Gayuma (40)

ni Maria Angela Gonzales @Kuwentong Pag-Ibig | Pebrero 1, 2024

Hindi alam ni Gabriel kung bakit hindi niya magawang iwan si Glaiza kahit na mabuti na ang kalagayan nito. Iniisip na lamang niya na naging bahagi rin naman ito ng kanyang buhay. 

“Minahal ko ba ito nang todo?” Tanong niya sa kanyang sarili. 

Agad siyang napailing sa kanyang katanungan, alam niya kasi sa kanyang sarili na iisang babae lang ang kanyang minahal. 

“Princess…?” Mangha niyang bulalas nang maalala niya ito. Dumagundong ang kabog ng kanyang dibdib dahil hindi niya ito makita, at para bang gusto niyang batukan ang kanyang sarili dahil hindi niya ito napansin. 

“Hey…”

Biglang kumabog ang kanyang dibdib dahil sa kaba na baka iwanan siya ni Princess, ngunit natigilan naman siya nang marinig niya ang pagtawag ni Glaiza. 

“Kumusta na ang pakiramdam mo?” Masuyo niyang tanong sa dalaga, ngunit alam niyang walang ibig sabihin ang pag-aalala niyang iyon. 

Ngumiti ito sa kanya at sabay sabing, “Mabuti na dahil nakita na kita. Salamat at ikaw ang una kong nakita.”

Marahan siyang tumango rito. Hindi naman kasi niya alam kung ano ba ang kanyang sasabihin. 

“Mahal pa rin kita,” walang pakundangang sambit ng dalaga. 

“Salamat,” wika niya.

“Hindi mo ba sasabihin sa akin ang salitang I love you too?” nanunudyong tanong nito sa kanya. 

“May girlfriend ako.” paalala niya rito. 

“Si Princess?” dudang tanong nito. 

Ngumiti muna siya bago ito sinagot. “Yes, at wala ng iba.”

“Mahal mo ba talaga siya?”

Mabilis ang pagsasalita niya ng, “Mahal na mahal.”

“Kahit na ginayuma ka lang niya?”

Kumunot ang kanyang noo sa sinagot ni Glaiza. Kahit na narinig niya na iyon kay Princess. 

“Tayo ang tunay na nagmamahalan dito. Bumalik ka na sa akin.” 

“Hindi ko alam ang mga sinasabi mo.  Basta ang alam ko, mahal na mahal ko si Princess.”

“Pero…”

“Oo, niligawan kita kahit na si Princess ang tunay kong mahal.” 

Itutuloy…

Gayuma (39)

ni Maria Angela Gonzales @Kuwentong Pag-Ibig | Enero 31, 2024

Wala namang sinabi si Gabriel na hindi na siya mahal nito. Ngunit, mas pinili ng dalaga na huwag na munang magpakita rito. Deep inside, nag-e-expect pa rin siya na makikipagkita at makikipag-ayos ito sa kanya, pero malabo na iyon mangyari.

Masyado na kasi itong busy kay Glaiza. 

Magmula nang dumating si Glaiza, parang nagka-amnesia si Gabriel, binabalewala na niya ang kanyang nobya na si Princess. May karapatan bang magalit si Princess kina Glaiza at Gabriel?

Ang malinaw na sagot d’yan ay wala. Kung tutuusin, siya ang nanggulo sa relasyon ng dalawa kaya dapat lang na magdusa siya ngayon. Sabi naman ng mga ritualist, maaaring ulitin ang pagbibigay ng gayuma kay Gabriel, pero hindi na niya maaatim na gayumahin itong muli. Ang ibig niya ay maging masaya na talaga si Gabriel.

Naramdaman naman ni Princess na naging masaya ang kanyang nobyo.

Ngunit, hindi siya nakasisiguro kung tunay nga ba ito o dahil lang sa gayumang kanyang binigay. Isa pa, ibang mukha na ang nakikita nito sa kanya, kaya alam niyang isa ‘yun sa dahilan kaya madaling naglaho ang gayuma niya rito. Mahal na mahal niya si Gabriel kaya naisip niyang mas maigi pa sigurong magpakalayu-layo na muna dahil hanggang nasa tabi niya si Gabriel, tiyak na masasaktan lang siya. 

Ngunit siyempre, hindi na niya kailangang ipaalam sa binata at sa kanyang mga magulang ang kanyang pinaplanong gawin. Nakatitiyak kasi siyang hindi siya papayagan ng mga ito. 

Pero, hindi ba dapat magpokus siya kung papaano niya maibabalik ang kanyang hitsura? Marahas na buntong hininga ang pinawalan niya. Kung wala rin naman sa kanya si Gabriel, wala na siyang pakialam kung anong mukha pa ang mayroon siya ngayon. 

Itutuloy…

Gayuma (38)

ni Maria Angela Gonzales @Kuwentong Pag-Ibig | Enero 30, 2024

Gustong humagulgol ni Princess nang mga sandaling iyon. Ramdam kasi niya na naitsapwera na siya sa buhay ni Gabriel. Hindi na siya pinapansin ng binata at ramdam niyang wala na siyang kuwenta sa paningin nito. 

Nang makita ni Glaiza ang tunay na hitsura ni Princess, agad itong hinimatay, at sa gulat ni Gabriel binuhat niya ito at dinala sa guest room. 

“Ang sakit!” Sigaw ng puso ni Princess. 

“Nakaka-guilty naman,”dagdag pa niya. Binulong niya lang iyon, pero agad na lumingon sa kanya si Gabriel. 

“Why?!”

Napapitlag siya dahil ang lakas ng pagkakasabi ni Gabriel sa katagang iyon.

Pakiramdam niya ay sinisigawan siya nito. 

“Dahil sa akin kaya…”

“Huwag ka na muna kayang magpakita sa kanya?,”. 

Biglang tumulo ang luha ng dalaga. Pakiwari niya ay tinataboy na siya ni Gabriel.

Nawala na ba talaga ang pag-ibig nito sa kanya? 

“Damn,” wika nito. 

Ayaw na niyang magtanong pa dahil natatakot siya sa maaaring isagot ng binata.

“Alright,” sagot ni Princess, sabay talikod.

Narinig niyang tinawag siya ng binata, pero hindi na niya ito nilingon pa. Tiyak niya kasing masasaktan lang siya kapag ginawa niya iyon. Hindi rin siya nakasisiguro kung tinawag ba siya nito dahil gusto nitong sabihin na mahal siya o baka nais lang nitong magpaalam sa kanya. 

Noon pa man ay nakakaramdam na siya ng insecurity kay Glaiza. Ito kasi talaga ang gusto ni Gabriel, paano pa ngayong na-trap siya sa katawan ni Baninay? 

“Kung ganu’n, maiging magpakalayu-layo na lang ako.” 

Itutuloy…