Bagong buhay para sa biktima ng droga

ni Bong Go - @Bisyo Magserbisyo | November 25, 2022

Sa ginanap na pagdinig sa Senate Committee on Public Order ngayong linggo, muli tayong nanawagan na magkaroon ng pangkalahatang sistema o holistic approach sa pamamaraan kung paano masusugpo ang paglaganap ng ilegal na droga sa bansa.

Bukod sa tapang, dapat mayroong malasakit. Importante kung paano matutulungan ang mga nalulong sa masamang bisyo na muling makapagbagong buhay at makabalik sa kanilang pamilya at sa lipunan sa pamamagitan ng mas maayos na rehabilitation programs na ipatutupad ng pamahalaan.

Isa sa mga adbokasiya ng nakaraang administrasyon ay ang pagpapanatili ng peace and order sa bansa. Kaya nagpapasalamat tayo sa Philippine National Police, Dangerous Drugs Board, Philippine Drug Enforcement Agency, National Bureau of Investigation at sa Department of the Interior and Local Government, sa lahat ng naging bahagi ng laban kontra droga dahil hindi ito magiging matagumpay kung hindi dahil sa inyong tulong at trabaho.

Masidhi ang kampanya kaya bumaba na ang crime rate noon. Mahalagang hindi masayang ang ating nasimulan at maipagpatuloy ang pagsugpo sa mga nasa likod ng ilegal na droga para masolusyunan din ang problema sa kriminalidad at katiwalian. Kaya saludo tayo sa administrasyon ni Pangulong Ferdinand Marcos, Jr. dahil sa kanilang adhikain na ipagpatuloy ang laban at bigyang-importansya ang rehabilitasyon.

Ito ang isa sa mga dahilan kaya isinumite nating muli ang isa sa ating priority bills, ang Senate Bill No. 428 na naglalayong maitayo ang Drug Abuse Treatment and Rehabilitation Center sa bawat lalawigan sa ating bansa. Ang mga nalulong sa droga ay dito pansamantalang maninirahan habang isinasagawa ang rehabilitasyon at gamutan. At kapag tuluyan na silang na-rehabilitate, magpapatuloy ang rehabilitation center sa pagsubaybay sa kanila hanggang tuluyan silang makaangkop muli sa buhay.

Bukod sa pagtiyak sa kaligtasan at seguridad ng ating bansa laban sa kasamaang hatid ng droga, napakahalagang tutukan at bigyang-pansin ang rehabilitasyon, paggaling at tuluyang pagbabagong buhay ng mga nalulong dito. Sa pamamagitan ng pagtatayo ng Drug Abuse Treatment and Rehabilitation Centers, mas mapalalakas natin ang isinasagawang pagsisikap na makapagsalba ng buhay at makawala ang mga biktima sa kuko ng mapanganib na droga.

Bahagi ng ating pangako ang patuloy na paglalapit ng serbisyo at malasakit sa mga Pilipino lalung-lalo na ang mga higit na nangangailangan.

Dahil napakahalaga ng edukasyon ng kabataang Pilipino, noong Nobyembre 23 ay sinaksihan natin ang ceremonial awarding ng scholarship certificates para sa 593 estudyanteng benepisaryo sa Minalin, Pampanga. Sinaksihan din natin ang paglulunsad ng ika-153 na Malasakit Center na nasa OFW Hospital sa San Fernando City. Matapos ito ay nag-inspeksyon tayo sa itinatayong SHC sa nabanggit ding lugar at personal na namahagi ng ayuda sa mahihirap na residente.

Ngayong linggo ay maagap nating inalalayan ang mga biktima ng sunog, tulad ng 72 residente sa Cagayan de Oro City; 19 pamilya sa Nangka at Malanday sa Marikina City, at dalawang katao sa Tacurong City, Sultan Kudarat; at ang 466 na binaha sa Cagayan de Oro City.

Nakarating din tayo sa Maguindanao del Norte at naghatid ng tulong sa 3, 333 mahihirap na residente mula sa iba’t ibang bayan. Sa Surigao del Norte ay 1,200 residente ng Sta. Monica ang naalalayan, bukod pa ang 1,184 mula sa Dapa. Sa Misamis Oriental, hindi natin kinaligtaan ang 1,595 na benepisaryo sa Medina, at 926 pa sa Tagoloan. Dumayo rin tayo sa Noveleta, Cavite at naayudahan ang 1,333 benepisyaryo; 1,666 sa Labason, Zamboanga del Norte; at 1,116 sa Lucena City, Quezon.

