Gawing de-kalidad pero abot-kaya ang serbisyong pangkalusugan

ni Bong Go - @Bisyo Magserbisyo | November 12, 2022

Noong Nobyembre 8 ay nag-co-sponsor ang inyong lingkod para sa 2023 budget bill na magkakaloob ng mga kinakailangang dagdag-pondo para sa ating mga prayoridad na sektor.

Bilang Chair ng Senate Committee on Health, ipinaabot natin sa mga kasamahan sa Senado na ang paglalaan ng budget para sa pangangalaga sa kalusugan ng lahat ng Pilipino ay dapat ituring na mahalagang investment.

Nagpapasalamat tayo dahil naisama ang karagdagang budget para sa pagpapalawak at pagpapalakas ng epidemiology at surveillance systems ng Department of Health; Cancer Assistance Fund para matulungan ang mga kababayan nating sumasailalim sa cancer treatment; hiring ng immunization vaccinators para mapalakas ang isinasagawang immunization activities ng DOH upang mapigilan ang posibleng paglaganap ng mga sakit na kayang kontinahin sa pamamagitan ng bakuna; Health Facilities Enhancement Program para sa mas moderno at kumpletong pasilidad at kagamitan; at maging ang Medical Assistance for Indigent Patients program para sa mahihirap nating kababayan.

Natutuwa tayo na maipagpapatuloy ang pagtatayo ng karagdagang Super Health Centers sa iba’t ibang sulok ng bansa sa susunod na taon para maisaayos lalo ang accessibility ng ating health facilities at services.

Bukod dito, ang P21 bilyong inilaan sa ilalim ng PhilHealth ay magagamit para madagdagan ang benefit packages kabilang ang pagpapalawak ng free dialysis coverage, mental health outpatient coverage at ang pagpapatupad ng comprehensive outpatient benefit package, kabilang ang libreng medical check-up. Kaya dapat maimplementa na nang buo ang Universal Health Care law.

Sa pamamagitan nito, magagarantiyahan nating ang bawat Pilipino ay may karapatan sa de-kalidad at abot kayang serbisyong pangkalusugan.

May karagdagang budget din para sa Overseas Filipino Workers Hospital. Isa ito sa priority projects ng administrasyon ni dating pangulong Rodrigo Duterte para sa mga OFWs at sa kanilang pamilya. Magkakaroon din ng Malasakit Center sa OFW hospital. Patunay ito na prayoridad natin ang mga OFWs, kaya rin talagang isinulong nating maisabatas ang pagtatatag sa Department of Migrant Workers. Masaya rin tayo na may sariling budget na sa susunod na taon ang DMW.

Nagkaroon din ng dagdag-budget ang National Academy of Sports na isa rin sa mga proyekto ng nakaraang administrasyon. Natutuwa tayong patuloy nating masusuportahan ang mga student-athletes. Isang paraan itong NAS para maisulong ang grassroots sports development, makakapag-training sila at makakapag-aral nang sabay. Maisusulong din natin ang sports sa kabataan imbes na maligaw o malulong sila sa masasamang bisyo. Sabi ko nga, “Get into sports, stay away from drugs.”

Lubos ang pasasalamat natin dahil sa iisang hangarin na mas mapalakas ang healthcare system at mga sports program sa bansa. Ngunit sabi ko nga, ang importante, magamit ang budget na ito para sa mahihirap, siguraduhin natin na walang magutom at matulungan ang mga helpless, hopeless at walang malapitan.

Tuluy-tuloy ang ating paghahatid ng serbisyo at malasakit sa ating mga kababayan na hanggang ngayon ay apektado pa rin ng pandemya at iba pang krisis ang kabuhayan.

Ngayong araw, bumisita tayo sa Roxas City, Capiz para tingnan ang kalagayan ng mga sinalanta ng Bagyong Agaton at mapagaan ang dalahin ng higit tatlong libong benepisaryo. Pagkatapos ay dumiretso tayo sa Balasan, Iloilo para magbigay ng tulong sa kanilang transport sector at masilayan ang bago nilang transport terminal na ating sinuportahan ang pagtatayo. Namahagi rin tayo ng tulong sa maliliit na negosyo sa Estancia, Iloilo at nag-inspection sa itinatayong public market na atin ding sinuportahan na mapondohan. Pinuntahan natin ang pagtatapos ng limang araw na pamamahagi ng ayuda sa mga naging biktima ng bagyong Agaton sa Anilao, kasabay ang pagsagawa ng inspeksyon at monitoring ng itinatayong Super Health Center sa nasabing bayan.

