Tandang, sobrang galing mangatwiran, kayang gawing tama ang mali

ni Maestro Honorio Ong @Forecast | March 23, 2023

Ipagpatuloy natin ang pagtalakay ng mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster sila ang mga isinilang noong taong 1933, 1945, 1957, 1969, 1981, 1993, 2005, 2017, at 2029.

Sa pag-ibig, dahil hindi niya basta masabi sa napupusuan niyang babae o lalaki ang kanyang pagmamahal o minsan ay kasama na niya ang nagpapaligaya sa kanya, pero pinipintasan pa rin niya at hinahanapan ng kapangitan — ang mga bagay na ito ang nagiging hadlang upang ang Tandang ay tuluyan na sanang magtatagumpay at magiging maligaya.

Kaya kung ikaw ay isang Tandang, ‘wag mo nang pangarapin pang ma-perfect ang isang bagay sa halip, kahit may kaunting mali o kapintasan mas mainam kung uunahin mo ang iyong layunin o plano, nang sa gayun ay hindi maantala ang tagumpay na matagal nang naghihintay. Tandaan, ang tagumpay na ito perfect man o hindi ay nakalaan sa iyo bago ka pa isilang.

Ganundin sa pag-ibig at pakikipagrelasyon, huwag mo ng pilitin na maging perpekto ang isang ugnayan. Mas mabuting hayaan mo na may mali o kaunting kapintasan nang sa gayun, kahit may bahagyang mali sa isang relasyon, maitatama at maitutuwid din naman ito habang kayo ay patuloy na nag-aalalayan at nagpapadama ng wagas na pagmamahalan sa isa’t isa.

Sa sandaling natanggap na ng Tandang na hindi naman talaga perpekto ang mundo dahil wala naman talagang relasyon na walang mali at kapintasan, dahil ang mga ito ay bahagi ng natural nating buhay sa mundong ito, saka lamang lubusang matatamasa ng Tandang ang bonggang-bonggang tagumpay at wagas na kaligayahan ngayong Year of the Water Rabbit.

Sa pagdedesisyon at pagbibigay ng payo, sinasabi ring madalas na nakaatang sa balikat ng Tandang ang tinatawag na “devil’s advocate”.

Dahil inaakala niyang siya ay matalino, magaling at mahusay na tagapayo sa lahat ng problemang dapat bigyan ng solusyon, palaging may kakaiba siyang paraan o solusyon na hindi kayang isipin ng pangkaraniwang tao.

Ganu’n kahusay ang kanyang pag-aanalisa, ‘yung tama ay nagagawa niyang mali, habang ang mali naman ay nagagawa niyang tama. Gayunman, hindi naman siya seryoso sa pagpapatupad nang kanyang solusyon o katwiran kundi para lamang sa debate o diskusyon. Kaya minsan ay nagagawa niyang pumanig sa akala ng iba ay mali, na kayang panindigan ng isang Tandang na ito ay tama.

Minsan ay hindi lang napaninindigan na tama ang isang mali, bagkus, nakakahiyakat din siya ng mga taong maniniwala at susunod sa kanya upang ipaglaban ang isang mali na ginawa niyang tama o ang isang tama na ginawa niyang mali.

Ibig sabihin, bukod sa mahusay magpaliwanag ang tandang, magaling din siyang mangumbinsi, lalo na kung ang pinag-uusapan ay tungkol sa mali at tama.

Itutuloy

Year of the Rooster, maaasahan sa lahat ng problema, pero ‘di kayang lutasin ang sariling isyu

ni Maestro Honorio Ong @Forecast | March 21, 2023

Ipagpatuloy natin ang pagtalakay mga katangian at magiging kapalaran ng animal sa sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1933, 1945, 1957, 1969, 1981, 1993, 2005, 2017, at 2029.

Ang isa pang nakakatuwa sa buhay ng Tandang, kahit siya ay bigung-bigo o sabihing siya ay laos, hindi niya ito paniniwalaan. ‘Yan ay dahil tulad ng nasabi na, kahit siya ay ilagay pa sa sobrang baba na kalagayan, iisipin pa rin ng Tandang na siya ay nasa ibabaw ng bundok o mataas pa rin ang tingin sa kanyang sarili na may pagka-angas at malutong pa rin ang kanyang pagaspas at tilaok.

Dagdag pa rito, isinilang ang Tandang upang ayusin ang lahat ng bagay. Kaya kapag may problema sa opisina o pagtatalo sa grupo na kanyang kinabibilangan, walang duda na isang tao lamang ang may kakayahang mag-ayos ng gulo, at walang iba kundi ang Tandang. Tunay ngang isa sa natatagong galing ng Tandang ang pag-ayusin ang lahat ng gulo sa mabilis na paraan.

Dahil magaling siyang mag-ayos at mag-manage, puwede siyang maging supervisor o manager. Madali niyang nagagawang pakilusin at pagalingin ang mga tao na kanyang nasasakupan, at ‘yun naman ang nangyayari. Halimbawa, ikaw ay may boss o teacher na Tandang, siguradong ikaw ay magiging mahusay na empleyado at estudyante.

Ang problema lamang, kahit magawa ng Tandang na mapahusay ang kanyang mga tinuturuan, sa isip-isip nito, “Parang marami pang kulang ang ginawa kong pagtuturo sa empleyado o estudyante kong ito,” kaya sa kabila ng kanyang hindi mapakaling isipan, palagi pa ring may lungkot at kulang sa mga diskarte at pagsisikap sa buhay. Kaya minsan, siya ay tinatawag ding “pesimistang Tandang” na laging nakatingin sa pangit na anyo ng buhay.

