Libreng annual medical check-ups, dialysis treatments at marami pang benepisyo ngayong Bagong Taon

ni Bong Go @Bisyo Magserbisyo | January 4, 2023

Tulad ng nakagawian nating mga Pilipino, dapat umpisahan ang Bagong Taon na masigla, masaya at may positibong pananaw.

Kaya naman, hangad natin sa bawat isa ang maayos na kalusugan at kaligayahan ngayong taon at sa mga darating pa. Gawin nating inspirasyon ang pamilya upang ang mga layunin sa hinaharap ay maisakatuparan nang hindi kinakaligtaan ang pagmamahal sa bayan at malasakit sa kapwa Pilipino.

Tututukan natin ang pagpapalakas sa healthcare system para hindi tayo muling mabigla kung may umusbong man na mga bagong sakit at hindi mahirapan ang healthcare system. Muli nating ipaglalaban sa Senado ang pagpapatayo ng Philippine Center for Disease Control and Prevention at Virology Science and Technology Institute of the Philippines. Nakasumite na rin sa 19th Congress ang ating mga panukala na magkakaloob ng libreng annual medical check-ups; pag-aatas sa Philippine Health Insurance Corporation na palawakin ang coverage ng dialysis treatments; pagtatayo ng Emergency Medical Services System; pagkakaloob ng benepisyo at kompensasyon sa mga Barangay Health Workers; pagtatayo ng Drug Abuse Treatment and Rehabilitation Centers sa buong bansa at pagpopondo sa pagpapalawak ng edukasyon ng nursing students.

***

Samantala, patuloy nating isusulong ang mga programang magpapaunlad sa kakayahan ng mga atletang Pilipino at makatuklas ng kabataang may potensyal na maging world-class athlete sa pamamagitan ng pagpapalawak sa ating grassroots sports development.

Sa 2023 national budget ay naipaglaban natin ang pondo para sa budget ng Philippine Sports Commission at ng Games and Amusement Board. Ang budget ng PSC ay gagamitin sa preparasyon, pagsasanay at paglahok ng mga atleta sa iba’t ibang international competitions, pagho-host ng 2023 FIBA World Cup, sports infrastructure development, tulong-pinansyal sa mga atleta at inisyatiba para sa grassroots sports program. Tiniyak din nating mabibigyan ng karagdagang pondo ang National Academy of Sports (NAS) na nasa New Clark City Sports Complex dahil napakaraming matutulungan nitong batang atleta. Matagal na nating pangarap na magkaroon sa bansa ng sports academy na tututok sa kabataang may potensyal sa sports. Naisakatuparan natin ito sa pamamagitan ng Republic Act 11470, na siyang nagtayo sa NAS, na isa tayo sa may-akda at sponsor noong 18th Congress.

Para sa 19th Congress, isusulong natin ang pag-institutionalize sa Philippine National Games na gaganapin kada dalawang taon para sa paghubog ng kabataan sa iba’t ibang sports.

***

Patuloy tayong tinatamaan ng mga kalamidad at palaki nang palaki ang pinsalang idinudulot nito. Hindi tayo titigil na isulong ang Department of Disaster Resilience para may departamento na talagang tututok bago pa man dumating ang bagyo, pagbaha at iba pang kalamidad at sakuna. Kaugnay nito ang isinusulong nating “Mandatory Evacuation Center Act” para sa pagpapatayo ng ligtas at permanenteng evacuation centers sa bawat munisipalidad, lungsod at probinsya.

***

Samantala, noong January 2 ay nagpunta tayo sa Magsaysay, Misamis Oriental para personal na tingnan ang kalagayan at pagkalooban ng tulong ang 1,308 nating mga kababayan na nabiktima ng pagbaha. Nakatuwang natin ang DSWD na nagbigay ng hiwalay na tulong-pinansyal sa mga benepisaryo.

Bukod sa Magsaysay ay nagpadala rin ang ating outreach team ng tulong sa mga biktima ng baha sa Gingoog City noong January 2; pati na rin ang mga bayan sa Salay, Medina, Balingoan, Balingasag, Kinoguitan, Lagonglong, at Binuangan nitong January 3.

Sa mga susunod na araw ay pupuntahan natin ang mga bayan na naapektuhan din ng pagbaba sa Misamis Occidental, gaya ng Jimenez, Lopez Jaena, Tudela, Aloran, Clarin, Panaon, Sapang Dalaga, Calamba, Don Victoriano, Baliangao, Oroquieta at Ozamiz City.

Ang pagsapit ng panibagong taon ay hindi awtomatikong nagreresolba sa ating mga kinaharap na problema, na posibleng kahaharapin pa rin sa mga darating na araw. Gayunman, umaasa tayo na sa pamamagitan ng ating patuloy na pagkakaisa at pagbabayanihan at sa mga aral na natutunan natin sa nakalipas na taon, mas magiging magaan na malampasan ang mga ito hanggang sa tuluyan tayong makabangon.

