Huwag magpakumpiyansa sa boluntaryong pagsusuot ng face mask sa labas

ni Bong Go - @Bisyo Magserbisyo | September 10, 2022

Nitong Miyerkules, Setyembre 7 ay inirekomenda ng Inter-Agency Task Force for the Management of Emerging Infectious Diseases (IATF-EID) na gawing boluntaryo na ang pagsusuot ng face masks kapag nasa labas. Ang rekomendasyon ay isinapubliko ng Department of Health.

Ayon sa DOH ay ili-liberalize ang pagsusuot ng face mask sa labas para sa low-risk individuals at sa low risks settings. Binigyang-diin ng task force na ang implementasyon ay dapat gawin ng unti-unti para matiyak na protektado pa rin ang ating mga kababayan laban sa COVID-19.

Sa parte natin bilang senador at Chair ng Senate Committee on Health, tiwala tayo na ang rekomendasyon ng IATF ay ayon sa masusing pag-aaral ng mga eksperto. Simula sa unang araw na pumutok sa ating bansa ang pandemya, palagi tayong nakasalalay sa siyensya sa paglalabas ng mga polisiya para matugunan ang krisis pangkalusugan na ito.

Gayunman, hinihikayat pa rin natin ang ating mga kababayan na mag-ingat, sumunod sa health protocols at kung maaari ay magsuot pa rin ng face mask—mapa-mandatory o optional man ito.

Mabuti na ‘yung todo-ingat tayo habang naririyan pa ang banta ng kalabang hindi naman natin nakikita. Huwag tayong magkumpiyansa. Habang nand'yan pa ang COVID-19 ay delikado pa rin.

Kahit payagan na tayong hindi magsuot ng face masks, habang nasa labas o sa mga ligtas na lugar, ugaliin nating maging responsable upang maproteksyunan ang sarili at ang ating komunidad laban sa anumang sakit o pangamba.

Patuloy rin ang ating panawagan sa mga kuwalipikado, ngunit hindi pa bakunado na magpaturok, pati ng booster shots, para protektado tayo laban sa COVID-19. Bukod sa pag-iingat, bakuna ang tanging solusyon para makabalik tayo sa normal na pamumuhay. Kapag narating na natin ang herd immunity, tuluyan na mas magiging maluwag ang ating patakaran.

Isaalang-alang natin ang buhay ng ating kapwa na nakataya rito, lalo na ang matatanda na o delikado ang kalagayan. Walang part two ang buhay ng tao — kapag mamatay na, patay na talaga. Kaya importante na maproteksyunan ang kalusugan at buhay ng bawat Pilipino.

Sa ating pag-iikot sa iba’t ibang sulok ng bansa, ipinapaalala natin sa lahat na kailangang maipagpatuloy ang bayanihan at kooperasyon upang tuluyang nalampasan ang mga krisis na ating pinagdaraanan. Bukod sa pagkakaloob ng ayuda sa mga kababayan nating higit na nangangailangan, nagpapamahagi rin tayo ng masks, vitamins, pagkain at iba pang kailangan para maproteksyunan ang kanilang kalusugan.

Tulad nitong linggong ito, maagap tayong muli sa pagsaklolo sa mga biktima ng sunog gaya ng 24 na pamilya sa Orani, Bataan; at siyam pa sa Bgys. Camalig Ortiz at San Antonio sa Iloilo City.

Bilang suporta sa kanilang edukasyon, pinagkalooban natin ng ayuda ang 136 estudyante mula sa tribung Ata-Manobo sa Talaingod, Davao del Norte.

Inayudahan naman natin ang mahihirap na residente ng iba’t ibang komunidad na ang kabuhayan ay patuloy na apektado ng pandemya at iba’t ibang krisis, gaya ng 2,000 benepisaryo mula sa Barbaza, Antique; 1,000 sa Dasmariñas City, Cavite; 715 sa Malolos City, Bulacan; 666 sa Tuburan, Cebu; at 400 din sa Dauin, Negros Oriental.

Katulad na ayuda ang natanggap ng 335 benepisaryo mula sa Reina Mercedes, Mallig, Delfin Albano, Sta. Maria at Cabagan, at 113 pa sa San Pablo sa Isabela; 300 sa Angeles City, Pampanga; 250 sa Balungao, Pangasinan; 216 sa Norala, Banga, Koronadal City at Tupi sa South Cotabato; 200 sa San Jose Del Monte City at 153 sa Guiguinto sa Bulacan; at 71 pa sa Villaverde, Nueva Vizcaya.

