Baka o tandang, the best na ka-compatible ng Snake sa lahat ng animal signs

ni Maestro Honorio Ong - @Forecast | Febuary 22, 2022

Sa pagpapatuloy ng Forecast 2022, tatalakayin naman natin ang pangunahing ugali at magiging kapalaran ng animal sign na Snake o Ahas ngayong Year of the Water Tiger.

Kung ikaw ay isinilang noong 1941, 1953, 1965, 1977, 1989, 2001 at 2013, ikaw ay mapabibilang sa animal sign na Snake o Ahas.

Sinasabing kilala rin ang Ahas sa pagiging tiyak sa lahat ng kanyang ginawa at buo ang kanyang loob. Dahil dito, birang-bihira kang makakatagpo ng Ahas na bigo sa buhay dahil kahit ano’ng kabiguan at pagsubok ang kanyang maranasan, tiyak na siya ay babangon at babangon upang muling manaig at magtagumpay sa anumang layunin o proyektong kanyang nasimulan.

Dagdag pa rito, ang isa pang kakaiba sa personalidad ng Ahas ay sinasabing tugma sa kanya ang kasabihang, “Kapag tahimik ang batis, ito ay napakalalim.” Ganu’n mismo ang pagkatao ng Ahas, kung saan kadalasan ay tahimik lang sila, ngunit mapapansin mong sobrang lalim na pala ang kanilang iniisip.

Sa aspetong pakikipagrelasyon at damdamin, mahinhin at tahimik sa panlabas na anyo ang Ahas, ngunit wild, maharot, marahas at bigay na bigay sa panahon ng pag-e-express ng damdamin, partikular sa aspeto ng romansa. Kaya naman kapag naging kapareha mo ang Ahas, tiyak na sa larangang panseksuwal at pandamdamin ay paliligayahin ka niya nang sobra.

Bukod sa mahusay sa romansa at seksuwal na aspeto, sobrang pinoproteksiyunan din ng Ahas ang mga taong napapalapit sa kanya, kinakalinga at talaga namang minamahal, kaya masasabing hindi lang siya mahusay sa romansa kundi masarap din siyang mag-alaga at magmahal ng kasuyo.

Dahil likas na matalino at magaling mag-alaga ng kapareha, kahit gaano pa kasalimuot o hindi normal ang relasyon na kanyang napasukan, ito ay nagagawa pa rin niyang ipreserba at minsan, ito ay nagiging maligaya at nagagawa pa ring maging masarap at panghabambuhay.

Dagdag pa rito, dahil likas na mapang-akit, kadalasan ay maraming nagiging lihim at lantarang nakakarelasyon ang Ahas. Bagama’t ang iba ay panandalian lamang, ang ilan naman ay nagtatagal at nagiging panghabambuhay.

Sa pag-aasawa, ka-compatible o sadyang tugma sa Ahas ang isa ring materyoso, may pagkatuso at mahilig magpayaman na Ox o Baka. Habang matatagpuan naman ng Ahas ang may plano at masinop na pagpapamilya sa isang Rooster o Tandang. Kaya naman sa 12 animal signs, pinaniniwalaang ang Baka at Tandang ang “the best” na makapareha ng Ahas upang umunlad ang kanilang pamumuhay at ang itatayo nilang pamilya ay tiyak na magiging maligaya at panghabambuhay na.

Samantala, bukod sa Baka at Tandang, tugma at ka-compatible rin ng Ahas ang Dragon, Rabbit, at Tupa. Sapagkat matatagpuan ng nasabing mga hayop sa Ahas ang hinahanap nilang elegante, masaya at masarap na pamumuhay. Sa katotohanan, dahil likas na matalino at mapang-akit, halos lahat ng animal signs ay talagang ka-compatible ng Ahas, gayundin, sadyang mahusay siyang makibagay. Kaya anumang relasyon ang nais niyang patagalin at ipreserba ay madali naman niyang nagagawa na maging maligaya at maging pang-forever.

