Dragon, dapat mag-ingat sa mga inggitera dahil lihim na pababagsakin

ni Maestro Honorio Ong - @Forecast | Febuary 10, 2022

Ipagpatuloy natin ang pagtalakay sa pangunahing ugali at magiging kapalaran ng animal sign na Dragon ngayong 2022.

Kung ikaw ay isinilang noong 1940, 1952, 1964, 1976, 1988, 2000 at 2012, ikaw ay mapabibilang sa animal sign na Dragon.

Higit na magiging maganda ang takbo ng career ng Dragon ngayong Year of the Water Tiger, ganundin sa larangan ng business o pangangalakal. Kung noong nakaraang taon ay medyo hindi masyadong maganda ang kinita, ngayong 2022, tiyak na aangat ang graph ng pag-unlad sa larangan ng pagkakaperahan at kabuhayan.

Kung ikaw ay negosyante, umasa kang maraming oportunidad ng bagong pagkakakitaan ang mabubuksan. Kung ang Dragon ay isa namang tipikal na empleyado, maaari ring tumaas ang posisyon o suweldo sa kumpanyang pinaglilingkuran. Mag-ingat lamang sa mga taong lihim na naiinggit sa iyo at nais kang pabagsakin dahil gagawa sila ng paraan upang mapurnada ang maganda mong kapalaran. Kapag nakikita nilang namumunga nang hitik at maganda ang punong-kahoy, tiyak na ito ay pupukulin nila hanggang sa maglaglagan ang mga bunga. Hindi mo naman sila dapat pansinin dahil ngayong 2022, poproteksiyunan ka ng langit. At dahil ang nasa itaas mismo ang nagpoprotekta sa iyo, ang mga taong pumupula at naiinggit sa iyo ang mapapahamak.

Dagdag pa rito, ngayong Year of the Water Tiger, marami ring papasok na kakaibang ideya, pangarap o mga gustong gawin sa buong taon. Ibig sabihin, magiging masigla ka o mataas ang iyong energy, at dahil dito, hindi naman ito dapat masayang sa mga walang direksiyong gawain.

Sa halip, tandaan mo na anuman ang puntahan ng iyong lakas at panahon, kailangang sa taong ito ng 2022, siguraduhin mong ito ay nakatuon sa iisang layunin lamang. Ibig sabihin, ang lahat ng gawain mo ay dapat nakatuon sa pagkakaperahan o pagtaas ng iyong ipon o kita. Kumbaga, anuman ang ginagawa mo, kailangang madagdagan ang iyong kinikita, pero hindi sinasabing dagdagan mo rin ang iyong gastusin, sa halip, ang dapat mong dagdagan ay ang ipon. Sa ganyang paraan, ang taon ng Tigre ay ang tanging pagkakataon mo sa buhay na madodoble ang iyong kabuhayan hanggang ikaw ay tuluyan nang yumaman.

Samantala, sa pag-ibig, kung ikaw ay dalaga o binata, bagama’t maraming makukulay na relasyon ang darating, ito ay hindi magiging seryoso, sa halip, ito ay pansamantala lamang.

Kumbaga, ang mga relasyong mararanasan mo ngayong 2022 ay pampalipas-oras lamang at pampawala ng stress. Kaya kung may bago ka mang makilala o magkaroon ka man ng love interest sa taong ito ng Water Tiger, hindi mo ito dapat seryosohin. Ang dapat mong maging attitude ay ganito, “Dumating siya nang bigla, hayaan mo rin siyang mawala nang kusa.”

Habang ikaw naman ay hindi nawalan dahil batid mo na sa umpisa pa lang ng taon, ang prayoridad mo ay ang mga bagay na pagkakaperahan. Tutal sa susunod na taon ng Kuneho (2023), tiyak namang may darating sa iyong bagong pakikipagrelasyon at higit na masayang pag-ibig na hahantong sa panghabambuhay na pag-aasawa ang dapat mong paghandaan ngayon.

Samantala, mapalad na kulay ang yellow at green, puwede ring gamitin ang black at red, habang mananatili namang suwerte ang mga numerong 1, 6 at 9, at bukod sa nasabing numero, mapalad din ang 3, 18, 27, 33, 36 at 45, higit lalo sa araw ng Martes, Huwebes at Linggo. Sa buong 2022, likas na lalakas ang kapangyarihan at panghatak mo ng buwenas mula sa ika-18 ng Marso hanggang ika-27 ng Abril, mula sa ika-18 ng Hulyo hanggang sa ika-27 ng Agosto at mula sa ika-18 ng Nobyembre hanggang sa ika-27 ng Disyembre.

