Super Health Centers at Malasakit Centers, mas daragdagan pa!

ni Bong Go - @Bisyo Magserbisyo | December 14, 2022

Noong December 12, 2022 ay isinagawa ang inagurasyon ng Joni Villanueva General Hospital sa Bocaue, Bulacan. Bilang Chair ng Senate Committee on Health, personal nating sinaksihan ang okasyon. Masaya tayo dahil bukod sa malaking tulong ang JVGH sa pangangalaga sa kalusugan ng mga Bulakenyo at karatig-lugar, bahagi rin ito ng prayoridad na mas mapalakas pa ang healthcare system ng bansa.

Ang JVGH ay magiging Level 2 hospital mula sa pagiging extension facility lamang ng Jose B. Lingad Memorial General Hospital, na nakabase sa San Fernando, Pampanga matapos lagdaan ni dating pangulong Rodrigo Duterte ang Republic Act 11720 na nagbibigay ng estado sa naturang ospital bilang ganap na general hospital. Mayroon itong pasilidad tulad ng intensive care unit, pediatrics, obstetrics, gynecology, surgery, laboratoryo na kumpleto ang kagamitan. Direkta rin itong nasa ilalim ng pangangalaga at pangangasiwa ng DOH.

May kalakip nga lang na kaunting kalungkutan ang inagurasyon dahil hindi ito nasaksihan ni dating mayor Joni Villanueva na sumakabilang buhay noong nakaraang taon. Nakilala natin siya bilang mahusay at makasipag na local executive. Nakalulungkot na kumpleto na ang ospital pero wala siya.

Gayunman, masaya nating ibabalita, na ayon sa DOH ay magkakaroon ng Malasakit Center sa JVGH sa susunod na taon. Napakalaking tulong ito sa mahihirap dahil inilalapit sa kanila ang pampublikong serbisyong medikal sa pamamagitan ng mga medical assistance programa ng mga ahensya ng gobyerno.

Bukod sa JVGH, sinaksihan din natin ang groundbreaking ng itatayong Super Health Center sa Pandi, sa Bulacan pa rin. Masaya nating ibalita na sa ilalim ng 2022 national budget, mayroong 307 SHCs na itatayo sa buong bansa at pito ang itatayo sa Bulacan. Nakatakda namang itayo sa ilalim ng panukalang 2023 national budget ang higit 300 pang SHCs sa susunod na taon.

Ang SHC ay medium type na polyclinic at mas malaki sa rural health unit, at maraming pasilidad tulad sa mga ospital. Itinatayo ito sa strategic areas sa buong bansa, lalo na sa malalayong komunidad na tutukuyin ng DOH. Ang panganganak, dental services, isolation, emergency cases at iba pa ay hindi kailangang dalhin sa malaking ospital dahil kaya nang isagawa rito.

Samantala, tulad ng dati ay umaapela tayo sa mga hindi pa bakunado pero kuwalipikado na maging sa booster shots, na magpabakuna na kayo. Mas protektado kung bakunado! Mas masayang magdiwang ng Pasko kapag ligtas sa virus ang pamilya at kapwa Pilipino. Mas tanaw din ang pag-asa sa pagpasok ng 2023 kung patuloy tayong magkakaisa at magbabayanihan para tuluyan tayong makabangon mula sa pandemya at makabalik sa normal na pamumuhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mamamayan ang dapat makinabang sa pondo, period!

ni Bong Go - @Bisyo Magserbisyo | December 9, 2022

Naging abala tayong muli kasama ang mga kapwa mambabatas sa mga gawain sa Senado para matapos ang mga dapat ayusin bago ang Kapaskuhan.

Kabilang sa naisakatuparan ang pag-apruba ng ating Bicameral Conference Committee noong Disyembre 5 sa consolidated version ng panukalang P5.268 trillion national budget para sa susunod na taon. Importanteng matiyak ang pondo sa 2023 para maayos na maipatupad ang mga prayoridad ng pamahalaan, ang mga programa ng bawat ahensya, lalung-lalo na ang para sa pagsiglang muli ng ating ekonomiya at pangangalaga sa kalusugan ng ating mga kababayan.

Talagang nagsikap ang lahat ng ating mga mambabatas upang maisakatuparan ang bersyon na ito ng ating 2023 General Appropriations Bill. Umaasa tayong maisasabatas ito para sa kapakanan ng ating sambayanang Pilipino.

Ang paalala lang natin sa mga nasa gobyerno, gamitin natin ang pera sa tama at kung saan ito nakalaan. Dapat makarating sa mga Pilipino ang serbisyo dahil para sa kanila naman talaga ang pondong ito. Sikapin nating matulungan ang ating mga kababayan na harapin ang mga hamon ngayon, tulad ng pagtaas ng presyo, pagpapasigla ng negosyo at kabuhayan, maiwasan ang gutom, at makabangon mula sa pandemya at iba pang krisis.

