Ox, mapapalaban sa intriga, pero sure win dahil kakampi ang langit

ni Maestro Honorio Ong @Forecast | Ika-7 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Ox o Baka.

Ang Ox o Baka ay silang mga isinilang noong 1925, 1937, 1949, 1961, 1973, 1985, 1997, 2009, 2021, 2033.

Sinasabing sa ikalawang hati ng 2024, mula sa buwan ng Abril hanggang Mayo, maraming kakaibang sorpresa at hindi inaasahang kapalaran ang magaganap sa buhay ng isang Baka, higit lalo sa aspetong pangpinansyal at pangmateryal na bagay.

Sa panahong ito ng iyong buhay, kusang lalago ang kabuhayan ng Baka, kasabay nito, iba’t ibang uri ng magagandang oportunidad ang darating sa karanasan nila. Kaya naman, dapat silang maging maagap at ipatupad ang diskarteng sunggab agad sa bawat magandang pagkakataon na dumarating upang ang nasabing mga gintong pagkakataon ay madali nilang mai-convert sa pera.

Dagdag dito, sa taong ito ng Dragon, tandaan din na ang tapang at lakas ng loob na may kasamang talino, ang susi para lalong umunlad ang kabuhayan ay agad mong maramdaman na kusa rin naman sa iyong ipagkakaloob ng kapalaran sa buong taon ng 2024.

Sa career at hanapbuhay, maraming mga intriga, paninira at lihim na naiingit sa Baka na lulutang nang paisa-isa sa unang hati o 1st quarter ng 2024. Ngunit ‘wag kang mabahala, kung ang iba ay nagkakampihan laban sa iyo, dahil may isang matitirang kakampi mo at ito ay ang langit. Sino ba naman ang makakatalo sa langit?

Kaya sa buong 2024, anumang sagabal at pagsubok ang iyong kaharapin, partikular sa career at hanapbuhay, sigurado na ang iyong tagumpay.

Gayunman, kahit magtagumpay ka sa career, hindi mo naman dapat pairalin ang sobrang tiwala sa sarili at kayabangan dahil sinasabi ring ngayong Green Wood Dragon, habang nagpapakumbaba ka at hindi mo pinapakitang ikaw ang pinakamahusay at pinakamagaling, lalo kang pagpapalain ng nasa itaas.

Dagdag pa rito, ang mahusay, diplomasya at kunwaring pakiusap, sa halip na pagtataas ng boses at pagiging dominante ay higit na mabisa. Kaya sinuman ang kakausapin mo, lalo na ang mga taong nakakataas sa iyo, kaunting diplomasya at pakiusap ang dapat. Sa ganyang paraan, tulad

ng nasabi na, tuluy-tuloy kang aani ng pag-unlad at kasaganahan sa larangan ng career, negosyo, pangangalakal at hanapbuhay, na magdudulot sa iyo ng tuluy-tuloy na pagtaas ng kita at paglago ng kabuhayan.

Sa aspetong pakikipagkapwa tao at sa pamilya, sinasabing sa taong ito ng 2024, maraming mga plano ang maaantala. Pero, ang pagkaantala o hindi agad magagawang mga proyekto ay pansamantala lang.

Hindi ka dapat ma-stress o mainis, sa nasabing mga pangyayari, dahil tulad ng nasabi na, wala ka namang magagawa sa mga pangyayaring nabanggit dahil tiyak na ganu’n ang magaganap.

Habang ‘yung ibang bagay na inaasahan mong mangyari na hindi naman nangyayari ay mas mainam na balewalain na lang kesa ma-stress ka pa, dahil may pangako ang langit na sa taong ito ng Green Wood Dragon, higit sa inaasahan mo ang mangyayari at mas maganda pa sa iniisip mo ang ipapalit ng langit.

Sa pag-ibig at pakikipagrelasyon, habang kasama mo ang iyong kasuyo, siya ang magiging suwerte mo sa larangan ng salapi sa buong taon ng Green Wood Dragon. Kaya ‘wag kang lalayo sa kanya, higit lalo sa buwan ng Oktubre hanggang Disyembre. Sa madaling salita, habang kayo’y magkasama, ang aktuwal na mangyayari, “may pera na may bonus pa na masarap na romansa!”

Samantala, kung ikaw ay isang single at wala pang kapareha, mapapansin mo lalakas nang husto ang iyong pang-akit, gayuma at ang iyong karisma. Dahil sa lumulutang at humahalimuyak mong kakaibang ganda at pang-akit, sa buong taong ito ng 2024, walang duda, kung ikaw ay isang lalaki, ikaw ay magkaka-girlfriend na, habang kung ikaw naman ay isang babae, walang dudang magkaka-boyfriend ka na rin ngayong taon, kahit pa na nagdadalawang isip ka.

Wala kang dapat gawin ngayon, kundi samantalahin ang mga pagkakataong ito, dahil minsan lang ngingiti sa iyong puso at kapalaran ng totoong pakikipagrelasyon na may kasamang kakaibang lambing.