Ramdam natin ang paparating na Kapaskuhan. Tanaw na rin natin ang “light at the end of the tunnel” sa laban kontra COVID-19. Tulad noon, ang apela natin ay patuloy tayong magtulungan, magbayanihan at sumunod sa health protocols habang naririyan pa rin ang panganib ng pandemya. Ang mahalaga ay unti-unti na tayong nakababalik sa normal, bumabangon ang ating ekonomiya at walang maiiwan sa pag-unlad.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Gobyerno mismo ang lalapit sa mamamayan para sa serbisyong medikal

ni Bong Go - @Bisyo Magserbisyo | November 23, 2022

Bilang matagal nang nakakasama ni dating pangulong Rodrigo Duterte sa loob ng mahigit dalawang dekada, saksi tayo sa paghihirap ng ating mga kababayan sa pag-avail ng serbisyong medikal ng gobyerno. Ang marami sa kanila, pumipila pa sa iba’t ibang opisina ng gobyerno para lamang humingi ng tulong. Ang iba, bumibiyahe pa ng Maynila mula probinsya para lamang magmakaawa sa iba’t ibang ahensya ng gobyerno.

Kaya naman bago pa man maihalal bilang senador at italagang Chair ng Senate Committee on Health, naging adhikain natin ang mailapit ang serbisyong medikal ng gobyerno sa mga Pilipino.

Mula 2018, isa sa mga ipinaglaban nating inisyatiba ang Malasakit Center program. Sabi ni Tatay Digong sa akin noon, dapat matulungan ang mga nangangailangan ng pampagamot kahit saan mang sulok ng bansa. Kaya sa unang anim na buwan bilang senador ay inakda at sinikap nating maipasa ang Malasakit Centers Act of 2019 na naisabatas bilang Republic Act No. 11463 sa 18th Congress.

Sa kasalukuyan ay mayroon na tayong 152 Malasakit Centers sa iba’t ibang bahagi ng ating bansa at nakatulong na sa milyun-milyong benepisaryo. Sa tulong nito, hindi na kailangang pumila o mag-ikot pa ng mga Pilipino sa iba’t ibang opisina ng gobyerno para kumuha ng medical assistance. Gobyerno na mismo ang naglapit sa kanila ng mga serbisyong ito sa tulong ng Malasakit Centers.

Nang pumutok ang pandemya noong 2020 ay nasaksihan naman natin ang kakapusan ng mga ospital at iba pang health facilities sa ating bansa. Sa totoo lang, durug na durog ang puso natin noong kasagsagan ng COVID-19 kapag nakikita nating siksikan sa ospital ang mga kababayan nating tinamaan ng sakit. Ang ibang pasyente na hindi COVID-19 ang sakit ay hindi na halos makakuha ng agarang lunas dahil sa takot na mahawahan sa ospital. Kapos din sa health personnel noon dahil prayoridad munang tugunan ang mga nagka-COVID-19.

Naisip natin, hindi na dapat maulit ang mga ganitong eksena, lalo na sa mga kababayan nating nasa liblib na lugar na kailangan pang bumiyahe para makapunta sa mga ospital. Kailangang matiyak na may mabilis na access sila sa de-kalidad na healthcare services kahit na malayo sila sa mga siyudad — may pandemya man o wala.

Kaya naisipan natin, sa tulong ng mga kasamahan sa Kongreso at maging sa Ehekutibo, na magpatayo ng mga Super Health Centers na isa sa magiging solusyon para umayos ang healthcare services sa bansa. Pero ano nga ba ang Super Health Center?

Ang Super Health Center ay medium na bersyon ng polyclinics at mas malaki kaysa sa rural health units na karaniwang natatagpuan sa mga barangay. Layunin ng SHC na magkakaloob ng mga serbisyo, tulad ng out-patient, birthing, isolation, diagnostic (laboratory: X-ray, ultrasound), pharmacy at ambulatory surgical unit. Meron ding eye, ear, nose, and throat (EENT) service; oncology centers; physical therapy and rehabilitation center; and telemedicine. Maaari rin itong magsilbing satellite vaccination sites para sa mga Pilipinong nakatira malayo sa urban centers kapag may immunization na isasagawa ang Department of Health.

Itinatayo ang SHCs sa mga maa-identify ng DOH na mga strategic locations para matiyak na madali silang mapupuntahan ng mga Pilipinong pinakanangangailangan ng kanilang serbisyong pang-medikal. Ang pagtatayo ay bahagi at pinopondohan ng Health Facilities Enhancement Program (HFEP) ng DOH na isunulong namin sa Kongreso noong nakaraang taon. Target ng DOH na makapagpatayo ng 307 SHCs sa buong bansa sa ilalim ng 2022 budget ng HFEP nito.

