Dagdag-benepisyo para sa mga dating pangulo, isinusulong

ni Bong Go @Bisyo Magserbisyo | Pebrero 10, 2023

Makasaysayan para sa akin ang buwan ng Pebrero ngayong taon dahil limang taon na ang nakalipas matapos nating matupad ang isa sa aking mga pangarap na paghahatid ng serbisyo sa aking mga kapwa Pilipino—ang pagkakaroon ng Malasakit Center, isang one-stop shop ng mga medical assistance para sa mahihirap na Pilipino

Bumisita ako sa Vicente Sotto Memorial Medical Center sa Cebu ngayong araw. Dito unang nagkaroon ng Malasakit Center noong Pebrero 12, 2018. Noong 2019, isinulong ko ang pagsasabatas ng panukalang magtatatag ng Malasakit Centers sa mga Department of Health-run hospitals at sa Philippine General Hospital sa buong bansa.

Na-institutionalize ang Malasakit Center program nang lagdaan ni dating pangulong Rodrigo Duterte ang Republic Act No. 11463 o ang Malasakit Centers Act noong December 2019. Sa kasalukuyan ay mayroon na tayong 154 Malasakit Centers sa buong bansa at mahigit pitong milyong kababayan na natin ang natulungan, at patuloy na natutulungan ng programang ito.

Matapos ang aking pagbisita sa Malasakit Center sa VSMMC, nagkaloob naman ako ng tulong sa mga pasyente ng ospital at mga frontliners.

Bukod naman sa Malasakit Center, patuloy din sa pagdagdag ng bilang ang mga itinatayong Super Health Center (SHC) sa iba’t ibang bahagi ng ating bansa. Sa imbitasyon ng mga lokal na opisyal, sinaksihan ko ang groundbreaking ng itatayong Super Health Center sa Lawaan, Talisay City. Personal ko ring pinangunahan ang pagkakaloob ng tulong sa 500 benepisyaryo mula sa iba’t ibang sektor, at sa 91 residenteng biktima ng sunog.

Kahapon, Pebrero 9, sa imbitasyon ng mga lokal na opisyal ay sinaksihan ko naman ang groundbreaking ng itatayong Super Health Center sa San Carlos City, Negros Occidental.

Pinangunahan ko rin ang pamamahagi ng ayuda sa 500 mahihirap na residente ng nasabing lungsod.

Nagsagawa rin ako ng inspeksyon sa sinuportahan nating pagpapagawa ng public market sa Don Salvador Benedicto sa Negros Occidental, at nagkaloob ng tulong sa 500 mahihirap na residente. Pinaunlakan din natin ang imbitasyon bilang guest speaker sa 40th founding anniversary ng bayan, kung saan itinampok ang kanilang Kali Cultural Competition at 40th Kali-Kalihan Harvest Festival.

Nagkaroon din ng groundbreaking ng SHC sa Dolores, Eastern Samar; at ako naman ay nagsagawa ng inspeksyon sa itatayong SHC sa Imus, Cavite noong Pebrero 8, kasabay ng pagbibigay ng ayuda sa 500 residente at 85 pamilyang nasunugan.

Sinaksihan din natin ang groundbreaking ng itatayong SHC sa Compostela, Davao de Oro noong February 4, at nagkaloob ng ayuda sa 500 mahihirap na residente ru’n. Bago ang event sa Compostela, dinaluhan ko rin ang inagurasyon at turnover ceremony ng itinayong multi-purpose building sa Purok 2, Lower Bgy. Mapula, Paquibato District, Davao City. Nakapag-abot din tayo ng tulong sa 250 mahihirap na residente ru’n.

Hindi rin natin kinakaligtaan ang paghahatid ng tulong sa mga kababayan nating higit na nangangailangan at nahaharap sa iba’t ibang krisis. Personal kong tiningnan ang sitwasyon at nagkaloob ng tulong sa mga nasunugan sa Quezon City— 94 mula sa Bgy. Roxas, at 600 sa Bgy. Apolonio Samson. Nakarating din ako sa Parañaque City para tulungan ang 45 biktima ng sunog sa Bgy. Merville at Bgy. San Dionisio. Kabilang din sa ating naalalayan ang 27 na mga estudyanteng atleta mula Luzon na na-stranded sa Bislig City, Surigao del Sur.

