Eksperto: WHO, bigong tugunan ang paninigarilyo sa loob ng 2 dekada

ni Chit Luna @News | August 23, 2025

Photo File: World Health Organization (WHO)

Iginiit ng mga eksperto na hindi naging epektibo ang polisiya ng World Health Organization (WHO) sa pagkontrol ng tabako, dahil halos walang naging pagbabago sa bilang ng naninigarilyo kahit mahigit dalawang dekada na mula nang ipatupad ang Framework Convention on Tobacco Control (FCTC).

Sa 2025 Global Forum on Nicotine (GFN) sa Poland, sinabi ng mga panelist na ang mahigpit na pagbabawal ng WHO ay hindi tumutugma sa mga estratehiyang nakabatay sa ebidensya para sa harm reduction — na makatutulong sa mahigit isang bilyong naninigarilyo na huminto o lumipat sa mas ligtas na alternatibo.

Ang tobacco harm reduction ay tumutukoy sa mga hakbang na naglalayong bawasan ang panganib ng mga sakit dulot ng paninigarilyo sa pamamagitan ng paggamit ng mga produktong gaya ng heated tobacco, nicotine pouches, at e-cigarettes imbes na magpatuloy sa paggamit ng tradisyonal na sigarilyo.

Sa naturang sesyon na pinamagatang “Reflections on the Framework Convention on Tobacco Control at 20”, nagtipon-tipon ang mga eksperto mula sa larangan ng pampublikong kalusugan, oncology, at adbokasiya ng mamimili upang suriin ang naging implementasyon ng FCTC.

Binigyang-diin ng mga panelist na dapat maging pangunahing batayan ng modernong tobacco control ang agham, pagkakapantay-pantay, at karapatang pantao. Nanawagan silang iwanan ang malawakang pagbabawal at itaguyod ang mga patakarang praktikal, batay-sa-ebidensya, at nagbibigay-daan sa inobasyon habang gumagalang sa dignidad ng tao.

Kabilang sa mga nagsalita sina Propesor Tikki Pangestu, dating Director ng Research Policy & Cooperation sa WHO at kasalukuyang Visiting Professor sa Yong Loo Lin School of Medicine, National University of Singapore; Asa Saligupta, director ng ENDS Cigarette Smoke Thailand (ECST); Dr. Derek Yach, dating WHO cabinet director at executive director para sa noncommunicable diseases and mental health, na nanguna sa pagbabalangkas ng FCTC; Propesor David Khayat, Pranses na oncologist at co-author ng Paris Charter Against Cancer; at Jeannine Cameron, tagapagtatag ng JCIC International Consultancy.

Binigyang-diin pa ni Pangestu ang impluwensya ng WHO sa mga bansang mababa at katamtaman ang kita, na madalas ay walang sapat na kakayahang bumuo ng sariling polisiya. “The elephant in the room is the WHO,” aniya. “As long as that position doesn't change, many countries are going to continue with apathy”.

Pinuna naman ni Saligupta ang papel ng Bloomberg Philanthropies at ilang NGO sa paghuhubog ng mahigpit na patakaran kasang-ayon ng WHO. “They use ideology over evidence, they’re ignoring science and pushing prohibition,” aniya, kasabay ng babala na ang maling impormasyon at labis na regulasyon ay humahadlang sa mga naninigarilyo sa mga bansang gaya ng Thailand — kung saan ipinagbabawal pa rin ang vaping — na magkaroon ng mas ligtas na opsyon.

Samantala, kinilala ni Yach ang kahalagahan ng FCTC sa kasaysayan, ngunit binatikos ang hindi pantay-pantay na implementasyon nito at ang pag-iwas na isama ang harm reduction.

Nanawagan si Khayat para sa isang mas makataong, education-based na polisiya sa kalusugan, at tinutulan ang “quit or die” na pananaw bilang hindi makatotohanan para sa mga hirap sa pagkaadik sa nikotina.

Ipinahayag naman ni Cameron na ang makabuluhang pagbabago ay dapat magmula sa pambansang pamahalaan at hindi sa mga international na ahensya. “The WHO gets to decide nothing. It’s the national governments that must act,” aniya.

Sa Pilipinas, sinuportahan ni Dr. Lorenzo Mata, Jr., presidente ng Quit for Good, ang panawagan para sa reporma. “The WHO has fallen short of its target and failed to help more than a billion smokers globally,” ani Mata.

Dagdag pa niya: “Because of its prohibitionist ideology, the WHO has only alienated smokers and nicotine consumers, demonizing them for their habits. It is time for the WHO to adopt a more compassionate approach and acknowledge the rights of consumers to choose what is best for them.”

