Mahihirap na mag-aaral, ‘di dapat pahirapan

ni Bong Go @Bisyo Magserbisyo | March 1, 2023

Masaya kong ibinabalita na mayroon na tayong 155 Malasakit Center sa buong bansa, at ang pinakahuling inilunsad ay nasa Dr. George T. Hofer Medical Center sa Ipil, Zamboanga Sibugay noong Pebrero 25. Isa itong panibagong milestone sa ating programa na ngayon ay limang taon na at nakapaghatid na ng tulong sa mahigit pitong milyong Pilipino sa iba’t ibang bahagi ng Pilipinas ayon sa Department of Health (DOH).

Patuloy itong aalalay sa ating mga kababayan, lalo na sa pinakamahihirap at walang malalapitan maliban sa pamahalaan.

Bago nagkaroon ng mga Malasakit Center, marami tayong mga kapwa Pilipino na hirap sa pambayad sa ospital na isang linggong pumipila sa iba’t ibang ahensya ng pamahalaan para lang makakuha ng tulong medikal. Dagdag na pabigat ito sa kanila, lalo pa at labis na ang kanilang pag-aalala sa kanilang kapamilyang nagpipilit labanan ang sakit para mabuhay.

Sinimulan natin ang Malasakit Centers program noong 2018. Isa itong one-stop shop kung saan nasa iisang bubong ang DOH, Department of Social Welfare and Development (DSWD), PhilHealth at Philippine Charity Sweepstakes Office (PCSO) para matiyak na ang tulong medikal mula sa pamahalaan ay abot-kamay ng mas maraming Pilipinong nangangailangan. Nang mahalal ako bilang senador, sa tulong ng aking mga kapwa mambabatas, matagumpay nating na-institutionalize ang programa sa pamamagitan ng Republic Act 11463, na nilagdaan ni dating Pangulong Rodrigo Duterte noong 2019, na ako ang principal author at sponsor sa Senado.

Simula noon, nakapaglagay tayo ng Malasakit Center sa Luzon, Visayas, at Mindanao—at sa lahat ng rehiyon sa ating bansa. Umaasa tayo na patuloy pa itong madaragdagan para mas marami pang kababayan nating nangangailangan ng tulong medikal ang maalalayan.

Palagi kong sinasabi, pera naman ng taumbayan ito, ibinabalik lang sa inyo sa pamamagitan ng mabilis, maayos at maaasahang serbisyo mula sa gobyerno. Sa ganitong paraan, inilalapit lang natin ang serbisyo ng gobyerno sa tao.

At kung ipinaglaban natin noon na huwag itaboy ang mga pasyente na di makabayad ng deposito sa ospital, ngayon naman ay ipinaglalaban natin ang mga estudyante na dapat makapag-aral at mabigyan ng palugit kung wala pa silang pambayad ng matrikula para makakuha ng exam. Nag co-sponsor tayo ng Senate Bill No. 1359, o ang panukalang batas na magbabawal sa “No Permit, No Exam” policy.

Sa ngayon ay maraming pamilyang Pilipino pa rin ang apektado ng pandemya at iba’t ibang krisis, kasama na r’yan ang mga natural na kalamidad, lalo na ang mga bagyo, lindol, baha, sunog atbp.

Habang sinisikap nilang makabangon, bigyan natin sila ng pagkakataon na mag-exam habang kumakayod ang kanilang pamilya ng pambayad sa matrikula. Ang sa atin dito, ayaw nating maantala ang kanilang pag-aaral.

Sa nakalipas na panahon, may estudyante na nag-suicide dahil hindi nakabayad ng tuition. Hindi na dapat maulit ito. Iniiwasan natin na ma-depress ang mga kabataan sa bigat ng pinapasan sa murang edad. Dapat nga, ineengganyo natin silang mag-aral. Ang edukasyon lang ang puhunan natin sa mundong ito, kaya sikapin nating makapagtapos ng pag-aaral ang mga bata. Sila ang kinabukasan ng bayang ito. Bigyan natin ng suporta at palugit para hindi mapunta ang pressure sa kanila.