Sa isinagawa namang pagdinig ng Senate Committee on Justice and Human Rights sa Senate Bill No. 1296, na naglalayong gawing kasong kriminal ang paglikha at pagpapakalat ng fake news, kinondena natin ang mga taong nagpapakalat ng fake news. Kailangang maipagtanggol ang katotohanan at matiyak ang malaya at tamang daloy ng impormasyon. Palagi tayong nasa panig ng katotohanan, at kung ano lang ‘yung totoo. Kawawa ang mga kapwa natin Pilipino na gustong mamuhay nang tahimik pero maling impormasyon ang nakararating at naibibigay sa kanila dahil sa mga mapagsamantalang indibidwal.

Bilang Chair ng Senate Committee on Health, muli nating iginiit sa pagtalakay sa Senate Bill No. 230, o ang panukalang Medical Cannabis Compassionate Access Act of the Philippines, na inakda ni Senador Robinhood Padilla, na bukas tayo kilalanin ang paggamit ng medical marijuana bilang “compassionate alternative means of medical treatment” sa ating bansa, pero kinakailangan ang proper regulation.

Hindi lang medikal ang pinag-uusapan dito, kundi pati kung paano mare-regulate nang maayos at hindi maaabuso ang paggamit. Importante rin sa atin na mabalanse ang interes ng nakararami. Importante ang kalusugan, ang peace and order at ang rule of law. Lahat ng ito ay mga aspeto na dapat ikonsidera kaya dapat mapag-aralan ito nang mabuti.

Proteksyunan natin ang buhay ng tao na kailangan ng ganitong uri ng gamot, pero proteksyunan din natin ang buhay ng mga puwedeng maging biktima dahil sa maaaring maging abuso nito. Kung inyong matatandaan, kahit ayaw na ayaw ni dating pangulong Rodrigo Duterte ang paglaganap ng ilegal na droga sa ating bansa, nagpahayag din siya na bukas siya na talakayin ang medical marijuana basta may karampatang regulasyon.

Sa kabila naman ng ating pagiging abala sa Senado ay hindi natin kinakaligtaan ang ating mga kababayan na kailangan pa ring alalayan habang unti-unti tayong nagbabalik sa normal na sitwasyon para maging mas madali ang kanilang pagbangon mula sa pandemya at iba pang krisis.

Noong December 8 ay muli nating dinalaw ang mga kapwa natin Batangueño at personal na nagkaloob ng tulong sa humigit-kumulang 400 residente ng Malvar. Nasa Noveleta, Cavite naman tayo noong a-sais at personal na pinangunahan ang pamamahagi ng ayuda sa 1,333 na residenteng hanggang ngayon ay ramdam pa rin ang epekto ng bagyong Paeng sa kanilang kabuhayan.

Hindi rin tumitigil ang ating relief team sa paglilibot sa iba’t ibang komunidad para mamahagi ng tulong sa ating mga kababayan, lalo na ang mga higit na nangangailangan. Maagap nating dinaluhan at pinagkalooban ng para sa kanilang pangunahing pangangailangan at gastusin ang 80 pamilyang nasunugan sa Bgy. Pulang Lupa Uno, Las Piñas City. Serye naman ng pamamahagi ng ayuda ang ating isinagawa sa Batangas at naabutan ng tulong ang 1,666 mahihirap na residente ng Alitagtag; 833 sa Sta. Teresita; at 77 pa sa Malvar.

Sa Quezon ay 1,500 benepisaryo mula sa Lopez ang ating naalalayan at may 333 pa sa Unisan. May napasaya rin tayong 1,400 mahihirap na residente ng San Isidro, Davao Oriental. Sa Zambales, natulungan natin ang 1,341 benepisyaryo mula sa Castillejos at San Marcelino; at 709 pa sa San Felipe. Meron ding natulungan na 124 na benepisaryo sa Ifugao.

Muli nating narating ang Samar para alalayan ang 569 na benepisyaryo mula sa Sta. Rita; at 522 pa sa Villareal. Nakapamahagi rin tayo ng tulong sa Laguna at nabigyan ang 500 residente ng Luisiana; 200 sa Lumban; at 107 pa sa Cavinti. May 384 namang napagkalooban din sa Bgy. Marilag, Quezon City. Hindi natin kinaligtaan ang isa sa mga sektor na prayoridad din natin—ang mahihirap na estudyante at naabutan natin ng para sa kanilang gastusin sa school ang 600 na mag-aaral ng Cavite City.

