Mga dapat gawin ng Dragon para suwertehin ngayong 2024

ni Maestro Honorio Ong @Forecast | Enero 28, 2024

Ipagpatuloy natin ang pagtalakay sa mga katangian at magiging kapalaran ng animal sign na Dragon ngayong 2024 o Year of the Green Wood Dragon.

Ang Dragon ay silang mga isinilang noong taong 1928, 1940, 1952, 1964, 1976, 1988, 2000, 2012, 2024 at 2036.Mas madaling uunlad ang isang Dragon, kung hindi sila aasa sa kanilang mga magulang. Sinasabing kapag ang Dragon ay takot na maging independent, malabo at maaaring hindi umunlad ang kanilang buhay. Kaya dapat sa isang Dragon, hangga’t bata pa, matuto na silang mabuhay ng independent at hindi umaasa sa ibang tao. Dagdag dito, dahil likas silang masuwerte, bihira ka lang makatatagpo ng isang Dragon na bigo sa buhay, dahil karamihan sa mga Dragon ay successful, lalo na kung sila ay lalayo sa sinilangan nilang bayan.

Pinaniniwalaan din ng mga sinaunang Chinese na ang mga Dragon ay pinoprotektahan ng langit, kung ikaw ay may kasamang Dragon sa bahay, may proteksyon ka sa mga negatibong kaganapan. Kaya ang paninirahan ng isang Dragon sa inyong bahay ay talaga suwerte. Bagama’t karamihan sa mga Dragon ay maunlad, walang nakakapansin na sa kaibuturan ng pagkatao ng isang Dragon, mababakas mo sa loob ng kanyang puso ang malalim na kalungkutan. Ang kalungkutang ito ay ang dahilan kung bakit ang Dragon ay labis na matulungin at mapagbigay.Risk taker din ang mga Dragon, pero dapat hinay-hinay lang. Nangyaring ganu’n, sapagkat anumang panganib ay kaya nilang harapin, na kadalasan ito ang nagpapahamak o nagpapapangit ng kanilang kapalaran.

Kung minsan ay sumosobra talaga ang tingin nila sa kanilang sarili. Kaya hindi na nakagugulat kung makatatagpo ka ng isang Dragon na dating may negosyo at bahay, pero kanila itong binenta at sinanla dahil lamang sa pag-aakalang hindi sa kanila ito.

Pero huli na bago matuklasan ng isang Dragon na mali pala ang kanilang naging pasya.Minsan, ang Dragon ay nasasadlak din sa labis na kabiguan, ‘yun bang walang-wala talaga as in zero, ang nakatutuwa lang sa isang Dragon ay halimbawang nawalan sila ng ari-arian o anumang bagay dahil sa taglay nilang lakas at tiwala sa sarili, walang anu’t ano sa isang kisapmata, mabilis pa sa kidlat, ‘yung mga bagay na nawala sa kanila ay ibabalik ding isa-isa ng langit.Hindi lamang sa materyal na bagay nangyayari ito, dahil maging sa pag-ibig, anuman ang mawala sa kanila, mahal sa buhay, pamilya, career o karangalan, basta’t ‘wag lang silang mawalan ng pag-asa, at sa halip ay patuloy lang kumilos dahil isang umaga, pagmulat na pagmulat ng kanilang mata, nasa harapan na nila ang mga bagay na dating nawala sa kanila - tulad ng nasabi na, mas madami, mas masagana at mas maganda pa.

Kaya kung ikaw ay isang Dragon, bilang ganti sa mga tinatamasa mong magandang kapalaran, lalo na’t ito ay nakatakda ng dumating sa iyo isa-isa at sunud-sunod ngayong taong 2024. Ang una mong dapat gawin ay matuto kang magpasalamat sa nasa itaas, sa pamamagitan ng pagdarasal.

Kapag lagi mo itong ginawa, makikita mo, mas madaming suwerte at magandang oportunidad ang darating sa iyo. Ang puhunan mo lang dapat ay sunggab nang sunggab!Manatili kayong nakasubaybay sa Forecast 2024, na eksklusibo n’yo lang mababasa sa pahayagang Bulgar upang marami pa kayong matutunan at matuklasan tungkol sa inyong kapalaran. Sa taong ito ng 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat gawin upang suwertehin at magtamo ng mas marami pang mga suwerte sa buong taong ito ng Year of the Green Wood Dragon. 

Itutuloy… 

Dragon, pinakamapalad sa 12 Animal Signs

ni Maestro Honorio Ong @Forecast | Enero 27, 2024

Ngayong alam n’yo na ang pagkakapareho at pagkakaiba ng Western at Chinese Astrology. Simulan na nating talakayin ang pangunahing ugali at kapalaran ng 12 animal signs. Unahin na natin ang Dragon na siya ring iiral ngayong taon.

Ang Dragon ay silang isinilang noong taong 1928, 1940, 1952, 1964, 1976, 1988, 2000, 2012, 2024 at 2036.Ang Dragon ay siya ring Aries sa Western Astrology na nagtataglay ng ruling planet na Mars. Ang mapalad na oras ng mga Dragon ay mula alas-7 hanggang alas-9:00 ng umaga. Habang ang kanilang masuwerteng direksyon ay ang east o ang silangan at east-southeast o timog silangan.Kadalasan, tinatawag din ang Dragon bilang “anak ng kapalaran” dahil sa 12 animal signs na pinatawag ni Lord Buddha, ang Dragon ay itinuturing din na pinakamakapangyarihan, pinakamasuwerte at pinakamapalad.

Kung saan, may mga kapalaran ng nakatakda sa kanila. Bukod sa mapalad at makapangyarihan, nagtataglay din ang Dragon ng kakaibang suwerte na wala sa ibang animal signs, lalo na kung siya’y nagsusuot ng mapalad niyang kulay na red o pula.

