- BULGAR
- Dec 2, 2022
Brand Zone | December 2, 2022
top of page
Search
ni Bong Go - @Bisyo Magserbisyo | December 2, 2022
Napakabilis talaga ng panahon. Parang kailan lang nagsimula ang 2022, pero nagpalit na naman tayo ng buwan at nasa exciting part na tayo ng kasalukuyang taon dahil December na’t ilang araw na lang ay Pasko na. Samantalahin na natin ang pagkakataon na ang inyong Senador Kuya Bong Go ang isa sa pinakaunang babati sa inyo ng “Maligayang Pasko!
Pinakamagandang regalo na matatanggap natin ngayong Pasko mula sa Diyos ang natatanaw nating “light at the end of the tunnel” dahil patuloy tayong bumabangon mula sa krisis na dulot ng COVID-19. Kumpara sa dalawang nagdaang Pasko, may liwanag ngayon ang buhay at unti-unti tayong nakababalik sa normal na paraan ng selebrasyon dahil patuloy sa pagbaba ang bilang ng mga tinatamaan ng virus.
Gayunman, tulad ng palagi nating pakiusap at paalala sa lahat—huwag maging kumpiyansa dahil nariyan ang banta ng naturang sakit. Kung hindi sagabal at mahirap gawin, patuloy tayong magsuot ng face masks sa matataong lugar at sumunod sa iba pang health protocols. Kung hindi pa bakunado, pakiusap na magpabakuna na’t magpa-booster shot na rin kung kuwalipikado. Sa totoo lang, ang bakuna ang malaking factor kung bakit unti-unti na tayong nakakaahon mula sa hagupit ng pandemya.
Isa pang paalala, maging maingat laban sa sunog. Mahirap ang nasusunugan. Ingatan ang buhay at ang mga naipundar. Tiyaking maayos ang mga linya ng kuryente sa bahay. Iwasang gumamit ng kandila kapag brownout dahil ito ang isa sa pangunahing sanhi ng sunog. Ngayong maraming nagdedekorasyon ng Christmas lights, tiyaking pasado ito sa product safety standard at bumili lang sa mga awtorisadong tindahan. Wala tayong ibang hiling sa Diyos, kundi ang ligtas na Christmas Season para sa lahat ng Pilipino.
Noong November 30, kasama ang kapwa mambabatas na sina Senador Ronald “Bato” dela Rosa at Senador Imee Marcos ay personal naming binisita at hinatiran ng tulong ang 669 pamilyang nasunugan sa Looc, Mandaue City. Matapos ito ay dumiretso kami sa Cebu City para ayudahan din ang 272 pamilyang nasunugan na mula sa mga barangay ng Mabaling, Kalunasan, Capitol Site, Guadalupe at Kamputhaw. Namahagi rin tayo ng tulong sa 2,000 market vendors ng nasabing lungsod.
Dinaluhan natin ang year-end summit ng Liga ng mga Barangay - Cebu Province. Mahal natin ang mga opisyal ng barangay at malaking tulong sila sa ating mga kababayan, lalo na noong pumutok ang pandemya, kaya suportado natin ang mga hakbang na mas palakasin pa ang mga barangay units at maalagaan ang kapakanan ng mga barangay frontliners.
Samantala, kahapon naman, December 1 ay nakiisa tayo sa groundbreaking ceremony ng Super Health Center sa Biñan City sa probinsya ng Laguna, na sinundan din ng pagbibigay ng ayuda sa 1,000 nating kababayan doon. Dumalo rin tayo sa national assembly ng League of Vice-Governors of the Philippines, kinahapunan.
Noong November 28 ay nakilahok tayo sa isinagawang medical mission at pamamahagi ng ayuda ng pahayagang Bulgar. Pagkatapos noon ay naalalayan din natin ang nasa 1,382 benepisaryo mula sa Caloocan City.
Ngayong araw naman, December 2 ay sinaksihan natin ang groundbreaking ceremony ng Super Health Center sa Island Garden City of Samal kasabay ng paghahatid ng tulong sa mga kababayang tour guides at habal-habal drivers.
