competitors.