Snake, ‘di showy sa feelings pero grabe ‘pag nainlab sa karelasyon

ni Maestro Honorio Ong @Forecast | January 28, 2023

Ipagpatuloy natin ang pagtalakay sa mga katangian at kapalaran ng animal sign na Snake o Ahas ngayong Year of the Water Rabbit.

Sinasabi ring dahil likas na matalino, hindi basta-basta naigugupo ng mga pagsubok at mga suliranin ang Ahas. Sa halip, kadalasan ay nagagawa nilang tawanan at balewalain ang mga problemang dumarating sa kanila. Subalit kapag nagseryoso ang Ahas, kahit gaano pa kahirap at kabigat na mga problema ay kayang-kaya niyang solusyunan, kaya sinasabi ring wala kang makikitang Ahas na bigong-bigo sa buhay dahil sa totoo lang, tulad ng nabanggit, kahit ibaon mo sa problema ang Ahas, kung gugustuhin nila, kayang-kaya nilang makaahon agad.

Dagdag pa ng sinipi nating aklat na Chinese Elemental Astrology ni E. A. Crawford et al, “The Chinese believe that the Snake is one sign who must, by hook or by crook, resolve any Karmic problems within the span of his lifetime.” Ibig sabihin, kahit kulungin mo sa rehas ng mabibigat at nakatakdang mga problema at suliranin ang isang Ahas, tiyak na babaluktutin niya nang magaan ang rehas ng mga problema, hahakbang siya palayo sa selda, parang walang nangyari at muli siyang magiging malaya at maligaya.

Sa sining, career at propesyon, may kakayahan ding makalikha ang Ahas ng masterpiece na kanyang nililok o ginawa, na bagama’t hindi a-appeal sa pangkaraniwang mga tao, sa mundo naman ng mga supistikadong tao na may malalim na kaisipan at mundo ng matatalino, tunay ngang hahangaan at pararangalan ang mga likhang sining ng isang Ahas dahil siya ay may malalim na panlasa sa sining at kulutura.

Dagdag pa rito, dahil may kakaibang magnetismo at pang-akit, na may kombinasyon pa ng mabilis at matalas gumanang isipan ng isang Ahas, bagay sa kanya ang mga propesyong may kaugnayan sa pulitika, artista, at religious leader.

Sa pag-ibig at pakikipagrelasyon, tugma sa pagkatao ng Ahas ang kasabihang, “Kapag tahimik ang ilog, tiyak na ito ay malalim.” Oo, sobrang lalim talaga ang pagkatao ng Ahas, pilit niyang itinatago ang kanyang damdamin at pagiging mahilig. Kadalasan ay nagkukuwari siyang “Okey lang,” pero ang totoo ay hindi siya okey. Sa pag-ibig ay ganundin, kung saan hindi niya ipapahalata na gusto ka niya dahil sa totoo lang, patay na patay siya sa iyo.

Minsan naman, hindi niya naipapahayag ang kanyang sarili sa natural na paraan dahil kapag umiibig siya, nagpaplano pa siya bago ipatupad ang kanyang diskarte.

Wala sa kanya ang salitang ‘act naturally’ kapag nagmamahal, subalit kung magagawa niya ang diskarte na kumilos nang natural, makakaramdam siya ng mas sarap at malasang kaligayahan na dulot ng tunay at dalisay na pag-ibig.

Dahil hindi showy ang Ahas, lumalagpas sa kanya ang masasarap na karanasan sa pag-ibig na dapat ay tinatamasa niya sa kasalukuyan, kung saan halos baliktad sila ng ugali ng isang Aso na kapag umibig ay sagad sa buto na ini-express at dinadama talaga niya ito.

Pero ang ikinaganda naman sa Ahas, sa sandaling nahulog ang loob niya sa iyo at tuluyan siyang na-in love, dahil hindi na niya nagawang itago pa ang kanyang damdamin o sabihin na nating nagkabistuhan na, sa sandaling ito ay lumalabas ang pagiging sensual at malambing ng isang Ahas.

Kaya kung tutuusin, masarap din siyang maging karelasyon at mapangasawa dahil may kakayahan siyang i-express nang todo ‘yung hilig o pagnanasa niya sa iyo sa mas malambing, mainit at masarap na paraan.

Samantala, makakabuo ng meaningful at masayang relasyon ang Ahas at Dragon, ganundin ang Tandang at Baka ay tugmang-tugma sa isang Ahas.

