Malasakit Center Program limang taon nang umaalalay sa mga Pinoy

ni Bong Go @Bisyo Magserbisyo | January 25, 2023

Masaya nating ibinabalita na malapit na ang ikalimang anibersaryo ng Malasakit Centers program.

Muli nating ipaalala na samantalahin ang tulong medikal na ipinagkakaloob ng 154 Malasakit Centers sa buong bansa para mapangalagaan ang kanilang kalusugan nang hindi mabibigatan sa mga bayarin sa ospital.

Noon, wala pang Malasakit Center ang mga kababayan natin. Kung meron silang kailangang tulong sa pagpapaospital o billing, lalapit ‘yan sa iba’t ibang opisina.

Halimbawa, Lunes, pupunta ‘yan sa city hall, provincial capitol o sa mga opisina ng mayor o gobernador. Martes, pupunta ‘yan sa PCSO, pipila, kahit madaling-araw.

Miyerkules, pipila ‘yan sa DOH. Huwebes, pipila ‘yan sa DSWD. Biyernes, ipoproseso naman ng PhilHealth. Ubos ang panahon nila, ubos ang pamasahe sa kapipila at paghingi ng tulong.

Kaya naisipan natin noong 2018 na ilagay sa isang kuwarto ang mga ahensya. Noong naging senador ang inyong lingkod noong 2019, isinulong natin ang Malasakit Centers Act sa tulong ng mga kasamahan sa Kongreso at sa Senado at pinirmahan ni dating Pangulong Duterte. Ngayon ay batas na ito, institutionalize na.

Para sa poor and indigent patients ang programang ito na handang tumulong sa ating mga kababayan saang sulok man ng bansa. Walang pinipiling tutulungan ang Malasakit Centers.

Priority lang natin ang indigent patients o ang mga financially incapacitated. Basta Pilipino, qualified sa Malasakit Center.

Layunin ng Malasakit Center na mababa up to the barest minimum ang hospital bill ng pasyente. Ang importante lang sa pasyente na nanghihingi ng assistance, lumapit talaga sa ospital na may Malasakit Center. Pagdating sa requirements, basic ang mga kailangan at basta makumpletong maisumite, maaari nang mag-avail ng assistance, ayon sa DOH na namamahala nito.

Batay sa Malasakit Centers Act, ang DOH ang namamahala ng mga center na ito, at dapat lagyan ang lahat ng DOH-run hospital at Philippine General Hospital. Ang mga local at iba pang public hospitals ay puwede ring magkaroon ng sariling Malasakit Center kung masusunod ang criteria na itinakda ng batas.

Inilunsad natin ang ika-154 Malasakit Center noong January 18 sa Camiguin General Hospital sa Mambajao. Noong Nobyembre 2022, nagbukas tayo ng ika-153 para naman sa OFW Hospital sa Pampanga. Pangarap natin noon na magkaroon ng Department of Migrant Workers, para sa mga OFWs natin at ngayon ay natupad na. Tapos, nagkaroon din sila ng sariling hospital diyan. Ngayon naman ay may Malasakit Center na rin para sa kanila at kanilang mga pamilya.

Sa kabuuan, mayroon na tayong 87 na Malasakit Center sa Luzon, 29 sa Visayas, at 38 sa Mindanao. Mula Batanes na dulo ng Pilipinas, hanggang Tawi-Tawi ay mayroon na.

Natutuwa tayo dahil batay sa datos ng DOH, mahigit pitong milyong Pilipino na ang natulungan nito, lalo na sa pamamagitan ng programang Medical Assistance for Indigent Patients ng DOH.

Samantala, sa pagbubukas naman ng sesyon sa Senado nitong January 23, kabilang ang inyong Senador Kuya Bong Go sa 12 senador na nakapagtala ng perfect attendance sa lahat ng 39 plenary sessions mula July 25, 2022 hanggang December 14, 2022.

Hindi tayo nagsasayang ng araw lalo pa at ipinaglalaban natin ang mga prayoridad na panukalang batas na nai-file na kasalukuyang isinusulong natin at tatalakayin pa sa Senado, kabilang ang pagpapalawak ng “Rural Employment Assistance Program”, “Emergency Medical Services System Bill”, “Free Legal Assistance to AFP (Armed Forces of the Philippines) and PNP (Philippine National Police) Enlisted Personnel Bill”, “Magna Carta of Philippine Drug Enforcement Agency (PDEA) Officers and Personnel”, “Philippine National Games (PNG) Bill”, “One Town One Product Program”, “Amendment to the Insurance Code”, “National Housing Development Production and Financing Program”, “Barangay Health Workers (BHWs) Compensation and Incentives Bill”, “Drug Abuse Treatment and Rehabilitation Center”, “Disaster Resilience Act”, "Virology Science and Technology Institute of the Philippines Act", “Philippine Center for Disease Control and Prevention Act” at “Mandatory Evacuation Centers Act”.