Kaakibat ang mga ahensya ng gobyerno na namahagi ng tulong pangkabuhayan sa maliliit na negosyante, sumama rin tayo para magdagdag ng tulong tulad sa Palawan, kung saan sinuportahan natin ang 300 sa Culion; 56 na benepisyaryo sa Roxas; 55 sa Araceli; at 50 pa sa Dumaran. Katulad na sistema ang ginawa natin sa Sarangani para sa 126 benepisaryo sa Malapatan; 71 sa Alabel; 48 sa Malungon; at 48 din sa Glan.

Para naman mas mapalakas ang ating healthcare system, nagkaroon ng groundbreaking ceremony noong Setyembre 8 para sa itatayong Esmeralda Balungao Super Health Center sa Pangasinan na aking personal na pinuntahan. Sinaksihan din natin ang ribbon cutting ng isang kalsada doon na ating isinulong na mapondohan. Nag-abot din tayo ng ayuda sa mga Pangasinense sa mga bayan ng Balungao at Binalonan.

Mga kababayan, nakikita na po natin ang mga indikasyon na malapit na nating malampasan ang pandemyang dulot ng COVID-19. Huwag lang tayong maging kampante. Mag-ingat at magtulungan tayong lahat upang masigurong walang maiiwan sa ating muling pagbangon bilang nagkakaisa at mas matatag na bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hindi lang basta ayuda, trabaho sa mamamayan

ni Bong Go - @Bisyo Magserbisyo | September 7, 2022

Kapag namimigay ang ating tanggapan ng ayuda sa mahihirap nating residente—maging sa pinakaliblib na bahagi ng ating bansa—personal nating nakikita at nararamdaman na kailangan pa rin talaga nila ng ating tulong at ng gobyerno. Dahil sa pandemya ay naging limitado ang mga oportunidad para kumita ang ating mga kababayan, pero ginagawa pa rin nila ang lahat at nagsasakripisyo para kahit paano ay may maiuwi sa kanilang pamilya at may maihain sa kanilang hapag-kainan.

Kaya hindi tayo sang-ayon na ihinto na ng gobyerno ang pagbibigay ng ayuda sa mga pinakaapektado ng pandemya. Hanggang nand'yan pa ang COVID-19, delikado pa ang buhay ng ating mga kababayan at apektado pa rin ang kabuhayan ng maraming Pilipino.

Kamakailan ay may mga agam-agam na dahil sa ating mahigpit na pangangailangan sa pondo, dapat nang ihinto ng gobyerno ang pagkakaloob ng financial support sa pinakanangangailangan nating mga kababayan. Uulitin natin, hindi tayo sang-ayon dito. Una sa lahat, prayoridad natin ang pagbibigay ng ayuda, lalo na sa mahihirap, basta may pagkukunan ng pondo. Siguraduhin nating walang magugutom.

Mandato ‘yan ng buong gobyerno, kasama na ang Kongreso, na tiyaking may sapat na pondo para sa pag-alalay, pagtulong at pagmamalasakit sa mga mamamayan hanggang tuluyang makabangon ang lahat.

At kung sinasabi nilang may mga butas diumano ang pagkakaloob ng ayuda sa ating mga kababayan, ang dapat gawin ay ayusin para matapalan ang butas kaysa itigil ito, lalo na sa panahon ngayon na may mga kapwa tayo Pilipino na walang-walang malalapitan maliban sa gobyerno. Alam natin ito ay dahil nakakausap at naririnig natin mismo ang kanilang mga pangangailangan.

Bagaman at ganito ang ating paninindigan, sang-ayon din tayo na kapag talagang tuluyang nakabawi na ang ating ekonomiya sa hagupit ng pandemya at iba pang krisis ay dapat hindi na sa ayuda idaan ang pag-alalay sa ating mga kababayan. Kailangan na may susunod na hakbang tayo upang unti-unti ay makatayo na sila sa kanilang sariling mga paa.

Sa ating kapasidad bilang senador, patuloy tayo sa pagsusulong ng mga panukalang batas sa ating 19th Congress na makatutulong sa mga sektor para maprotektahan ang kanilang hanapbuhay at maliliit na negosyo at matiyak na mayroon silang pagkakakitaan.