Noong Nobyembre 7 ay personal tayong bumisita sa Batangas at nagkaloob ng ayuda sa 1,362 mahihirap na residente ng Balayan; at 400 pa sa Calatagan na apektado ng kalamidad kung saan inilunsad din namin ang Super Health Center na itatayo roon.

Nakarating din ang ating tanggapan sa iba’t ibang komunidad para maghatid ng tulong. Sa Iloilo, limang araw tayong namigay ng ayuda sa Anilao para sa 7,615 benepisyaryo; bukod pa ang 293 sa Pototan; 177 sa Lambunao; 17 sa Bingawan; at 15 pa sa Calinog. Sa Cagayan kung saan nanalasa ang bagyong Paeng ay napagaan natin ang dalahin ng 650 benepisyaryo sa Sanchez Mira; 450 sa Gonzaga; 450 sa Camalaniugan; at 300 pa sa Allacapan.

Hindi natin kinaligtaan ang Surigao del Norte at natulungan ang 1,641 residente ng Sison; 1,662 sa Taganaan; at 1,267 pa sa Placer. Sa Cavite, naayudahan ang 1,000 residente ng General Mariano Alvarez; at 500 pa sa Bacoor City. Naalalayan din ang 1,666 residente ng Tukuran, Zamboanga City; 472 sa Brgy. Sto Niño, Hagonoy, Bulacan; 436 sa Cagayan de Oro City; 390 sa Sta. Cruz, Zambales; 225 sa Dumaguete City; 300 sa Malasiqui, Pangasinan; 600 sa San Pablo City, Laguna; 169 pa sa Tarlac City; at 246 sa Binuangan, Misamis Oriental.

Namahagi rin tayo ng 1,400 food packs para sa mga biktima ng Bagyong Paeng sa Malolos City, Pandi, Marilao, Paombong, Hagonoy at Calumpit, na mga lugar sa Bulacan; 300 sa Taytay, Rizal; at 600 pa sa San Pedro City, Laguna.

Mayroon ding 78 pamilya mula sa Iligan City na nakatanggap ng tulong.

Hangad natin ang pantay-pantay na serbisyo. Palagi tayong magtulungan, magbayanihan at magmalasakit sa kapwa upanh mabilis nating malampasan ang mga pagsubok na ating kinahaharap.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ang importante ay walang magutom na Pilipino

ni Bong Go - @Bisyo Magserbisyo | November 9, 2022

Nagtungo ang inyong Senador Kuya Bong Go sa mga lugar na sinalanta ng Bagyong Paeng nitong mga nakaraang araw para tingnan ang kalagayan ng ating mga kababayan at makapagbigay ng kaunting ngiti sa panahon ng kanilang pagdadalamhati.

Nakarating ang inyong lingkod sa Cavite, Maguindanao del Norte, Maguindanao del Sur at Batangas para personal na magkaloob ng tulong sa mga apektadong residente. Ang ating tanggapan naman ay nagtungo rin sa iba pang lugar, tulad ng Laguna, Bulacan at Zamboanga City upang magdala rin ng tulong. Pupuntahan din namin ang Rizal, Panay Island at iba pang apektadong lugar sa mga susunod na araw.

Ipinaalala ko rin sa opisyales ng gobyerno na walang dapat maging isyu sa pagkakaloob ng tulong sa mga nangangailangan. Kung anuman ang available na food packs, kaysa naman masira ay ibigay na agad sa mga tao. Ang importante ngayon ay walang magutom na Pilipino. Sa totoo lang ay pera ng taumbayan 'yan. Ibalik natin sa kanila sa pamamagitan ng mabilis, maayos at maaasahang serbisyong may malasakit.

Tayong mga nasa gobyerno, siguraduhin nating ipamahagi na agad ang tulong. Kahit madoble o matriple, ibigay na natin sa mga kababayan natin dahil naghihirap at nag-a-adjust pa sila sa kanilang sitwasyon ngayon na katatapos lang ng kalamidad at may pandemya pang kinahaharap.

Ang iba riyan ay nasiraan ng bahay at wala pang panahong bumili ng pagkain kahit delata. 'Yung iba nga ay walang pambili. Tulungan natin ang ating mga kababayan, lalo na ang mahihirap. Huwag natin silang mas pahirapan pa. Ibigay agad ang dapat para sa kanila—food pack man 'yan o ayuda—sa lalong madaling panahon.

