Importanteng marinig ang hinaing ng ating mga kapwa Pilipino

ni Bong Go @Bisyo Magserbisyo | March 11, 2023

Ngayong linggo, naging abala tayong muli sa ating iba’t ibang gawain maging sa labas ng Senado para magbigay ng kaunting tulong at solusyon sa mga problema ng ating mga kababayan sa abot ng ating makakaya.

May mga hinaing talaga ang ating mga kapwa Pilipino na dapat nating pakinggan, na hindi makakarating sa atin kung nasa opisina lang tayo. Layunin natin sa ating pag-iikot sa mga komunidad ang maghatid ng serbisyo at mag-iwan ng kaunting ngiti sa panahon ng kanilang pagdadalamhati.

Natutuwa tayo na ngayon ay patuloy ang pagdami ng mga itinatayong Super Health Center sa iba’t ibang bahagi ng ating bansa. Ang Super Health Center ay ating inisyatiba at suportado ng aking mga kapwa mambabatas at siya namang ipinapatupad ng Department of Health (DOH) bilang bahagi ng ating layunin na mas ilapit pa ang mga serbisyo ng gobyerno sa mga tao. Noong 2022, 307 Super Health Centers ang napondohan, at nasa 322 pa ngayong 2023. Personal tayong nagsasagawa ng inspeksyon at sinasaksihan ang paglulunsad ng bawat Super Health Center, sa imbitasyon na rin ng mga lokal na pamahalaan at ng DOH.

Ngayong araw, personal kong sinaksihan ang groundbreaking ng mga itatayong Super Health Centers sa Davao Oriental—isa sa Mati City at isa pa sa Lupon. Pinangunahan din natin ang pagkakaloob ng tulong sa 500 mahihirap na residente sa Mati City at 1,000 mahihirap sa Lupon.

Noong Huwebes, nag-inspeksyon ako sa itinatayong Super Health Center sa San Jose, Tarlac, kung saan personal din tayong namahagi ng tulong para sa 973 katutubong Abellen at solo parents na taga-roon. Dinaluhan din natin ang groundbreaking ng itatayong Super Health Center sa Arayat, Pampanga, at pagkatapos ay nagkaloob ng ayuda sa 500 benepisyaryo. Nagkaroon din ng groundbreaking ng Super Health Center sa Lopez, Quezon, at Kadilingan, Bukidnon at bagama’t hindi tayo nakadalo, nagpahatid tayo ng mensahe ng pasasalamat sa kanilang LGU.

Noong Marso 8, binisita ko ang ating 275 kababayang nasunugan sa Bgy. Tatalon, Quezon City, habang ang aking staff ay nag-abot din ng tulong sa 649 residente ng Concepcion, Tarlac; 200 sa Pangil, Laguna; at 44 pamilyang nasunugan mula sa iba’t ibang barangay sa Cebu City. Nagkaroon din ng groundbreaking ceremony ng Super Health Center sa Sumilao, Bukidnon.

Noong Marso 7, nagsagawa naman tayo ng inspeksyon sa itinatayong Super Health Center sa San Pedro City, Laguna, at nag-abot ng tulong sa 500 na mahihirap na residente. Masaya rin akong ibalita na nagkaroon ng groundbreaking ceremony para sa Super Health Center sa Malaybalay City, Bukidnon.

Pinupursige natin ang pagpapalakas sa ating healthcare system para hindi na tayo muling mabulaga. Sino ba ang nag-akala na sa buhay natin ay magaganap pala ang COVID-19 pandemic? Ang ganda na ng takbo ng ating ekonomiya at pataas na sa ilalim ng Duterte administration nang dumating ang pandemya. Ako naman, bilang Chair ng Senate Committee on Health, dapat mas handa tayo ngayon kung ano ang puwede nating gawin. Napakaimportante sa akin ng buhay at kalusugan ng bawat Pilipino.

Nag-file ako ng dalawang bill na marahil ay makakatulong para maging handa tayo—ang Center for Disease Control and Prevention Act, at ang Virology Science and Technology Institute of the Philippines (VIP) para mayroon na tayong kakayahan at kapasidad na lumikha ng sariling bakuna nang hindi tayo umaasa na lamang sa ibang bansa.