Kabilang din sa ating isinusulong ang Annual Medical Check Up para sa lahat ng Pilipino, Comprehensive Dialysis Benefit Package para sa mga miyembro ng PhilHealth, Advanced Nursing Education, Rental Housing Subsidy, E-Governance, at Magna Carta for Barangay.

Samantala, patuloy pa rin tayo sa pagtulong sa mga kababayan nating labis na nangangailangan. Noong January 21 ay binisita natin ang Oton, Iloilo na sinalanta ng buhawi at nagkaloob ng ayuda sa 248 residente na labis na naapektuhan. Dapat talagang maisabatas na ang “Department of Disaster Resilience Bill” at ang “Mandatory Evacuation Centers Bill” para maagap na matulungan ng pamahalaan ang ating mga kababayang tinatamaan ng kalamidad.

Nakiisa rin tayo sa pagdiriwang ng Dinagyang Festival sa Iloilo City at pati ang Ati-atihan Coronation night sa Ibajay, Aklan. Sinaksihan din natin ang groundbreaking ng itatayong apat na Super Health Centers sa Western Visayas—isa sa bayan ng Maasin sa Iloilo province at tatlo pa sa mga bayan ng Kalibo, Numancia, at Tangalan sa Aklan province.

Nag-abot din tayo ng tulong sa 217 residenteng naapektuhan ng bagyo sa Kalibo, 500 sa Numancia, at sa 1,900 na magsasaka sa Tangalan.

Hindi lamang sa paglikha ng mga batas na magpapagaan sa buhay ng bawat Pilipino kundi maging ang paghahatid ng serbisyo sa mga higit na nangangailangan. Hindi tayo magsasawa sa pagtupad sa ating iisang pangarap na ang bawat Pilipino ay magkaroon ng ligtas at mas komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ayuda sa mahihirap, dapat non-stop

ni Bong Go @Bisyo Magserbisyo | January 21, 2023

Patuloy ang serbisyo ng Malasakit Center para mailapit sa mga nangangailangan ang serbisyong pangkalusugan.

Naging mabunga ang linggong ito dahil sa kabila ng marami tayong naging trabaho sa Senado, nakapaglibot pa rin ang inyong Senador Kuya Bong Go para naman maghatid ng serbisyo at tulong sa iba’t ibang komunidad, at maipabatid ang ating mga inisyatiba at programa na ang layunin ay mapagkalooban ang ating mga kapwa Pilipino ng ligtas at komportableng buhay, at mabigyan ng proteksyon ang kanilang kalusugan.

Kahapon, January 19, ay sinaksihan natin ang pagpapasinaya at turnover ng New Community College building sa Gingoog City, Misamis Oriental. Sinuportahan ko ang pagpapatayo ng nasabing gusali. Matapos ang aktibidad ay personal nating pinangunahan ang pamamahagi ng ayuda sa 750 indigent na estudyante ng NCC.

Pinayuhan ko ang mga kabataan na pagbutihin ang kanilang pag-aaral para maging masaya ang kanilang mga magulang. Sinabi ko rin sa kanila na mahalaga ang edukasyon dahil ito ang isa sa mga susi sa pag-unlad. Bukod sa kanilang dedikasyon sa pag-aaral, ipinaalala ko rin sa kanila na maging mahilig sa sports, para bukod sa matalas ang kanilang isipan ay masigla rin ang kanilang katawan. Dagdag na payo ko sa kanila, get into sports and stay away from drugs.

Pagkatapos ay dumiretso naman tayo sa Oroquieta City at pinangunahan ang pagkakaloob ng ayuda sa 2,563 na mahihirap na residente na naging biktima ng pagbaha sa kanilang lugar.

Dinaluhan ko naman noong January 18 ang paglulunsad ng pinakabagong Malasakit Center sa Camiguin General Hospital, isang DOH-run hospital, sa Mambajao, Camiguin. Masaya po akong ibalita na ito na ang ika-154 na Malasakit Center sa ating bansa. Nag-abot din tayo ng tulong sa mga pasyente at frontliners sa ospital.

Patuloy ang ating pagsisikap na maipagpatuloy pa ang mga Malasakit Center sa layuning ilapit sa mga pasyente — lalo na ang mga mahihirap at walang matatakbuhan maliban sa pamahalaan — ang mga tulong pinansyal at pangmedikal ng iba’t ibang ahensya ng gobyerno nang hindi na sila mahirapan pa sa paglilibot sa mga opisina dahil nasa iisang bubong na.