Kooperasyon sa ASEAN kailangan laban sa iligal na kalakalan

ni Chit Luna @News | August 9, 2025

• 

Photo: Binigyang-diin ang kahalagahan ng koordinasyon sa pagitan ng PNP, National Intelligence Coordinating Agency, at mga barangay bilang early warning system. Sa pamamagitan ng Task Force Against Counterfeit Goods, “nagbigay-daan sa PNP na protektahan ang mga consumer at sugpuin ang counterfeit supply chains.”

Nanawagan ang mga opisyal ng Pilipinas ng mas mahigpit na pagtutulungan sa ASEAN upang labanan ang lumalalang banta ng illicit trade. Sa isang high-level briefing noong Agosto 5, 2025, binigyang-diin ng mga eksperto na ang bukas na hangganan ng rehiyon, magkakaibang regulasyon, at hindi pantay na pagpapatupad ng batas ay nagpapahina sa depensa laban sa mga kriminal na operasyon.

Idinaos ng Financial Times sa Shangri-La The Fort, Taguig City, ang pagtitipong may temang “Combatting Illicit Trade in Southeast Asia.”

Ayon kay Nestor Sanares, Undersecretary for Peace and Order ng DILG, ang iligal na kalakalan ay banta sa ekonomiya at kaligtasan ng mamamayan. “Pinapalakas ng illicit trade ang korapsyon, pinopondohan ang mga kriminal na network at sinasamantala ang kahinaan ng mga tao,”. Dagdag pa niya, “ang smuggling, counterfeiting, trafficking, o iligal na droga ay transnational na mga krimen na malalim ang ugat at patuloy na nagbabago.”

Binigyang-diin ni Sanares ang kahalagahan ng koordinasyon sa pagitan ng PNP, National Intelligence Coordinating Agency, at mga barangay bilang early warning system. Sa pamamagitan ng Task Force Against Counterfeit Goods, “nagbigay-daan sa PNP na protektahan ang mga consumer at sugpuin ang counterfeit supply chains.”

Mahalaga rin aniya ang cross-border cooperation; ang pakikipagtulungan sa Malaysia, Indonesia, at Thailand ay nakapigil sa pagpasok ng kontrabando bago makarating sa bansa.

Para kay BIR Commissioner Romeo Lumagui Jr., “ang sama-samang pagsisikap ng mga ahensiya ng gobyerno at ng publiko ang siyang magtatakda kung magpapatuloy ang iligal na kalakalan.” Kabilang sa mga hamon ang malawak na baybayin ng Pilipinas, makabagong smuggling scheme, at lumalaking digital marketplace.

Ayon kay Lumagui, ang illicit trade sa sigarilyo at alak ay nagdudulot ng bilyun-bilyong pisong pagkalugi na sana’y para sa edukasyon, kalusugan, at imprastruktura. “Ang mga iligal na produkto — na hindi regulado at madalas na hindi ligtas — ay naglalantad sa mga tao, lalo na sa mga kabataan at mahihirap, sa mga substandard na produkto at nakakapinsalang sangkap,” dagdag niya.

Sa nakalipas na dalawang taon, nagtayo ang BIR ng mga multi-agency task forces para magsagawa ng organisado at intelligence-driven na operasyon. Isa sa mga pinakamalaking raid ay nagresulta sa pagliligtas sa 155 mangga-gawang biktima ng trafficking sa isang iligal na pabrika ng sigarilyo sa Bulacan. Ang insidente ay nagbunga ng tax case na mahigit P596 milyon at kasong human trafficking laban sa dayuhang nagpapatakbo nito.

Kinilala rin ni Lumagui ang papel ng publiko: “Ang mga tips, leads at iba pang impormasyon mula sa mga miyembro ng publiko ay malaking tulong sa BIR sa pagtukoy ng mga establishments na sangkot sa iligal na kalakalan.”

Binigyang-diin niya ang pangangailangan ng real-time authentication tools at mas mahigpit na border controls para sa mas epektibong kooperasyon sa ASEAN. “Makakatulong sa hinaharap ang paggamit ng teknolohiya, patuloy na pag-update ng regulatory framework, pagpapalawak ng cross-border information sharing at pagpapatatag ng matibay na partnership sa pagitan ng mga gobyerno, negosyo at civil society para pigilan ang illicit trade,” aniya.

