Mga dapat gawin sa pagsalubong ng Chinese New Year

ni Maestro Honorio Ong @Forecast | Enero 25, 2024

Bukod sa paglilinis, pagsusuot ng mga suwerteng kulay bilang preparasyon at pagsalubong sa Chinese New Year sa February 9, 2024. Ano pa nga ba ang dapat nating gawin upang tayo'y suwertehin sa buong taong ito?

Tulad ng naipaliwanag na kahapon, dapat ding maghanda ng pansit at iba pang uri ng pasta, dahil ang “mahabang pasta” ay siya ring sumisimbolo ng mahabang pagsasama, mahabang pagmamahalan at mahabang buhay.

Maghanda rin ng mga pagkaing malalagkit at matatamis sa hapagkainan upang mapanatili ang madikit at matamis na pagmamahalan ng bawat miyembro ng pamilya sa buong taong 2024.

Dagdag dito, ang 12 na uri ng prutas na hugis bilog ay mahalaga ring ihanda, at hindi dapat kalimutan ang prutas na pinya, dahil ang prutas na pinya ay nakakapagbigay ng suwerte at magandang kapalaran. 

Ang prosperity of bowl ay dapat ding ihanda sa ibabaw ng mesa na ilalagay naman sa sala ng inyong bahay, bilang pagsalubong sa Chinese New year sa darating na February 9.

Ang prosperity bowl ay dapat naglalaman ng 12 pirasong itlog na ipinalibot sa mangkok na nilatagan ng bigas. Isalit-salitan sa mga itlog ang laurel leaves at ang mga perang papel na binilog at tinalian ng kulay pulang ribbon. Pagkatapos, ilagay sa gitna ang kulay golden yellow na prutas na sunkist na sumisimbolo naman ng ginto at kayamanan. Hindi rin dapat mawala sa hapagkainan, ang walong klaseng nuts at mga bilog na matatamis na candies at chocolates. Kung saan, ito naman ay ang tinatawag na “tray of togetherness”. Ilagay ang iba't ibang uri ng nuts, candies at chocolates, sa maliit na walong platito o mangkok, at ilagay ito sa tray.

Ang tray of togetherness ay dapat na ipatong sa ibabaw ng mesa na laging nakikita ng bawat miyembro ng pamilya.  Tulad ng nasabi na, Pebrero 9 ng gabi ay dapat masaya na nating ipagdiwang at salubungin ang Chinese New Year upang matamo natin ang suwerte at magandang kapalaran sa buong taong 2024.

Ang lahat ng nasabing handa ay dapat na nasa ibabaw ng mesa sa pagsalubong sa Chinese New Year upang ang suwerte at magagandang kapalaran ay madaling masagap ng inyong pamilya.

Pagsapit naman ng alas-11:30 hanggang alas-11:59 ng gabi,  dapat din tayong mag-ingay bilang pagsalubong sa Year of  Green Wood Dragon, kung saan, pinaniniwalaang ang paglikha ng ingay ay pantaboy sa mga negative vibrations na nasagap natin  nitong nakaraang taong 2023, year of Black Water Rabbit at pampasuwerte. 

Bukod sa pag-iingay, ang pagsasabit ng ubas at 9 na palay sa harap mismo ng bahay ay pinaniniwalaang hihigop din ng suwerte at magandang kapalaran sa pagpasok ng taong Green Wood Dragon.

Pagdating naman ng alas-11:45 ng gabi, dapat din tayong magsaboy ng mga barya papasok sa sala. Ito ay dagdag suwerte, at pagdating ng alas-11:55 ng gabi, ilabas mo na sa iyong bulsa ang makapal na iba’t ibang uri ng pera at puwede rin dollar.

Pumuwesto ka sa entrance ng inyong bahay at bilangin mo ang makapal na perang papel na iyong hawak hanggang sa pumasok ang 2024 o ang year of the Green Wood Dragon o ang petsang February 10, 2024.