Kaya kapag dumating na ang karanasan at senaryong ito sa iyong buhay hanggang sa huling hati ng taong 2024, wala kang dapat gawin kundi magpaubaya. Tulad ng isang berdeng dahon na napigtas sa sanga, dahan-dahang nahulog sa batis, sapagkat, walang duda, dadalhin ka nito sa isang wagas, nakakakilig at maligayang pag-ibig.

Mga animal sign na ka-compatible ng Baka

ni Maestro Honorio Ong @Forecast | Ika-6 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Ox o Baka. 

Ang Ox o Baka ay silang mga isinilang noong 1925, 1937, 1949, 1961, 1973, 1985, 1997, 2009, 2021, 2033. 

Sa aspetong pang propesyon, sinasabing uunlad, liligaya at magtatagumpay ang isang Baka sa propesyong may kaugnayan sa batas at sa pagpapairal ng katarungan sa mga mahihirap at naaapi, tulad ng judge at iba pang propesyon o katungkulan na ang nature ay humahatol, dahil sa taglay nilang talas ng isipan.

Walang iniiwan sa kuwentong matatagpuan sa Bibliya sa Unang Hari, 3:16-18, kung saan ipinamamalas ni Haring Solomon ang napakatalinong desisyon at paghatol.

Ganito ang istorya, may dalawang babae na magkasama sa iisang bahay ang nagsadya kay Haring Solomon, dahil kapwa sila nanganak nang halos magkasabay na parehong lalaking sanggol. Namatay ang anak nang ikalawang babae dahil nadaganan niya ito habang siya ay natutulog.

“Habang ako po ay natutulog, kinuha niya ang anak ko at dinala sa kanyang higaan at ‘yung patay niyang anak ang itinabi sa tabi ko. Kinaumagahan, nagising ako para padedehin ang aking anak at natagpuan ko na lang ito na patay na. Pero, nang pagmasdan kong mabuti ang sanggol, nakilala ko na hindi iyon ang tunay kong anak.”

Tumutol naman ang ikalawang babae at sinabing, “Hindi totoo iyan! Ang anak ko ang buhay at ang sa kanya ang patay!”

Lalo namang iginiit nang unang babae na, “Mahal na hari, ang anak niya po ang patay at ang sa akin ang buhay!”

Kaya't sinabi ni Solomon sa isa, “Sinasabi mong iyo ang buhay na bata at sa kanya ang patay.”

At sa ikalawa, “Ang sabi mo naman, iyo ang buhay at sa kanya ang patay.”  Kaya nagpakuha ang hari ng isang tabak, at idinala sa kanya ang isang matalim na tabak.  

Sinabi ng hari, “Hatiin ang batang buhay at ibigay ang kalahati sa bawat isa.”

Nabagabag ang puso ng tunay na ina at napasigaw,  “Huwag po, kamahalan! Ibigay n’yo na lang po sa kanya ang bata, basta huwag n’yo lamang itong patayin.”

Sabi naman ng isa, “Sige, hatiin n’yo ang bata, para walang makinabang kahit sino sa amin!”

Kaya’t sinabi ni Solomon, “Huwag n’yong patayin ang bata. Ibigay n’yo sa una, dahil siya ang tunay na ina.”

Ganu’n kagaling humatol ang mga taong isinilang sa Year of the Ox, kaya naman dahil sa taglay nilang mala-Haring Solomon, sa larangan ng pagpapatupad ng batas at makatarungang pagpapasya sa kanilang nasasakupan  ang Baka ay tiyak na kikilalanin, magtatagumpay at labis na mamahalin ng mga taong kanyang pinamamahalaan at nasasakupan.

Sa pag-ibig at pakikipagrelasyon, bagama’t may pagkapihikan at bihirang makaranas ng tinatawag na love at first sight, mali namang isipin na hindi sila romantiko at hindi rin totoo na hindi sila naiinlab.

Bagama’t may pagka-naive o halos walang gaanong pakiramdam, umiibig pa rin naman ang isang Ox. Ang problema nga lang ay mabagal silang kumilos at mabagal din silang umibig kaya ang akala ng marami ay hindi gaano masarap magmahal ang mga Ox, ngunit ang totoo, praktikal lang sila kung umibig.

Ang magara pa sa isang Baka, oo nga’t medyo mabagal silang umibig at magmahal, kapag nainlab naman sila ay talaga namang seryosohan. Hindi sila papayag na hindi nila mabibigyan ng magandang buhay at masaganang kinabukasan ang taong kanilang iniibig.

Gayunman, may mga sandali na ang Baka ay madali rin mag-init ang ulo o magalit, at kapag nagalit sila, ito ay matagal nilang kikimkimin. Kaya nga sinasabing, mabagal silang magmahal.