Lalo na ngayong nagiging mahal ang presyo ng mga bilihin. Trabaho natin sa gobyerno na gawan ng paraan na walang magutom. Dapat gamitin ang lahat ng resources ng pamahalaan para pakinabangan ng bawat Pilipino.

Para naman sa ating mga kababayan, huwag kayong mawalan ng pag-asa. Magtulungan lang tayo. Paulit-ulit ko ngang sinasabi na ang pera, kikitain pa 'yan, ang gamit mabibili natin, ang mga nabasa at naputikan ay puwedeng labhan. Pero 'yung perang kikitain natin, hindi kayang bilhin ang buhay. A lost life is a lost life forever. Pangalagaan natin ang buhay ng bawat isa.

Ipinaalala rin natin sa lahat na iba na ang panahon ngayon dulot ng climate change. Dapat protektado tayo. Isa sa mga nakikita nating solusyon ay ang malawakang reforestation at greening program sa mga probinsya. Maraming nakakalbo sa ating kagubatan na dapat tanimang muli ng mga puno. Kailangang bantayan pa lalo ang kagubatan at sugpuin ang illegal logging. Kailangang kumpleto at updated ang ating mga geohazard maps and data upang alam natin ang mga lugar na palaging apektado.

Halimbawa, kung alam naman nating palaging binabaha at prone to landslide ang lugar, puwede nating ipagbawal ang pagtatayo ng mga bahay para maiwasan natin ang pagbubuwis ng buhay kung merong sakuna. Dapat ding ayusin ang mga flood control projects bilang dagdag-solusyon sa pagbaha. Umaapela tayo sa gobyerno na mas paigtingin pa ang mga programang ito.

Sa 19th Congress ay muli nating isinumite ang panukalang paglikha sa Department of Disaster Resilience para magkaroon tayo ng departamento na tututok sa mga kalamidad at sakuna, sa pre-positioning ng mga pangunahing pangangailangan bago dumating ang bagyo, sa paglikas ng mga kababayan nating nasa lugar na may peligro, sa pag-aaruga sa mga evacuees hanggang sila ay makabangon at lalo na pagdating sa recovery at rehabilitation. Pag-alis ng bagyo, aasikasuhin naman ang restoration of normalcy at rehabilitasyon ng mga lugar na apektado.

Napapanahon na ang paglikha sa DDR o pagsasaayos at pagpapalakas sa NDRRMC, kaysa puro task force lang. Alalahanin nating walang katapusan ang pagdating sa ating buhay ng bagyo, baha, lindol, pagputok ng bulkan at mga sunog, kaya dapat maging mas proactive tayo.

Bilang Chair ng Senate Committee on Health, mayroon din tayong proposed additional budget for the health sector. Mas kailangan nating palakasin pa at suportahan ang ating healthcare system tulad ng mga karagdagang ospital, specialty hospitals, Super Health Centers, para hindi na kailangang magbiyahe ang ating mga kababayan ng malayo upang magpagamot.

Maaasahan naman ang ating suporta ng mga doktor at nars na itinuturing nating bayani, hindi lang sa panahon ng COVID-19, kundi maging kapag may kalamidad dahil sila ang unang rumeresponde para proteksyunan ang kalusugan ng ating mga kababayan.

At tulad ng ating pangako, magtatrabaho at magseserbisyo tayo sa lahat ng Pilipino sa abot ng ating makakaya. Minsan lang tayong dadaan sa mundong ito, kung anumang kabutihan, tulong at malasakit ang puwede nating gawin sa ating kapwa ay gawin na natin ngayon dahil hindi na tayo babalik sa mundong ito. Patuloy tayong magseserbisyo, dahil naniniwala akong ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Magpabakuna at magpa-booster, plis!

ni Bong Go - @Bisyo Magserbisyo | November 4, 2022

Hanggang nand'yan pa ang banta ng pandemya, huwag muna tayong magkumpiyansa. Ito ang palagi nating paalala, lalo na ngayong iba’t ibang krisis at sakuna ang ating hinaharap.

Habang unti-unting nakakabangon ang ekonomiya, huwag nating sayangin ang pinaghirapan at isinakripisyo sa nakaraang dalawang taon. Huwag isantabi ang minimum health protocols na dapat sundin para masigurong ligtas ang ating komunidad.