Magiging maayos at tugma ang relasyon ng Ahas, Kuneho at Kambing o Tupa, at kung magkakatuluyan, makakabuo rin sila ng maligaya, maunlad at panghabambuhay na pamilya.

Higit namang magiging positibo at maganda ang kapalaran ng Ahas ngayong 2023 sa buwan Abril hanggang Mayo at sa buwan ng Agosto at Setyembre, ganundin sa buwan ng Disyembre at Enero 2023.

Mapalad ang mga numerong 2, 5, 6 at 8, habang suwerteng oras naman ang alas-9:00 hanggang alas-11:00 ng umaga. Buwenas din sa Ahas ang kulay na red, green, yellow, lavender at black, higit lalo sa direksyong timog, timog-kanluran at hilagang-kanluran.

Itutuloy

Isinilang sa Year of the Snake, walang kinatatakutan

ni Maestro Honorio Ong @Forecast | January 26, 2023

Ipagpatuloy natin ang pagtalakay sa mga katangian at kapalaran ng animal sign na Snake o Ahas ngayong Year of the Water Rabbit.

Tunay na ang lihim na ugali ng Ahas ay walang iniwan sa Matandang Ahas na tumukso sa Unang Babae sa mundo. Gamit ang mahusay niyang pananalita at pangungumbinsi, madali niyang napaniwala si Eva, na naging dahilan upang kainin ang bawal na prutas sa halamanan ng Eden, kaya naganap ang unang paglabag o kasalanan ng tao sa Diyos.

Kaya kung seseryosohin upang pagkaperahan o gamitin sa negosyo ang husay niyang ito sa pangungumbinsi at panghihikayat, walang duda na sa larangan ng pangangalakal at pagbebenta, ang Ahas ay tiyak na aasenso hanggang sa tuloy-tuloy na yumaman.

Ayon sa aklat na Chinese Elemental Astrology ni E.A. Crawford, et al, “Loaded with sex appeal and discretion, they exude a dramatic air of mystery. When a Snake enters a room, people always notice that he or she is there. Cinderella was most certainly a Snake.”

Ang isa pang maganda at positibong ugali ng Ahas ay hindi siya basta-basta naiistorbo, kinakabahan o nababahala nang labis sa mga negatibong pangyayari na nagaganap sa mundo at sa mga negatibong pangyayaring nagaganap sa kanyang kapaligiran.

Basta para sa isang Ahas, ang buhay ay ganyan lamang, walang panghihinayang at walang kinatatakutan, sapagkat alam at kuwentado niya ang hiwaga ng kalikasan at marunong siyang sumakay at magsaya sa araw-araw na takbo ng mga pangyayari sa kanyang kapaligiran. Kadalasan, pangit o maganda man ang maganap, nananatili siyang relaks at masaya.

Basta ang mahalaga sa isang Ahas ay batid niyang napaliligiran siya ng mabubuti, maaasahan at mapapakinabangang mga kaibigan. Kaya sa 12 animal signs, ang Ahas ang nakakapamili o sadyang pinagkalooban ng langit ng mabubuti at maaasahang kaibigan dahil para sa kanya, kaya niyang magtanggal o magbawas ng mga kaibigang traydor at hindi napapakinabangan.

Nagagawa niya ito dahil madali rin siyang magdagdag o mag-ipon ng mga kaibigang may silbi at maaasahan sa anumang sandali ng pangangailangan at kagipitan.

Bagama’t seloso o selosa at may pagka-possessive o makasarili, ang ikinaganda sa isang Ahas ay tulad ng nasabi na, hindi siya nanghihinayang na magtagal o mag-alis ng mga kaibigan o mga taong napamahal sa kanya, hangga’t nararamdaman niya na ang mga kaibigan at ang mga taong ito ay hindi na niya napapakinabangan pa.

Hindi siya nagpapahalaga sa relasyon dahil ang mas pinahahalagahan niya ay kung sino ang nakapagbibigay sa kanya ng saya at ganda. Ganu’n siya kapraktikal dahil kahit sabihin pang mahal niya ang kanyang karelasyon, tiyak na itatapon niya rin ito sa kangkungan sa sandaling hindi na siya nabibigyan nito ng saya, sarap at ganda. Dahil tulad ng nasabi na, mas pinahahalagahan ng Ahas ang ganda, sarap at saya sa isang relasyon nang higit sa nadarama niyang pag-ibig o pagmamahal sa kanyang kasuyo.