Itutuloy

Dragon, sobrang loyal sa karelasyon pero ‘di na iibig ulit ‘pag nasaktan

ni Maestro Honorio Ong - @Forecast | Febuary 08, 2022

Ipagpatuloy natin ang pagtalakay sa pangunahing ugali at magiging kapalaran ng animal sign na Dragon ngayong 2022.

Kung ikaw ay isinilang noong 1940, 1952, 1964, 1976, 1988, 2000 at 2012, ikaw ay mapabibilang sa animal sign Dragon.

Sinasabing minsan ay makakatagpo ka talaga ng Dragon na walang ginagawa o tatamad-tamad.

Ngunit dapat maisip ng Dragon na hindi ‘yun ang nakatadhana sa kanya, sapagkat ang Dragon ay hindi dapat tutulog-tulog sa kanyang lungga. Sa halip, dapat siyang bumangon at suungin ang iba’t ibang aktibidad at pagsubok ng buhay. Sa ganu’ng paraan, ‘pag maraming ginagawa, higit na magiging matagumpay at maligaya ang Dragon.

Ang nagiging problema lang sa Dragon na maraming ginagawa, kadalasan ay nakakalimutan niyang mag-concentrate sa iisang gawain lamang. Dahil dito, hindi ganap na nagtatagumpay at nasisiyahan. Pero kung matututunan ng Dragon na magpokus sa iisang tumbok na gawain sa takdang panahon, siya ay uunlad hanggang sa tuloy-tuloy na yayaman.

Sa panahon naman ng mga pagsubok at kabiguan, ang Dragon ay napakatatag kung saan kahit siya ay “down na down”, tiyak na siya ay hindi mananatili sa sitwasyong siya ay bigo at luhaan. Dahil siguradong ang Dragon ay muling babangon at mas maraming suwerte at surpresang mga tagumpay ang walang kahirap-hirap na ipagkakaloob sa kanya ng langit.

Samantala, sa pakikisamalumuha sa kapwa at pakikipagrelasyon, ang mga Dragon ay likas na malakas ang karisma, kaya palaging maraming kaibigan ang kanyang nahahatak na makikitang nakapaligid sa kanya. Gayunman, marami ring lihim na tagahanga at may mga lihim na naiingit sa makisig o matikas na Dragon, kaya nagkakaroon din siya ng mga lihim na kaaway.

Ang nakatutuwa, hindi alam ng Dragon na malakas ang kanyang magnetismo sa kanyang kapwa,

lalo na sa opposite sex, kaya tila binabalewala lang niya ang kanyang mga tagahanga nang hindi sinasadya.

Sa pag-ibig, sinasabing maagang nai-in love ang Dragon, kaya kadalasan, sa murang edad pa lamang, may mga Dragon na nakapag-aasawa agad, at ito ang nagiging dahilan ng maaga niyang mga pagsubok sa buhay. Ngunit dahil maagang nakapag-asawa at maaga ring sinubok ng kapalaran sa aspetong pagpapamilya at pinansiyal, pagkatapos ng mga pagsubok na ito, malalaking tagumpay naman ang darating.

Kapag ang Dragon naman ay matagal magkaroon ng karelasyon, kadalasan ay tuluyan silang tumatandang binata o dalaga. Kaya ang pinakatamang dapat gawin, kapag nasa hustong edad na ang Dragon at may karelasyon naman siya, mas maganda kung mag-aasawa na siya agad upang mas madaling umunlad at lumigaya ang itatayo niyang pamilya.

Dagdag pa rito, ‘pag nakuha mo ang loob ng Dragon, habambuhay na siyang magiging tapat sa iyo. Isa lang ang magiging pagkakamali mo sa kanya, kapag nakita niyang ang taong sobrang minahal at pinagkatiwalaan niya ay hindi pala karapat-dapat sa ganu’ng pagsamba, guguho ang mundo ng Dragon. Kapag nangyari ‘yun, hindi na muling makikipagrelasyon ang Dragon kahit kailan dahil binigo siya ng babae o lalaking labis niyang sinamba, ganu’n katindi umibig ang Dragon.

Samantala, compatible at suwetong-suweto namang kapareha ng Dragon ang tuso at matalinong Unggoy dahil hangang-hanga ang Dragon sa katalinuhang ipinamamalas ng Unggoy kapag sila ay magkasama. Gustong-gusto rin ng Dragon ang ambisyoso at matagumpay sa career na Daga, habang ang Daga ay mahahalina naman sa likas na magnetismo at kakaibang karisma ng Dragon.