Ilang araw na lang at Pasko na at umaasa tayo na kumpara sa nakalipas na dalawang taon ay mas maganda ang sitwasyon nating lahat ngayong Holiday Season. Ang nakagisnan nating tala mula sa silangan ay sumisimbolo sa “light at the end of the tunnel” dahil unti-unti na tayong nakababangon mula sa madilim na epekto ng pandemya. Umaasa tayong mas lalaganap ngayon ang diwa ng pagkakaisa at pagmamalasakit sa kapwa at magpapatuloy habang sama-sama tayong humahakbang tungo sa mas magandang bukas.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bakit umabot sa expiration ang mga bakuna?

ni Bong Go - @Bisyo Magserbisyo | December 7, 2022

Kamakailan ay pinaalalahanan natin ang Commission on Audit na gawin ang kanilang mandato at suriin ang pondo ng gobyerno na ginamit sa pagbili ng mga bakuna laban sa COVID-19. Ginawa natin ang ating panawagan sa COA bilang Chair ng Senate Committee on Health at para maging malinaw na rin sa publiko ang isyu tungkol sa mga nabili na bakuna, kasama ang mga sinasabing expire na.

Dapat magsagawa ang ahensya ng kumpletong audit at obligahin ang iba pang kinauukulang sangay ng gobyerno na isumite ang mga kinakailangang dokumento at mga report para makapagbigay-linaw sa publiko. Tandaan, pera ng bayan ang ginastos dito. Bawat piso ay mahalaga para sa mga Pilipino.

Mismong si Department of Health officer-in-charge Maria Rosario Vergeire na rin ang nagsabi kamakailan na ang mga dokumentong may kaugnayan sa pagbili sa COVID-19 vaccines ay maaaring ipasa sa ating state auditors.

Maliban sa paggamit ng pondo, gusto rin nating maklaro sa publiko ng mga awtoridad kung ano ang nangyari sa mga bakunang hindi magamit? Ano ang katotohanan, ano ba ang nangyari, bakit nag-expire at kung napalitan na ba ito ng mga bagong bakuna?

Ito ang dahilan kung bakit magkakaroon ng pagdinig ang Senate Blue Ribbon Committee sa susunod na linggo tungkol dito. Bilang Vice-Chair ng Blue Ribbon at Chair ng Committee on Health, susubaybayan at tututukan din natin ito.

Importanteng masilip ang mga ito dahil patuloy pa rin ang ating isinasagawang pagbabakuna at pagbibigay ng booster shots para mas protektado ang ating mga kababayan, dahil and'yan pa rin ang banta ng COVID-19. Hindi tayo dapat magpakumpiyansa, lalo pa't patuloy na may sumusulpot na bagong variants.

Suyurin dapat ang bawat sulok ng bansa para masigurong makarating sa mga tao ang bakuna at hindi ito masayang. Ipaintindi rin natin na ang bakuna ang tanging solusyon upang makabalik tayo sa normal na pamumuhay. Mas protektado ang mga Pilipino kung bakunado!

Napakahalaga na malaman ng mga Pilipino, kung saan napupunta ang pera ng bayan. Pera ito ng taumbayan — na ang bawat piso, bawat sentimo ay napakahalaga at dapat napupunta kung saan ito talaga nakalaan. Hindi ito dapat masayang para mapakinabangan ng tao lalo na ng mga mahihirap at walang ibang matatakbuhan.

Nagpapasalamat tayo sa DOH na nagsabing ginagawa nila ang inisyatiba para matiyak na ang pondo ng gobyerno na ginamit sa pagbili ng COVID-19 vaccines ay nagamit nang maayos. Paghandaan na rin dapat ang pagbili ng bivalent vaccines na sinasabi ng mga eksperto na mas mabisa kontra sa mga bagong variants ng virus, at maaari nang ibakuna sa ating mga kababayan sa unang quarter ng 2023.

Samantala, gusto nating samantalahin ang pagkakataon para pasalamatan ang lahat na patuloy na sumusuporta at nagtitiwala sa atin.

Batay sa resulta ng Tugon ng Masa (TNM) 2022 Fourth Quarter survey, na isinagawa ng OCTA Research ay nakakuha ang inyong lingkod ng 74% overall trust rating noong October 2022. Mas mataas po ito ng 24% kumpara sa ating December 2021 rating na 50%. Ang atin namang October 2022 performance rating ay 71%, na mataas din kumpara sa ating December 2021 rating na 50%.

Maraming salamat sa pagtitiwala at maaasahan ninyo na patuloy ang pagseserbisyo lahat sa abot ng aking makakaya. Tao na lang ang maaaring humusga sa resulta ng ating mga inisyatiba, partikular sa sektor ng kalusugan kung saan ipinaglaban natin ang 153 Malasakit Centers, kasalukuyang pagtatayo ng Super Health Care Centers at pagpasa ng iba’t ibang hospital bills and health measures bilang bahagi ng ating layunin na ilapit sa tao ang serbisyong dapat nilang makuha.

Magsisilbing inspirasyon at motivation natin ang tiwalang patuloy na ibinibigay ninyo sa akin upang hindi tumigil sa pagseserbisyo dahil naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.