Kamakailan ay nagsagawa ako ng monitoring at inspection ng itinatayong SHC sa Anilao, Iloilo. Binisita rin natin ang SHC sa Iba, Zambales at sinaksihan ang groundreaking ng itinatayo sa Calatagan, Batangas; at sa Balagtas, Bulacan. Personal ko ring binisita ang itinatayo sa Barangay Inagawan, Puerto Princesa City, Palawan—at sa ilalim ng budget ngayong taon ay magkakaroon din sa iba pang mga bayan. Nitong Nobyembre, mayroon ding mga nagsagawa na ng mga ceremonial groundbreaking, tulad ng dalawang SHC sa Surigao City; at isa sa Santiago, Agusan del Norte.

Hangad nating tuluyang maipatayo ng gobyerno ang 307 SHCs na tinulungan nating mapondohan sa ilalim ng budget ng kasalukuyang taon. At sana ay madagdagan pa ang mga ito sa susunod na mga taon. May pandemya man o wala, dahil hindi nawawala ang pangangailangan ng mga Pilipino pagdating sa kanilang kalusugan.

Sa mga ginanap na pagdinig sa Senado sa 2023 budget ng DOH, bilang Chair ng Senate Committee on Health at Vice Chair ng Finance Committee, nagpapasalamat tayo sa mga kasamahan at natiyak nating may sapat na pondo para sa patuloy na pagtatayo ng mga SHCs at sa pagpapatupad ng iba pang programa para epektibong mailapit ang public healthcare services sa lahat. Napakahalaga na protektado ang ating mga kababayan, lalo na ang kanilang kalusugan. Ang pagpapalakas sa ating healthcare system at ang abot-kayang serbisyong medikal ay puhunan para sa kinabukasan ng ating bansa at bahagi ng ating layunin na patuloy na pagkakaloob ng komportableng buhay para sa mga Pilipino.

Bukod sa ating healthcare, tuloy pa rin ang ating suporta sa pagpapalakas ng sports sector ng bansa. Nito lamang Lunes, Nobyembre 21 ay personal nating nakapanayam si Justin Brownlee na nagpahayag ng kanyang pagnanais na maging ganap na Filipino citizen. Humarap siya sa Senate Public Hearing ng Committee on Justice and Human Rights para sa proseso ng kanyang naturalization.

Si Brownlee ay may pusong Pinoy at "never say die" attitude, kaya napamahal na siya sa mga Pilipino at alam din nating napamahal na ang mga Pilipino sa kanya.

Kaya naman taus-puso nating ipinaaabot ang buong suporta kay Brownlee. Higit sa talento niya sa basketball, ipinapakita niya ang puso niya na lumaban para sa Pilipino at ang pagmamahal niya sa ating bayan. Wala akong duda na ang puso niya para sa Pilipinas, kasama ang kanyang kakayanan at kakayahan sa basketball, ay may potensyal na magdadala sa ating Gilas Pilipinas sa rurok ng tagumpay sa mga kompetisyon na kanilang lalahukan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mag-basketball na lang kaysa mag-drugs… Malaking tulong ang sports academy sa kabataan

ni Bong Go - @Bisyo Magserbisyo | November 16, 2022

Nagkaroon ng deliberasyon sa Senado noong Nobyembre 10 hanggang madaling-araw ng Nobyembre 11 para sa 2023 budget ng Philippine Sports Commission at ng Games and Amusement Board. Bilang Chair ng Senate Committee on Sports at Vice-Chair ng Senate Committee on Finance, inisponsoran ng inyong lingkod ang pondo ng dalawang ahensya, kasabay ng apela sa mga kapwa mambabatas na dapat ipagpatuloy ng pamahalaan ang mas malawak na suporta sa mga atletang Pilipino.

Suportado natin, hindi lang ang mga national athlete na sumasalang sa international competitions, kundi pati na rin ang mga promising athlete na may potential. Binigyang-diin ko rin na mahalaga ang may sapat na pondo para masuportahan ang mga kinakailangang programang pampalakasan, lalo na sa grassroots level para mahasa ang kakayahan at mapalakas ang kumpiyansa ng ating mga manlalaro, lalo na ang mga sumasabak sa international competitions.

