Mga kapalaran ng Tupa ngayong 2024

ni Maestro Honorio Ong @Forecast | Pebrero 20, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Sheep o Tupa.

Ang Sheep o Tupa ay silang mga isinilang noong taong 1931, 1943, 1955, 1967, 1979, 1991, 2003, 2015 at 2027.

Sa taong ito ng 2024, asahan ang mabilis na pagbabago sa buhay at kapalaran ng isang Tupa. Gayunman, ang lahat ng mga pagbabagong ito ay bahagyang magdadala sa isang positibo at paborableng pag-unlad sa kanilang kapalaran, higit lalo sa larangan ng career, negosyo, pinansyal, propesyon, lipunan at maging sa pag-ibig o sa pakikipagrelasyon.

Kaya naman nangyaring “bahagyang pag-unlad lamang” dahil ang totoo nito, ang kapalaran ng isang Tupa ay nakadepende pa rin sa lakas ng loob na kanilang pinapamalas sa taong ito ng Wood Dragon. Ibig sabihin, kapag wala silang takot na umalis sa kanilang comfort zone, mas malaking tagumpay at pagpapala ang kanilang aanihin.

Sa negosyo at aspetong pagkakaperahan, sinasabing kung naging matumal o mahina ang kita nitong nagdaang taon, sa buong taong ito ng 2024 may pangako ng pag-unlad, lalo na sa unang hati o first quarter ng taong 2024, mula sa buwan ng Pebrero hanggang Marso. Magtutuluy-tuloy ang suwerte ng Tupa hanggang sa buwan ng Hulyo.

Muli namang gaganda ang aspetong pangkabuhayan sa pagpasok ng buwan ng Setyembre. Kung saan, kusang darating ang maganda at positibong oportunidad na maaaring pagkaperahan, kaya habang papalapit ang Christmas 2024, dagdag-sipag ang dapat nilang ipatupad dahil tulad ng nasabi na, aangat ng kusa at todo ang kabuhayan sa nasabing huling quarter ng taong 2024, kaya tiyak na magiging masaya ang pasok ng Pasko at Bagong Taon.   

Sa may mga asawa na, tinatayang higit na iinit ang kanilang pagmamahalan sa taong ito ng 2024. Kung wala pa kayong anak, malaki ang tsansa na mabuntis si misis o kaya’y biglang mabuntis ang girlfriend na magbubunga ng isang cute at matalinong babaeng sanggol. Kaya kung hindi ka pa handa magkaroon ng sariling pamilya, iwasan n'yo ang mapupusok na mga sitwasyon. 

Kung mag-asawa naman kayo at nagbabalak na magka-baby, ang taong ito ang pinaka-paborableng taon upang ituloy ang nasabing balak dahil tulad ng naipaliwanag na, malaki ang posibilidad na magkaroon ng bagong sanggol na isinilang na magbibigay ng dagdag-galak at ligaya sa buong pamilya.

Sa mga single na naghahanap ng makakataling puso o makakarelasyon, tunay ngang ang taong ito ng 2024 higit lalo sa buwan ng Mayo hanggang Nobyembre at aabot pa hanggang Christmas 2024, siguradong magiging paborable ang lahat ng pagkakataon sa larangan ng damdamin, pag-ibig at pakikipagrelasyon.

Ibig sabihin, sa mga hindi mo inaasahang sitwasyon maaari ka ng magka-boyfriend o girlfriend.

Basta ang mahalaga, kapag may dumating na manliligaw o babaeng nagpaparamdam, kailangan hindi kayo tutulug-tulog.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….

Mga animal sign na swak sa mga isinilang sa Year of the Sheep

ni Maestro Honorio Ong @Forecast | Pebrero 20, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Sheep o Tupa.

Ang Sheep o Tupa ay silang mga isinilang noong taong 1931, 1943, 1955, 1967, 1979, 1991, 2003, 2015 at 2027.

Pagdating sa pakikipagrelasyon, hindi nagkokontrol ng Tupa ang mga pangyayari at sitwasyon. Ang nangyayari tuloy,  huli na bago nila matuklasan na niloloko o pinagtataksilan na pala sila ng kanilang partner. Kumbaga, dahil madaling bumigay ang kanilang damdamin, wala silang kamuwang-muwang o kamalay-malay na pinaglalaruan na pala sila ng kanilang kapareha. At ang masakit pa rito, dahil sa kanilang kabaitan kadalasan kahit niloloko na sila patuloy pa rin ang kanilang pagtitiis at pagpapaka-martir. Ngunit kung praktikalidad at tigas ng damdamin ang paiiralin ng Tupa sa pakikipagrelasyon mas malaki ang tsansa na makasumpong sila ng isang tapat at panghabambuhay na pag-ibig.