Ibig sabihin, madaling umibig at magmahal ang isang Ahas, subalit madali ring nawawala ang pag-ibig at pagmamahal na ito sa sandaling nawala na rin ang saya, ganda at sarap na nalasahan niya sa isang relasyon.

Itutuloy

Isinilang sa Year of the Snake, praktikal kaya masarap kasama

ni Maestro Honorio Ong @Forecast | January 24, 2023

Ipagpatuloy natin ang pagtalakay sa mga katangian at kapalaran ng animal sign na Snake o Ahas ngayong Year of the Water Rabbit.

Sa 12 animal signs na ipinatawag ni Lord Buddha sa kanyang palasyo, sinasabing Ahas ang isa sa may pinakamasarap na buhay at may matimyas na panlasa. Kung kagandahan, malasang pagkain at hayahay na pamamahinga ang pag-uusapan, Ahas ang numero-uno sa ganitong istilo ng pamumuhay.

Kung dadalaw ka sa bahay ng isang kaibigan at naramdaman mong napakarelaks ng ambience sa nasabing bahay, walang duda na ang bahay na ito ay pag-aari ng isang Ahas.

Kaya masasabing napakasarap na mapangasawa ng Ahas kung home-loving individual ka. Kumbaga, kung gusto mo na nasa bahay ka lang, ibigin mo ang isang Ahas at siguradong magiging maligaya ang iyong karanasan sa piling ng iyong pamilya.

Sa umpisa, aakalain mo na ang isang Ahas ay parelaks-relaks lang ang istilo ng pamumuhay, subalit habang lumalalim ang inyong pagkakaibigan, mapapansin mo na bukod sa relaks at napaka-cool ng kanyang pagkatao, ang Ahas ay nagtataglay din ng malalim na katalinuhan at katusuhan.

Gayundin, praktikal sila, mabilis mag-isip, tiyak kung kumilos at listo kung umasta. Ang mga positibong katangian na ito ng Ahas ay dagdag pa sa may charismatic niyang pagkatao, na nagiging dahilan upang siya ay maging kaibig-ibig sa sinumang kanyang makakasama. Kung tutuusin, gugustuhin mo talaga siyang makasama, hindi lang nang isang araw kundi makasama habambuhay.

Ngunit sa madilim na bahagi ng kanyang pagkatao, sinasabi rin na ang Ahas ay hirap magtiwala. Lagi siyang naghihinala o nagdududa sa kanyang mga kasama at mahilig magsupetsa kahit hindi naman totoo ang kanyang mga hinala.

Ang ikinaganda lamang, kahit siya ay naghihinala, at hindi basta-basta nagtitiwala, hindi niya ito ipinahahalata o pinangangalandakan. Sa halip, pilit niya itong inililihim at hindi mo mahahalata na pinaghihinalaan ka na niya nang hindi maganda.

Kaya masasabing isa sa pinakamahirap na maging kaaway, pero masarap maging kaibigan ang gumagapang-gapang at aali-aligid na Ahas sa iyong harapan. Sapagkat sa sandaling naging lihim mo siyang kaaway, halimbawa ay lihim siyang nainis o nainggit sa iyo, walang pagdadalawang-isip at hindi mo rin mapapansin, magugulat ka na bigla ka niyang tutuklawin.

Kung ikaw ay may kaibigang Ahas, mag-ingat ka sa kanya at huwag mo siyang bibigyan ng dahilan upang magduda, mainis, magkamali o magkasala ka sa kanya, lalo na kung paplanuhin mo siyang lokohin o dayain dahil bago mo pa ito magawa, tiyak na mauunahan ka niyang tuklawin. Huli na ang lahat at magugulat ka pa dahil sa halip na madiskartehan mo siya, ikaw ang mauunahan niyang argabyaduhin.

Dagdag pa rito, mahusay ding magtago ng kasalanan o pagkakamali ang isang Ahas. Kumbaga, kung may kinatatakutan man siya o kasalanang nagawa, hindi mo ito basta-basta mapapansin o mahahalata sa kanyang pagkatao.

Sa eksaktong paglalarawan, akala mo ay napakahusay, napakabait at napakatalino ng Ahas na iyong kaharap ngayon. Pero ang hindi mo alam, sa likod ng magandang pagkatao na ipinapakita niya sa iyo, mahusay niyang naikukubli ang lahat ng kanyang kahinaan at negatibong ugali, kaya nahulog agad ang loob mo sa kanya at ibinigay mo nang isandaang porsyento ng iyong pagtitiwala.

Itutuloy