Bilang Chair ng Senate Committee on Health, at miyembro rin ng Senate Basic Education Committee at ng Higher Education Committee, ang pangunahing layunin ko ay mapangalagaan ang pisikal at mental na kalusugan ng mga kabataan, at ang kanilang pagkakaroon ng maayos na edukasyon. Hindi dapat gawing pabigat sa kanila ang mga bayarin. Kailangan talaga natin ng batas na ito na dapat sundin ng mga eskuwelahan para mapagaan ang pinapasan ng ating mga mahihirap na estudyante.

Prayoridad dapat natin ang karapatan sa edukasyon dahil nasa ating Saligang Batas naman mismo ‘yan. At unahin natin ang kapakanan ng mahihirap. Ang mayayaman, kaya namang magbayad anumang oras. Pero ang mga mahihirap na isang kahig, isang tuka at nagtatrabaho ang mga magulang para mapaaral ang mga anak, para sa kanila itong SBN 1359.

Ayaw din naman natin na ang mga may-ari ng eskuwelahan ay hindi na makapagpatuloy ng kanilang operasyon dahil nanggagaling din ang kanilang pondo sa tuition fees. Nais lang nating mabigyan ng palugit at dagdag na panahon ang mga magulang na mag-issue ng promissory note at kung hanggang kailan dapat bayaran. May safeguards naman ang batas para masigurong hindi malulugi ang mga eskwelahan. Balansehin lang natin.

Sa ating pagsisikap na mapangalagaan ang kapakanan ng mga estudyante at maisulong ang kanilang karapatan sa edukasyon, naghain tayo at sinuportahan ang ilan pang mga panukalang-batas sa layuning mapaganda ang pagkakaroon ng edukasyon sa ating bansa, lalo na sa mahihirap.

Isa rito ang SBN 1190 na aking nai-file sa Senado, na naglalayong palawakin ang paggamit ng Special Education Fund para sa operasyon at maintenance ng mga pampublikong paaralan, pagbabayad ng suweldo at benepisyo para sa teaching and non-teaching personnel, pagkakaloob ng competency training para sa teaching personnel atbp.

Nag-co-sponsor din tayo ng SBN 1360, na naglalayon na mapalawak ang coverage ng tertiary education subsidy sa pamamagitan ng pag-amyenda sa Universal Access to Quality Tertiary Education Act. Sa panukalang ito, mas mabibigyan ng access sa dekalidad na edukasyon ang mahihirap na Pilipino.

Nag-co-sponsor din tayo sa SBN 1864, o ang “Student Loan Payment Moratorium During Disasters and Emergencies Act of 2022”, na nag-aawtorisa na mabigyan ng palugit ang pagbabayad ng student loan sa loob ng “reasonable period” sa panahon ng kalamidad at iba pang emergencies.

Inihain din natin ang SBN 1786, na naglalayong atasan ang Higher Education Institutions na magkaroon ng mental health offices at mag-empleyo ng karagdagang HEI-based mental health service personnel sa kanilang campus na aalalay sa buong HEI community, lalo na sa mga estudyante.

Naging co-author din ako ng bill ni Senator Win Gatchalian na SBN 379 o ang Basic Education Mental Health and Well-Being Promotion Bill na naglalayong paigtingin pa ang mental health services, emotional, developmental and preventive programs, and other support services sa Basic Education.

Isa rin na co-author ako ay ang SBN 94, o Teaching Supplies Allowance bill, para madagdagan ang allowance ng teacher para sa mga kagamitang pang-turo. Ang mga guro ay dapat na binibigyan ng sapat na benepisyo at konsiderasyon dahil sa kanilang serbisyo sa pagtuturo ng ating mga kabataan. Sila ay nagbibigay ng kanilang oras, kaalaman at dedikasyon upang masiguro na ang mga bata ay may magandang kinabukasan.