Itutuloy

Pulitika at pagiging religous leader, swak na career sa ahas dahil magaling na pinuno

ni Maestro Honorio Ong - @Forecast | Febuary 15, 2022

Sa pagpapatuloy ng Forecast 2022, tatalakayin naman natin ang pangunahing ugali at magiging kapalaran ng animal sign na Snake o Ahas.

Kung ikaw ay isinilang noong 1941, 1953, 1965, 1977, 1989, 2001 at 2013, ikaw ay mapabibilang sa animal sign na Snake o Ahas.

Sinasabing bukod sa taglay na katalinuhan, ang Ahas ay nagtataglay din ng malalim na pang-unawa sa mundo, kaya naman kahit may suliranin ay hindi sila gaanong naaapektuhan dahil nakikita nila ang mga dahilan sa kabila ng aktuwal na mga pangyayari.

Sa ganu’ng paraan, malalim mag-isip at nagtataglay ng malalim na pagkatao at pang-unawa, mas madaling nakakamit ng Ahas ang inner peace of mind sa panahong lubhang nababagabag ang mga tao sa mundo. Dahil tulad ng nasabi, iba ang tingin nila sa mga nagaganap kaysa sa tingin ng mga pangkaraniwang tao.

Dagdag pa rito, sinasabi ring may kakaibang leadership ability ang Ahas, kung saan kaya niyang gumawa ng isang sitwasyon na napaliligiran siya ng maraming mahuhusay at magagaling na tao.

At habang napaliligiran siya ng mahuhusay na tao, madali niyang nagagawa na siya ang taga-isip at taga-utos sa mga pangyayaring nangangailangan ng magmamando. Sa ganitong paraan, naipamamalas ng Ahas ang kakaibang husay niya sa pamumuno, mas madaling umuunlad at nagtatagumpay ang anumang samahan o organisasyon na kanyang pinamumunuan.

Kadalasan, makikitang buo rin ang loob ng Ahas sa anumang pagharap sa mga problema at suliranin at tinitiyak niya na sa anumang pakikihamok o labanan, ang mga kapanalig, nasasakupan at mga mahal niya sa buhay ang siguradong wagi, magtatagumpay at makikinabang.

Bukod sa pagiging mahusay na leader, ang ahas ay may taglay ding malalim na espirituwalidad, kaya naman maraming Ahas ang nagiging very religious o humahantong sa mistisismo at iba pang mga kakaibang ritwal na panrelihiyon.

Sinasabing bagay na bagay sa isang Ahas ang mga propesyon na may kaugnayan sa pulitika, artist o manlilikha, kung saan nai-express nila ang kanilang malalim na pagkilatis sa iba’t ibang uri ng likhang sining. Du’n naman naipamamalas niya ang kanyang pagiging malikhain ay tunay ngang nagtatagumpay at nagiging maligaya ang Ahas. Dagdag pa rito, tugma at bagay din sa Ahas ang pagiging religious leader o organizer. May tendency na kung magtatayo ng sariling kulto, paniniwala o relihiyon ang Ahas, tiyak na ang nasabing kongregasyon ay magkakaroon ng napakaraming miyembro o disipolo, hanggang ito ay mapabantog at sumikat nang sumikat sa iba’t ibang panig ng mundo.

Itutuloy

Year of the Snake, dapat umiwas sa kakaibang relasyon dahil mapapahamak

ni Maestro Honorio Ong - @Forecast | Febuary 12, 2022

Sa pagpapatuloy ng Forecast 2022, tatalakayin naman natin ang pangunahing ugali at ang magiging kapalaran ng animal sign na Snake o Ahas.

Kung ikaw ay isinilang noong 1941, 1953, 1965, 1977, 1989, 2001 at 2013, ikaw ay mapabibilang sa animal sign na Snake o Ahas.

Ang Ahas o Snake ay siya ring Taurus sa Western Astrology, na may ruling planet na Venus.