Isang manigong Bagong Taon sa inyong lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Gawing gabay ang mga aral ni Rizal sa muling pagbangon

ni Bong Go @Bisyo Magserbisyo | December 30, 2022

Ginugunita natin ngayong araw, December 30, 2022, ang ika-126 anibersaryo ng kadakilaan ni Dr. Jose P. Rizal. Ibinuwis niya ang kanyang sariling buhay para mamulat ang sambayanan sa mga aral ng importansya ng kalayaan. Ang kanyang mga panulat ay naging mitsa upang mabuhay sa dibdib ng iba pa nating bayani ang pagnanais na maging malayang bansa ang Pilipinas noong panahon ng himagsikan. Bukod sa pagiging manunulat at makata, isa rin siyang doktor, siyentipiko at bihasa sa iba’t ibang wika. Ang kanyang husay at talino ay kinikilala maging ng ibang bansa.

Isa si Rizal sa ating mga idolo. Tulad niya, passion din natin sa pagseserbisyo sa mga Pilipino at pagmamahal sa bayan. Kaya napakasaya natin nang naatasan tayo noong October 28 upang ikatawan ang Philippine Senate sa ginanap na unveiling ng ceremonial plaque bilang paggunita sa ika-75 anibersaryo ng pagkakatatag ng relasyong diplomatiko sa pagitan ng Pilipinas at Espanya sa Jose Rizal Monument, Avenida de las Islas Filipinas sa Madrid, Spain.

Ang nasabing okasyon ay angkop na pagpupugay sa mayamang kasaysayan na ibinahagi ng dalawang bansa, gayundin sa ating bayaning si Dr. Jose Rizal na ang mga paniniwala at adbokasya ay patuloy na nagbibigay-inspirasyon sa ating mga Pilipino mula noon hanggang ngayon.

Sa ibang bansa ay nakita ni Rizal ang kahalagahan ng pagkakaroon ng edukasyon at ng mga bagong ideya at dinala niya ang mga ito sa Pilipinas upang makatulong sa mga kapwa niya Pilipino. Ngayon, habang ang ating modernong mundo ay patuloy na humaharap sa mga bagong hamon at umuusbong na banta sa kalusugan at kaligtasan natin, hindi tayo dapat huminto sa pag-aaral mula sa iba at gamitin ang mga ito para sa kapakanan ng sariling mamamayan.

Kaya patuloy tayong nagseserbisyo tulad ni Dr. Jose Rizal. Naniniwala tayong ang serbisyo sa tao ay serbisyo rin sa Diyos. Ang ginawa niyang pag-aalay ng sariling buhay para sa kinabukasan at kalayaan ng Pilipinas ay dapat bigyang-halaga. Hindi natin dapat kalimutan ang kanyang kabayanihan. Ang kanyang mga ipinaglaban ay dapat magbigay ng inspirasyon sa mga Pilipino na magsumikap para sa kanilang mga kababayan, lalo na sa kabataang Pilipino, na ayon sa kanya ay pag-asa ng Inang Bayan.

Gabay ang mga aral ni Rizal, patuloy pa rin ang ating pag-alalay sa mga kababayan nating higit na nangangailangan at nahaharap sa iba’t ibang krisis.

Noong December 27 ay personal nating pinangunahan ang pamamahagi ng ayuda sa 212 pamilyang nasunugan sa Bgy. San Dionisio, Parañaque City. Hindi rin natin kinaligtaan ang 89 pamilya sa Malabon City na naging biktima ng sunog.

Naglibot din ang ating relief team sa iba’t ibang komunidad sa Iloilo para magkaloob ng tulong sa mahihirap na residente at tiyakin na may mapagsasaluhan ang kani-kanilang pamilya sa pagsapit ng New Year, tulad ng 333 benepisaryo sa Estancia, 333 sa Carles at 200 pa sa San Dionisio.

Masaya rin nating ibinabalita na isinagawa ngayong araw ang groundbreaking ng itatayong Super Health Center sa Igbaras, Iloilo.

Ipinagdarasal natin sa Diyos na ang pagsapit ng 2023 ay magbibigay ng panibagong sigla at pag-asa sa ating lahat—lalung-lalo na sa mga dumaan sa mabibigat na pagsubok ngayong taon.