Pangalagaan natin ang kalagayan at kapakanan ng mga kabataan lalo na pagdating sa edukasyon dahil sila ang pag-asa ng ating bayan. Magtulungan tayo para mabigyan ang susunod na henerasyon ng mas ligtas at komportableng buhay at makaahon ang kanilang pamilya sa kahirapan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Rental Housing Subsidy Program, tulong sa mga biktima ng kalamidad

ni Bong Go @Bisyo Magserbisyo | Pebrero 24, 2023

Marami sa ating mga kababayan ang walang maayos na tirahan. Ayon sa Habitat for Humanity Philippines, sa Metro Manila pa lang ay mahigit apat na milyong Pilipino na ang hindi maganda ang kondisyon ng tinitirahan, na mas pinalala pa ng pandemya at mga kalamidad. Kulang din tayo ng tinatayang 6.5 milyong bahay, ayon sa Department of Human Settlements and Urban Development (DHSUD).

Ito ang binigyang-diin ko sa aking manipestasyon noong Martes sa ginanap na pagdinig ng Senate Committee on Urban Planning, Housing, and Resettlement. Kailangang tutukan ng ating pamahalaan ang kakapusan ng maayos na tirahan sa ating bansa.

Tinukoy ko rin na ang kawalan ng tahanan ay resulta ng mga kalamidad, kahirapan, kawalan ng hanapbuhay at limitadong access sa abot-kayang pabahay. Ito ang dahilan kaya patuloy kong isinusulong na maisabatas ang Senate Bill No. 192, na naglalayong ma-institutionalize ang Rental Housing Subsidy Program. Sa ilalim nito, ang housing and social protection program ay palalawakin para magkaloob sa mga biktima ng kalamidad ng mas maayos at abot-kayang access sa formal housing market sa pamamagitan ng pagkakaloob sa kanila ng pamahalaan ng ayuda para sa kanilang renta sa bahay.

Kaakibat ng panukalang-batas na ito ang pangarap nating lahat na sana ay magkaroon ng sariling maayos, ligtas at komportableng pamamahay ang bawat Pilipino at ang kanilang mga anak. Sana’y magtulungan ang gobyerno at ang lahat na matugunan itong backlog sa housing.

Sa aking pag-iikot sa buong Pilipinas, naabot ko na ang mula Aparri at Batanes hanggang Jolo at Tawi-Tawi, ang kalagayan ng ating mga kababayan na nasunugan at tinamaan ng lindol.

Nasaksihan ko talaga na nahirapan silang makabangon ulit. Back to zero talaga. Palagi kong sinasabi sa kanila na, “Huwag kayong mawalan ng pag-asa. Ang importante ay buhay tayo.” Magtulungan lang tayo, ang gamit ay nabibili, ang pera’y kikitain, subalit ang perang kikitain ay hindi nakakabili ng buhay. ‘Ika nga, a lost life is a lost life forever.

Kilala ang mga Pilipino sa pagtutulungan, ngunit kailangan pa rin nila ng tulong mula sa ating gobyerno. Kaya itong rental subsidy, sana ay maipasa ito para mabigyan lamang sila ng kahit anong halaga o kalahating halaga ng renta ng matitirhan nila habang hindi pa sila lubos na nakakabangon mula sa trahedya.

Isinulong ko rin ang Mandatory Evacuation Centers dahil konektado ito rito. Dahil sa tuwing nasusunugan ang ating mga kababayan, wala silang komportableng evacuation center. Minsan ay nagagamit ang mga eskuwelahan, naaantala at naaapektuhan naman ang pag-aaral ng mga bata dahil nagagamit ang mga silid-aralan, lalo ngayong face-to-face learning na ulit tayo. Minsan napapansin ko, sa ibang lugar, gumagawa na lang sila ng temporary tent sa tabi ng kalye. Kawawa ang kanilang kalagayan at dapat talagang tulungan ang mga ito.