Suportado natin ang pasya ng gobyerno na gawing voluntary ang pagsusuot ng masks dahil naniniwala tayong base naman ito sa siyensya at napag-aralang mabuti ng mga eksperto. Ngunit kung hindi naman sagabal o mahirap para sa atin, magsuot pa rin ng masks. Ito ay bilang proteksyon hindi lang sa ating mga sarili, kundi maging sa mga kapamilya nating mahihina ang resistensya, matatanda, sakitin at hindi pa bakunado.

Dagdag pa rito, patuloy ang ating apela sa mga hindi pa bakunado na magpabakuna na, pati na ang booster. Masyadong mababa pa ang booster rate natin, isa sa mga pinakamababa sa buong Southeast Asian region. Ayon sa DOH, as of November 1, merong 48% lang ng mga kabataan edad 5-11 na taon ang bakunado. At 26% lang ng ating qualified population ang naturukan ng unang booster.

Inuulit natin: dapat bakunado para protektado.

Bilang Chair ng Senate Committee on Health, ang kalusugan at kaligtasan ng mga Pilipino ang ating pangunahing layunin. Ang buhay ng tao, hindi katulad ng pelikula, walang part two.

Samantala, tuluy-tuloy ang ating isinasagawang koordinasyon sa mga ahensya ng pamahalaan at local government units para makatulong sa mga naging biktima ng bagyong Paeng.

Sa lawak at laki ng pinsalang iniwan ng naturang bagyo, buong pamahalaan at tayong lahat na mga Pilipino ang dapat na magkaisa at magtulungan para maalalayan ang ating mga kababayang apektado.

Naunang nakapaghatid na ng food packs at iba pang tulong ang ating opisina sa mga lalawigan ng Maguindanao del Norte, Maguindanao del Sur, Cotabato at Cavite.

Patuloy naman ang pagdadala ng tulong sa Zamboanga City na binagyo rin. Sa Bgy. Putik ay nagbigay tayo ng 60 food packs at 220 food packs naman sa Bgy. Talon-talon. Nagkaloob din tayo ng mga bola ng basketball at volleyball sa dalawang barangay para may mapaglibangan ang mga kabataan doon at pansamantalang makalimot sa trauma na hatid ng kalamidad.

Noong Nobyembre 2 ay nag-abot tayo ng tulong sa 1,200 residenteng apektado ng bagyo sa Iloilo City.

Ngayong araw ay personal nating bibisitahin ang ating mga kababayan sa Bacoor City at Kawit, Cavite. Bukas naman ay personal din tayong pupunta sa Maguindanao del Sur at Maguindanao del Norte upang malaman ang kalagayan ng mga kababayan natin doon, makapaghatid ng tulong at masuportahan ang kanilang pagbangon.

Ipinaalala rin natin sa mga nangangailangan ng tulong-medikal, maaari kayong lumapit sa alinmang Malasakit Center sa inyong lugar. Mahalang masubaybayan ang kalusugan ng ating mga kababayan dahil kapag nalantad sila sa kalamidad ay mas madaling kapitan ng sakit, bukod pa sa naririyan pa rin ang banta ng pandemya.

Samantala, hindi natin kinakaligtaan ang paghahatid ng serbisyo sa iba pa nating mga kababayan na ang kabuhayan ay apektado pa rin ng pandemya at iba pang krisis. Maagap tayong sumaklolo sa 43 residente ng Bgy. Gulod, Quezon City na naging biktima ng insidente ng sunog, kamakailan. Pupuntahan din natin ngayon ang mga nasunugan sa Taguig City.

Nagsagawa rin tayo ng serye ng pamamahagi ng tulong sa Himamaylan City, Negros Occidental para sa 3,323 benepisaryo. Nakapag-iwan naman tayo ng konting ginhawa sa 1,027 residente ng Tabaco City, Albay; bukod pa sa 1,000 benepisyaryo sa Palayan, Nueva Ecija; at 846 naman sa Sta. Maria, Bulacan.

Tulad noon, sa abot ng ating makakaya, sisikapin natin na makatulong sa mga nangangailangan.

Hilin lamang natin na ituloy ang pagkakaisa at pakikipagbayanihan dahil napatunayan na natin na mabisa itong sandata para malampasan ang anumang pagsubok na ating kinahaharap. Sama-sama tayo at walang maiiwan sa ating muling pagbangon mula sa pandemya at mga kalamidad.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.