Tugma rin sa Dragon ang praktikal at eleganteng Ahas, kung saan tuturuan naman ng Ahas ang Dragon na mas maging romantiko at higit na maging mapagmahal, kaya naman ang pagsasama ng Dragon at Ahas ay magiging masarap at habambuhay na magiging maligaya.

Itutuloy

Year of the Dragon, lalong susuwertehin ‘pag sumali sa mga grupong nakakatulong sa mga kapus-palad

ni Maestro Honorio Ong - @Forecast | Febuary 05, 2022

Ipagpatuloy natin ang pagtalakay sa pangunahing ugali at magiging kapalaran ng animal sign na Dragon ngayong 2022.

Kung ikaw ay isinilang noong 1940, 1952, 1964, 1976, 1988, 2000 at 2012, ikaw ay mapabibilang sa animal sign Dragon.

Sinasabing bihira sa mga Dragon ang hindi masuwerte dahil anumang kapalaran ang sapitin nila, palagi silang pinoproteksiyunan ng langit at tila nabubuhay sila sa isang mala-mahikang daigdig.

Ito ay nangyari dahil likas silang matulungin at mapagbigay at ito marahil ang dahilan kaya maraming magagandang kapalaran ang ipinagkakaloob sa kanila ng langit kahit hindi nila ito hinihingi.

Ngunit minsan, ang problema sa Dragon, kapag siya ay pinanghinaan na ng loob at may lihim na takot o kabog ng dibdib, nakakalimutan niyang siya ay isang mystical creature, na may napakalakas na kapangyarihan, pangangatawan, may matikas na pakpak at may kakayahang bumuga ng apoy sa ilong. Ito ang dapat ikintal sa isipan ng Dragon upang hindi siya panghihinaan ng loob, sa halip, anuman ang mangyari, dapat siyang magpatuloy at lumaban. Dahil sa pamamagitan ng tapang at tatag ng kalooban, mananaig at higit na magtatagumpay at mas magiging maligaya ang Dragon habang siya ay nabubuhay.

Ang problema, sinasabing kaya minsan ay pinanghihinaan ng loob ang Dragon, mas nauuna sa kanila ang malalim na lungkot sa kaibuturan ng kanilang pagkatao. Kaya kadalasan, kaunti lang ang kanilang tunay at tapat na kaibigan dahil likas silang malungkutin.

Gayunman, kung matututunan ng Dragon na sumali sa mga charitable institution works o religious congregations o sa mga samahang may adhikaing tumulong o sa mga samahang may kaugnayan sa espirituwalidad, higit na mapapanuto at lalo pang gaganda at susuwertehin ang kapalaran ng isinilang sa Year of the Dragon.

Tulad ng nasabi na, kapag pinairal at na-develop nang husto ang kanyang likas na tapang at lakas ng loob, mas malayo ang mararating niya at higit na magiging maligaya ang bawat pakikihamok at pakikipagsapalaran na kayang susuungin.

Dagdag pa rito, ang isang Dragon ay may matatag at mahirap baguhin na paninindigan o paniniwala, kaya kadalasan, napagbibintangan siyang dominante, may pagka-arogante at mayabang. Pero sa totoo lang, nagagawa lamang ‘yun ng Dragon kapag may isang bagay siyang ipinaglalaban at pinaninindigan. Ngunit hindi pa rin dapat kalimutan na sa kaibutran ng kanilang puso, tunay na nananaig pa rin ang kanilang mababang loob, dalisay na kabutihan ng puso at ang paghahangad na tumulong sa mga kapus-palad.

Sa katunayan, ang Dragon ay masasabing tapat at mabuting kaibigan, matulungin sa kanyang nasasakupan, lalo na sa mga taong inaapi ng lipunan. At siya rin ay mapag-aruga at mapagmahal na asawa. Kaya naman, sinasabing kapag nahulog ang loob sa iyo ng Dragon, talagang magiging mabuti, tapat at mapagmahal siya sa iyo habambuhay.

Sa kabila ng lahat, ang Dragon ay malaon nang nakatalaga bago pa siya isinilang sa dalawa lamang na pamimiliang kapalaran— una, malalaking tagumpay ng buhay ang sadyang sa kanila ay inilaan ng langit o isang magara at hindi kapani-paniwalang kabiguan.

Itutuloy