Iwas-droga ang kabataang aktibo sa sports

ni Bong Go - @Bisyo Magserbisyo | October 12, 2022

Sa ginanap na pagdinig sa Senado noong Oktubre 10 para sa 2023 budget ng Philippine Sports Commission at ng Games and Amusements Board, bilang Chair ng Senate Committee on Sports, sinuportahan ko ang kanilang pondo para sa 2023. Naniniwala ako na kailangan nating mag-invest sa sports para makatuklas at makapaghasa tayo ng mas maraming world-class athletes na maipagmamalaki ng ating bansa at makapag-uuwi ng mga medalya at karangalan.

Naniniwala rin ako na ang masiglang grassroots sports program ay mabisang paraan para mailayo ang kabataan sa kaway ng droga at iba pang masasamang bisyo. Sabi ko nga, get into sports, stay away from illegal drugs. Isa ang sports sa mga paraan para ipagpatuloy ang kampanya laban sa ilegal na droga.

Ang matagal ko nang pinangarap na National Academy of Sports ay naisakatuparan na at naitayo na sa New Clark City, Capas, Tarlac. Nakakapag-aral at nakapagsasanay rito ang mga atleta, at plano natin na ma-regionalize ito para hindi na mapalayo ang mga potential athletes natin sa kanilang pamilya, at mas maging madali ang pagpapatupad natin ng grassroot sports development.

Nasa ilalim na ng Department of Education ang NAS at nababalitaan ko nga na nabawasan ang budget nito. Full support ako para ma-restore ito, dahil atleta at kabataan din ang pinag-uusapan dito. Ayaw nating maantala ang buong programa. Nakita naman natin na pag may suporta ang gobyerno, kasama ang pribadong sektor, ay nakakapagdala sila ng karangalan sa ating bansa.

Sa nakaraang mga kompetisyon sa labas ng bansa ay nasaksihan natin kung paano nagtagumpay sina Hidilyn Diaz, Alex Eala, Carlos Yulo, EJ Obiena at ang lahat ng atletang Pilipino na patuloy na nagsisikap at iniaalay ang kanilang sarili sa para maisulong ang pag-unlad ng sports sa Pilipinas.

Sa mga nakalipas na panahon ay isinulong ko ang dagdag-pondo para sa preparasyon natin sa iba’t ibang international sports competition tulad ng Olympics, SEA Games, Asian Games at ParaGames. Sa tulong ng mga kapwa ko mambabatas, nabigyan natin ng sapat na pondo ang PSC at ang GAB.

Nagbunga naman nang maganda ang ating pagbibigay ng dagdag na budget sa ating mga atleta. Nakamit natin ang kauna-unahang gold medal sa Olympics, kasama na ang dalawang silver medals at isang bronze medal. Ang Pilipinas ang top performing country sa Southeast Asia sa Tokyo Olympics. Noong 2019 na nag-host tayo ng SEA Games, number 1 tayo at napakaganda ng pagkakapanalo natin doon.

Sa nakaraang SEA Games ay maganda rin ang performance ng ating mga atleta, bagaman at hindi tayo nagkampeon sa basketball. Sa ngayon, hangad natin na mabawi ang korona sa basketball sa SEA Games, at magkampeon sa Asian Games at FIBA Asia. Nakikiusap ako sa ating mga atleta na naglalaro na sa ibang bansa na kung tatawagin na kayo para sa bayan na maglaro para sa ating bandila, sana ay suportahan ninyo ang ating national team.

Binanggit ko rin sa pagdinig na nag-commit tayo para suportahan si Kayla Sanchez, ang Fil-Canadian Olympic swimmer na naglaro para sa Canada noong Tokyo Olympics, at nanalo ng silver at bronze medal. Ngayon ay lumipat na siya sa atin para irepresenta ang Pilipinas sa international competitions, tulad sa darating na Paris Olympics. Pilipino si Kayla. Sigurado ako na marami pang tulad ni Kayla ang gustong magwagayway ng bandila ng Pilipinas sa mga sports competitions lalo na kung bubuhusan natin sila ng suporta.

At dahil tayo ang host ng 2023 FIBA World Cup, napag-usapan din ang kailangang pondo para rito para maging matagumpay ang pagdaraos at matiyak ang seguridad ng mga bisita at ng ating mga kababayan.