Kung saan, pinaniniwalaang ang pagbibilang ng makapal na halaga ng salapi ay daan upang sumagana ang iyong buhay, at madoble nang madoble ang iyong kita o income sa buong taong 2024.

Muli, manatili tayong nakasubaybay sa Forecast 2024 na eksklusibo n'yo lang mababasa sa pahayagang Bulgar upang marami pa kayong matutunan tungkol sa Chinese Element Astrology,  siyempre para mas umunlad, lumigaya ang inyong buhay sa pagpasok na pagpasok ng year of the Green Wood Dragon sa February 9 to 10, 2024.

Itutuloy… 

Mga pagkaing dapat ihain sa Chinese New Year

ni Maestro Honorio Ong @Forecast | Enero 24, 2024

Ayon sa Chinese Element Astrology ang elementong iiral ngayong 2024 ay ang Dragon na isa sa mga tampok ngayon.

Kaya ang tawag sa taong 2024 ay Green Wood Dragon. Kung saan, green o berde ang kulay ng mga halaman at punong kahoy na pinagmumulan ng “wood” habang ang Dragon ay isa sa pinaka-auspicious sign o isa sa itinuturing na pinakamasuwerte sa 12 animal signs ayon sa Chinese Element Astrology. Masasabing higit silang mas susuwertehin, uunlad, liligaya at sasagana, kung ikukumpara sa nakaraang taong 2023 o taon ng Black Water Rabbit.

Sa mga nagtatanong kung kailan ba magsisimula ang Chinese New Year na siya ring simula ng Green Wood Dragon, ito ay pangkaraniwang nagaganap sa panahon ng New Moon na tinatawag ding Spring Festival. Kaya tiyak ang isang maunlad at masaganang buhay sa pagsisimula ng Chinese New Year sa eksaktong petsa ng February 10, 2024.

Kaya para makinabang ka sa pagpasok ng Chinese New Year, at magkaroon ng madaming blessing sa buhay, dapat salubungin mo ito ng may galak hindi lamang sa iyong puso, kundi maging sa loob ng inyong bakuran o tahanan.

Kaya sa pagsalubong ng Chinese New Year sa gabi ng February 9, 2024. Ihanda mo ang iyong sarili at ang mismong bahay. Kailangan malinis na malinis ang paligid at siyempre malinis din ang iyong sarili. Magsuot ka ng bagong biling damit o damit na maginhawa sa iyong pangangatawan na may suwerteng kulay na berde o green, maaari rin ang kulay red o pula.

Pagkatapos, maghanda tayo ng iba’t ibang uri ng pansit o pasta, ‘wag mong masyadong putulin, dahil ang haba nito ay siya ring sumisimbolo ng mahabang pagsasama, mahabang buhay at mahabang pagmamahalan ng pamilya.

Bukod sa mga pansit na mahaba, mainam din na maghanda ng malalagkit na pagkain at bilog ang hugis, tulad ng tikoy at biko na hindi pa nahiwa. Kung saan, ang mga pagkain namang ito ay nagrerepresenta o sumisimbolo sa pagsalubong at pagpasok ng Bagong Taon, dahil nga matatamis ang mga pagkaing ito, inaasahan na magiging maligaya at matamis ding ang pagmamahalan ng bawat miyembro ng pamilya sa buong taong 2024.

Pansamantala, manatili kayong nakasubaybay sa ating Forecast 2024 na eksklusibo n’yo lang mababasa sa pahayagang Bulgar upang madami pa kayong matutunan, at para na rin umunlad, lumigaya at sumagana ang inyong pamilya sa pagpasok at sa buong taon ng Wood Dragon.

Itutuloy….

Dos and Don’ts para palarin ngayong 2024

ni Maestro Honorio Ong @Forecast | January 19, 2024

Nakaraan ay tinalakay natin ang mga suwerteng kulay para sa Year of the Wood Dragon na eksaktong elemento at animal sign na iiral ngayong taon 2024.