Nagpahayag din ako ng “conditional support” para sa Regional Comprehensive Economic Partnership (RCEP) na pinagbotohan sa Senado nitong Martes. Bagama’t sumang-ayon ako rito, nanawagan naman ako sa Ehekutibo na tiyaking matutupad ang pangakong hindi mapapabayaan ang mga labis na nangangailangan. Sila ang dapat na makinabang sa benepisyo, lalo sa nasabing kasunduan.

Dapat matiyak na may sapat na safeguards upang maprotektahan ang ating mga lokal na magsasaka at mga industriya kung sakaling mayroong masamang epekto ang RCEP.

Dapat ding mas palakasin pa ang ating sektor ng agrikultura at gawing mas competitive at resilient ang ating mga magsasaka.

Siguraduhin din natin na dahil mas maluwag na open competition, bababa ang presyo ng mga produkto dahil bawat piso ay importante sa mga ordinaryong mamamayang Pilipino.

Bilang Chair ng Senate Committee on Health, sa tulong ng Department of Health (DOH), kapwa ko mambabatas, at mga lokal na pamahalaan sa iba’t ibang bahagi ng bansa, patuloy nating pinalalakas ang ating healthcare system.

Noong Pebrero 23, nag-inspeksyon tayo sa itinatayong Super Health Center sa Rizal, Nueva Ecija. Matapos ito, pinangunahan natin ang pamamahagi ng ayuda sa mahihirap na residente sa lugar. Bumiyahe rin tayo sa Sto. Domingo, sa Nueva Ecija pa rin, para naman mag-inspeksyon din sa itinatayong Super Health Center du’n. Personal din nating pinangunahan ang pagkakaloob ng tulong sa mahihirap na residente sa lugar at tiningnan ang mga gusaling ating sinuportahang maitayo tulad ng tulay papuntang Aliaga para mapakinabangan ng mga tao ru’n.

Nagkaroon rin ng groundbreaking noong Pebrero 20 para sa itatayong Super Health Center sa Cabuyao City, Laguna. Nagpahatid tayo ng pasasalamat sa kanilang mga lokal na opisyal sa suporta sa pakikiisa sa mga programa ng pamahalaan sa pangunguna ng DOH na mapagkalooban ang kanilang mga nasasakupan ng de-kalidad na serbisyong medikal at abot-kaya.

Bukod sa mga basic na serbisyong maipagkakaloob ng Super Health Center na tulad ng modernong ospital, maaari rin itong maging vaccination site, lalo na sa mga bata gaya ng bakuna laban sa polio at measles. Karaniwan kasi, lalo na sa mga kanayunan ay malalayo ang bakunahan kaya nadi-discourage ang mga nanay na dalhin ang kanilang mga anak. Sa pamamagitan ng Super Health Center, mailalapit natin sa kanila ang serbisyong magpoprotekta sa kalusugan nila.

Patuloy naman ang ating isinasagawang pamamahagi ng ayuda sa mga kababayan natin sa iba’t ibang komunidad sa buong bansa na apektado ng iba’t ibang krisis. Katuwang ang mga lokal na opisyal at ilang ahensya ng ating pamahalaan, gaya ng dati ay maagap nating inaalalayan ang mga naging biktima ng sunog. Noong Pebrero 21 ay personal na kinumusta at tinulungan ang 210 na nasunugang pamilya sa Bgy. Addition Hills, Mandaluyong City. Lima sa kanila ay buntis na binigyan natin ng bonus na regalo.

Magiging future kumare ko rin ang mga ito dahil magiging ninong tayo ng kanilang magiging anak.

Naghatid din ang aking relief team ng ayuda sa iba pang nasunugan kabilang ang 36 na residente ng Bgy. 10, Bacolod City, at tatlo naman sa Bgy. Zone 1, Cadiz City na mga lugar sa Negros Occidental; 13 sa Bgy. Sto Niño, Tugbok District, Davao City; pito sa San Fernando City, Pampanga; at dalawa pa sa Bgy San Roque, Tarlac City, Tarlac. Sa Ibaan, Batangas ay pinagkalooban din natin ng tulong ang 454 na mahihirap na residente.

