Gawing prayoridad ang paglikha ng solusyon sa mga problemang hatid ng kalamidad

ni Bong Go - @Bisyo Magserbisyo | November 3, 2022

Nakadudurog ng puso sa sinapit ng ating mga kababayan na hinagupit ng Bagyong Paeng. Higit tayong nalulungkot para sa ibang may kapamilyang nasawi. Nagpapaabot tayo ng buong pusong pakikiramay.

Agad nakipag-ugnayan ang ating tanggapan sa mga LGUs at naghatid ng food packs at iba pang relief goods sa mga biktima ng bagyo.

Noong Oktubre 30 ay pinuntahan natin ang Datu Odin Sinsuat at Parang sa Maguindanao del Norte; at Datu Abdullah Sangki at Ampatuan sa Maguindanao del Sur. Humigit-kumulang sa 1,200 food packs ang naipadala sa araw na iyon.

Sumunod na araw ay nagpadala naman tayo ng higit 3,000 food packs at dagdag-tulong sa mga LGUs sa Maguindanao del Norte para sa Cotabato City at munisipalidad ng Sultan Kudarat, Sultan Mastura, Buldon, Barira, Matanog, Datu Blah Sinsuat, Northern Kabuntalan, Mother Kabuntalan at Upi. Sa Maguindanao del Sur naman ay kasalukuyang inihahanda ang dagdag-food packs para naman sa mga munisipalidad ng South Upi, General Salipada K. Pendatun, Guindulungan, Datu Montawal, Sultan sa Barongis, Mamasapano at Datu Piang.

Sa North Cotabato, nagpadala rin tayo ng kabuuang 2,000 food packs para sa mga biktima ng bagyo, partikular para sa mga lugar ng Libungan at Midsayap, pati na sa Aleosan, Kabacan at Pigkawayan.

Kahapon din, Nobyembre 1 ay nag-abot tayo ng tulong sa Cavite na tinamaan din ng bagyo. Humigit-kumulang sa 1,500 food packs at iba pang pangangailangan ang dinala natin para sa mga residente ng Kawit, Rosario, Noveleta, Cavite City at Bacoor City.

Patuloy ang ating pagbisita sa iba pang nasalantang komunidad sa Luzon, Visayas at Mindanao.

Sa panahon ngayon, kung kailan maraming parte ng bansa ang tinamaan ng sakunang ito — dagdag pa riyan ang pandemya at lindol na naramdaman sa hilagang parte ng bansa —bawat oras, bawat minuto, bawat piso at bawat tao na maiaambag natin para makatulong sa kapwa natin Pilipino ay mahalaga upang makapagsalba ng buhay.

Kaya patuloy tayong nakikipag-ugnayan sa iba’t ibang ahensya at LGUs para alamin kung paano pa tayo mas makatutulong sa mga isinasagawang relief, recovery and rehabilitation efforts. Gagawin natin ang ating parte para magkaloob ng suporta sa mga apektadong komunidad, saanmang dako ng bansa.

Napakalawak ng pinsalang idinulot ng Bagyong Paeng sa ating bansa at sa ating mga kababayan. Kaya tulad ng madalas nating sabihin noon pa man at hanggang ngayon, kailangan talagang maging mas handa ang ating bansa sa ganitong sitwasyon.

Saludo tayo sa mga kawani ng gobyerno na ginawa ang kanilang tungkulin sa panahon ng krisis at trahedya. Ngunit bilang mambabatas ay nais din nating paigtingin pang lalo ang mga mekanismo sa paghahanda, pagresponde at pagbangon para mas maproteksyunan ang buhay ng ating mga kababayan.

Kaya patuloy nating ipinaglalaban na maisabatas ang isinumite nating Senate Bill No. 188 na lilikha sa Department of Disaster Resilience. Sa loob ng isang taon ay nasa mahigit 20 bagyo ang dumaraan sa ating bansa, bukod pa ang ibang kalamidad tulad ng lindol at pagputok ng bulkan. Kapag naitatag ang DDR, may sarili itong kalihim na magbibigay ng mas malinaw na direktiba sa iba pang sangay ng pamahalaan kung paano tutugunan ang sitwasyon bago dumating at pagkatapos ng kalamidad.