Kabilang na ang panukalang Government Financial Institutions Unified Initiatives to Distressed Enterprises for Economic Recovery (GUIDE) Act.

Kapag naisabatas, palalakasin ng GUIDE ang kapasidad ng Land Bank of the Philippines at ng Development Bank of the Philippines para makapagkaloob sila ng kinakailangang pautang at tulong-pinansyal sa micro, small, and medium enterprises at sa strategically important companies at iba pang negosyong apektado ng pandemya. Kung matutulungan natin ang mga negosyo na makabawi at lumago, matutulungan din ng pribadong sektor ang ating mga kababayan na makabangon muli.

Isinusulong din natin ang panukalang ma-institutionalize ang programang “One Town, One Product” program ng DTI. Ang OTOP ay nagkakaloob din ng tulong sa MSMEs bukod sa promosyon ng mga paninda at produkto mula sa mga bayan, siyudad at rehiyon sa buong bansa. Kung mas lalawak ito, mas marami ang malilikhang trabaho.

Seguridad sa trabaho naman ang ating naging target para sa ating mga manggagawa na nasa iba’t ibang industriya.

Para matiyak na ang mga residente sa rural areas na kulang ang oportunidad sa trabaho ay napapangalagaan, isinumite natin ang Senate Bill No. 420. Sa ilalim nito, magkakaroon ng Rural Employment Assistance Program (REAP) sa ilalim ng Department of Labor and Employment, na magbibigay ng pansamantalang hanapbuhay sa mga kuwalipikadong indibidwal na mahirap, mahigpit ang pangangailangan, nawalan ng trabaho o kaya ay seasonal lang ang hanapbuhay.

Nariyan din ang Senate Bill No. 1191 para mapangalagaan ang karapatan ng ating mga marino sa bansang kanilang pupuntahan, magtakda ng mga patakaran sa kanilang pagsasanay at tiyakin ang kanilang kapakanan kapag sila’y retirado na.

Gusto rin natin na magkaroon ng maigting na proteksyon, seguridad at dagdag-benepisyo ang mga kaibigan natin sa media at entertainment, kaya inihain natin ang Senate Bill No. 1183 o ang “Media and Entertainment Workers’ Welfare Act”. Sa pamamagitan nito, mabibigyan sila ng dagdag na health insurance package, overtime at night differential pay at iba pang benepisyo. Ayaw nating maulit ‘yung nangyari noong pumutok ang pandemya na marami sa kanila ay walang pagkukuhanan ng ikabubuhay dahil wala silang mga benepisyo. Marami sa kanila ay kinupkop ng Department of Social Welfare and Development at nahahatidan ng ating tanggapan ng tulong.

Inihain din natin ang Senate Bill No. 1184 o ang panukalang “Food, Grocery, and Pharmacy Delivery Services Protection Act of 2022” para sa proteksyon ng ating delivery riders na karaniwang nabibiktima ng peke o nakanselang mga booking at order.

Para sa atin, mas maraming negosyong makakabangon, mas maraming Pilipino ang mabibigyan ng trabaho at kabuhayan. Mas protektado ang mga manggagawa, mas may sapat na pagkain para sa kanilang pamilya at mas maraming bata ang makakapag-aral. Hindi na natin kailangan ang palaging pagkakaloob ng ayuda.

Pero pansamantala, sa sitwasyon ngayon, patuloy pa rin nating ilapit ang malasakit at serbisyo ng gobyerno sa ating mga kababayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hikayatin ang kabataan na mag-sports para iwas pa more sa ilegal na droga

ni Bong Go - @Bisyo Magserbisyo | September 2, 2022

Noong Miyerkules, Agosto 31, 2022 ay nagkaroon ang Senate Committee on Public Order—na pinamumunuan ni Sen. Ronald “Bato” dela Rosa—ng public hearing at tinalakay ang pagpapalawak sa Anti-Drug Abuse Council Law na naglalayong magtatag ng Anti-Drug Abuse Councils sa bawat local government unit. Sang-ayon tayo sa panukalang ito at sa hangarin ng ating gobyerno na mapanatili ang peace and order sa ating bansa sa pamamagitan ng pagsugpo sa ilegal na droga.

