Mga katangian ng Unggoy

ni Maestro Honorio Ong @Forecast | Pebrero 25, 2024

Ipagpapatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Monkey o Unggoy.

Ang Monkey o Unggoy ay silang mga isinilang noong taong 1932, 1944, 1956, 1968, 1980, 1992, 2004, 2016 at 2028.

Ang Unggoy ay talaga namang masarap kasama, pero sa kabila ng mapagbiro nilang pagkatao, mayroon din pala silang pusong mamon.

Maihahalintulad ang inner self ng isang Unggoy sa isang payaso o clown na mahilig magpatawa, ngunit sa loob ng pasayong ito may malalim na lumbay at lungkot silang nadarama.

Kaya ang sinumang nakakaunawa sa malalim na kalungkutan ng isang Unggoy ay tiyak na mamahalin nila habambuhay.

Samantala, sinasabi ring pangkaraniwan sa isang Unggoy ang mabilisang pag-iisip at pagkikilos. Kaya naman kapag may problema, Unggoy agad ang kanilang nilalapitan.

Nangyaring ganu’n dahil ang Unggoy ang madalas makaisip ng kakaibang pormula o paraan kung paano masosolusyunan ang anumang uri ng suliranin kanilang kinakaharap, dahil nga bukod sa likas na tuso ang unggoy, likas din silang matalino at mapamaraan na halos ang kanyang mga naiisip na paraan ay tama talaga sa kahit na anumang uri ng sitwasyon.

Dagdag dito, sinasabi ring hindi lang may pagkatuso, mautak at matalino ang Unggoy, ang ikinaganda pa nito, alam niya kung paano babasahin ang motibo o iniisip ng mga taong nakapaligid sa kanya. Matatraydor o madadaya mo ang ibang animal signs na ipinatawag ni Lord Buddha sa kanyang palasyo, pero hindi ang mga Unggoy.

Ang mas kinaganda pa nito, kung sakali mang magtagumpay kang itulak ang isang maharot na Unggoy sa patibong na mayroong sari-saring problema, habang tinatanaw mo siya at pinagtatawanan, hindi mo alam pagkatalikod mo ay tuluyan na rin siyang makakaligtas sa ginawa mong patibong na pinaghulugan niya.

Nangyaring ganu’n, dahil sa totoo lang anumang sitwasyon ng buhay o gaano man kapanganib ang pangyayari, siguradong makakaisip siya ng isang ligtas at mahusay na daan paraan upang siya ay makatakas at makaahon ng ligtas sa kahit anumang uri ng suliranin na kanyang kinakaharap.

Oo ganu’n kagaling ang mga Unggoy, kaya ang mga Unggoy na nagkakaroon ng mabibigat na problema sa buhay, tiyak na sila ay madaling makaka-recover at makaka-move on.

Dagdag dito dahil likas na matuwid at makatarungan, pahirapan din silang yayain o kumbinsihin na gumawa ng pagkakamali o kapalpakan dahil tulad ng nasabi na, likas sa mga Unggoy ang matuwid at laging nakasandig sa katarungan at pagkakapantay-pantay. Bagama’t may katalinuhan, sinasabi ring ang Unggoy ay may maikli na pasensya at kapasidad para sa pag-aanalisa ng mga problema. Kaya naman hindi sa kanila tugma ang mga bagay na may mahabang isipin at nakakainip. Isang halimbawa na rito ay ang paglalaro ng chess. Malabong maging grandmaster o dalubhasang chess player ang isang Unggoy dahil kapag may mahaba silang isiping inaanalisa, tunay ngang naiinip siya.

Kaya kapag nagdesisyon sa buhay ang isang Unggoy, umasa kang mabilis at agad-agad niya itong gagawin at ipapatupad.

Kaya dahil sa ganitong naturaleza, kung minsan ay nagiging reckless o walang ingat ang isang Unggoy na nagiging dahilan ng kanilang kabiguan at kalungkutan sa buhay. Sinasabing kung magiging maingat lamang ang Unggoy sa kanyang mga pagdedesisyon at pagkilos, ‘yun bang hahabaan niya ang kanyang pag-aanalisa o pagpapasensya, hindi sana ay mas matagumpay at mas maligaya ang Unggoy ngayon.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….

Unggoy na miyembro ng pamilya, may dalang suwerte ngayong 2024

ni Maestro Honorio Ong @Forecast | Pebrero 24, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Monkey o Unggoy .

Ang Monkey o Unggoy ay silang mga isinilang noong taong 1932, 1944, 1956, 1968, 1980, 1992, 2004, 2016 at 2028.

Ang mga Unggoy ay kilala sa pagiging maharot, masayahin, sikat, pala-barkada at may pagkatuso. 

Sinasabing higit na mas malakas ang magnetismo at karisma ng Unggoy na isinilang sa panahon ng tag-araw o tag-init kung ikukumpara sa kapatid niyang isinilang sa panahon ng tag-ulan o tag-lamig. Ang mga Unggoy na ito ay medyo mahiyain, ayaw makisama at ayaw ma-expose sa lipunan.

Gayunman, hindi pa rin maitatanggi na isa sa mga pangunahing katangian ng Unggoy ay ang pagiging malakas at buo ang loob. Kaya mapapansin mo sa isang punong kahoy ang Unggoy ay hindi natatakot na magpabaging-baging at hindi alintana na sila ay maaaring mahulog. 