Bukod dito, nariyan din ang ating panukalang Mandatory Evacuation Center Act of 2022. Layunin nito na magtayo ng matitibay at permanente na evacuation center sa bawat probinsya, lungsod at munisipalidad. Bukod sa maayos na tulugan at palikuran, kumpleto ito sa mga pangunahing pangangailangan gaya ng pagkain, tubig, gamot at mga damit. Bigyan natin ang mga biktima ng maayos na matutuluyan pansamantala para mas ligtas at mabilis silang makabangon.

Isa pa sa isinusulong natin ang Rental Housing Subsidy Bill na ang layunin ay pagkalooban ng ayuda sa kanilang pangungupahan ang mga Pilipinong nawalan ng tirahan para mayroon silang disenteng matitirahan at gastusin habang hindi pa naitatayong muli ang kanilang bahay o inihahanap pa sila ng relokasyon.

Habang nakikidalamhati tayo sa ating mga kababayan na apektado ng sunud-sunod na kalamidad, gawin din natin ang lahat ng ating makakaya para makapagligtas at maproteksyunan ang mas maraming buhay sa hinaharap.

Patuloy lang tayong magserbisyo at magmalasakit sa kapwa para sama-sama nating malampasan ang isa na namang hamon sa katatagan at pagkakaisa nating mga Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Evacuation center sa bawat probinsya, lungsod at munisipalidad

ni Bong Go - @Bisyo Magserbisyo | October 29, 2022

Noong Oktubre 24 hanggang 26 ay nasa Paris, France ang inyong lingkod para sa official parliamentary visit. Naimbitahan tayo bilang bahagi ng inter-parliamentary exchanges na bahagi na rin ng pagdiriwang ng ika-75 anibersaryo ng pagkakatatag ng ugnayang pandiplomatiko ng Pilipinas at France. Kasama ang mga kapwa natin senador sa pamumuno ng ating Senate President Juan Miguel Zubiri, nakipagpulong kami sa ating French counterparts at tinalakay ang mas matatag na bilateral cooperation sa pagitan ng mga mambabatas ng dalawang bansa.

Sa ginanap na pulong ay napag-usapan ang mga isyu na may kinalaman sa climate change, renewable energy, food security at economic development.

Bilang Chair ng Senate Committee on Health, sinamantala natin ang pagkakataon para personal na pasalamatan ang pamahalaan ng France sa ginawang pagtulong nito sa ating bansa sa pagtugon sa pandemya, lalo na sa donasyon nitong mga bakuna kontra COVID-19. Isa rin ang Research Institute for Tropical Medicine (RITM) sa napili ng France na pagkalooban ng pondo noong 2020. Ang RITM ang nanguna sa pagsasagawa ng COVID-19 testing noong kasagsagan ng pandemya.

Kaakibat nito, isinusulong natin sa 19th Congress ang pagtatatag sa ating bansa ng Virology Institute of the Philippines para mapag-aralan natin ang paggawa ng sariling mga bakuna sa hinaharap.

Para naman matugunan ang epekto ng climate change, inihayag natin ang hangarin na magkaroon ang Pilipinas ng disaster resilient communities sa pamamagitan ng pagsusulong ng panukalang lilikha sa Department of Disaster Resilience. Layunin nitong mapabilis ang mga mekanismo sa paghahanda kapag may kalamidad at iba pang emergency. Kapag naitatag ang DDR, may sarili itong kalihim na magbibigay ng mas malinaw na direktiba sa iba pang sangay ng pamahalaan kung paano tutugunan ang sitwasyon bago dumating at pagkatapos ng kalamidad.

Nitong nakaraang araw, kinamusta ng ating opisina ang ating mga kababayan sa Abra at karatig na probinsya na tinamaan na naman ng lindol. Handa tayong mag-abot ng tulong sa mga nasalanta sa abot ng ating makakaya. Kailangang-kailangan nila ang ating pagmamalasakit ngayon.