Samantala, ngayong linggo ay muling nakarating ang ating opisina sa iba’t ibang komunidad sa bansa para patuloy na maghatid ng tulong sa mahihirap na residente. Sa dalawang araw na isinagawang pamamahagi ng ayuda sa Tarangnan, Samar ay 2,799 na benepisaryo ang naalalayan. May 1,000 nabahaginan sa Gutalac, Zamboanga del Norte; 870 sa San Jose del Monte City, Bulacan; at 700 pa sa iba’t ibang bayan sa Davao Oriental. Nakapagbigay din tayo ng educational assistance para sa 500 estudyante ng Catanduanes.
Sa ating paglilibot, nakapamahagi rin tayo ng ayuda at para sa pangunahing pangangailangan ng 500 na benepisaryo sa Tinio, Nueva Ecija; 499 sa Loon, Bohol; at 400 sa Mandaue City, Cebu. Hindi rin natin kinaligtaan ang mga taga-La Union, tulad ng 306 benepisaryo sa Pugo at 200 pa sa San Fernando City. Nagsagawa rin tayo ng serye ng pamamahagi ng ayuda sa 1,000 nating kababayan sa Malalag, Davao del Sur; 736 sa Botolan, Zambales; bukod pa ang natulungan na 540 residente mula sa Tineg, Abra na apektado ng lindol.
Salamat sa pagtugon sa mga panawagan ng gobyerno para tuluyan nating malampasan ang pandemya at iba pang krisis. Nalampasan natin ang mga pagsubok sa nakalipas na dalawang taon dahil hindi tayo bumitaw sa isa’t isa at sa hangaring makakamit ang komportableng buhay at pag-unlad sa pamamagitan ng patuloy na pagkakaisa at pagbabayanihan.
Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.
- BULGAR
- Nov 30, 2022
ni Bong Go - @Bisyo Magserbisyo | November 30, 2022
Bawat Pilipino ay may pangarap na mas magandang buhay para sa kanilang pamilya. Pinaghihirapan ng mga magulang na siguraduhing maging mas maginhawa ang kinabukasan ng kanilang mga anak. Ito ang rason kung bakit isinakripisyo ni dating Pangulong Rodrigo Duterte ang lahat para labanan ang masasamang elemento sa lipunan.
At tulad ng sinabi ni Pangulong Ferdinand Marcos, Jr., ang pangarap ninyo ay pangarap din namin. Ito ang dahilan kung bakit sama-sama tayong lumalaban tungo sa iisang hangarin para sa ating inang bayan. Magkaiba man tayo ng mga pinanggalingan, iisa ang daang ating tinatahak para masigurong walang maiiwan sa ating muling pagbangon.
Mula nang pagkatiwalaan ninyo ako na maging bahagi ng Senado, naging paninindigan ko na noon pa man ang gawin ang aking makakaya na magkaloob ng komportableng buhay sa lahat ng Pilipino. Ito ang panata na aking pinanindigan kasama ang pangako na magsilbi at magserbisyo sa inyo nang sapat.
Unti-unti ay nagiging reyalidad na ang pinaghirapan natin noon. Ang mga pangarap noon ay naisasakatuparan na ngayon.
Isa na ang Overseas Filipino Workers Hospital sa San Fernando City, Pampanga na pinasinayaan noong Mayo 1 na sinaksihan namin ni dating pangulong Rodrigo Duterte.
Ang OFW Hospital ay testamento kung gaano namin kamahal ni Tatay Digong ang ating mga bagong bayani at para mapangalagaan ang kanilang kalusugan maging ng kanilang pamilya. Ito rin ang kauna-unahang ospital para sa mga OFW at sa tulong nito, masusuklian natin ang kanilang sakripisyo at mapasalamatan sila sa kanilang kontribusyon sa ating bansa.
Bahagi pa rin ng ating malasakit at serbisyo sa ating mga OFW, isa sa aking mga pangarap na natupad ang paglikha sa Department of Migrant Workers.