Noong wala pa ang Malasakit Center, kinakailangan pang lumapit ng mga pasyente sa iba’t ibang opisina ng gobyerno. Pumipila sila nang napakahaba at nagmamakaawa na tulungan sila. Kaya naisip ko, bakit pa natin kailangang pahirapan ang ating mga kababayan? Bakit kailangan pa nilang magmakaawa, eh pera naman nila ‘yan? Ibalik dapat ang pera sa mga mahihirap sa pamamagitan ng mabilis, maayos at maaasahang serbisyong nararapat.

Bilang isang lingkod bayan, napakasarap sa aking pakiramdam na ang ating mga isinusulong na programa ay talagang malaki ang naitutulong sa ating mga kapwa Pilipino. Kaya naman sobra akong natutuwa sa pinakahuling ulat ng DOH na nagsasabing mahigit pitong milyong Pilipino na ang natulungan at nakinabang sa Malasakit Centers sa buong bansa, mula Batanes hanggang Tawi-Tawi.

Sinaksihan ko rin ang groundbreaking ng itatayong Super Health Center sa Mambajao, na kapag operational na ay magkakaloob sa ating mga kababayan doon ng de-kalidad na serbisyong pangkalusugan, at hindi na nila kailangang magpunta sa mga malalayong ospital dahil kaya nang tugunan dito ang mga emergency, maging ang panganganak, pagpapabunot ng ngipin at iba pang serbisyong agarang kinakailangan. Nakatanggap naman ng tulong mula sa aking tanggapan ang 702 benepisyaryo na bahagi ng iba’t ibang sektor sa naturang lugar.

Binisita ko rin ang mga proyektong aking sinuportahang mapondohan ng gobyerno sa Brgy. Bonbon, Catarman sa Camiguin pa rin. Kabilang dito ang barangay hall, evacuation center at solar lights na pawang nasa Purok 4. Sa Purok 3 ay sinilip ko rin ang mga proyektong atin ding sinuportahan gaya ng multipurpose gym at seawall. Malaking tulong ang mga pasilidad na ito sa kanilang mga residente lalo na kapag may kalamidad.

Napakahalaga para sa akin na personal na nakikita ang mga proyektong pinagkagastusan ng pondo ng pamahalaan para matiyak na maayos ang pagkakagawa at nasusunod kung ano ang purpose nito — ang mapakinabangan ng mga tao.

Ipinagpatuloy rin namin ang pamimigay ng tulong sa 73 estudyante sa Catarman (Camiguin) at ang groundbreaking ng isa pang Super Health Center sa Guinsiliban, Camiguin.

Samantala, nakatakda sana akong bumisita sa Mapanas, Catarman at Lavezares sa Northern Samar noong January 17 para maghatid ng ayuda sa mga residenteng naapektuhan ng malakas na pag-ulan at pagbaha. Sa kasamaang palad, noong kami ay papaangat na para lumipad ay nagkaroon ng mechanical issue sa isa sa mga makina at preno ng eroplanong aming sinasakyan kung kaya’t naantala ang aming pagbiyahe. Salamat sa Diyos, ligtas kami at walang gaanong aberya ang idinulot sa ating paliparan sa nangyari.

Magsasagawa rin sana ako ng inspection sa itinatayong Super Health Center at bagong tayo na covered court sa Lavezares, at sa isinaayos na public market sa Catarman. Gayunpaman, tiniyak ng aking team na nasa Northern Samar na tumutulong sa mga lokal na awtoridad doon na natutugunan ang pangangailangan ng mga residenteng labis na naapektuhan ng pagbaha. Naabutan din ng tulong ang 742 na senior citizens at solo parents.

Nakarating naman ang aking relief team sa Maco, Davao de Oro para alalayan at ayudahan ang 23 residente na biktima ng landslide.

Ngayong araw naman ay nakatakda akong bumisita sa Siniloan, Laguna para makita ang itinatayong Sports Complex doon na akin ding sinuportahang mapondohan. Pagkatapos ay dadaan ako sa Famy, Laguna para makisama sa kanilang piyesta at mapakinggan din ang mga hinaing ng mga kababayan natin doon.

Mga kababayan ko, kahit saang sulok kayo ng bansa, basta kaya ng aking katawan at panahon, ay pupuntahan ko kayo para makapaghatid ng agarang tulong at serbisyo. God willing, patuloy po akong bibisita sa ating mga kababayang tinamaan ng sakuna at nangangailangan dahil sa iba’t ibang krisis na hinaharap ng ating bansa. Patuloy pa rin akong magseserbisyo, magtatrabaho at tutulong sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suportahan ang sports, ilayo ang kabataan sa droga

ni Bong Go @Bisyo Magserbisyo | January 19, 2023

Una sa listahan ng mga prayoridad natin ang tulungan at proteksyunan ang mahihirap—hopeless at helpless nating mga kababayan, na walang ibang matakbuhan maliban sa pamahalaan.