Samantala, kasama ang aking mga kapwa mambabatas na sina Senators Mark Villar, Francis Tolentino, at Ronald dela Rosa, nag-file kami ng Senate Bill No. 1784 na layuning bigyan ng mga benepisyo at iba pang prebilehiyo ang mga dating pangulo ng ating bansa. Kung maisasabatas ito, lahat ng dating pangulo ay mabibigyan ng mas pinabuting personal na seguridad at proteksyon, at kaunting office staff mula sa Office of the President.

Kahit ngayon na tapos na ang kanilang termino, hindi ibig sabihin ay tapos na ang kanilang serbisyo at sakripisyo para sa ating bayan at para sa kinabukasan ng ating mga anak. Nagseserbisyo pa rin sila sa iba’t ibang kapasidad, kabilang na rito ang pagbibigay ng kanilang mga pananaw sa iba’t ibang isyu, pakikipagtalakayan sa mga foreign and local dignitaries, at pagdalo sa public events at iba pang social engagements. Patuloy pa rin silang tumutulong sa mga tao, at dahil d’yan, patuloy din ang banta sa kanilang buhay.

Bagama’t wala naman tayong hinihinging dagdag na pension o suweldo o allowance para sa mga dating pangulo, parang nakalulungkot isipin na P8,000 kada buwan lamang ang natatanggap nila base sa Republic Act No. 5059 na naisabatas noong ika-17 ng Hunyo, 1967. Hindi ito sapat para sa suweldo ng isang staff. Tatlong dating pangulo na lamang ang natitira ngayon—sina dating pangulong Joseph Estrada, Gloria Arroyo at Tatay Digong. Sakaling maisabatas ang SBN 1784, makikinabang din dito si Pangulong Ferdinand “Bongbong” Marcos, Jr. kapag tapos na ang kanyang termino.

Lalo nating pinabubuti ang paghahatid ng serbisyo sa bawat Pilipino, anuman ang antas ng kanilang buhay sa abot ng ating makakaya. Bawat isa ay may mahalagang papel sa ating lipunan, kaya nararapat lamang na maisulong natin ang karapatan at kapakanan ng lahat para walang maiwanan sa ating muling pagbangon tungo sa mas ligtas at komportableng buhay para sa lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mental health services para sa lahat, palalakasin

ni Bong Go @Bisyo Magserbisyo | Pebrero 8, 2023

Suportado ko ang mga hakbang ng kasalukuyang administrasyon, lalo na ‘yung para sa kapakanan at ikagaganda ng buhay ng bawat Pilipino, partikular ng mga mahihirap at walang malalapitan maliban sa pamahalaan.

Kaisa ako ni Pangulong Ferdinand “Bongbong” Marcos, Jr. sa kanyang mahahalagang legislative agenda na kabilang sa Philippine Development Plan 2023-2028, na kanyang inaprubahan sa pamamagitan ng Executive Order No. 14 noong Enero 27. Sang-ayon ako sa layunin nito na palakasin pa lalo ang mga nasimulan ni dating Pangulong Rodrigo Duterte na tugunan ang mga pangkasalukuyang mga suliranin, at mas maisaayos ang ating landas patungo sa sama-samang kaunlaran.

Ang PDP 2023-2028 ay magkakaloob sa atin ng tiyak na patnubay kung paano natin pangangasiwaan ang ating bansa habang sama-sama tayong nagtatrabaho para makabangon mula sa epekto ng pandemya. Naniniwala ako na ang prayoridad na mga panukalang-batas na taglay nito ay magkakaroon ng malaki at positibong epekto sa buhay ng bawat Pilipino.

Nakakatuwa na karamihan sa mahahalagang legislative agenda na nakapaloob sa PDP 2023-2028 ay kagaya ng mga panukalang-batas na nai-file ko sa 19th Congress. Kabilang dito ang Senate Bill No. 1180 o ang pagkakaroon ng Medical Reserve Corps kung saan ang mga licensed physicians, medical degree holders, estudyante na nakakumpleto ng apat na taong medical course, rehistradong nars, at licensed allied health professionals ay maaaring hingin ang serbisyo para matugunan ang pangangailangang medikal ng publiko.