Sa 18th Congress ay isa po ako sa may akda at co-sponsor ng Republic Act 11641, kung saan nalikha ang DMW, kaya mayroon na ngayong ahensya na nakatutok sa mga isyung kinahaharap ng OFW sa kanilang pagtatrabaho sa ibang bansa at hindi na sila kailangang mag-ikot pa sa iba’t ibang tanggapan para humingi ng tulong at serbisyo.
Sinimulan ko rin ang inisyatiba noong 2018 para matulungan ang ating mga kababayan, lalo na ang mahihirap at walang pagkukunan, sa kanilang hospital bills sa pamamagitan ng Malasakit Centers program.
Naisabatas ang Malasakit Centers Act noong 2019 na akin ring iniakda at ini-sponsor sa Senado noon. Sa pamamagitan ng Malasakit Centers, hindi na kailangang pumila o mag-ikot pa ng mga Pilipino sa mga opisina ng gobyerno para kumuha ng medical assistance. Gobyerno na mismo ang naglapit sa kanila ng mga serbisyong ito sa tulong ng Malasakit Centers, na sa kasalukuyan ay milyun-milyon na nating kababayan ang naalalayan.
Masaya rin po akong ibalita na sa ngayon ay mayroon na tayong 153 Malasakit Center sa buong bansa at nakapaglagay na rin po tayo sa OFW Hospital noong November 24, kaya dagdag-ginhawa ito sa kanila.
Bahagi naman ng aking adhikain na mapalakas ang ating healthcare system at mas maging maayos ang paghahatid ng serbisyong medikal ang pagpapatayo ng Super Health Centers sa buong bansa.
Ang SHC ay mga medium na bersyon ng polyclinics at mas malaki, kaysa sa rural health units. Magkakaloob ito ng mga serbisyo tulad ng outpatient, birthing, isolation, diagnostic (laboratory: X-ray, ultrasound), pharmacy at ambulatory surgical unit. Meron ding eye, ear, nose, and throat (EENT) service; oncology centers; physical therapy and rehabilitation center; and telemedicine. Magagamit din ito bilang satellite vaccination sites para sa mga kababayan nating nakatira malayo sa urban centers kapag may immunization na isasagawa ang Department of Health.
Ang pagtatayo ng SHC ay bahagi at pinopondohan ng Health Facilities Enhancement Program (HFEP) ng DOH na isinulong namin sa Kongreso noong nakaraang taon. Kasama ang pagpapatayo ng 307 SHCs sa buong bansa sa ilalim ng 2022 budget. Nais din nating makapagpatayo pa ng mas maraming SHCs sa susunod na mga taon kasama ang DOH at sa tulong ng LGUs. Kumpiyansa ako na sa pamamagitan nito, mas maaalagaan natin ang kalusugan ng ating mga mamamayan lalo na sa malalayong sulok ng bansa.
Sabi nila, libreng mangarap. Pero sa bawat pangarap na ito, may kaakibat na sakripisyo, serbisyo at pakikiisa na kailangan upang maging reyalidad ang mga ito.
Tulad ng mga naging pangarap ni Gat Andres Bonifacio na sa araw na ito ay ginugunita natin ang kanyang kapanganakan. Nangarap siya, kasama ang iba pang Katipunero, para sa kalayaan ng ating bansa. Nangarap siya para mabago ang buhay, lalo na ng ordinaryong Pilipino.
Kaya sana ay patuloy lang tayong magmalasakit at magbayanihan sa isa’t isa upang maisakatuparan ang ating mga pangarap para sa susunod na henerasyon.
Ang kinabukasan ng ating bansa ay nasa ating mga kamay kung kaya’t huwag tayong mawalan ng pag-asa kahit anumang hirap o krisis ang ating pinagdaraanan. Manalig tayo sa Diyos at magkaisa para sama-sama nating marating ang minimithing mas ligtas, komportable at masaganang buhay para sa lahat!
Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.
RECOMMENDED
bottom of page