Ayon sa pag-aaral... Heated tobacco, may kaugnayan sa pagbaba ng paninigarilyo sa Japan

ni Chit Luna @News | August 2, 2025

• 

File Photo: Hiwalay na pagsusuri na inilathala noong Setyembre 2024, na pinamagatang “Switching from Cigarettes to Heated Tobacco Products in Japan — Potential Impact on Health Outcomes and Associated Health Care Costs.

Dumadami ang ebidensya mula sa Japan na ang heated tobacco products (HTPs) ay may mahalagang papel sa pagbaba ng paggamit ng sigarilyo. 

Isang pag-aaral na inilathala sa Tobacco Control noong Oktubre 2024, na pinamagatang “Transformation of the Tobacco Product Market in Japan, 2011-2023,” ang nag-ulat na ang mga naninigarilyo at kabuuang benta ng sigarilyo sa Japan ay bumaba ng mahigit 50 porsyento sa pagitan ng 2011 at 2023.

Ang pagbaba ay nagsimula noong 2015, nang ipinakilala ang heated tobacco products sa merkado ng Japan. Pagkatapos nito, bumilis nang husto ang antas ng pagtigil sa paninigarilyo.

Ang pagkahati ng merkado ng sigarilyo sa Japan sa loob lamang ng mahigit isang dekada ay isang kahanga-hangang tagumpay.

Dagdag nito, ang pagtukoy kung paano makamit ang parehong uri ng pagbabago sa ibang lugar ay dapat maging prayoridad sa pampublikong pananaliksik sa kalusugan.

Isang hiwalay na pagsusuri na inilathala noong Setyembre 2024, na pinamagatang “Switching from Cigarettes to Heated Tobacco Products in Japan — Potential Impact on Health Outcomes and Associated Health Care Costs” ang humula ng malaking benepisyo sa kalusugan ng publiko at ekonomiya kung mas maraming naninigarilyo ang lilipat sa HTPs.

Tinantiya ng pag-aaral na kung kalahati ng mga naninigarilyo sa Japan ay tatalikod sa nasusunog na tabako at gagamit ng HTPs, hanggang 12 milyong sakit na may kaugnayan sa tabako ang maiiwasan. Ayon pa rito, posibleng makatipid ang Japanese healthcare system ng hanggang 454 bilyong yen.

Inirekomenda ng mga mananaliksik na ipagpatuloy ng Japan ang pagbibigay prayoridad sa “cost-efficient” measures na nagtataguyod ng kalusugan ng publiko at benepisyo sa ekonomiya.

Kabilang dito ang paghikayat sa mga naninigarilyo na lumipat sa mga produktong may pinababang peligro o less harmful alternatives, pagdaragdag ng kamalayan sa mga panganib sa kalusugan at paggamit ng diskarte sa pagbubuwis batay sa pinsala.

Sinasabi ng mga pandaigdigang tagapagtaguyod ng kalusugan na ang karanasan ng Japan ay nagbibigay ng matibay na ebidensya para sa mga bansa na isaalang-alang ang paggamit ng harm reduction bilang isang diskarte sa pagkontrol ng tabako.

Binigyang-diin ni Dr. Lorenzo Mata, presidente ng Quit for Good, isang grupong tagapagtaguyod ng kalusugan sa Pilipinas, na ang mga makabagong alternatibo na walang usok tulad ng heated tobacco at vapes ay maaaring magbigay ng mas mahusay na pagkakataon para ibaba ang bilang ng mga naninigarilyo.

Ayon kay Mata, kung talagang gusto ng gobyerno na tulungan ang mga naninigarilyo, dapat unahin ang edukasyon at pag-access sa mga alternatibong ito na hindi gaanong nakakapinsala.

Sa Global Tobacco and Nicotine Forum noong 2023, binanggit ni Hiroya Kumamaru, vice director sa AOI Universal Hospital ng Japan, na ang paninigarilyo ang pinakamalaking sanhi ng kamatayan sa nasabing bansa.

Pagdating ng 2019, halos ikatlo ng mga lalaki at ikaapat ng mga babaeng gumagamit ng tabako ay lumipat sa HTPs, isang resulta na inilarawan niya bilang ‘kahanga-hanga’.

Sinabi niya na ang mga alalahanin tungkol sa hindi inaasahang epekto tulad ng dual use o pagsisimula sa kabataan ay hindi nagkatotoo.

Habang patuloy na nakikipaglaban ang pandaigdigang komunidad ng kalusugan sa mga sakit na may kaugnayan sa paninigarilyo, ang dekadang paglipat ng Japan patungo sa mga alternatibong may pinababang pinsala ay maaaring mag-alok ng isang scalable na modelo para sa ibang mga bansa na naghahangad na makamit ang katulad na resulta, ayon sa pag-aaral.