Kabilang din ang pagtatayo ng Philippine Center for Disease Control and Prevention na kahalintulad ng panukala kong SBN 195; at ng Virology and Vaccine Institute of the Philippines na kahalintulad naman ng panukala kong SBN 196. Sa nais ng Pangulo na magkaroon ng mas maraming specialty centers, nauna na akong nagpahayag noon ng suporta sa kanya sa bagay na ito kaya i-finile ko ang SBN 1321 na hangaring magtayo ng regional specialty centers sa Department of Health (DOH) hospitals kung maisabatas.

Noong nakaraan, napakaraming lumalapit sa amin, hindi lang para magpagamot, humihingi rin ng pamasahe para bumiyahe dahil nasa mga siyudad ang mga specialty centers na kayang gumamot sa kanila. Ilapit na natin sa mga nangangailangan ang serbisyong-medikal na kailangan nila mula sa mga specialty centers.

Prayoridad din ng PDP 2023-2028 ang pagkakaroon ng batas para sa rental housing subsidy at magkaroon ng access ang informal settler families, homeless, at mga higit na nangangailangan ng disenteng tirahan. Kahalintulad ito ng i-finile kong SBN 192 o ang Rental Housing Subsidy Program para matiyak na ang mga walang tahanan ay may access sa maayos na matutuluyan. I-finile ko rin ang SBN 194 na naglalayong ma-institutionalize ang transisyon ng pamahalaan patungo sa e-governance gamit ang makabagong teknolohiya para sa mas mabilis na paghahatid ng serbisyo sa mga tao.

Samantala, bilang Chair ng Senate Committee on Health, isa rin sa aking prayoridad ang mental health ng ating mga kababayan, lalo na nang lumaganap ang pandemya. Marahil, madalas itong iniiwasan na pag-usapan noon dahil kadalasan ay nahihiya sila sa posibilidad na ma-discriminate sila ng ibang tao. Pero mahalagang bahagi ito ng ating kabuuan kaya dapat huwag nating pabayaan.

Marami rin ang hindi alam kung ano ang mga senyales at sintomas nito. Umpisa pa lang ng pandemya, marami nang naiulat nagkaroon ng depresyon dahil maraming nawalan ng kabuhayan.

Tumaas din ang kaso ng suicide sa ating bansa, lalo na sa mga kabataan. Ayon sa report, 404 na estudyante ang nagpakamatay noong 2021. Nakakabahala ito.

Dahil dito, i-finile ko ang SBN 1786 noong Enero 26 na kung maisasabatas ay aatasan ang public higher education institutions (HEIs) na palakasin ang kanilang mental health services at magtatag ng Mental Health Offices sa kanilang campus. Suportado ko rin ang panukala ng kapwa ko senador na palakasin din ang mental health program sa basic education level.

Patuloy din ang ating pagsisikap na mapalakas ang ating healthcare system sa pamamagitan ng pagiging instrumento o tulay sa pagpapatayo ng mga Malasakit Centers at Super Health Centers sa buong bansa.

Noong Pebrero 2 ay dinaluhan natin ang ribbon cutting ng SHC sa Mariveles, Bataan.

Kasabay namang pinasinayaan ang itatayo sa Sarangani, Davao Occidental. Noong Pebrero 4 ay nagkaroon din ng groundbreaking sa itatayo naman sa Compostela, Davao de Oro. Kahapon, Pebrero 7, ay nag-groundbreaking din sa SHC sa Dolores, Eastern Samar.

Umaasa tayo na sa tulong ng mga kapwa ko mambabatas, lokal na opisyal at ng DOH na mas marami pa tayong maitatatag na Super Health Centers sa iba’t ibang bahagi ng ating bansa.

Malaki po ang aking paniniwala na kung patuloy tayong magtutulungan at magbabayanihan, nasa tamang daan tayo tungo sa tuluyang pagbangon. Suportahan natin ang mga layunin ng ating pamahalaan dahil may maganda tayong oportunidad ngayon na maiangat ang buhay ng ating mga kapwa Pilipino.

