ni Maestro Honorio Ong @Forecast | January 21, 2023
Sa pagkakataong ito, tatalakayin naman natin ang katangian at magiging kapalaran ng animal sign na Snake o Ahas ngayong 2023 o Year of the Water Rabbit.
Ang Snake o Ahas ay silang mga isinilang noong taong 1929, 1941, 1953, 1965, 1977, 1989, 2001, 2013, at 2025.
Ang Year of the Snake ay pinaghaharian din ng impluwensiya ng planetang Venus. Habang sa Western Astrology, ang Year of the Snake ay siya ring kumakatawan sa zodiac sign na Taurus.
Sinasabing higit na makamandag ang Ahas na isinilang sa panahon ng tagsibol at tag-araw, habang ang mga Ahas na isinilang sa panahon ng taglamig at tag-ulan ay iwas, gumagapang palayo at sila rin ang Snake na tinatawag na ‘ahas-tulog’.
Malalim at mahiwaga ang katalinuhan ng Ahas sa kumbinasyon ng pagiging malambing, sensual at masarap magmahal. Kung paanong napaghahalo at napaghihiwalay ng Ahas habang siya ay nakikisalamuha ang pagiging tuso at may malalim na simpatya sa kanyang kapwa, kumplikadong larong-palaisipan na mahirap tuusin ang kasagutan.
Ito rin ang dahilan kaya ang mga Ahas ay may mahiwagang pagkatao at may misteryosong personalidad na mahirap maarok. Ang misteryosong outlook na ito ng Ahas ang lalong nakakaakit sa dati nang taglay na magnetismo ng kanyang personalidad.
Masarap kasama ang Ahas dahil tulad ng nasabi na, siya ay mahiwaga, matalino, mapagmahal, sensual, malambing at mahiwaga. Ang Ahas ay parang laging may lihim sa loob ng kanyang pagkatao at kung bago mo siyang kakilala ay parang nais mong tuklasin ang lihim niyang ito hangggang sa unti-unti kang mabighani at tuluyang mahipnotismo ng taglay niyang karisma at kakaibang pagkatao.
Si Jacob ay isang Snake, consistent honor mula elementary hanggang kolehiyo. Si Jen ay isang Snake, pinakasikat at hinahangaan sa kanilang opisina dahil sa taglay niyang tagong landi, ngunit lantad na tahimik at sobrang kagandahan. Si Madelyn ay isang Snake na nakapag-abroad nang maraming beses at nakipagrelasyon sa kung kani-kaninong kalalakihan. Kung paanong may pitong kulay ang bahaghari, ganundin naging sobrang makulay ang kanyang karanasan sa pag-ibig. Sila ay ilan lamang sa mga ehemplo ng mga taong nananalaytay sa kanilang dugo at kapalaran ang pagiging tipikal na Ahas.
Masasabing hindi sila pangkaraniwan, sapagkat ang pagiging popular, mapang-akit, katalinuhan, at mahiwagang pagkatao ay mga katangiang nangingibabaw at kusang nagdadala sa kanila sa mataas na pedestal ng lipunan.
Dahil dito, sila ay sisikat at hahangaan nang todo sa lipunan na kanilang ginagalawan, kaya dapat ay matuto silang magkaroon ng kongkretong layunin sa buhay upang hindi sila matulad sa kaisa-isang pulang bulaklak sa gitna ng gubat na napaliligiran ng mga berdeng halaman. Ngunit matapos umusbong, bumuka at mamukadkad ang pulang bulaklak na nagsabog ng kanyang bango at kagandahan sa gitna ng kagubatan, ilang araw lang ang lumipas ay nanguluntoy, nalanta, nahulog sa lupa, tinangay ng hangin at nawala na. Nakakapanghinayang kung ganu’n dahil ang dating magandang bulaklak ay tuluyang naglaho at nabura.
Kung ikaw ay Ahas, habang sumisikat o nakikilala ka sa lipunan at habang tumatanggap ka ng maraming papuri at karangalan, dapat ay mayroon kang layunin, gustong gawin at pangarap na kailangan mong abutin. Sa ganu’ng paraan, kapag hindi ka na sikat, kapag matanda ka na o sabihin na nating kapag dumating ang iyong retirement period, kumbaga sa artista ay kapag nalaos ka at kapag hindi ka na makapag-perform sa tanghalan ng buhay, dapat ay nakamit mo na ang malaon mo nang pangarap o ang dulong ambisyon na matagal mong pinlano at hinangad.
Sa ganu’ng paraan, sa panahong naghunos na ang balat ng Ahas dahil sa katandaan, mananatili siyang maligaya at may masarap na buhay dahil sa panahon ng pagtanda, nakuha at ganap na niyang nakamit ang kanyang ‘ultimate goal’.
Ibig sabihin, habang ikaw ay bata, sikat at malakas, dapat may layunin ka. Ang ‘ultimate goal’ na ito ay pilitin mong maabot upang pagdating ng dapit-hapon sa iyong buhay ay wala kang panghihinayangan, sa halip ay magkakaroon ka ng masarap at maligayang pagtanda.
Itutuloy