Kung inyong matatandaan, mahigit isang taon pa bago dumating ang bakuna kontra COVID-19 dito sa ating bansa. Para sa akin, gamitin natin ang talento ng mga Pilipino na makadiskubre at makapag-produce ng bakuna para maagapan ang mga virus, at iba pang sakit. ‘Yan ang magiging function ng VIP.

Sa Center for Disease Control and Prevention Act o Senate Bill 195, ipagpapatuloy naman natin ang pag-i-invest sa ating healthcare system. Hindi natin alam kung ito na ba ang huling pandemyang darating sa buhay natin. Ang CDC ang magiging center para sa mga eksperto tungkol sa infectious diseases. Sila ang mangunguna sa pagsugpo sa lahat ng banta sa kalusugan ng ating mamamayan. Sa ibang bansa, ang mga expert na ito ang naging instrumental sa panahon ng pandemya at nasa gitna ng laban sa COVID-19. Naniniwala ako sa kakayahan ng mga Pilipino na eksperto rin sa infectious diseases, at dapat silang mabigyan ng suporta ng pamahalaan.

Patuloy naman ang ating tanggapan sa pagbibigay ng tulong sa iba pa nating kababayan na nahaharap sa iba’t ibang krisis. Maagap tayong sumaklolo sa mga nasunugan, gaya ng 107 na pamilya sa Baseco, Manila City; at 201 rin sa North and South Caloocan City.

Nahatiran din ng tulong ang 333 biktima ng pagbaha sa Balangiga, Eastern Samar.

Naalalayan din natin ang 450 solo parents at PWDs sa Biñan City, Laguna; gayundin ang mahihirap na pamilya gaya ng 251 sa Bgy. San Isidro, Tarlac City; 33 sa Floridablanca, Pampanga; at 33 sa Mariveles, Bataan.

Nitong Biyernes naman, dinaluhan natin ang National Convention ng Philippine Councilors League sa World Trade Center sa Pasay City. Halos pareho lang kami ng trabaho ng mga konsehal—national ang mga senador, city o municipal level naman ang mga konsehal. Pero iisa lang ang layunin naming, ang makapagserbisyo sa mga Pilipino, lalo na ang mahihirap at nangangailangan. Kaya ipinapaalala ko na dapat nating isaalang-alang ang mga pangangailangan ng ating mga kababayan, unahin dapat ang pagseserbisyo sa mga tao.

Sa paghahatid ng serbisyo sa publiko, hindi sapat ang pagkakaroon lang ng magagandang polisiya at programa. Kailangang naipatutupad ito at naisasakatuparan para maramdaman ng mga tao ang positibong epekto nito sa kanilang buhay. Ginagawa ng inyong Senador Kuya Bong Go ang kanyang makakaya para maisulong ang mga inisyatibang makakatulong sa pag-unlad, lalo na sa mahihirap. Magtulungan lang po tayo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Proteksyunan ang buhay ng bawat Pilipino

ni Bong Go @Bisyo Magserbisyo | March 8, 2023

Ang Marso ay Fire Prevention Month bilang ito ang pinakamainit na buwan sa Pilipinas.

Sa panahong ito rin mas mataas ang bilang ng insidente ng sunog sa ating bansa, batay sa datos ng Bureau of Fire Protection (BFP). Muli tayong magpapaalala sa ating mga kababayan para magkaroon sila ng awareness na maging mapagmatyag sa mga posibleng pagmulan ng sunog gaya ng faulty electrical wiring, sobrang daming nakasaksak na appliance sa outlet, sirang lutuan, kandila at upos ng sigarilyo.