Tulad ng maraming mahihirap na humingi ng tulong sa kanilang pampaospital, ubos na ang panahon nila, ubos pa ang pera nila sa pamasahe.

Bakit ba natin pinahihirapan ang mga Pilipino kung pera naman nila 'yan? Ibalik ang pera sa mahihirap sa pamamagitan ng mabilis, maayos at maaasahang serbisyong nararapat.

Kaya noong naging senador ang inyong lingkod, bilang Chair ng Senate Committee on Health ay itinulak natin ang panukalang Malasakit Centers Act of 2019 o ang Republic Act No. 11463.

Target nito'y ibaba sa lowest amount possible ang hospital bill para maibsan ang pasakit ng mahihirap na nagkakasakit. Sa kasalukuyan ay mayroon na tayong 153 Malasakit Centers sa buong bansa mula nang sinimulan ang programa noong 2018 at maisabatas noong 2019. Iniulat din ng DOH na mahigit pitong milyong Pilipino na ang natulungan ng Malasakit Centers—mula Batanes hanggang Tawi-Tawi. Basta Pilipino, lalo na kung poor o indigent patient, qualified sa mga serbisyo nito.

Mahalagang patuloy na ilapit sa tao ang mga serbisyo ng gobyerno, lalo na pagdating sa kanilang kalusugan.

Sa naobserbahan natin nang pumutok ang pandemya, kailangang mas lalong palakasin ang healthcare system. Bukod sa pagpapatayo ng mga bagong ospital at pagpapaganda ng mga existing na, isinulong din natin ang pagkakaroon ng Super Health Center (SHC), partikular sa malalayong lugar.

Ang SHC ay improved version ng mga rural health clinic, mas maliit lang sa polyclinic, pero ang kagamitan at pasilidad ay maihahalintulad sa mga ospital na kayang makapagbigay ng basic health services. Kapag may nagkasakit sa malayong lugar, hindi nila kailangang pumunta o bumiyahe sa malalaking ospital na kadalasan ay nasa mga siyudad dahil kaya na silang asikasuhin dito, lalo na ang mga manganganak at iba pang emergency cases.

Kabilang sa mga serbisyong ipagkakaloob sa SHCs ang database management, outpatient, pagpapaanak, pagpapabunot ng ngipin, isolation, diagnostic (laboratory: X-Ray at ultrasound), pharmacy at ambulatory surgical unit. Maaari ring suriin kung may diperensya sa eye, ear, nose and throat (EENT); oncology centers; at physical therapy and rehabilitation centers. Makapagsasagawa rin ng telemedicine, kung saan puwedeng magpakonsulta ang pasyente sa pamamagitan ng pagtawag sa doktor.

May mga nasimulan na noong nakaraang taon dahil 307 SHCs ang napondohan noong 2022. 322 SHCs naman ang target na maipatayo ng gobyerno ngayong taon gamit ang pondong ipinaglaban nating maisama sa 2023 national budget.

Suportado rin natin ang mga inisyatiba ng mga lokal na pamahalaan para mapaganda ang serbisyo sa kanilang mga nasasakupan. Nitong January 16 ay personal nating sinaksihan ang pagbubukas ng mga bagong Multi-Purpose Building sa Bgy. Batasan Hills at sa Bgy. Commonwealth sa Quezon City. Malaking tulong ang mga bagong gusaling ito para sa komunidad doon.

Bilang Vice-Chair ng Senate Committee on Finance, naging instrumento tayo para mapondohan ang mga proyektong ito kasama ang local officials nila. Ipagpatuloy lang natin ang pakikipagtulungan para tuluy-tuloy din ang pag-unlad ng mga komunidad ninyo. Nandito lang tayo at tutulong sa abot ng ating makakaya.

Samantala, isa nang ganap na Filipino citizen ang basketball player na si Justin Brownlee matapos ang kanyang oath of allegiance sa Senado noong January 16. Bilang Chair ng Senate Committee on Sports, naniniwala tayong malaki ang maitutulong ni Justin bilang isa sa magiging manlalaro ng Gilas Pilipinas. To Mr. Brownlee, ngayon na isa ka nang ganap na mamamayan ng bansang Pilipinas, nawa’y patuloy mong isapuso ang pagiging isang Pilipino!

Umaasa tayong ang suportang ibinibigay natin sa mga atleta ay magiging gabay rin upang mailayo ang kabataan sa masasamang bisyo at mailapit sa tamang landas sa pamamagitan ng mga magagandang ehemplong ipinakikita ng mga atletang kanilang iniidolo anumang koponan at anumang sports ito. Tulad ng madalas nating payo, get into sports, stay away from drugs.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.