Sa aking kapasidad bilang inyong Senador Kuya Bong Go, patuloy ako sa aking mga pagsisikap na mapagkalooban ng tulong ang mahihirap nating kababayan, at maihatid ang serbisyo, saanmang sulok ng ating bansa at sa abot ng aking makakaya.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

OFW man o hindi… Mga manggagawang Pinoy, dapat may sapat na proteksyon

ni Bong Go @Bisyo Magserbisyo |Pebrero 3, 2023

Dahil sa sinapit ng ating kababayang si Jullebee Ranara sa Kuwait, naging maigting ang ating panawagan sa pamahalaan na mas protektahan ang ating mga overseas Filipino workers, saanmang panig ng mundo sila nagtatrabaho.

Umapela rin tayo sa Department of Migrant Workers (DMW), Overseas Workers Welfare Administration (OWWA), National Bureau of Investigation (NBI) at mga kinauukulang ahensya na tutukan ang kaso ni Jullebee. Ito ang dahilan kaya isinulong natin na magkaroon ng DMW para may ahensyang tututok sa mga ganitong kaso. Malaki ang tiwala ko sa mga ahensyang ito para makamit ng pamilya ni Jullebee ang katarungan.

Sa ating gawain sa Senado, tulad ng pangangalaga sa ating OFWs, layunin ko ring protektahan ang mga manggagawa rito sa ating bansa dahil napakahalaga ng papel nila sa ating economic recovery. Nagsumite ako ng mga bagong panukalang-batas sa hangaring mas maitaguyod ang kanilang mga karapatan sakaling maisabatas ang mga ito.

Isa rito ang Senate Bill No. 1705 na isinumite ko noong January 19. Layunin nito na madagdagan ang service incentive leave (SIL) ng mga manggagawa sa private sector.

Aamyendahan ng SBN 1705 ang Article 95 ng Labor Code of the Philippines, at aatasan ang mga employers na bigyan ang kanilang mga empleyado ng taunang SIL na sampung araw na may bayad. Ang karagdagang incentive leave na ito ay bilang pagkilala sa mahalagang papel at sakripisyo ng mga empleyado para sa ikauunlad ng ekonomiya ng ating bansa.

Isinumite ko rin ang SBN 1707 na layunin namang itaguyod ang kapakanan ng ating mga social workers. Kung maisasabatas, ginagarantiyahan ng panukalang ito ang pagbibigay ng dagdag na proteksyon sa mga social worker mula sa diskriminasyon, pananakot, panliligalig o pagpaparusa, at marami pang iba. Pangangalagaan din ng SBN 1707 ang kanilang karapatang sumali o tumulong sa mga organisasyon o unyon nang naaayon sa batas. Nakasaad sa panukala na ang minimum base pay ng Social Welfare Officer I sa gobyerno ay hindi dapat bababa sa Salary Grade 13.

Malaking bagay ang mga karagdagang benepisyong ito sa ating mga manggagawa, lalo na’t malaki rin ang naging epekto ng pandemya sa kanilang kabuhayan at sa kabuhayan ng marami pa nating mga kababayan. Ipaglalaban natin ito at hihingin ang suporta ng aking mga kapwa mambabatas at iba pang stakeholders para maging ganap na batas.

Sa Senate hearing ng Sub-Committee on Health and Demography kaugnay ng Universal Health Care law amendments noong Pebrero 1, bilang Chair ng komite, sinegundahan natin ang pagpapanatili sa suspensyon ng pagtaas ng PhilHealth contribution. Hinikayat natin ang mga kapwa natin mambabatas na pakinggan ang hinaing ng mga Pilipino na hanggang ngayon ay hirap pa rin na makabangon mula sa epekto ng pandemya.

Nagpahayag naman ako ng suporta na mapag-aralan ang gagawing amyenda sa batas upang mabalanse ang magiging epekto nito sa pondong pangkalusugan at sa mga umaasa mula rito. Hinimok din natin ang mga opisyal ng PhilHealth na i-expand ang free dialysis coverage, pag-implementa ng outpatient benefit package gaya ng free medical check-up, at pagtaas ng iba pang benepisyong puwedeng makuha ng mga pasyente.