Kailangang maging alerto ang lahat dahil kahit pinakamaliit na ningas, ‘pag napabayaan ay maaaring tumupok sa buong kapitbahayan. Kaya patuloy ang aking mga inisyatiba para mapaalalahanan ang ating mga kababayan na mag-ingat at maging mapagmatyag para makaiwas na masunugan. Tayo ang principal author at nag-co-sponsor ng Republic Act 11589 o ang BFP Modernization Act of 2021 para mapalakas ang kakayahan ng ating mga bumbero sa pagtugon sa mga insidente ng sunog, pagkakaroon ng mga modernong fire equipment, dagdag na mga tauhan, pagkakaloob ng specialized training sa mga bumbero, atbp. Bukod sa pagmodernisa ng kagamitan at kakayahan ng bumbero, magsasagawa rin ang BFP ng fire prevention campaigns and information drives sa bawat local government unit kada buwan. Mahalaga rito ang fire safety education. ‘Yung atin dito, kung papaano i-prevent at maturuan ang mga kababayan natin kung papaano maiiwasan ang mga sunog. Sa aking mga isinasagawang relief effort sa mga komunidad ay madalas kong masaksihan kung paanong sa ilang sandali lang ay natupok ang kabuhayan ng ating mga kababayan. Ang mga naipundar na ilang taon nilang pinag-ipunan ay saglit lang naging abo, minsan ay may nasasaktan at namamatay pa. Napakahirap talagang magsimulang muli sa wala. Kaya sila ang prayoridad kong tulungan dahil napakahirap ng kanilang kalagayan na wala agad matuluyan, problema pa ang pangunahing pangangailangan. Noong Marso 2, kasama ang kaibigan at kapwa ko mambabatas na si Sen. Robinhood Padilla ay pumunta kami sa Davao City para magkaloob ng ayuda sa 978 residenteng biktima ng magkahiwalay na insidente ng sunog sa Bgy. 21-C at Bgy. 22-C. Kasabay nito, naghatid din ang aking outreach team ng tulong para sa 39 residenteng nasunugan sa Parañaque City, at 96 pa sa Muntinlupa City. Kahapon din ay naghatid naman ang aking relief team ng tulong sa 135 na residenteng nasunugan sa South Caloocan at 66 sa North Caloocan. Palagi kong paalala sa kanila, ang importante, buhay tayo. Ang damit, nalalabhan natin.

Ang gamit ay nabibili natin, ang pera ay kikitain natin, pero ang perang kikitain ay hindi nabibili ang buhay. ‘Ika nga, a lost life is a lost life forever. Ang importante ay buhay tayo at mag-ingat tayo palagi. Samantala, sa aking manifestation sa inihaing Senate Resolution No. 517 noong Marso 6 na nagpapahayag ng taos-puso na pakikidalamhati sa pagkamatay ni Negros Oriental Governor Roel Degamo, ibinigay ko ang aking suporta at pakikiramay. Nakikisimpatya rin ako sa pamilya ng iba pang nasawi sa pangyayaring ito. Katulad ng kanilang gobernador, marami sa mga nasawi at nasaktan ay naru’n upang maglingkod sa kapwa nila Pilipino. Ang nangyari kay Gob. Degamo ay isa lang sa dumaraming kaso ng pagpatay sa mga opisyal ng pamahalaan at pribadong indibidwal sa ating bansa—na kapag hindi naagapan ay baka lumaganap pa. Itong mga local officials ay nagtatrabaho at nagseserbisyo sa ating mga kababayan anumang oras, ngunit sila pa ang naging biktima ng karumal-dumal na patayan.

Nakakalungkot, kaya dapat ay matigil na ito at mabigyan ng hustisya. Personal din tayong nakiramay sa pamilya ni Gob. Degamo at bumisita sa kanyang mga labi na nakahimlay sa Dumaguete City kasama ang aking kaibigan na si Philip Salvador at mga kapwa senador na sina Jinggoy Estrada, Robin Padilla at Bong Revilla. Sa pamamagitan natin ay nagpaabot din ng pakikidalamhati si dating Pangulong Rodrigo Duterte. Isa ring Bisaya ang napaslang na gobernador, matapat na kaalyado ng Duterte administration at maaasahang katuwang sa serbisyo-publiko. Humihingi tayo ng hustisya para kay Gob. Degamo. Walang puwang ang ganitong uri ng karahasan sa ating demokrasya. Hiniling ko rin sa ating mga awtoridad na magtulungan tayo para labanan ang masasamang loob sa lipunan. Buo ang aking suporta at tiwala sa pag-iimbestiga na kanilang ginagawa sa insidenteng ito. Kami ay narito at handa kaming tumulong sa abot ng aming makakaya sa mga sibilyan na nadamay. Gawin natin ang lahat ng ating makakaya para matiyak na makakamit ng mga biktima ang hustisya. Sa kabila ng mga nagaganap na karahasan, huwag tayong matakot na gawin ang ating trabaho para sa ating mga kababayan. Huwag tayong bibitaw sa ating responsibilidad bilang mga lingkod-bayan. Sa halip, mas dapat tayong maging matatag at manindigan na gawin ang tama para sa ating bansa at kapwa Pilipino. Magpatuloy tayo sa pagprotekta sa karapatan at kaligtasan ng ating mga kababayan. Iparamdam natin sa kanila na ginagawa natin ang lahat para matiyak ang kanilang kaligtasan dahil nandito ang kanilang gobyerno na handang magserbisyo sa kanila. Bawat buhay ay importante at dapat maproteksyunan ang buhay ng bawat Pilipino—kahit sinuman, kahit saanman. Minsan lang tayong dadaan sa mundong ito, gawin na natin ang lahat ng tulong at kabutihan sa ating kapwa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Unahin ang pagtulong at paghahatid ng serbisyo sa mahihirap na Pilipino

