11 months lang nagtagal… Ex-BF na seloso at may negative traits, ‘di dapat panghinayangan

ni Sis. Isabel del Mundo @Mga Kuwento ng Buhay at Pag-ibig | July 8, 2024

Dear Sister Isabel,

Nawa’y nasa mabuti kayong kalagayan kapag nabasa n’yo ang problema ko.

Nagsimula ang problema ko mula nang maging kami ng kapitbahay ko. Nagkamabutihan kami at habang tumatagal ang aming relasyon, napansin ko na mahina ang loob niya. May inferiority complex siya at seloso rin. Gayunman, pilit ko pa rin siyang inunawa dahil mahal ko siya.

11 months na ang relasyon namin nang makipag-break siya sa akin. Nag-aalangan daw siya sa akin dahil may trabaho na ako habang siya ay wala pa. Bukod pa roon, ‘di niya mapigilan ang magselos at ma-insecure sa mga lalaking akala niya’y may gusto sa akin. Nahihirapan daw siya sa ganu’ng sitwasyon, kaya naman mas pinili niyang makipaghiwalay sa akin. 

Alam mo ang mas masakit, Sister Isabel? Pinagpalit niya agad ako sa iba. Napakasakit ng ginawa niya sa akin, lalo na’t tinanggap ko ang pagkatao, kahinaan at iba pang negative traits niya. Hirap na hirap na akong tanggapin ang mga nangyayari. Paano kaya ako makaka-move on? Sana mabigyan n’yo ako ng payo para gumaan naman kahit papaano ang loob ko. 

Umaasa,

Glenda ng Cabanatuan Nueva Ecija

Sa iyo, Glenda,

Ganyan talaga ang pag-ibig, may nabibigo at mayroon din namang sa kasalan at panghabambuhay nauuwi. Bawat tao ay may kani-kanyang kahahantungan, marahil hindi pa ito dumarating sa buhay mo, at tanggapin mo na lang na hindi siya ang kapalaran mo. 

Glenda, may ibang tao pa kasing nakalaan sa iyo. Isipin mo na lang na kung siya ang mapapangasawa mo na mahina ang loob, may negatibong ugali, sa palagay mo kaya liligaya ka? Iniligtas ka lang ng Diyos sa ganu’ng sitwasyon kaya sa halip na malungkot ka, maging masaya ka na lang ngayon. Malay mo, paparating na pala ang lalaking inilaan sa iyo ng kapalaran. Mag-move on ka na at harapin mo ang iyong buhay. Huwag kang panghinaan ng loob, dahil may magandang plano pa ang Diyos para sa iyo. Ayaw lang ng Diyos na magdusa ka sa buhay may asawa, magpasalamat ka na lang na nakawala ka na sa lalaking iyon. 

Sumasaiyo,

Sister Isabel del Mundo

Super thankful sa family ng ex… Bebot, ‘di knows kung paano ipagtapat ang nalalapit na kasal

ni Sis. Isabel del Mundo @Mga Kuwento ng Buhay at Pag-ibig | July 4, 2024

Dear Sister Isabel,

Good day sa inyong lahat d’yan sa Bulgar! Matagal n’yo na akong tagasubaybay, at ang sarap basahin ng mga payo n’yo.

Gusto kong ibahagi sa inyo ang kuwento ng buhay ko. 16-anyos ako nang mainlab sa katulad kong teenager din na 17-anyos. Tutol ang mga kapatid ko sa relasyon namin, ulila na kami sa magulang, kaya ang mga kapatid ko na lang ang kasama ko sa bahay, ngunit wala sila buong maghapon dahil nagtatrabaho sila. 

Ramdam ko ang pagmamahal at pagmamalasakit niya sa akin. Dahil tutol ang mga kapatid ko, tinakas niya ako, at dinala niya ako sa bahay nila. Tinanggap ako ng nanay niya at itinuring bilang anak. Doon ko naramdaman ang hinahanap kong kalinga at pagmamahal ng isang ina. Isa pa, tinuring din akong kapatid ng 2 niyang nakababatang kapatid. 

Naging masaya ako sa bahay na iyon. 

Okey lang sa amin ang pangaral ng mother niya na ‘wag muna raw namin gawin ang ginagawa ng mag-asawa dahil bata pa kami. 

Pero after two years ng aming pagsasama, bigla siyang kinuha ng Maykapal. Naaksidente siya sa motor, at dead-on-arrival siya. Sobra akong nalungkot, at doon ko napagtanto na kaya pala kami hinayaan ng langit na magsama dahil maaga rin pala siya kukunin sa amin. 

Naka-move on naman na ako. Sa ngayon, may bago na kong mahal at handa niya akong pakasalan. 

Ang problema ko ay paano ko ito sasabihin sa nanay at mga kapatid ng ex-bf ko, natatakot ako na baka ‘di nila ako maunawaan. 

Paano ko sasabihin sa pamilya niya ang bagay na ito? Tulungan n’yo ako, Sister Isabel. 