Bilang pagsuporta sa mga adhikain ng administrasyon ni Pangulong Ferdinand “Bongbong” Marcos, Jr., sinuportahan ko naman ang ad interim appointment ni Secretary Alfredo Pascual bilang kalihim ng Department of Trade and Industry (DTI).

Naniniwala ako na malaki ang magiging ambag ni Sec. Pascual sa paglago ng ating ekonomiya. Umapela rin ako sa kanya na ipagpatuloy at palakasin pa ang mga nasimulang programa ng Duterte administration, at mas marami pang matulungan sa ating mga kababayan, lalo na ang maliliit na negosyante at mahihirap.

Samantala, hindi natin kinaliligtaan ang ating patuloy na paghahatid ng serbisyo at tulong sa ating mga kababayan na nahaharap sa iba’t ibang krisis. Ngayong araw, bibisitahin natin ang mga nasunugan sa Navotas City, at sa Valenzuela City para mamahagi ng ayuda. Noong Martes ay maagap tayong nagkaloob ng tulong sa 478 residente ng Bgy. 387, Quiapo, Maynila na nasunugan din.

Bumisita naman ang aking relief team sa iba’t ibang lugar sa bansa para alalayan at bigyan ng tulong ang mga biktima ng magkakahiwalay na insidente ng sunog gaya ng 300 residente mula sa tatlong barangay sa Molo District, Iloilo City; 116 mula sa dalawang barangay sa Lahug, Cebu City; 197 mula sa dalawang barangay sa Lapu-Lapu City. Sa Saranggani, Davao Occidental, naabutan ng tulong ang 300 benepisaryo na bahagi ng iba’t ibang sektor.

Masaya ko namang ibinabalita na noong Pebrero 2 ay nagkaroon na ng groundbreaking ng itatayong Super Health Center sa Sarangani, Davao Occidental. Nag-turn over din du’n ng sea ambulance, na aking sinuportahang mapondohan.

Bumiyahe rin tayo kahapon, February 2, sa imbitasyon ng mga lokal na opisyal ng Bataan para saksihan ang ceremonial turnover ng NHA housing units sa Bgy. Daan Pare sa bayan ng Orion. Ilan sa mga benepisaryo ng pabahay na ito ay mga biktima ng sunog na nauna nang natulungan ng aking opisina noong taong 2019. Binalikan natin sila ngayon upang kamustahin at nakakatuwa naman na ang ilan sa kanila ay may sarili at maayos na tirahan na.

Matapos ang programa ay pinangunahan natin ang pagkakaloob ng ayuda sa mahihirap na residente. Bukod dito, sinaksihan din natin ang groundbreaking ng sports facility sa Villa Leonor, Bgy. Bo. Luz sa Limay. Nagsagawa rin tayo ng inspeksyon sa itinatayong evacuation center na nasa National Road, Barangay Townsite, inspeksyon sa itinayong barangay hall sa Bgy. Wawa, at nagkaloob ng tulong sa 500 residente. Nag-inspeksyon din tayo sa Limay View Deck sa Sitio Anahao, Brgy. Reformista. Ang mga nasabing pasilidad ay pawang nasa bayan ng Limay.

Imbitado rin tayo sa ribbon cutting ng itatayong Super Health Center sa Mariveles naman, at pagkatapos ng programa ay naghandog tayo ng tulong sa 500 mahihirap na residente. Pinasasalamatan natin ang mga lokal na opisyal na katuwang natin at napakalaki ng papel na ginagampanan sa paghahatid ng serbisyo sa ating mga kababayan.

Ginagawa natin ang ating makakaya na maging instrumento at makatulong sa pagpapatayo ng mga ganitong imprastruktura na mapapakinabangan ng ating mga kababayan, partikular sa aspeto ng kanilang kalusugan, at kapag may mga sakuna at kalamidad.

Marami pa tayong adhikain at pangarap para sa lahat ng Pilipino. Hindi tayo mapapagod na maisakatuparan ang mga ‘yun sa aking kapasidad bilang senador at lingkod-bayan.

Masayang makita na nasusuklian ang tiwalang ipinagkaloob n’yo sa akin na maglingkod sa bayan. Hindi ko sasayangin ang oportunidad na ito na makatulong sa abot ng aking makakaya upang mabigyan kayo ng mas ligtas at komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.