Nagpaalala rin ako sa PSC at sa pribadong sektor na sa gaganaping 2023 FIBA World Cup ay tiyakin na walang masasayang na pondo at dapat na mas malaki ang maibabalik sa atin sa pamamagitan ng return of investment sa larangan ng turismo at benepisyo ng local economy. Ngayong bawat piso ay napakahalaga sa ating mga kababayan, dapat mamamayan ang makikinabang, lalung-lalo na ang mahihirap, sa kung anumang tulong ang maibibigay ng gobyerno sa PSC at sa ating hosting ng nasabing event.

Wala rin akong naging pagtutol sa hinihinging budget ng GAB, pero tulad sa PSC, nakiusap ako sa kanila na ayusin ang paggamit sa pera ng gobyerno, at wala dapat masasayang ni piso. Para sa akin, basta’t ang pondo ng bayan ay ginamit sa wasto at kung para saan talaga ito, wala tayong magiging problema. Unahin lang dapat ng mga ahensya ng pamahalaan ang interes at kapakanan ng ating mga kababayan, at maging ang interes ng ating pamahalaan tungo sa hangaring mas makapagserbisyo sa sambayanan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malaking bagay ang teknolohiya sa serbisyo-publiko

ni Bong Go - @Bisyo Magserbisyo | October 7, 2022

Malaking tulong talaga sa lahat ng sektor ang teknolohiya. Kabilang kaming mga nasa serbisyo-publiko sa mga nakikinabang dito. Sa parte ko bilang senador, nagagawa kong maghatid ng mensahe sa mga kababayan nating nasa malalayong komunidad sa pamamagitan ng teknolohiya.

Masasabi kong dahil sa teknolohiya, mas nagiging madali para sa akin ang pagsabayin ang tungkulin ko sa Senado at ang paghahatid ng serbisyo sa ating mga kababayan. Walang nasasayang na oras.

Pero sa totoo lang, hangga’t maaari ay mas gusto kong personal na nabibisita ang mga kababayan natin sa kanilang komunidad mismo kahit saan mang sulok ng bansa. Mas gusto kong aktuwal na nakikipagtalakayan at personal na lumalapit sa ating mga kababayan para marinig mismo sa bibig nila ang kanilang mga karaingan.

Sa katunayan, nitong Oktubre 4 ay bumiyahe ako sa Tagoloan, Misamis Oriental at personal na nag-abot ng tulong sa 301 na maliliit na negosyante sa nasabing lugar. Pagkatapos nito ay biyaheng Cagayan de Oro City ako at personal ko ring hinatiran ng ayuda ang 381 benepisaryo na mga biktima ng sunog.

Kasabay nito ay lumahok din ako nang online sa mga isinagawang pagdinig sa Senado, partikular sa mga kinakailangang budget ng mga ahensya para sa 2023.

Online ko ring sinaksihan ang groundbreaking ng itatayong Super Health Center sa Alangalang, Leyte. Bilang Chair ng Senate Committee on Health, talagang pinagsisikapan natin ang pagpapalakas sa ating healthcare system para handa tayo anuman ang lumaganap na sakit.

Oktubre 5 ay sa Sarangani naman tayo nagtungo para personal na saksihan ang ceremonial groundbreaking ng itatayong Glan Super Health Center. Masaya tayo na patuloy na nadaragdagan ang mga itinatayong Super Health Center sa buong bansa.

Sinaksihan at nakiisa rin tayo sa pagdiriwang ng Indigenous Peoples Day na ginanap sa Municipal Plaza ng Glan. Bago natapos ang araw, nakisalamuha at nagkaloob din tayo ayuda sa 500 benepisaryo roon.

Tumungo naman tayo sa Cotabato Province ngayong araw na ito, Oktubre 7 para dumalo sa pagdaraos ng Makilala Founding Anniversary. Personal tayong namahagi ng ayuda para sa daan-daang residente ng Makilala. Sinaksihan din natin ang groundbreaking ng itatayong Super Health Center sa Arakan, at nagkaloob ng tulong sa mga mahihirap doon.

Samantala, bukod sa aking mga personal na napuntahan, naghatid din ang aking tanggapan ng tulong sa mga kababayan nating apektado pa rin ng pandemya at iba pang krisis ang kabuhayan.