Tulad ng nasabi na, bagama’t mabagal mainlab ang isang Ox, kapag nainlab naman sila, bukod sa seryoso at totoo, nagiging tapat din sila. Kaya nakakabuo sila ng isang maligaya, maunlad at panghabambuhay na pakikipagrelasyon lalo na sa mga animal sign na katugma at ka-compatible ng Baka, tulad ng Rooster o Tandang gayundin ang Snake o Ahas at Rat o Daga.

Sa sandaling nagkaroon ng relasyon ang Baka at Tandang, sinasabing agad silang magkakasundo at magkakaunawaan, dahil kapwa sila masipag, praktikal at dedikado sa kanilang mga ginagawa. Kaya kapag ang Baka at Tandang ay nagkatuluyan, tiyak na sila ay yayaman at uunlad nang uunlad.

Habang ang relasyon ng Baka at Ahas ay magiging mapalad din dahil aalagaan ng Ahas ang Baka sa panahong siya ay nahahapo at napapagod. Ang mahiwagang haplos ng isang Ahas ang siyang magpapasigla at bubuhay sa imahinasyon at pagnanasa ng isang Baka.

Ang Daga at Baka ay sinasabi ring compatible. Nangyaring ganu’n, dahil ang Daga tulad din ng Ahas ay tunay ngang maaruga at mapagkalinga na gustung-gusto naman maranasan ng isang Baka.

Ang nasabing mga relasyon, Baka at Tandang. Baka at Ahas; at ang Daga at Baka, tulad ng naipaliwanag na ay sadyang magiging mapalad at maligaya higit lalo kung ito ay mabubuo ngayong Green Wood Dragon, na maghahatid ng suwerte at magandang kapalaran sa nasabing mga animal sign. 

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Dahil sa mga katangian… Ox, oks pumasok sa Military

ni Maestro Honorio Ong @Forecast | Ika-5 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Ox o Baka. 

Ang Ox o Baka ay silang mga isinilang noong 1925, 1937, 1949, 1961, 1973, 1985, 1997, 2009, 2021, 2033. 

Sa pakikipagkapwa tao, kahit pa sabihin na ang Baka ay pagkatuso pagdating sa pera, may bahagi rin naman ng kanyang puso ang malambot. Ibig sabihin, may hibla rin sila ng awa sa mahihirap.

Tunay ngang nahahabag ang kanilang kalooban kapag nakakakita sila ng mga taong naghihikahos o wala na talagang pag-asa sa buhay. Kaya kapag ganito ang sitwasyon ng mga taong malalapit sa Baka, paniguradong gagawin nila ang lahat para lamang makatulong sila.

Ang hindi alam ng Baka, dahil sa lihim nila na pagtulong, pinagmamasdan na pala sila ng nasa itaas, kaya sa dakong huli ang langit mismo ang gaganti sa mga lihim nilang pagtulong, kung kaya pinagkakalooban sila ng dagdag suwerte at magandang kapalaran na may kaugnayan sa salapi, materyal na bagay at sa kanyang propesyon.

Samantala, dahil hindi nga mahilig sa pakikipagbolahan, kahit pilitin mo, hindi ibibigay ng Baka ang kanilang commitment sa iyo, dahil para sa kanila, kapag kaya nilang gawin ang isang bagay, agad nila itong gagawin. Pero, kapag hindi naman nila ito kaya, hindi talaga nila iyon gagawin. 

Ayaw nilang mangako, lalo na kung ang pangako sa simula pa lang ay alam na alam na nilang mapapako. Sa halip, tunay ngang bihirang-bihira magbigay ng pangako ang isang Baka, pero sa sandali namang sila ay mangako, kahit ano pa ang mangyari, kahit magunaw pa ang mundo, tiyak na tutuparin nila ang kanilang binitiwan.

Bukod sa pagiging materyoso at may pagkapraktikal, ang Baka ay nakakagawa rin ng legacy, kung saan, ang ibang mga tao ay itinatayo ang kanilang mga pangarap sa buhangin tulad nilang nagtataglay ng animal sign na Rabbit o Kuneho. Ang Ox o Baka ay nakakapagpatayo rin ng kanilang mga pangarap at ambisyon sa totoong building.

Kaya ito ay nananatili habambuhay.

Oo, ganu’n kagaling ang isang Baka, lalo na kung ang pag-uusapan ay ang mga tangible things na nahahawakan ng mga kamay, kaya naman kung ikaw ay isang Baka habang patuloy sa pag-angat ang graph ng pag-unlad sa aspetong pangmateryal na bagay, samantalahin mo ang pag-iipon para sa future mo.

Samantala, dagdag dito, sinasabi ring ang isang Baka ay tunay namang nagtatagumpay sa mga gawain at propesyong tulad ng military dahil sa taglay nilang katatagan at katapangan, sa kabila ng mga kritikal at nakakapanindig balahibong pakikipagsapalaran na madali naman nilang nalulusutan.   

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.