Ang mga ganitong insidente ang dahilan kaya pursigido tayong ipaglaban sa Senado, bukod sa DDR, ang panukalang Mandatory Evacuation Center Act of 2022 na layuning magtayo ng matitibay na evacuation center sa bawat probinsya, lungsod at munisipalidad na pansamantalang tutuluyan ng mga apektadong residente. May maayos na tulugan at palikuran, kumpleto rin sa mga pangunahing pangangailangan tulad ng pagkain, tubig, gamot at mga damit.

Isa pa ang Rental Housing Subsidy Bill na magkakaloob naman ng rental housing subsidy sa mga nawalan ng tirahan para mayroon silang disenteng matitirahan at gastusin habang hindi pa naitatayong muli ang kanilang bahay o inihahanap pa sila ng relokasyon. Kailangan talaga maisabatas ang mga ito para sa kapakanan ng mga inaabot ng kalamidad, sakuna at trahedya.

At habang papatapos ang taon ay lalong nagiging pursigido ang aking tanggapan sa paghahatid ng tulong sa ating mga kababayan na ang kabuhayan ay apektado pa rin ng pandemya at iba pang krisis.

Tulad ng dati ay maagap tayo sa pagsaklolo sa mga nasunugan. Inalalayan natin ang 63 pamilya sa Bgy. San Dionisio, Parañaque City; 22 residente ng Mati City, Davao Oriental; mahigit isang daang pamilya sa Pasay City; at ang limang pamilya ng Alabel, Sarangani. Nag-abot din tayo ng suporta para sa 1,146 estudyante mula sa San Simon, Pampanga. Kasabay naman ng groundbreaking ng itatayong Super Health Center sa Naval, Biliran noong Oktubre 25, namahagi rin tayo ng ayuda sa 500 residente roon.

Nakarating pa tayo sa iba’t ibang komunidad at napangiti natin ang 1,000 sa Angeles City, Pampanga; 2,351 benepisyaryo mula sa iba’t ibang bayan ng Lanao del Norte; 1,000 sa Abucay, Bataan; 1,000 sa Ibajay, Aklan; 866 sa Dumaguete City, Negros Oriental; 600 sa City of San Jose del Monte, Bulacan; 230 pa sa Dingalan, Aurora; at 130 pa sa Sta. Cruz, Laguna.

Sa ating layuning mapasigla ang lokal na ekonomiya, tuluy-tuloy din ang pagkakaloob natin ng tulong para buhayin ang maliliit na negosyante. Nag-abot tayo ng dagdag na suporta para sa 667 MSMEs sa Bagulin, Burgos, Pugo, Agoo, Bagulin, Rosario, Sto. Tomas, Aringay, Santol, Caba at Balaoan sa La Union; at 250 sa Infanta, Quezon.

Ang kaligtasan at kapakanan ng ating mga kababayan ang palagi nating inaalala saanman tayo naroroon. Magkaisa tayo at patuloy na magbayanihan, at manalanging malampasan natin ang lahat ng pagsubok na ating kinahaharap. Makipag-ugnayan tayo upang mas mapalakas at gawing mas matatag ang ating bansa upang mabigyan ng mas komportableng buhay ang bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tiyakin ang kapakanan ng mga estudyante ngayong F2F

ni Bong Go - @Bisyo Magserbisyo | October 26, 2022

Ngayong Nobyembre 2 ay sisimulan na ng mga pampublikong paaralan ang pagdaraos ng limang araw na face-to-face classes kada linggo. Ang mga pampribadong paaralan ay maaari namang magsagawa ng blended learning. Batay ito sa Department Order 44 na nilagdaan ni Vice-President at Department of Education Secretary Sara Duterte.

Suportado natin ang desisyon ng ehekutibo at tiwala tayo sa kakayahan nilang ipatupad ito nang maayos. Gayunman, muli tayong nananawagan sa pamahalaan at sa mga school authorities na tiyakin ang kalusugan at kapakanan ng mga estudyante sa kanilang pagbabalik sa mga silid-aralan.