Maagap nating sinaklolohan ang mga nasunugan gaya ng 279 na pamilya sa Zamboanga City; 69 na pamilya sa Brgy. 662, Paco, Maynila; 24 na residente ng Brgy. Kamuning, Quezon City; at dalawa pa sa Bgy. Yati, Liloan, Cebu.

Nagkaloob tayo ng ayuda para pagaanin ang dalahin ng 600 na benepisaryo sa San Pablo City, Laguna; 333 sa Tarlac City; 201 sa Masantol, Pampanga; at dalawang pamilya sa Tacurong City, Sultan Kudarat.

Tuluy-tuloy rin ang pagkakaloob natin ng suporta sa maliliit nating negosyante. Sa Ilocos Sur, naabutan natin ng tulong ang 311 MSMEs sa Vigan City at Narvacan; at 303 pa sa Sta. Maria at Sta Cruz. May 600 na benepisaryo rin sa Iloilo City.

Nakarating din ang aking team sa Cagayan para sa mga MSMEs doon at naalalayan ang 83 benepisaryo sa Penablanca; 83 sa Santa Teresita; 75 sa Camalaniugan; 75 sa Gonzaga; 58 sa Rizal at Amulung; at 27 pa sa Claveria. Hindi rin natin kinaligtaan ang 549 benepisaryo sa Baguio, Pasuquin, Bacarra at Laoag City sa Ilocos Norte; 400 sa Iligan City, Lanao del Norte; at 71 pa sa Don Carlos, Bukidnon.

Sa iba pang kababayan natin, anumang oras ay darating ako o ang aking relief team sa inyong komunidad para matulungan kayo sa abot ng aking makakaya.

Masaya ako na nagagamit ko ang aking lahat ng oras at panahon para magserbisyo sa inyo sa abot ng aking makakaya. Ibinabalik ko sa inyo ang tiwalang ipinagkaloob ninyo sa akin bilang inyong lingkod bayan. Patuloy ko pong gagampanan ang aking sinumpaang tungkulin sa inyo gamit ang aking kakayahan, lakas at pagmamalasakit sa kapwa. Hinding-hindi ako titigil sa pangakong paghahatid ng serbisyo sa bawat Pilipino sa lubos ng aking makakaya!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Dagdag-pondo para sa serbisyong pangkalusugan

ni Bong Go - @Bisyo Magserbisyo | October 5, 2022

Sa naganap na hearing ng Senate Committee on Finance tungkol sa budget ng Department of Health noong Oktubre 3 ay binigyang-diin natin na napakahalaga para sa ahensya ang kanilang magiging pondo para sa 2023 habang unti-unti tayong bumabangon mula sa pandemya. Ngayon ang tamang panahon para mag-invest tayo sa pagpapalakas sa healthcare system.

Pinasalamatan natin ang mga healthcare workers na hanggang ngayon ay patuloy na nagsasakripisyo para isalba ang buhay ng mga kapwa nila Pilipino. Ipinaalala rin natin na dapat mabayaran ang hindi pa nila nakukuhang allowances na itinakda sa Republic Act 11712, o ang Public Health Emergency Benefits and Allowances for Health Care Workers. Nagtaya ng buhay ang ating health workers at hindi iyon mababayaran ng kahit anuman.

Mahalaga rin sa akin na patuloy nating pagandahin ang mga pampublikong ospital na karamihan ay mahihirap na kababayan natin ang pumupunta. Sa dami ng nangangailangan ng serbisyong pangmedikal, paano gagaling ang mga pasyente na nagsisiksikan sa ospital? Saksi tayo rito sa madalas na pagbisita sa mga probinsya.

Noong 18th Congress ay nakapagpasa tayo ng 69 batas para sa pagpapaganda at pagpapatayo ng mga pampublikong ospital sa buong bansa. Kaya asahan ninyo na bilang Chairman ng Committee on Health, handa tayong tumulong sa DOH.

Sabi nga ni Pangulong Bongbong Marcos sa kanyang unang SONA, kailangang mailapit natin ang healthcare system sa taumbayan ng hindi nila kailangang pumunta sa sentro ng kanilang bayan, lalawigan o rehiyon. Kaugnay nito, dapat nating tiyakin na may sapat na pondo para sa Health Facilities Enhancement Program, at para sa patuloy na pagtatayo ng Super Health Centers na isinulong natin sa budget ngayong taon.