Sinasabing higit na makamandag at agresibo ang mga Ahas na ipinanganak sa tag-araw at tag-sibol kaysa sa kapatid niyang Ahas na tutulog-tulog na isinilang naman sa panahon ng tag-lamig o tag-ulan.

Likas na mapalad ang Ahas tuwing sasapit ang alas-9:00 hanggang alas-11:00 ng umaga, higit lalo sa direksiyong timog at timog-silangan (south at southeast).

Kilala sa pagiging mapang-akit, tuso at may itinatagong kakaibang talino at taglay na mataas na karunungang wala sa ibang animal sign ang isang Ahas.

Bagama’t may praktikalidad at materyoso, kilala rin ang Ahas sa pagiging relihiyoso at kung hindi masasawata, magiging panatiko sa isang relihiyon o sobrang malululong sa pag-aaral at pagsasaliksik ng mga kakaibang karunungang lihim at mistisismo.

Sa kabila nito na may pagkarelihiyoso, higit din nilang binibigyang-prayoridad ang pagpapasarap ng katawan, saya at lahat ng gawaing sensuwal. Kaya naman ang Ahas ay itinuturing ding masarap kasama at magmahal dahil ini-express niya talaga nang todo ang lahat ng kasarapan at ikaliligayang pangkatawan.

Kilala ang Ahas sa pagiging masarap kumain, nangangarap ng magara at napakagandang bahay.

Mahilig din siya sa mamahalin at branded na kasuotan, nagpupundar ng magagara at mamahaling alahas. Basta lahat ng maganda, masarap, makulay at malasa, magara at kahanga-hanga at nakakahalina sa mga mata at five senses ay talaga namang kinahuhumalingan ng Ahas.

Dahil sa mga katangiang nabanggit, hindi naman binibigo ng langit ang kanilang layaw na pangkatawan dahil ang nasa itaas mismo ang nagbibigay sa kanila ng masuwerteng buhay sa larangan ng materyal na bagay upang matustusan nila ang kanilang mga gustong pagpapasarap sa buhay.

Kumbaga, likas na pinagpapala ang Ahas sa larangan ng career, negosyo at mga gawaing pagkakaperahan upang ma-satisfy nila ang kanilang mga luho at pagpapasarap sa buhay.

Dahil dito, siya ay maaaring malulong sa sugal, alak at lahat ng uri ng bisyo, na dapat iwasan upang hindi maubos ang kanilang kabuhayan at upang tuloy-tuloy na mapanuto, manatiling buo, maging matagumpay at maging maligaya ang itatayo nilang pamilya.

Dagdag pa rito, dahil matalas ang isip at likas na matalino ang Ahas, malayo pa lang ang panganib ay nasasagap at naiiwasan na nila ito, higit lalo kung halimbawang may mga taong may masamang motibo o binabalak sa kanila. Tunay ngang madali nila itong nakikilala, kaya sa anumang uri ng panganib na may kaugnayan sa panloloko, kahit na utakan at lamangan mo ang Ahas, hindi mo siya maiisahan dahil higit siyang matalino at tuso kaysa sa mga dalubhasang manloloko sa buong mundo.

Dagdag pa rito, bagama’t maraming lihim sa buhay na ayaw ikuwento sa iba, kapansin-pansin naman ang kakaibang misteryosong ganda ng Ahas. Kaya kapag pumasok na siya sa isang silid, hindi maitatangging ang lahat ng nakakita sa kanya ay lihim na humahanga at nahahalina sa taglay niyang kakaibang personalidad.

Dahil dito, ang Snake ay itinuturing ding isa sa may pinakamalakas na karisma, sex appeal o pang-akit na wala sa ibang animal signs. At dahil sa kakaibang karisma at pang-akit na ito, ang mga Ahas din ang pinagkakalooban ng langit ng masasalimuot at kakaibang pakikipagrelasyon at makukulay na pag-ibig, na kung hindi nila ito iiwasan, ang mga kakaibang relasyon ding ito ang maaaring magpahamak sa kanila.

Itutuloy