ni Bong Go @Bisyo Magserbisyo | March 4, 2023

Habang unti-unti tayong nagbabalik sa normal na pamumuhay, sa aking kapasidad bilang inyong senador at lingkod-bayan, palagi kong prayoridad ang mahihirap nating kababayan. Mas mararamdaman nila ang pagsiglang muli ng ekonomiya kung naaalalayan sila sa aspeto ng kanilang hanapbuhay, kalusugan, edukasyon at pangunahing pangangailangan. Isa sa prayoridad nating maalalayan ang mga jeepney driver. Sa aking manifestation noong Pebrero 28 sa ginanap na Senate plenary session, sinuportahan ko ang Senate Resolution No. 507 na umaapela sa Land Transportation Franchising and Regulatory Board (LTFRB) na ipagpaliban muna ang planong phaseout ng mga tradisyunal na jeepney. Bagama’t nauunawaan natin ang importansya ng modernisasyon para makaagapay sa mga makabagong pagsubok na hatid ng climate change at ekonomiya, hindi dapat ipasa ang pasakit sa mahihirap na Pilipino na kailangan ang ating tulong. Tandaan natin na ang mga driver, pati ordinaryong commuters, ay may pamilyang binubuhay at pinapakain na sinisikap na makabangon mula sa kahirapan. Importante ang safety ng pasahero at road worthiness ng mga sasakyan sa usapan dito, ngunit huwag natin pabayaan ang mga ordinaryong jeepney driver na walang pambili ngayon ng bagong pampublikong sasakyan, lalo na at hindi pa tayo tapos sa krisis na dulot ng COVID-19. Kaya naman nagpapasalamat ako sa LTFRB na pinakinggan ang hiling natin at ng kapwa natin Pilipino dahil kamakailan lang ay inanunsyo ng gobyerno na i-postpone muna ang pag-phaseout sa mga tradisyunal na jeepney. Palagi nating unahin ang kapakanan at interes ng mahihirap. Bigyan muna natin sila ng palugit para makapaghanda pa at gamitin din natin ang pagkakataong ito na ayusin ang mga patakaran, proseso at polisiya para hindi maging pabigat sa ating ordinaryong mga mamamayan. Titingnan din nating mabuti ang mga jeepney na puwede pang magamit dahil naging parte na ng ating kultura ito. Kapag walang jeepney, parang wala tayo sa Pilipinas. Kung safe pa naman at mapapakinabangan pa, gamitin pa rin natin dahil sayang. Kapag na-phaseout lahat, maninibago tayo niyan. Tila wala na tayo sa Quezon Avenue o Cubao kung wala ang mga jeepney na nakagawian natin. Bilang Chair ng Senate Committee on Health, napakaimportante rin sa akin na mapangalagaan ang kalusugan ng bawat Pilipino. Kaya ating pinalalakas ang healthcare system sa pamamagitan ng Malasakit Center program at pagtatayo ng Super Health Centers sa iba’t ibang sulok ng bansa sa tulong ng Department of Health (DOH) at ating mga kapwa mambabatas para one step ahead tayo — hindi na tayo dapat muling mabulaga sakaling may sumulpot na namang panibagong health emergency. Noong February 28, binisita kong muli ang Malasakit Center na nasa National Kidney and Transplant Institute (NKTI) sa Quezon City. Nakipagkuwentuhan din ako sa mga kamag-anak ng mga pasyente para malaman kung ano pa ang kanilang pangangailangan. Nakiusap din ako sa mga opisyal ng NKTI na unahin ang mahihirap na pasyente na walang ibang matakbuhan kundi ang gobyerno. Nang araw ding ‘yun ang ika-40 anibersaryo ng NKTI at pinagkalooban ng recognition ang mga empleyadong nagseserbisyo at matagal nang naglilingkod du’n. Pinasalamatan ko ang lahat ng frontliners sa kanilang kabayanihan, lalo na noong panahon ng pandemya. Sa ating layunin na unahin ang mahihirap, suportado natin ang mga aktibidad ng mga lokal na pamahalaan na isa sa ating mga katuwang sa paghahatid ng serbisyo. Tulad