Bilang Chair ng Senate Committee on Health at miyembro ng Senate Committee on Basic Education, bagaman at nararanasan na natin ngayon ang bahagyang pagbaba ng bilang ng mga tinatamaan ng COVID-19 at marami na sa sektor ng ekonomiya ang nagbabalik sa kanilang normal na operasyon, napakahalaga na mapangalagaan ang buhay ng lahat ng Pilipino at makontina ang panganib na dala ng pandemya, lalo na sa kabataan.

Hinihimok natinang lahat na siguruhin ang kapakanan at kalusugan ng mga estudyante sa gitna ng pagpapatupad ng full face-to-face classes sa bansa. Naiintindihan natin na importante ang edukasyon dahil ito ang tanging puhunan sa mundong ito. Kaya kapag nagkakaloob po ang aking tanggapan ng ayuda sa mga komunidad, pinapayuhan at hinihikayat ko ang mga bata na patuloy na mag-aral kahit na may krisis tayong hinaharap.

Gayunman, gawin natin ito sa ligtas na paraan. Ipinapaalala natin sa pamunuan ng mga paaralan at maging sa mga guro na mahigpit na ipatupad ang Required Health Standards for COVID-19 Mitigation na magkatuwang na inilabas ng DepEd at ng Department of Health ngayong magkakasama na muli sa loob ng silid-aralan ang mga guro at estudyante.

Dapat maimplementa ito nang maayos para hindi malagay sa alanganin ang kaligtasan at kalusugan ng mga kabataan. Kahit ayaw nating maantala ang klase nila, importanteng ligtas ang mga estudyante. Health and safety pa rin ang importante. Sa kagustuhan nating makapag-aral ang mga bata, huwag nating kalimutan na unahin palagi ang interes, kapakanan at buhay nila at ng bawat Pilipino.

Palakasin din natin ang pagbabakuna sa mga komunidad. Ngayong puwede nang magpabakuna ang mga edad mula lima hanggang 18, sana ay mas lalong paigtingin natin ang vaccination drive para mas maraming kabataang Pilipino ang mabakunahan, lalo na ngayong patuloy na lumalabas ang mga bagong variants at subvariants ng COVID-19.

Bilang magulang din, prayoridad nating proteksyunan ang mga bata. Unang-una, hindi maikakailang mayroon pa ring mga hindi pa bakunado. Pangalawa, hindi natin kontrolado 'yung galaw nila at pangatlo, baka mag-back to zero na naman tayo kung sakaling magkahawahan na naman.

Kaya ngayon na puwede nang magpabakuna ang mga bata, huwag nating sayangin ang oportunidad na ito na proteksyunan sila. Palagi nating alalahanin na hindi kaya ng gobyernong mag-isa ang laban kontra pandemya. Mahihirapan din ang mga frontliners kung darami na naman ang maoospital. Ang pagkontina sa paglaganap ng virus ay nagsisimula sa ating pagiging mga responsableng mamamayan sa pamamagitan ng pagpapabakuna at pagsunod sa health and safety protocols.

Napakahalaga na palaging naipatutupad ang mga patakaran para matulungan ang mga lokal na awtoridad at ang mga eskwelahan sa ligtas na pagbabalik ng face-to-face classes. Kung kakailanganin, maglagay tayo ng dagdag-safety officers sa mga paaralan at iba pang pampublikong lugar para masigurong nasusunod ang minimum health standards. Huwag din nating kalimutan ang mga natutunan natin sa nakaraang mga taon tulad ng contact tracing at iba pang disease control mechanisms.

Proteksyunan natin ang kabataang Pilipino. Sila ang pag-asa ng ating bayan at ng mga susunod pa nating henerasyon. Bukod sa tamang edukasyon na magiging puhunan nila sa buhay, magtulungan din tayo para mabigyan sila ng mas ligtas at komportableng buhay sa hinaharap.

Ilayo natin sila sa masasamang bisyo, tulad ng ilegal na droga, engganyuhin natin silang pumasok sa mga mas produktibong gawain tulad ng sports — “Get into sports, stay away from drugs!”, ‘ika nga — at gabayan natin ang kanilang landas para maging mabuting mamamayan para sa kanilang mga magulang, pamilya at bayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.