Bilyonaryong Mafia ang Mahal Ko (26)

ni Maria Angela Gonzales @Kuwentong Pag-Ibig | Marso 9, 2024

Hindi makapaniwala si Nhel na magagawa niyang maging sunud-sunuran sa gusto ni Via. Isang malaking kalokohan na pumayag siyang ligawan at haranahin ito.

Nakita kasi ni Via ang gitara na nasa sulok ng kanilang silid. Kahit na marunong naman talaga kumanta si Nhel, hindi siya ang tipo ng tao na pagbibigyan anumang i-request sa kanya. Pakiwari niya tuloy ay hindi na siya makakapaghiganti.

Ngunit, maya-maya kinontra rin niya ang sinasabi ng kanyang utak, “Mas magiging masakit ang paghihiganti mo kung makukuha mo ang kanyang loob”. 

Kaya naman habang inaawit niya ang kantang may pamagat na “Ikaw lamang” ay diretso siyang nakatingin sa mga mata nito. Ibig kasi niyang makita nito ang kanyang katapatan o mas maiging sabihing kasinungalingan. Hindi naman kasi niya masasabi na totoo ang nararamdaman niya rito dahil hindi rin naman siya tunay na umiibig, para sa kanya, isang malaking kalokohan lamang iyon.

Napakaimposible kung iisipin niyang mahal niya si Via, samantalang ilang araw pa lang niya itong nakakasama. 

Napabuntong hininga siya nang maisip niyang bago sila magkita ay may paghanga na siyang naramdaman dito.

“Pagnanasa,” mariin niyang sabi sa sarili.

“Ang ganda ng boses mo, daig mo pa si Christian Bautista!”

“Hindi ko kailangan makarinig ng pangalan ng ibang lalaki,” inis niyang sabi. 

Tunay ngang nakaramdam siya ng matinding galit dahil nakuha pa nitong sabihin ang pangalan ng kanyang ex. Kahit hindi tuloy siya nakaharap sa salamin, tiyak niyang ang pula-pula ng kanyang mukha.

“Para tuloy gusto kong isipin na nagseselos ka.”

“Ba’t ako magseselos sa ex mo? Don’t tell me, hanggang ngayon may something pa rin sa inyo?”

“Hindi ko ex si Christian Bautista. Siya ang isa sa naging singer ng kinanta mo!” Nakangising sabi nito na para bang tuwang-tuwa.

Itutuloy…

Bilyonaryong Mafia ang Mahal Ko (25)

ni Maria Angela Gonzales @Kuwentong Pag-Ibig | Marso 8, 2024

“Dapat ba akong masiyahan sa ipinapakitang pagmamahal ni Nhel?

Naiinis na tanong ni Via sa kanyang sarili, pagkaraan ng ilang sandali ay mariin niyang sinabi ang katagang, “Hindi”. 

“Mag-ingat ka sa mga sinasabi mo, baka magkatotoo ‘yan, bahala ka.” Kunwa’y sabi niya. 

“Bakit parang excited ka?” Nag-aakusang tanong ni Nhel.

Kumunot ang noo niya at sabay sabing, “Kahit kailan hindi ako nasiyahan, kapag napapahamak ang kapwa ko.” Nakasimangot niyang sambit.

“Ang akin ay akin, kaya hindi ka na nila maaagaw pa,” wika nitong titig na titig sa kanyang mga mata. 

Napasinghap naman si Via sa ginawang tugon ni Nhel, at pakiramdam niya ay parang may malaking kamay na humahaplos sa kanyang puso. Pero, hindi naman sakit ang naidudulot nito, sa katunayan, para nga siya nitong kinikiliti.

“Hindi ka pa kasi sawa sa akin ngayon.”

“Sinong nagsabi sa iyo na pagsasawaan kita?” Naghahamong tanong nito sa kanya.

Agad naman na tumaas ang kilay ni Via at sabay sabing, “Ganyan naman kayong mga lalaki. Sa umpisa lang kayo magaling.”

“Mga walang kuwentang lalaki ang tinutukoy mo.”

“At ikaw, may kuwenta ka?.”

“Kaya nga pinakasalan kita.”

“At dahil iyon sa paghihiganti mo.”

“Wrong.”

“At ano ang dahilan?” Naghahamon niyang tanong.

“Dahil gusto kita.”

“Sige nga, patunayan mo.”

“Anong gusto mong gawin ko?” Naghahamon nitong tanong.

“Ligawan mo ko.”

Itutuloy…

Bilyonaryong Mafia ang Mahal Ko (24)

ni Maria Angela Gonzales @Kuwentong Pag-Ibig | Marso 7, 2024

“DAMN!” Buwisit na sabi ni Nhel sa kanyang sarili. 

Nagmukha kasi siyang tanga ng mga sandaling iyon. Hindi niya alam kung bakit nagawa niyang tanungin si Via kung buntis ba ito na para bang nagsama na sila nang matagal. Para tuloy gusto niyang batukan ang kanyang sarili sa sobrang inis. 

Sa katunayan, wala naman talaga siyang plano na pakasalan si Via. Bakit naman niya gagawin iyon eh, buwisit nga siya sa kinikilala nitong ama? Pero, nang makita niya si Via, nagbago ang lahat. Noong nakita niya pa lang ito sa picture, naisip niya agad na gamitin ito para makapaghiganti sa kanyang ama. Ngunit, nang makaharap niya ito ay biglang nag-iba ang kanyang gusto. Sabi niya kasi sa kanyang sarili, mas makakabuti yata kung pakasalan ko na lang ito para mas maging maganda ang kanyang paghihiganti. 

Hindi niya lang alam kung bakit siya natigilan nang mapagtanto niyang virgin pa ito.

Hindi niya lubos akalain na sa dinami-rami niya na nakarelasyon, wala man lang siya nakuhang virgin. So, paano na siya makakapaghiganti ngayon?

“Aalis ako.”

“Saan ka pupunta?” “Maghahanap ng trabaho.”

“Sa palagay mo ba hindi kita kayang buhayin?” Nanunubok niyang tanong. Hindi niya maiwasan ang makaramdam ng panggigigil dahil pinagdududahan yata nito ang kanyang kayamanan.

“Hindi iyon ang iniisip ko.”

“Eh, ano?”

“Ayokong dumepende sa’yo.” Buong diing sabi ni Via.

“Asawa mo ko.”

“Pero, hindi tayo nagmamahalan, at darating din ang araw na maghihiwalay tayo,” wika ni Via.

“Over my dead body,” mariing sabi ni Nhel.

Itutuloy…