ko, pareho kaming bisyo ang magserbisyo. Noong Pebrero 27, naging panauhin tayo sa ginanap na 31st National Convention and Election of National Officers ng Provincial Board Members League of the Philippines (PBMLP). Ipinarating ko sa provincial board members na “fundamentally the same” ang aming mga responsibilidad. Mayroon silang pagkakataon na marinig ang mga alalahanin at hangarin ng kanilang mga kalalawigan, at lumikha ng mga patakaran na tutulong para maabot nila ang kanilang mga pangarap. Huwag nating sayangin ang oportunidad na ito na makagawa ng direktang pagbabago sa buhay ng mga tao sa ating komunidad. Huwebes, Marso 2, naman ay dinaluhan ko ang imbitasyon ng Vice Mayors at Councilors ng Cordillera Administrative Region (CAR) para sa kanilang orientation course bilang bagong halal na local legislators. Hinikayat ko rin sila na makipagtulungan para lalo pang makapagserbisyo sa mga Pilipino, kabilang ang mga programa at inisyatiba na masugid nating isinusulong gaya ng para sa kalusugan, sports, kampanya laban sa ilegal na droga at kriminalidad, at pag-alalay sa ating mga kababayan sa panahon ng kalamidad at mga sakuna. Nasaksihan ko rin nitong Biyernes ang groundbreaking ng itatayong Super Health Center sa Pangantucan, Bukidnon. Matapos ang okasyon ay personal kong pinangunahan ang pamamahagi ng ayuda sa 500 mahihirap na residente ng Bgy. Bacusanon sa nasabing lugar. Nakarating din ako sa Davao City at naghatid ng tulong sa mga binaha sa Bgy. Ilang. Noong Huwebes, nasa Mendez, Cavite ako at personal na nag-abot ng tulong sa 1,000 vulnerable residents. Kasabay din nito ay nagkaroon ng groundbreaking ng Super Health Center sa Magallanes, Cavite at relief activity para sa 500 na mahihirap na residente sa lugar. Bumiyahe rin ako sa Davao City at nagkaloob ng ayuda sa mga residenteng nasunugan sa Bgy. 21-C at sa Bgy. 22-C. Matapos naman ang paglulunsad ng ika-155 na Malasakit Center sa Dr. George T. Hofer Medical Center Ipil, Zamboanga Sibugay noong Pebrero 25, nagkaloob tayo ng personal na tulong gaya ng pagkain, grocery packs, vitamins, masks, at t-shirts sa 95 pasyente at 423 frontliners sa nasabing ospital. May natanggap ding pinansyal na tulong mula sa Department of Social Welfare and Development (DSWD) ang mga pasyente. Naalayan din natin ang ilang residente rin du’n na naging biktima ng sunog. Nakiisa tayo sa mga aktibidad gaya ng e-sports competition na bahagi ng kanilang Sibug-Sibug Festival at sinuportahan ang mga inisyatiba para mailayo ang mga kabataan sa masasamang bisyo. Nitong linggong ito, naalalayan din ng ating tanggapan ang iba pang nangangailangan nating mga kababayan tulad ng 57 mahihirap na residente ng Cuyapo at Peñaranda sa Nueva Ecija; 333 mahihirap na residente ng Labason, Zamboanga del Norte; 200 mahihirap na residente ng Barotac Viejo, Iloilo, 150 mahihirap na residente ng Biñan City, Laguna, 39 pamilyang nasunugan sa Bgy. Moonwalk, Parañaque; at 96 pamilyang nasunugan sa Bgy. Poblacion at Bgy. Buli sa Muntinlupa. Habang patuloy nating ginagawa ang lahat ng pagsisikap na tulungan at unahin ang mahihirap nating kababayan sa abot ng ating makakaya, hikayatin din natin ang ating kapwa Pilipino na makiisa sa mga inisyatiba ng gobyerno upang masigurong walang maiiwan sa ating muling pagbangon mula sa mga krisis bilang isang mas matatag at nagkakaisang bansa. Ang ating pakikilahok ay malaking ambag tungo sa mas ligtas at komportableng buhay para sa lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.