Pinuntahan rin ng akong staff ang Medical and Dental Mission sa Sibalom, Antique upang magpadala ng karagdagang tulong.

Hindi titigil ang inyong Senador Kuya Bong sa paghahatid ng serbisyo sa lahat ng Pilipino sa abot ng aking makakaya. Magtulungan lang tayo at suportahan ang mga programa ng pamahalaan na mapagkalooban ang bawat pamilya ng mas ligtas at komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Mga batas para sa kalusugan at kaligtasan ng mga Pinoy, isinusulong

ni Bong Go @Bisyo Magserbisyo | Pebrero 22, 2023

Excited ako sa pagsapit ng bawat weekend, hindi dahil makakapagpahinga ako kundi mas marami akong oras para ilapit ang serbisyo sa ating mga kapwa Pilipino. Dahil bisyo ng inyong Senador Kuya Bong Go ang magserbisyo, hindi na uso sa akin ang salitang pahinga. Sa totoo lang, mas nare-relax ako kapag pumupunta ako sa mga komunidad sa iba’t ibang bahagi ng bansa, nakakausap ang mga tao, naririnig ang kanilang mga karaingan, lalo na ng mahihirap at walang ibang malalapitan kundi ang pamahalaan, at sa abot ng aking makakaya ay nakakapag-abot sa kanila ng kaunting tulong at nakakapaghatid ng ngiti sa kanilang mga labi. Pinauunlakan din natin ang mga pagtitipon na may kaugnayan sa mga programa at proyekto ng mga lokal na pamahalaan para sa ikabubuti ng paghahatid ng serbisyo ng pamahalaang nasyonal sa kanilang mga nasasakupan. Noong Pebrero 19, sa imbitasyon ng lokal na pamahalaan ng Aurora, nakiisa tayo kasama ang kapwa natin mambabatas na si Senador Ronald “Bato” dela Rosa, sa selebrasyon ng kanilang 44th founding anniversary kasabay ng ika-135 na kaarawan ni Doña Maria Aurora Quezon, asawa ni dating pangulong Manuel Luis Quezon. Naging guest of honor and speaker tayo sa okasyon. Nagsagawa rin tayo ng monitoring visit sa Malasakit Center na nasa Aurora Memorial Hospital sa Baler, at nagkaloob ng ayuda para sa mga pasyente at frontliners ng nasabing ospital. Sa araw ding ito, isinagawa ang inagurasyon ng Super Health Center sa Dipaculao, Aurora. Hindi man tayo personal na nakapunta para saksihan ‘yun dahil sa masamang panahon, naru’n ang ating outreach team at sinamahan ang ilang taga-Department of Health at lokal na opisyal. Nagpadala rin tayo ng tulong para sa mahihirap na residente ng Dipaculao. Kasama si dating Pangulong Rodrigo Duterte, dumalo tayo sa Special Thanksgiving at Worship Presentation ng Kingdom of Jesus Christ sa pangunguna ni Pastor Apollo Quiboloy, na ginanap sa Ynares Center sa Antipolo City. Nakiisa rin sa okasyon ang aking mga kasamahan sa Senado na sina Sen. Robin Padilla at Sen. Francis Tolentino, at ilan sa mga dating miyembro ng gabinete ni Tatay Digong. Sa aking mga gawain sa Senado, prayoridad ko ang buhay, kaligtasan at kalusugan ng ating mga kapwa Pilipino. Dahil sa naganap na malakas na lindol sa Turkey at libu-libo sa kanilang mamamayan ang namatay, dapat nating paghandaan ang ganitong senaryo.