Kabilang sa mga suwerte ay ang kanilang pagiging lider ng mga organisasyon, samahan, lalawigan o bansa at sa pinakarurok ng kanilang pamumuno sila rin ay nagiging isang diktador o emperor ng isang maunlad at dambuhalang kaharian.

Dagdag dito ang pagiging matapang at makapangyarihan ay likas din sa isang Dragon at ang katapangang ito ang kadalasang nagiging puhunan upang sila’y manaig at magtagumpay sa kanilang buhay.

Likas ding malakas ang kanilang intuition, kung kaya’t sa oras ng panganib agad nilang nasasagap ang mga kaganapan, dahil dito maaga nilang nasosolusyunan ang anumang problema dumarating sa kanilang buhay.

Kapag may gusto namang luminlang o manloko sa isang Dragon agad din niya itong nararamdaman,  kung kaya’t sinuman ang kahina-hinalang manlalamang o manlilinlang sa isang Dragon, ito ay tiyak na hindi magtatagumpay dahil sa taglay na talas ng intuition o pakiramdam ng isang Dragon.At dahil nga makapangyarihan ang Dragon, noong unang panahon ay madaming magkasintahan sa bansang China na nagmamadaling magpakasal sa panahon ng Rabbit upang tiyak na magkakaroon ng isang anak na isinilang sa Year of the Dragon.

Manatili kayong nakasubaybay sa Forecast 2024, na eksklusibo n’yo lang mababasa sa pahayagang Bulgar upang madami pa kayong matutunan at matuklasan tungkol sa inyong kapalaran. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin at magtamo ng mga biyaya sa buong taon ng Year of the Green Wood Dragon.

Itutuloy… 

Kumbinasyon ng Zodiac at Animal sign ngayong 2024

ni Maestro Honorio Ong @Forecast | Enero 26, 2024

Ngayon alam na natin kung ano ang gagawin sa pagsalubong sa Chinese New Year. Talakayin naman natin ang pangunahing ugali at magiging kapalaran ng 12 animal signs sa taong ito ng 2024.

Ang una nating bibigyan interpretasyon ay ang Dragon. Kapag Dragon ka, at nagkataong Dragon din ang year 2024, sinasabing magiging katamtaman lang ang takbo ng iyong kapalaran, hindi suwerte at hindi rin naman malas. Pero hindi totoo ‘yun. Kaya lilinawin muna natin ang pagkakaiba at pagkakapareho ng Chinese Astrology at Western or Chaldean Astrology.

Nang tumingala sa langit ang mga sinaunang Chinese Astrologers, nakita nila ang 12 punpon ng mga bituin or constellation, at tinawag nila itong animal signs.

Samantala, nang tumingala naman ang mga Western Astrology, hindi naman talaga sila taga-Western kundi taga-Middle East, sa partikular ay ang mga Chaldean Astrologers, nakita rin nila ang 12 constellation ng mga bituin sa langit o constellation at tinawag nila itong 12 zodiac signs.

Ibig kong sabihin, hindi kailanman nagsisinungaling ang asignaturang astrology, dahil may 12 constellation ng mga bituin na umiimpluwensya sa kapalaran ng bawat tao sa araw mismo ng kanyang pagsilang. Nangyaring ganu’n, dahil ang natuklasan ng mga sinaunang Chinese Astrologers ay siya ring katotohanan na natuklasan ng Chaldean Astrologers.

Ang pinagkaiba lang nila, naniniwala ang mga sinaunang Chinese Astrologers na yearly ang ikot ng 12 animal signs habang ang Western Astrology o Chaldean Astrology, buwanan ang ikot ng 12 zodiac signs. At siyempre ‘yung isa pang pagkakaiba, ‘yung obvious na tawag ng Chinese Astrologers sa punpon ng mga bituing nakita nila sa kalangitan, dahil ang lahat ng ito ay binase nila ang pangalan o tawag sa mga hayop, kaya nga tinawag na animal signs. Samantala, ang Chaldean Astrologers ay tinawag itong zodiac signs dahil sa kalahating tao at kalahating hayop, tulad na lamang ng Sagittarius. May mga tao rin, tulad ng Gemini, Virgo at Aquarius, bukod pa rito, may zodiac sign din silang ipinangalan sa bagay, tulad ng Libra o Timbangan. 

Anu’t anuman, isa lang ang nais kong tumbukin na wala namang halos pagkakaiba ang Chinese at Western Astrology, dahil ‘yun din naman ang mga constellation na umiimpluwensya sa buhay at kapalaran ng bawat tao.

Narito ang pagkakatulad ng bawat animal signs mula sa Chinese Astrology at zodiac signs mula naman sa Western or Chaldean Astrologer.

• Dragon - Aries

• Snake o Ahas - Taurus

• Horse o Kabayo - Gemini

• Goat o Kambing - Cancer

• Monkey o Unggoy - Leo

• Rooster o Tandang - Virgo

• Dog o Aso - Libra

• Pig o Baboy - Scorpio

• Rat o Daga - Sagittarius

• Ox o Baka - Capricorn

• Tiger o Tigre - Aquarius

• Rabbit o Kuneho - Pisces.

Muli, manatili kayong nakasubaybay sa Forecast 2024, na eksklusibo n’yo lang mababasa sa pahayagang Bulgar upang marami pa kayong matutunan at matuklasan tungkol sa inyong magiging kapalaran, para magamit n’yo upang mas lumigaya at sumagana ang inyong buhay sa pagpasok na pagpasok ng Year of the Green Wood Dragon sa February 9 to 10, 2024.

Itutuloy…