Ngunit sa katunayan, walang Unggoy na nahuhulog sa kabiguan ng buhay. Sa halip, kapag sila ay dumaraan sa mga pagsubok, madali silang nakaka-recover at nakakaahon. Nangyaring ganu’n, dahil mayroon silang tiwala sa kanilang kakayahan.

Ang pagiging matapang ng Unggoy ang kadalasang nagtutulak sa kanila na sumubok ng mga bagay na mapanganib. 

Ang mas nakakahanga pa sa kanila ay kahit gaano pa kapanganib ang isang sitwasyon, buong tapang nila itong hinaharap. 

Bukod sa mahilig sumuong sa mga panganib, nagpapasaya rin sa damdamin ng isang Unggoy ang pakikipagsapalaran. Dahil likas ngang masayahin at maliksing kumilos ang isang Unggoy, sa hindi sinasadya nahahawahan tuloy nila ng kaharutan at kasiglahan ang mga taong nakapaligid sa kanila. Kaya ‘yung mga tatamad-tamad kapag nakasama ang isang Unggoy ay tiyak na sisipag.

Sinasabing mahusay ding magpatawa at mag-entertain ang Unggoy sa kanilang mga kasama. Kaya kapag may mga kaibigan o barkada kang Unggoy, tiyak na hindi kayo mabo-boring dahil ang Unggoy na ito ang siguradong kikiliti sa inyong kaluluwa para ang inyong pagkabagot ay tuluyang lumisan. 

Ang pamilya na may Unggoy sa kanilang tahanan ay itinuturing na mapalad, dahil ang nasabing Unggoy ang magdadala ng saya at ligaya na aakit ng dagdag-suwerte at magandang kapalaran sa buong pamilya.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….

‘Di lang Dragon… Monkey, masuwerte rin ngayong Green Wood Dragon

ni Maestro Honorio Ong @Forecast | Pebrero 23, 2024

Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Monkey o Unggoy .

Ang Monkey o Unggoy ay silang mga isinilang noong taong 1932, 1944, 1956, 1968, 1980, 1992, 2004, 2016 at 2028.

Ang Unggoy o Monkey ay may zodiac sign na Leo sa Western Astrology na nagtataglay ng ruling planet na Sun o Araw.

Bago tayo magpatuloy, ang Unggoy ay kabilang sa triangle of affinity ng Dragon na siyang umiiral na animal ngayong 2024. Tunay ngang bukod sa Rat o Daga, ka-triangle of affinity din ng Dragon ang Monkey. Silang tatlo ang bumubuo ng “triangle of affinity,” kaya naman magkakatugma at magkaka-compatible ang mga nasabing animal sign.

Dahil ka-compatible ng Monkey ang Dragon, walang duda, at tiyak na ang Monkey ay isa rin sa animal sign na siguradong susuwertehin ngayong 2024.

Sa lahat ng aspeto, lalung-lalo na sa pinansyal, ang unggoy ay magtatamo ng magandang kapalaran ngayong Green Wood Dragon. Kung hindi gaanong naging maganda o positibo ang buhay ng Unggoy nitong nakaraang taon, siguro naman sa kasalukuyang taon ay susuwertehin na siya, lalo na kung hindi niya iaasa sa iba ang kanyang diskarte.

Tunay ngang kailangan ng Unggoy ngayong 2024 na maging independent at hindi umaasa sa plano, pangarap, at mga gustong gawin ng mga taong nakapaligid sa kanya. Sa halip, tulad ng nasabi na, ‘di dapat siya magpadala sa sulsol at sinasabi ng iba.

Magbubukas lamang ang pintuan ng suwerte ngayong 2024, kung mag-isa niyang paplanuhin ang kanyang nais sa buhay.

Samatala, kung may mga taong gustong sumawsaw o sumali sa kanilang plano, pwede naman, basta sa Unggoy dapat manggagaling ang anumang plano o initiative dahil sila ang suwerte at lalo pang susuwertehin sa taong ito.

Ang isa mo pang dapat gawin bukod sa maging independent ay ‘yung dating pinapagawa ng mga success story, ‘yun bang pag-alis sa comfort zone ngayong 2024.

Alam mo ba kung bakit mo kailangan umalis sa comfort zone? Dahil likas kang masuwerte sa panahong ito, alalahanin mo na “hindi ginawa ang bangka para ilagay lang sa pampang o dalampasigan.” Oo nga’t hindi masisira ang maliit na bangka kapag nasa dalampasigan lang dahil hindi naman niya nakakasagupa ng malaki at mataas na alon dahil nga nasa pampang lang ang bangka. Pero, alalahanin mo na ang bangka ay ginawa para ipalaot sa dagat, upang makipagharutan sa malalaking unos at alon, pagkatapos ng mga masalimuot na karanasan ng nasabing bangka, kahit sira-sira na ang kanyang katig, matapos ang unos ay muli silang makakabalik ng safe at tagumpay sa dalampasigan.

Ganu’n ka rin dapat sa taong ito ng 2024, kahit pa may madilim na ulap kang matanaw sa gitna ng karagatan, pumalaot ka pa rin sa hamon ng buhay, ‘wag kang matakot, dahil tulad ng nasabi na, ka-compatible ng Green Wood Dragon ang Monkey.

Tiyak na ang magaganap sa taong ito ng 2024, matapos mong pumalaot sa mapanganib na karagatan ng buhay, tulad ng bangka, makakabalik ka sa dalampasigan na punumpuno ng tagumpay at pag-unlad ngayong 2024 na inilaan ng langit para sa tulad mong isinilang sa animal sign na Unggoy.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….