Nai-file natin ang Senate Bill No. 1181 para maamyendahan ang National Building Code of the Philippines, at matiyak na ang lahat ng itatayong pampubliko at pribadong gusali at istruktura sa ating bansa ay matitibay laban sa natural and man-made calamities. Ang ating building code ay naisabatas noon pang 1977, panahon nang pag-aralan natin ito at tingnang mabuti kung naaayon pa ito sa kasalukuyang panahon, at kung nasusunod pa ba. Natutuwa rin ako sa pag-anunsyo ng PhilHealth ng pag-expand sa dialysis coverage sa 156 sessions mula 90 sessions. Noon ko pa priority ang karagdagang dialysis session dahil kawawa ang mga kababayan nating mahirap, walang pagkukunan na nagtatrabaho para lang ibayad sa ospital. Dapat nating gamitin ang pondo ng PhilHealth para tulungan sila, at kung maaari nga lang ay libre. Naiintindihan ko ang katayuan ng ating mga dialysis patients, napakahirap magkasakit lalung-lalo na kapag ikaw ay mahirap. Sa katunayan, nai-file ko rin sa Senado ang Senate Bill No. 190, na nag-aatas sa PhilHealth na magkaloob ng libreng dialysis sa lahat ng miyembro nito. Sa ginanap na pagdinig ng Senate Committee on Local Government noong Lunes, tinalakay ang aking panukala para sa expansion ng Special Education Fund. Binigyang-diin natin na hindi lahat ng LGUs ay pantay-pantay. Ang mayayamang LGUs ay kayang pondohan ang pangangailangan ng kanilang mga estudyante, subalit ang mga mahihirap na LGUs ay umaasa lang sa SEF allocation na may restrictions pa ang paggamit. Ito ang dahilan kaya gusto nating mapalawak ang gamit ng SEF at makatulong sa pagsasaayos ng education system, saanmang parte ng bansa. Kahapon naman ay nagsagawa ng pagdinig sa Senado ang Committee on Urban Planning, Housing and Resettlement kung saan natalakay ang nai-file kong Senate Bill 192 o ang Rental Subsidy Program Bill. Napakahirap mawalan ng tirahan at magsimula ulit kung sa isang iglap ay mawala lahat ang iyong pinaghirapan. Back to zero talaga.

Kaya kahit sa simpleng paraan, dapat tumulong ang gobyerno sa pamamagitan ng pagbibigay ng subsidiya sa renta para sa mga nasalanta ng kalamidad o sakuna habang wala pang permanenteng tirahan. Bukod pa r’yan, isinulong ko rin sa Committee on National Defense hearing ang nai-file kong Senate Bill 193 na Mandatory Evacuation Center para matiyak na ligtas at kahit paano ay may komportableng matutuluyan ang mga nasalanta ng kalamidad. Ilan lamang ito sa aking isinusulong dahil sa tuwing bumababa ako sa mga komunidad ay problema sa tinitirahan ang kanilang hinaing. Samantala, hinggil sa naging kampanya laban sa ilegal na droga at kriminalidad, bilang senador at naging parte ng nakaraang administrasyon, alam ko na ginawa lang ni dating Pangulong Duterte ang kanyang sinumpaang tungkulin para sa kaligtasan ng mga Pilipino at kinabukasan ng ating mga anak. Gaya nang sinabi ko noon, hayaan natin ang mga Pilipino ang humusga kung mas nakakalakad ba sila sa gabi nang hindi nababastos at hindi nasasaktan ang kanilang mga anak. Hindi dapat banyaga ang humusga sa naging kampanya ng nakaraang administrasyon laban sa ilegal na droga dahil buhay na buhay naman ang demokrasya sa ating bansa, mayroon tayong rule of law na pinapairal at may sarili naman tayong mga korte na nananatiling malaya at mapagkakatiwalaan. Pilipino na ang bahala sa kanya. Hinihikayat ko ang ating mga kababayan na ipaglaban natin si Tatay Digong dahil ginawa niya ang kanyang trabaho para sa ating mga kababayan. Muli, habang patuloy tayo sa unti-unting pagbabalik sa normal na pamumuhay, narito lang ang inyong Senador Kuya Bong Go na patuloy na maghahatid ng serbisyo sa kanyang kapasidad at abot ng makakaya. Hindi ako mapapagod sa pag-alalay sa lahat ng Pilipino, lalo na sa mahihirap at higit na nangangailangan. Lagi kong gabay ang aking paniniwala na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.