Dahil may pagkamahina, maramdamin at pagka-emosyonal, sinasabing the best na kapartner ng isang Tupa, ang isang indibidwal na may lakas na loob. Kumbaga, bagay na bagay sa isang Tupa ang animal sign na Kabayo. Kung saan, dadalhin ng Kabayo ang Tupa sa mga pakikipagsapalaran na ngayon pa lang nila mararanasan sa tanang buhay nila. Kaya naman, unti-unting tatapang at lalakas ang loob ng isang dating duwag na Tupa.

Bukod sa Kabayo, sakto rin nila kasama o kapareha ang isang tuso, maharot at kenkoy na Unggoy. Kung saan, malilibang ang malungkuting Tupa sa mga ikukuwento at ipaparanas sa kanya ng Unggoy. Kaya anumang bigat ang problema o suliraning dinadala ng isang Tupa, sa isang iglap ay makakalimutan niya lahat ng ito at para bang wala na siyang suliranin pang-iisipin sa sandaling makasama na niya ang isang Unggoy.

Bagay na bagay din sa isang duwag at laging nag-aalinlangan sa kanyang kakayahan na Tupa, ang isang matapang na Dragon, gayundin ang isang mapangaraping Kuneho, magkakasundo sila nito na mangarap habang nakasandal sa isang malaking punong kahoy na nakaharap sa magandang tanawin ng ulap at kabundukan. Kumbaga, habang magkasama ang Tupa at Kuneho, makakalimutan nila ang reyalidad. 

Tugma at okey din sa isang Tupa ang isang Tandang at Ahas. Kung saan, iga-guide ng isang Tandang at Ahas ang Tupa para maging praktikal at maging materyalismo hanggang sa matutunan ng Tupa na kumilos at umaksyon upang pagsumikapang lumago ang kanilang kabuhayan hanggang sa sila ay yumaman.   

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….

Mga nakakabilib na katangian ng Tupa

ni Maestro Honorio Ong @Forecast | Pebrero 19, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Sheep o Tupa.

Ang Sheep o Tupa ay silang mga isinilang noong taong 1931, 1943, 1955, 1967, 1979, 1991, 2003, 2015 at 2027.

Ang Tupa ay may malakas na intuition. Ayon sa mga sinaunang Chinese Astrologer, isa ang Tupa sa pinakamapalad na animal sign. 

Sa madaling salita, kahit hindi sila gaanong magsumikap, dahil sa likas nilang kabaitan, ang langit mismo ang nagpo-provide ng lahat ng kanyang mga pangangailangan.

Kaya kung makakakita ka ng Tupa na mabait at masipag, tiyak na sila ay yayaman.

Nangyaring ganu’n, dahil bukod sa binibiyayaan na sila ng langit ng kanilang pangangailangan, nadadagdagan pa ito dahil sa kanilang pagsusumikap. 

Kung matututo lang na mag-ipon ang Tupa para sa kanilang future bago mamahagi nang mamahagi, tiyak na sila ay yayaman.

Ang problema nga lamang sa Tupa, tulad ng nasabi na, masyadong silang mabait at mapagbigay, lalo na pagdating sa kanilang mga kamag-anak. Ang masaklap pa, ‘yung mga taong hindi karapat-dapat bigyan ay tinutulungan din nila.

Dahil dito, dapat na mag-ingat ang Tupa sa pagbibigay at dapat kinikilala muna nilang mabuti ang mga taong kanilang tinutulungan.

Sa pakikipagkaibigan, ang Tupa ay masarap ding maging kasangga, dahil kapag namomroblema ka tiyak na iko-comfort at aasikasuhin ka nila. Kumbaga, mararamdaman mo talaga sa kanila ‘yung pagmamahal. 

Sa katunayan, ang Tupa ay masarap ding magmahal. Hindi lang advice o payo ang ginagawa nila, bagkus kung sila lamang ang masusunod, ipapa-feel pa nila sa iyo na hindi ka nag-iisa.

Sa pag-ibig ang Tupa ay itinuturing ding hopeless romantic. Grabe at matindi rin sila kung umibig. Once na sila ay nagmahal, tiyak na ito ay totoo at tapat. 

Gayundin sa pamilya dahil para sa kanila, ito ang dapat bigyan ng higit na atensyon.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….