Bukod sa inaakala ng Tandang na siya ay matalino –na minsan ay totoo naman, pero kadalasan ay hindi – ang Tandang na sobrang perpeksyunista, ayaw na ayaw makakita ng mga bagay na mali at kapintasan. Sabagay, galit siya sa pangit at sa mga bagay na hindi nakaayos, kaya siya ay isang dakilang pintasero.

Sa kabila nito, ang nakakatuwa, palagi siyang may solusyon sa hindi magagandang bagay.

Madalas, masaya siyang nag-iisip kung paano itatama ang mga mali na nakikita niya at kung paano papagandahin ang mga bagay na may kapintasan. Ito ang isa sa nagpapasaya sa buhay ng Tandang– ang mag-isip nang mag-isip at mag-analisa ng kung anu-anong bagay sa silong ng langit. Inaakala ng Tandang na siya ay tunay na matalino dahil sa ugali niyang palaisip at mahilig mag-analisa.

Samantala, kadalasan ay tama naman ang naiisip niyang solusyon sa mga pangyayari.

Ang problema lang sa Tandang ay hindi niya agad naipatutupad ang solusyon o mga binabalak sa buhay dahil ayaw niyang kumilos nang may kulang o hindi pa masyadong perpekto ang isang proyekto.

Kaya ito ang pangunahing dahilan kaya nabibigo, hindi umuunlad at minsan ay hindi rin siya ganap na nagiging maligaya. At tulad ng nasabi na, dahil sa kakaisip niya at sa pagiging perpeksyunista, ipapatupad na lang ang isang bagay na tiyak namang ikauunlad niya, ngunit hindi niya ito magawa nang mabilis.

Dahil sa kakuparan ng Tandang na mag-execute ng mga plano niya sa buhay o solusyon sa isang problema, matagal bago niya mapitas ang napakalaking tagumpay na matagal nang inilaan sa kanyang kapalaran.

Itutuloy

Year of the Rooster, masyadong mataas ang tingin sa sarili

ni Maestro Honorio Ong @Forecast | March 18, 2023

Ipagpatuloy natin ang pagtalakay sa mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1933, 1945, 1957, 1969, 1981, 1993, 2005, 2017, at 2029.

Hindi lang palapintas at perpeksyunista ang Tandang, bagkus, mahilig din siyang makipagdebate.

Asahan mo na habang siya ay nagpapaliwanag, sa kanyang husay, napapabilib niya ang lahat ng nakikinig at nanonood.

Ang problema lamang, kapag may nakadebate na ang Tandang, kahit siya ay mali, hindi siya aamin, sa halip, pilit siyang maghahanap ng palusot upang hindi mo mapangalandakan ang kanyang pagkakamali. At dahil perpeksyunista, ayaw niyang makakita ng pagkakamali sa ibang tao, gayundin sa kanyang sarili.

Subalit kapag nagkamali talaga ang isang Tandang at napansin niyang ganu’n ang kanyang nagawa, tulad ng nasabi na, tatawanan niya lang ito at paninindigan niyang hindi siya nagkamali.

Kaya kung ikaw ay may karelasyon na Tandang, mas mabuting iwasan mong makipagtalo sa kanya dahil tiyak na hindi ka mananalo sa isang pilosopo at mahilig magpalusot na Tandang kahit huling-huli na siya.

Kung ikaw naman ay nagkataong nakapag-asawa ng Tandang, kailangang handa kang makinig sa mga katwiran niya at habaan mo ang iyong pasensya, gayundin, dapat kang makinig sa kanyang mga kuwento upang lalong lumawig at lumigaya ang inyong pagmamahalan habambuhay.

Samantala, dahil mahilig mamintas sa mga kahinaan at pagkakamali ng kanilang kapwa, kadalasan ay hindi masaya ang Tandang na makisalamuha sa mga kaibigan o lipunan na kanyang ginagalawan.

Ito ay dahil mas nauuna niyang makita ang pagkakamali ng kapwa kaysa sa mga tama at kabutihan nitong nagawa.

Dahil dito, minsan ay nagiging mailap ang Tandang sa kanilang mga kaibigan at kasamahan.

Halimbawa, sa trabaho o kung saang institusyon siya kabilang, ginusto niya man o hindi, ‘ika nga, aloof at may pagka-loner ang kadalasan nangyayari sa buhay ng Tandang sa panahong siya ay nakikisalamuha sa lipunan.

Ang nakatutuwa pa sa isang Tandang, bagama’t aloof at loner, sinasabi niyang siya ay matalino, magaling at sikat, sa isip-isip niya, kapag may pinaparangalan, habang nakaupo sa isang sulok at ‘yung pinaparangalan ay umaakyat na sa stage, bumubulong-bulong ang Tandang sa kanyang sarili at sinasabing, “Paano kaya naparangalan si Mr. Engot, eh, samantalang magaling pa ako r’yan?”

Ganu’n ang attitude ng Tandang sa halos lahat ng larangan ng buhay, palagi niyang naiisip na mas magaling siya sa kanyang kapwa at akala naman niya ay totoo ito.

Samantalang kapag siya ang mapaparangalan, ang nasa isip niya naman ay,“Kulang pa nga ang karangalang ito sa kakayahan at galing ko!”

Ganu’n kayabang ang Tandang, pero hindi niya ito pinagsasabi at nahahalata dahil hindi naman siya makuwento. Sa halip, tulad ng nasabi na, dahil aloof at loner siya, hindi niya nahahalata na sa loob ng natatago niyang katawan o unconsciously, siya lang talaga ang nakakaalam at minsan ay hindi niya pa ito alam, talaga namang ang mga Tandang, bukod sa sobrang bilib sa kanyang sarili ay sobrang yabang pa at akala mo ay magaling na magaling siya sa lahat ng kanyang kilala at nasasakupan.

Itutuloy