Ang panukalang budget ng PSC para sa 2023 ay itinaas natin sa P1 bilyon para sa preparasyon, pagsasanay at paglahok ng ating mga atleta sa gaganaping 2024 Paris Olympics, 2023 Southeast Asian Games, 2023 Asian Games, ASEAN Para-games at iba pa. Kasama na rin ang pagho-host natin ng 2023 FIBA World Cup, sports infrastructure development, tulong-pinansyal sa mga atleta at inisyatiba para sa grassroots sports development tulad ng Philippine National Games, na plano nating ma-institutionalize kapag tuluyang naisabatas ang isinumite nating panukala. May nakalaan ding P30 milyon para sa umiiral na Batang Pinoy grassroots sports program ng PSC.

Kabilang sa dalawang malalaking programa ng PSC sa ilalim ng National Sports Development Plan ang Duyan ng Magiting para sa grassroots program at ang Gintong Laban na elite program. Ang Duyan ng Magiting ay kombinasyon ng national competition projects at sports-for-all activities. Sa ilalim nito, ang local government units at ang pamilya ng mga atleta ay katuwang para maisakatuparan ang mga layunin nito. Sa kabilang banda, ang Gintong Laban ay nasa itaas ng National Sports Development Plan at nakapokus sa high-performance sports development ng ating national athletes sa pamamagitan ng pagkakaloob sa mga ito ng training allowance, performance incentives, uniporme at kagamitan, serbisyong medikal, tulong-pinansyal at iba pa.

Binigyang-diin din natin sa ginanap na deliberasyon na kailangang matiyak ang paglalaan ng karagdagang pondo para sa National Academy of Sports (NAS) na nasa New Clark City Sports Complex sa Tarlac dahil napakaraming matutulungan nito na mga batang atleta. Pangarap nating magkaroon sa ating bansa ng sports academy na tututok sa kabataang Pilipino na may potensyal sa sports. Naisakatuparan natin ito sa pamamagitan ng Republic Act 11470, na siyang nagtayo sa NAS, na aking inakda noong 18th Congress. Nag-o-offer ang NAS ng secondary education program na may kaakibat na special curriculum sa sports sa pakikipagtulungan ng Department of Education at ng PSC. Libre ang pag-aaral dito, kaya bukod sa mahahasa ang kakayahan ng mga batang atleta, nabibigyan din sila ng oportunidad na mapaangat ang kanilang kalagayan sa buhay sa pamamagitan ng edukasyon.

Ngayong 19th Congress ay isinumite natin naman ang Philippine National Games bill na layuning magkaroon ng ugnayan ang pagpapalaganap ng grassroots sports program sa national sports development. Sa PNG, lahat ng mga may potensyal sa iba’t ibang larangan ng palakasan ay mabibigyan ng pantay na oportunidad na makasali sa mga international sporting events. Kung mahahanap natin sa bawat sulok ng Pilipinas ang pinakamagagaling na atleta, ito rin ang magiging daan para kilalaning muli ang Pilipinas bilang “Sports Powerhouse of Asia.”

Ipinaalala naman natin sa PSC na para mas mapalakas ang mga programa nito at masiguro na ang pondo ng bayan ay magagamit nang tama, epektibo at naaayon sa mandato nito at mga umiiral na batas, dapat nilang tiyakin na matatanggap ng mga atletang Pilipino ang lahat ng suportang nakalaan para sa kanila.

Huwag din nating kalimutan ang mahihirap nating mga kababayan na may potensyal sa larangan ng palakasan. Alalayan at gabayan natin sila upang magtagumpay, hindi lang sa laro, kundi pati na rin sa buhay. Tandaan, bukod sa mga atleta ay mayroon din silang pamilyang umaasa na makaahon sa kahirapan at mabigyan ng mas magandang kinabukasan ang kanilang mga anak.

Samantala, bilang avid basketball fan at supporter, naniniwala tayong walang lugar ang violence o karahasan sa larong ito—at maging sa ibang sports din—kaya labis tayong nalulungkot sa nangyari sa laro sa pagitan ng Jose Rizal University at ng College of St. Benilde kamakailan. Gabayan natin at payuhan ang kabataang atleta na dapat magsilbi silang mabuting huwaran sa mga bata.

Bukod sa ating hangarin na mas mapaunlad ang mga programang pampalakasan sa ating bansa, isa ring paraan ang sports para mailayo ang kabataan sa kaaway ng droga. Tulad ng madalas nating ipayo sa kanila, get into sports and stay away from drugs.

Naitatampok din ang ating bansa kapag may international competitions at nakahihikayat sa maraming turista para bumisita rito, bukod pa ang mga oportunidad pang-ekonomiya. Ang investment sa sports ay investment sa kinabukasan ng buong sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.