Bukod sa sapat na pasilidad, equipment at medical personnel, importante rin na bigyan ng dagdag-pondo ang mga programang nagbibigay ng direktang tulong-pinansyal sa ating mga kababayan, tulad ng Medical Assistance to Indigent Patients. Marami sa mahihirap nating kababayan ang walang ibang matatakbuhan at umaasa lang sa tulong ng gobyerno kapag sila ay naoospital. Ang iba nga ay ayaw magpaospital dahil takot sa malaking babayaran.

Ito ang dahilan kaya ipinasa natin ang Republic Act 11463 o ang Malasakit Centers Act noong 18th Congress para maging madali sa ating mga kababayan ang pagkuha ng tulong medikal mula sa pamahalaan. Dapat nating tiyakin ang patuloy na operasyon ng mga Malasakit Center lalo na’t marami itong natutulungang mahihirap na pasyente. Siguraduhin nating hindi balakid ang kahirapan sa pagpapagamot. Pera naman ng taumbayan ito, ibinabalik lang natin sa kanila sa pamamagitan ng mabilis, maayos, at maaasahang serbisyong pangmedikal na makukuha nila mula sa Malasakit Centers.

Importante ring mabigyan ng sapat na pondo ang mga batas na ipinasa natin sa pag-upgrade o pagtatayo ng pampublikong ospital, tulad ng Joni Villanueva General Hospital sa Bocaue, Bulacan. Ayaw nating nakatiwangwang at masayang ito dahil baka mas mahal pa yung lupa kaysa sa ospital na itinayo, at nasa strategic locations.

Tinukoy din natin na ang dagdag sa subsidiya sa PhilHealth mula P80 bilyon ngayong 2022 ay naging P100 bilyon sa 2023, at dapat magamit ito ng PhilHealth sa dagdag ng benepisyo na sakop ng Universal Healthcare Law gaya ng para sa dialysis at pagpapalawak ng Konsulta program. Sa Konsulta program, sagot ng PhilHealth ang pagpapa-check-up o laboratory test sa isang PhilHealth-accredited health facility. Dapat gawing libre ang pagpapa-check-up para hindi natatakot ang ating mga kababayan na alamin ang kalagayan ng kanilang kalusugan.

Hiniling din natin na dagdagan ang pondo sa specialty hospitals tulad ng Lung Center of the Philippines, Philippine Heart Center at National Kidney and Transplant Institute. Ang malalaking ospital na ito ang pinakapinupuntahan ng ating mahihirap na kababayan, kaya dapat masuportahan ang patuloy na pag-improve ng kanilang serbisyo.

Dapat may sapat na pondo para sa mga programa laban sa cancer, tuberculosis at mental health disorders, lalo na’t maraming apektado ang mental health ngayong panahong ito ng krisis sa bansa. At habang patuloy ang pagbabakuna laban sa COVID-19, hindi natin dapat kalimutan na labanan din ang iba pang vaccine-preventable diseases, tulad ng polio at measles.

Palagi nating tandaan na hindi pa tapos ang pandemya at delikado pa rin ang panahon habang nariyan pa ang COVID-19. Huwag tayo magkumpiyansa. Siguraduhin nating makarating ang bakuna sa mga nangangailangan nito dahil ang bakuna lamang ang tanging susi at solusyon ngayon para makabalik tayo sa normal na pamumuhay.

Napakahalaga ng buhay at kalusugan ng mga Pilipino, kaya sinuportahan at iniendorso natin ang dagdag-pondo para sa kalusugan. At tulad ng palagi nating paalala sa lahat ng ahensya ng gobyerno, siguraduhin nating magagastos ang pondo sa tama at naaayon sa batas—at ang mahihirap nating kababayan ang higit na dapat makinabang.

Huwag nating sayangin ang mga sakripisyo natin nitong nakaraang mga taon. Matuto tayo sa nangyari nitong pandemya at sikaping maging mas handa sa anumang krisis pangkalusugan na maaaring dumating pa. Higit sa lahat, siguraduhin nating walang maiiwan sa ating muling pagbangon bilang nagkakaisa at mas matatag na sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.