Sa ating kapasidad bilang inyong Senador Kuya Bong Go at inyong lingkod bayan, ipagpapatuloy natin ang ating nasimulan na paghahatid ng serbisyo at malasakit sa inyong lahat sa abot ng ating makakaya. Gawin nating tanglaw ang dakilang bayani na si Dr. Jose Rizal sa pagsapit ng Bagong Taon—na sumisimbolo sa panibagong pag-asa. Mula po sa aking puso, Happy New Year sa inyong lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Yaman ng bansa ang malusog na mamamayan

ni Bong Go @Bisyo Magserbisyo | December 28, 2022

Muli nating naranasan ang pagsapit ng Pasko nang masaya, masigla at mapayapa. Hindi tulad sa nagdaang dalawang taon, muling naisagawa ngayon sa maraming bahagi ng bansa ang mga nakaugaliang tradisyon, lalo na ang Simbang Gabi. Nabisita ng ating mga kababayan ang kanilang pamilya at kamag-anak sa probinsya. Nakapagdaos ng Christmas party ang mga kompanya, nakapag-reunion ang mga dating magkakaklase at magkakaibigan, at nakapagbalikbayan ang overseas Filipino workers para makapiling ang kanilang mahal sa buhay. Ang mga manggagawang Pinoy ay nagkaroon ng pagkakataong makapagpahinga at makapaglibang. At ang mga bata ay muling naranasan ang magkaroling at mag-enjoy sa iba’t ibang aktibidad na hatid ng Kapaskuhan.

Ang naging Christmas wish natin ay sana’y magtuluy-tuloy na ang ganitong sitwasyon, at makamit ng mga Pilipino ang pagsulong at pag-unlad sa malapit na hinaharap. Maging mabilis ang pagbangon ng ekonomiya, makalikha ng maraming trabaho at oportunidad para sa ating mga kababayan, lalo na ang mahihirap, magkaroon ng seguridad sa pagkain, malakas na healthcare system dahil importante ang kalusugan ng lahat at edukasyon para sa kabataan, kasabay ng paghubog sa talento sa iba’t ibang larangan kasama na ang sports. Hangad natin ang patuloy na kapayapaan, tuluyang masugpo ang droga at kriminalidad maging ang katiwalian.

Muli tayong nagpapasalamat sa lahat nating kababayan na sa kanilang sariling paraan ay naghandog ng regalo sa mahihirap at higit na nangangailangan. Ang Panginoon na ang bahalang magsukli sa inyong ginagawang kabutihan sa kapwa.

Samantala, Pasko man o ordinaryong araw ay hindi natutulog ang serbisyong may tapang at malasakit. Noong Disyembre 23, kasama si dating pangulong Rodrigo Duterte ay binisita natin ang mga batang inabandona na kinakalinga sa Balay Dangupan, Davao City. Nakatanggap ng regalo mula sa amin ni Tatay Digong ang 49 bata at 23 staff ng naturang shelter. Bukod sa pagkain, namahagi rin tayo ng Christmas baskets, cellphones at tablets. Namigay din tayo ng mga bolang pang-basketball at pang-volleyball; paraan ito para may mapaglibangan sila.

Samantala, noong araw ding iyon ay bumisita tayo sa mga minamahal nating lolo’t lola sa Co Su Gian Home for the Aged, sa Davao City upang magkaloob ng mga aguinaldo.

Samantala, dahil panahon din para magsaya, hinihiling natin na suportahan ang industriya ng pelikulang Pilipino. Manood tayo ng mga kalahok sa Metro Manila Film Festival ngayong taon. Marami rin sa manggagawa sa pelikula, lalo na ang mga nasa likod ng camera, ang naapektuhan ang kabuhayan dahil wala silang projects nang pumutok ang pandemya. Sana’y maging simula ang 2022 MMFF sa muling pagsigla ng pelikulang Pilipino, at muling mabigyan ng pagkakataon ang mga nasa industriya na makabalik sa kanilang hanapbuhay.

Ilang araw na lang at magpapalit na ang taon. Maganda ang naging momentum ngayong 2022 sa pagbaka sa pandemya at natanaw natin ang tinatawag na “light at the end of the tunnel” at unti-unti tayong nakababalik sa normal na buhay. Ang pakiusap lang ay ipagpatuloy natin ang pag-iingat dahil nariyan pa rin ang panganib ng virus, magpabakuna kung kuwalipikado dahil mas protektado kung bakunado, sumunod sa health protocols, lalo na ang pagsusuot ng face mask kung hindi naman sagabal, palaging maghugas ng mga kamay at panatilihin nating malakas ang ating katawan.

Yaman ng bansa ang malusog na mamamayan. Higit sa lahat, manatili sana sa ating puso ang pagmamahalan—na tunay na kahulugan ng Pasko.

At sa pagtatapos ng taon, sana’y suportahan natin ang pamahalaan, ang administrasyon ni Pangulong Ferdinand “Bongbong” Marcos, Jr. para sa tuluyang pagbangon mula sa pandemya na dulot ng COVID-19. Sama-sama nating harapin na puno ng pag-asa ang pagbubukang-liwayway ng bagong taon bilang nagkakaisa at mas matatag na sambayanan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.