Sa susunod na mga araw ay tuluy-tuloy nating talakayin ang katangian ng bawat animal sign at kung ano ang mangyayari sa kanilang kapalaran. Kaya manatili lang kayong nakasubaybay at ‘wag kayong bibitaw sa ating Forecast 2024 na eksklusibo n’yo lang mababasa sa pahayagang Bulgar. 

Pero bago ‘yan, ang elementong kahoy o wood muna ang pag-aralan natin.

Muli, tandaan na ang Wood o Kahoy ay may katangian ng “expansion, abundance and fertility”, alam naman nating lahat na ang kahoy o punong kahoy na mismong pinanggagalingan ng elementong wood ay wala namang ginagawa sa lupa na kanyang kinatataniman, kundi ang lumago nang lumago, at pagkatapos ng paglago ay ang pamumulaklak at pamumunga.

Kaya masasabi talagang magiging maganda ang buhay ng bawat animal sign ngayong 2024. At dapat nating pasalamatan ang elementong wood o kahoy.

Sa kabilang banda, kapag ang kahoy o wood ay nalanta, dahil hindi na nadidiligan sa mahabang panahon sa hindi kagandahang kalagayan ang kahoy o ang punong kahoy ay tiyak na mabubulok ang sanga hanggang sa ito ay tuluyang mamatay.

Ano nga ba ang ibig kong sabihin? ‘Yun nga, bagama’t magiging maganda ang kapalaran ng bawat animal sign ngayong taon, hindi naman puwedeng hindi na tayo kumilos, hindi rin tayo puwedeng hindi madiligan o malagyan ng fertilizer dahil kapag ganu’n ang nangyari sa isang halaman o sa isang punong kahoy, tulad ng nasabi na, ito ay mananamlay at manunuyot hanggang sa tuluyang mamatay.

Kaya sa taong ito ng 2024, ang pinakamahalaga sa lahat ay kumilos ka. Umalis ka sa iyong comfort zone, kumbaga sa halamang baging, ngayon ka gagapang at lalago – ito ang magsisilbi mong pampasuwerte na magsisilbing fertilizer mo ngayong 2024, para lahat ng suwerte at magagandang kapalaran hatid ng Wood Dragon na ganap at tuluyang mapapasaiyo.

Ipinapaliwanag kong mabuti ‘yan dahil laging may nagsasabi sa akin at nababasa ko lang sa comment section na, “Bakit si Maestro Honorio Ong ay walang negative o pangit na hula para sa mga 12 animal signs? At bakit nga ba puro maganda lang ang hula ko sa prediksyon?”

Nangyaring ganu’n, eh kasi nga kung si God ang may gawa ng mga tao, ng kalikasan at lahat ng bagay na nakikita mo sa iyong kapaligiran, noong unang linggo ng creation, tatanungin kita, gagawa ba si God ng pangit?

Well, sige ako na ang sasagot para sa iyo, dahil si God ay tinatawag ding all-beautiful God, lahat ng ginawa niya ay tunay namang magiging maganda at mabuti, kaya masasabing lahat tayo ay suwerte, lahat ay may magandang kapalaran at walang malas.

Samantala, kung maitatanong mo ngayon kung bakit may minamalas o bakit may mga indibidwal na imbes suwertehin ay hindi nakatatagpo o hindi nakatatanggap ng magandang kapalaran? Eh kasi nga, kayo rin naman ang gumagawa nang ikapapangit ng inyong kapalaran, o baka hindi n'yo kasi alam kung paano pagagandahin ang inyong kapalaran na sa madaling salita isa kayong ignorante sa pagkilalala ng panloob at panlabas n'yong katangian. 

Kaya sa patuloy na pagtakalay natin sa Forecast 2024, ituturo ko sa inyo ang pangunahing katangian ng 12 animal signs, kung paano kayo higit na susuwertehin, liligaya at magtatagumpay sa buhay.