Isa sa adbokasiya ng nakaraang administrasyon ni dating pangulong Rodrigo Duterte ay ang mapanatili ang kaayusan tungo sa kaginhawahan sa ating bansa. Mahalaga na hindi masayang ang ating nasimulan at maipagpatuloy ang pagsugpo sa mga nasa likod ng ilegal na droga, tulad nang ginawa ng Administrasyong Duterte para masolusyunan din ang problema sa kriminalidad at katiwalian.

Sa ating naobserbahan, kapag bumalik ang droga, babalik ang kriminalidad at babalik din ang korapsyon kaya damay-damay 'yan. Sa kampanya ni Tatay Digong mula noong 2016, isa sa kanyang ipinangako ay labanan ang kriminalidad, ilegal na droga at korapsyon. Hindi man natupad ang mga ito nang buong-buo, pero sinikap niya na ibaba to the barest minimum ang crime rate natin.

Sa katunayan, ang crime rate sa Pilipinas ay bumaba ng 73.76% mula 2016 hanggang 2021, batay sa tala ng Philippine National Police. Kaya isa sa kanyang inuna, ipinangako at ipinatupad ay doblehin ang sahod ng mga pulis, kasama na ang ibang mga uniformed personnel. Hindi maisasakatuparan ang ipinangako niyang kapayapaan kundi sa tulong ng mga pulis, at sa tulong na rin ng Anti-Drug Abuse Councils.

Dati, takot ang tao sa mga durugista. Noong panahon ni Tatay Digong, ang mga durugista na ang takot. Naramdaman ng mga Pilipino na ligtas silang maglakad sa gabi at may peace of mind ang mga magulang na nakakauwi ang kanilang mga anak nang hindi nababastos.

Malaki ang tiwala at buo ang suporta ko sa bagong administrasyon sa pangunguna ni Pangulong Ferdinand “Bongbong” Marcos, Jr. na mas mapapalakas pa ang kampanya natin laban sa ilegal na droga at kriminalidad upang tuluyang mabigyan ng mas ligtas at komportableng buhay ang mga Pilipino na gustong mamuhay nang tahimik at ligtas.

Sa parte natin bilang Chair ng Senate Committee on Sports, patuloy ako sa paghikayat sa kabataan na umiwas sa ilegal na droga. Kapag bumibisita tayo sa mga komunidad, palagi nating ipinapayo na ibuhos ang oras sa eskuwela at iba pang produktibong gawain, tulad ng sports. Get into sports, stay away from drugs.

Samantala, tuloy naman ang ating tanggapan sa paghahatid ng ayuda sa mga kababayan nating hindi pa rin tuluyang nakakabawi sa epekto sa kanilang kabuhayan ng pandemya at iba pang krisis.

Tulad ng dati ay inuuna nating tulungan ang mga biktima ng sunog dahil napakahirap ng kanilang katayuan, lalo na ‘yung may mga sanggol at senior citizen sa pamilya—at wala agad pagkukunan ng pangunahing pangangailangan.

Napagaan natin ang dalahin ng mga pamilyang nasunugan gaya ng 210 residente ng Bgy. 76-A Bucana, at 20 pa sa Brgy. Agdao Proper sa Davao City; at 2,126 sa Mariveles, Bataan.

Para naman sa 350 estudyante ng Payatas B Elementary School, tuwang-tuwa ang mga bata sa ating ipinagkaloob sa kanila na bagong sapatos, bags at school supplies.

Nabigyan din natin ng ayuda ang 269 na mahihirap na estudyante ng Cabanatuan City, Nueva Ecija.

Pinagkalooban din natin ng tulong ang 300 na residente ng Nueva Valencia, at 285 pa sa Sibunag sa Guimaras; 107 sa City of San Jose del Monte, Bulacan; 100 sa Murcia, 296 sa Pontevedra, at 100 pa sa Talisay City sa Negros Occidental.

Umaasa rin tayo na sa nalalapit na pagtatapos ng taon ay tuluyan na tayong makalampas sa mga krisis na ating kinahaharap. At bukod sa pag-unlad ng ating ekonomiya at pag-angat ng buhay ng bawat Pilipino, hangad kong tuluyang lumaganap sa bawat dako ng ating bansa ang kapayapaan at kaayusan—na tunay na biyaya ng demokrasya sa ating lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.