Nagpapasalamat,

Susan ng Pampanga

---

Sa iyo, Susan,

Sa palagay ko naman ay mauunawaan ka ng pamilya niya. Kung paano ka inunawa ng nanay niya noon, natitiyak kong lalo ka niyang mauunawa ngayon. 

Sa kabilang dako, bago ka magpakasal kilalanin mo munang mabuti ang lalaking pakakasalan mo. 

Ang pag-ibig ay hindi isang kanin na iluluwa mo kapag napaso ka. Sa edad mong 18-anyos, alam kong hindi ka pa rin gaanong matured. Huwag puso ang lagi mong pairalin, minsan gamitin mo rin ang isip mo. Tulad ng una mong minahal, maging ganundin sana kabait ang lalaking nag-aalok ng kasal sa iyo. 

Hangad ko ang kaligayahan mo sa lalaking napili mong ipalit sa first love mo na maagang kinuha ng Maykapal. Maging karapat-dapat nawa siya, at patnubayan ka nawa ng Diyos. 

Sumasaiyo,

Sister Isabel del Mundo

Wa’ na kinikita sa negosyo… Dapat gawin sa asawang baon na sa utang

ni Sis. Isabel del Mundo @Mga Kuwento ng Buhay at Pag-ibig | July 1, 2024

Dear Sister Isabel,

Ang kuwentong ibabahagi ko ay tungkol sa lalaking napangasawa ko. 41-anyos na ako nang maisipan kong magpakasal. Mataas ang posisyon niya sa kumpanyang kanyang pinapasukan, ngunit maliit lang ang kanyang sinusuweldo, habang ako naman ay isang professional na dentista na may malaking sinusuweldo. 

Noong araw ng kasal namin, nagkaroon kami ng pagtatalo tungkol sa mga gastos. Sa awa ng Diyos, nairaos naman namin ang aming kasal at mga gastusin. 

Masipag at mabait ang napangasawa ko, kaya lang nagtataka ako dahil ang dami niya palang pinagkakautangan. Kaya ‘yung negosyong karinderya at computer cafe namin ay wala ring halos kinikita, dahil binabayad niya lang ito sa dati at kasalukuyan niyang utang. 

Nang malaman ng mga kapatid ko ang sitwasyon namin, agad nila kaming tinulungan upang mabayaran namin ang lahat ng utang ng asawa ko. 

Nagbukas kami ng bagong negosyo na ukay-ukay at halamanan, ngunit nabaon na naman sa utang ang asawa ko. 

Madalas ko siyang makitang tulala at ang masakit nito, parang may relasyon sila ng isa naming staff. Kinompronta ko siya, pero ayaw niyang umamin at sinabihan ko rin siya na mag-isip-isip siyang mabuti. Tingnan niya kung ano ba talaga ang gusto niya sa buhay, malaya ko siyang pinagdedesisyon pero sa totoo lang, gusto ko na siyang hiwalayan. 

Punumpuno na ako sa konsumisyong binibigay niya sa akin. Sobrang laki na rin ng pinayat ko, at maski ang hanapbuhay ko ay naaapektuhan na rin. 

Ano ba ang magandang solusyon na dapat kong gawin upang maging maayos ang aming pagsasama? May isa kaming anak at maayos naman ang pag-aaral niya. Mabuti naman siyang ama, ang hindi ko lang maintindihan kung bakit hindi siya makaahun-ahon sa pagkakautang. 

Ano ba ang gagawin ko, Sister Isabel? Dapat ko na ba siyang hiwalayan? Hihintayin ko ang payo n’yo.

Nagpapasalamat,

Imelda ng Taguig

---

Sa iyo, Imelda,

Ang buhay may asawa ay sadyang ganyan, hindi puwedeng walang problema. Kausapin mo nang masinsinan ang asawa mo, sa palagay ko ay kulang lang kayo sa komunikasyon. 

Ang sabi mo, mabait naman siyang ama sa nag-iisa n’yong anak. Hindi solusyon ang pakikipaghiwalay, unawain mo na lang kung anuman ang matuklasan mong dahilan kung bakit hindi siya makaahun-ahon sa utang.

Ihanda mo ang sarili mo sa matutuklasan mo. Bilang asawa, lawakan mo pa ang iyong pang-unawa. Naniniwala akong babalik din sa dati ang pagsasama n’yo. Tungkol naman sa feeling mong may relasyon sila ng isa n’yong staff, magmasid-masid ka muna at huwag mo agad siyang husgahan, dahil umaasa akong hindi totoo ang hinala mo. 

Huwag kang mag-alala dahil tiyak na magiging okey din ang pagsasama n’yo, lalo na kapag nagkaroon kayo ng time na makapag-usap. 

Lahat ng problema ay may solusyon, huwag ka agad susuko. Pinili mo ang buhay may asawa kaysa tumandang dalaga, kaya harapin mo ang mga pagsubok na iyan. Sa tulong ng Diyos, mailalagay din sa wasto ang pagsasama n’yo. 

Sumasaiyo,

Sister Isabel del Mundo