Karate champ Alforte, asam ang rankings sa World Games

ni Gerard Arce @Sports News | Jan. 29, 2025

Photo: Laforte

Susubukang makaporma ng puwesto sa bisa ng World at Continental rankings para sa 2025 World Games ni Southeast Asian Games Individual Kata gold medalist Sakura Alforte sakaling hindi palarin na magwagi sa isinasagawang Karate1 Premier League – Paris 2025 sa France, upang makapasok sa 2025 World Games sa Chengdu, China.

Kasalukuyang nakalagay bilang No. 14 sa buong mundo ang Filipino-Japanese karateka na susubukang magamit ang mga nakuhang kaalaman sa training camp sa Miami, Florida, gayundin ang pagsasanay sa Japan sa ilalim ni sensei Shin Tsukii, ama ni 2022 Birmingham World Games gold medalist Junna.

Maituturing na isa sa malalaking pagsubok na kakaharapin ng 2023 Cambodia SEAG champion ang preparasyon sa World Games na umaasang makakakuha ng kailangang puntos upang maka-entra sa 2025 sa Chengdu simula Agosto 7-Agosto 17.

“Of course, it will be one of my biggest challenges probably in my whole career, so I know how difficult to qualify which makes it more fun I guess to enjoy the journey of qualifying for each competition and it also shows how competitions are very important so that I can able to stand in the World Games, [which] only eight athletes can compete per weight category. It’s gonna be a fun challenge,” pahayag ni Alforte sa panayam ng Radyo Pilipinas 2.

Isang panalo lang ang nakuha ni Alforte sa Pool 3 ng Final Pool Standings kung saan dinaig si Kitaguchi Kao sa iskor na 39.40 kontra 38.70, subalit yumuko kina World No.19 Ana Cruz ng Portugal sa 39.00-39.80 at World No.11 Paola Garcia Lozano sa 37.90-39.10.

Malaking puntos ang nakalaan sa mga paliga ng Karate1 Premier League sakaling makakuha ng podium finish higit na ang gold medal na nagbibigay ng mahigit sa 1000 puntos para makapaglaro kasama ang 5 Pinoy, dragon boat at floorball.

Magsayo naghahanda sa bigating laban sa lightweight

ni Gerard Arce @Sports News | Jan. 25, 2025

Photo: Mark Magsayo / IG

Hindi na mapipigilan ang muling paglipat ng weight division ng dating World featherweight titlist na si Mark “Magnifico” Magsayo kasunod ng panibagong rankings sa lightweight division, habang pormal itong kinumpirma ng Viva Promotions na pinapatakbo ni Brendan Gibbons na planong hanapin ang panibagong landas tungo sa inaasam na panibagong suntok sa world title fight.

Sa huling sabak ni Magsayo laban kay Ecuadorian boxer Bryan Mercado, unang nagisnan ang bangis nito sa lightweight non-title match noong Disyembre 14, 2024 na ginanap sa Thunder Studios sa Long Beach California sa America, kung saan nagtapos lamang sa 28 segundo ng first round kasunod ng ilang matitinding banat sa karibal para mabilis na tuldukan ang kanyang 135-pound debut.

Dulot ng panalo ay umangat sa 27-2 rekord ang kartada ng 29-anyos mula Tagbilaran City, Bohol kasama ang mabangis na 18 panalo mula sa knockouts, kung saan sa huling tatlong laban ay dinomina nito si dating World challenger Eduardo “Zurdito” Ramirez ng Mexico sa pamamagitan ng 10th round unanimous decision at pinatumba si Mexican Isaac Avelar sa third round.

Mula sa isang post sa social media, inihayag naman ni Gibbons, anak ni MP Promotions President at international matchmaker Sean Gibbons, na pormal na nitong papasukin ang panibagong dibisyon, kung saan lumapag ito bilang ika-anim sa rankings ng International Boxing Federation (IBF) na pinanghahawakan ni Ukrainian champion Vasiliy “Loma” Lomachenko.

Kasalukuyang nakabase sa Valencia, California ang Pinoy power-puncher na puspusan ang isinagawang paghahanda sa Wild Card Gym sa Los Angeles, California sa ilalim ng head trainer na si Marvin Somodio, katulong ang MP Promotions at TGB Promotions, na planong makabalik sa World title fight matapos minsang hawakan ang WBC featherweight belt laban kay Gary Allen Russel Jr sa pamamagitan ng majority decision noong Enero 22, 2022 sa Borgata Hotel Casino sa Atlantic City.

DLSU at Canino babawi sa 87th UAAP Season

ni Gerard Arce @Sports News | Jan. 25, 2025

Photo: Canino / Volleyball - DLSU Sports - Flavius Dulce

Magiging sapat na nga ba ang nakuhang exposure at experience ng De La Salle University Lady Spikers upang tudlain ang ika-13 korona at makabawi sa huling karanasan noong nagdaang season, habang manunumbalik ang bangis sa taraflex court ni dating Rookie/MVP Angel Ann Canino sa 87th University Athletic Association of the Philippines (UAAP) women’s volleyball tournament simula Pebrero 15.

Mula sa third place finish sa 86th season matapos patalsikin ng last season runner-ups na UST Golden Tigresses at muling buhayin ang rivalry laban sa reigning at defending titlist na NU Lady Bulldogs, tatangkain ng 5-foot-11 outside hitter na mabitbit muli sa mataas na puwesto ang green-and-white lady squad.

Bukod sa 21-anyos mula Bacolod City, na nasa kanyang ikatlong taon ng paglalaro para sa Lady Spikers, makakaasang makakakuha ito ng suporta sa ibang mga kakampi matapos maging pangunahing ace attacker sa nagdaang season – nananatiling sasabak para sa La Salle sina wing spiker Alleiah Malaluan, Jyne Soreno, libero Lyka De Leon, Katrina Del Castillo, middle blocker Amie Provido, playmaker Julyana Tolentino at opposite spiker Shevana Laput.

Limang manlalaro ang nalagas sa koponan mula kina pro-league top Draft pick Thea Gagate, ace playmaker at kapwa Alas Pilipinas player Julia Coronel, spiker Leila Cruz, Jenya Torres at Maiccah Larroza, habang inaabangan ang pagpasok ng mga bigating rookies mula kina Jillian Santos (outside hitter), Rianne Cortez (opposite spiker), Amor Guinto (outside hitter), Japanese trained Ella De Guzman (outside hitter), Shane Reterta (middle blocker/Open Hitter), Zach Maganto (outside spiker), Erika Pagal (middle blocker), Althea Cabradilla (outside spiker), Sandy Demain (outside spiker), Francesca Rodriguez (libero), Joe Anne Nochete (libero), Malia Jose (open spiker), Alyssa Macanta (libero), Samantha, Sagarbarria (outside spiker), Patricia Chan (middle blocker) at playmaker Maile Salang. (GA)