Mahahalagang panukalang-batas para sa kapakanan ng iba’t ibang sektor

ni Bong Go @Bisyo Magserbisyo | March 22, 2023

Naging produktibo ang ating unang araw sa Senado ngayong linggong dahil may kabuuang 17 panukalang-batas ang pumasa sa ikatlo at huling pagbasa. Kapag tuluyang naisabatas, malaki ang maitutulong ng mga ito sa ating mga kababayan na bahagi ng iba’t ibang sektor, at sa pag-unlad ng ating bansa. Ilan sa mga ito ay naging co-author at co-sponsor ang inyong lingkod.

Una sa mga panukalang-batas na pumasa na co-author tayo ang Senate Bill No. 1841, o “An act strengthening the conservation and protection of our national cultural heritage through an enhanced cultural policy and cultural mapping program.” Mahalaga na mapreserba at mapangalagaan ang ating mga pamanang kultura upang mapanatili natin ang ating pambansang pagkakakilanlan bilang mga Pilipino.

Co-author at co-sponsor naman tayo sa Senate Bill No. 1594, o “An act institutionalizing the One Town, One Product (OTOP) Philippines Program.” Napakaimportante na masuportahan natin ang micro, small, and medium enterprises o MSMEs, lalo na ang mga nasa probinsya dahil sila ang backbone ng ating ekonomiya. Sa pamamagitan ng panukalang ito, matutulungan natin ang MSMEs na buhayin at muling pagyabungin ang kanilang maliliit na negosyo, kasabay ang paglikha ng mga trabaho at oportunidad para sa iba nating kababayan.

Dahil napakahalaga sa akin ng edukasyon ng mga kabataang Pilipino, co-author at co-sponsor din tayo ng Senate Bill No. 1359, o “An act prohibiting the imposition of a ‘no permit, no exam’ policy.” Sa ilalim nito, walang institusyong pang-edukasyon, pampubliko o pribado, ang dapat magpataw ng anumang patakaran na pumipigil sa mga mag-aaral na may outstanding financial o property obligations, na kumuha ng exam o anumang uri ng educational assessment. Bilang Chair ng Senate Committee on Health, ang pangunahing layunin ko ay mapangalagaan ang physical at mental health ng mga estudyante natin. Hindi dapat malipat sa kanila ang burden kung hindi agad sila makabayad ng matrikula. Lagi nating unahin ang kapakanan ng ating mga estudyante bago ang lahat.

Kabilang din ang Senate Bill No. 1864, o “An act providing for a moratorium on the payment of student loans during disasters and other emergencies” kung saan naging co-author at co-sponsor tayo. Layunin nito na magkaloob ng tulong sa mga estudyanteng may mga pagkakautang, pero hindi nila mabayaran sanhi ng mga kalamidad at iba pang krisis. Sa ilalim nito, suspendido rin muna ang pagbabayad ng student loans sa gobyerno, maging ang interes at multa, habang umiiral ang moratorium.

Ang iba pang panukalang-batas na naging co-sponsor tayo at naaprubahan ay may kinalaman sa pagpapaganda ng kalidad ng ating edukasyon tulad ng pagsasaayos ng mga pampublikong paaralan sa iba’t ibang komunidad, at paglalaan ng pondo para sa mga ito.

Ang edukasyon ang isa sa mga pangunahing karapatan ng bawat Pilipino at susi sa kanilang pag-angat sa buhay at pag-unlad ng ating bansa, kaya ibinigay ko ang aking buong suporta sa mga kapwa ko mambabatas sa mga panukalang-batas na kanilang isinusulong.

Sa labas naman ng Senado, patuloy ako sa paghahatid ng serbisyo sa pamamagitan ng pagtataguyod ng mga programa at pagkakaloob ng tulong sa ating mga kababayang nahaharap sa iba’t ibang krisis. Kahapon ay binisita natin ang Malasakit Center sa Rogaciano M. Mercado Memorial Hospital sa Santa Maria, Bulacan para alamin kung ano pa ang mga kailangan para mas mapaganda ang serbisyo nito. Matapos ito ay personal na namahagi naman tayo ng tulong sa 1,000 mahihirap na residente ng nasabing bayan.

Nitong lunes, masaya kong ibinabahagi na isinagawa ang groundbreaking ceremony ng itatayong Vintar Super Health Center sa Ilocos Norte. Inalalayan naman ng aking tanggapan noong araw na ‘yun ang walong residente ng Bgy. Peñaplata, Island Garden City of Samal, Davao del Norte na nasunugan.

Noong Marso 17, sinaksihan natin ang groundbreaking ceremony ng itatayong Super Health Center sa Mawab, Davao de Oro. Pinangunahan din natin ang pagkakaloob ng tulong sa 500 mahihirap na residente sa lugar.

Personal din akong namahagi ng tulong para sa mga naging biktima ng pagbaha sa 759 residente ng Bgy. San Isidro, Bunawan District, Davao City, habang ang aking tanggapan ay nagpaabot ng tulong sa mahihirap na mga residente, tulad ng 233 sa Salcedo, Eastern Samar. Hindi rin natin kinalimutang alalayan ang 33 mahihirap na residente ng Candaba, Pampanga.

Patuloy lang tayo sa mga trabahong ipinagkatiwala ng taumbayan sa amin bilang halal na opisyal.

Minsan lang tayo dadaan sa mundong ito, kaya kung anumang kabutihan o tulong na pwede nating gawin sa ating kapwa ay gawin na natin ngayon dahil hindi na tayo babalik sa mundong ito.

Kasama ko ang ating mga lingkod-bayan, patuloy akong tutulong sa abot ng aking makakaya at magseserbisyo sa inyo dahil ako ay naniniwala na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Ipagpatuloy ang magandang naumpisahan sa kampanya laban sa droga at kriminalidad

ni Bong Go @Bisyo Magserbisyo | March 18, 2023

Sa ginanap na pagdinig sa Senado ng Committee on Public Order noong Marso 15 tungkol sa mga ‘ninja cops’, binigyang-diin ko sa aking manifestation na ayaw nating masayang ang inumpisahan ni dating Pangulong Rodrigo Duterte na matagumpay na kampanya laban sa ilegal na droga at kriminalidad. Alam naman nating lahat na kapag bumalik ang ilegal na droga, babalik at mananaig na naman ang korupsyon sa gobyerno, at maging ang kriminalidad sa buong bansa.

Sa naging kampanya ng Duterte administration laban sa ilegal na droga, natahimik ang ating bayan at mas nakakalakad na ang mga anak natin sa gabi, hindi na nasasaktan at hindi na nababastos.

Binanggit ko na ang paglaganap ng peace and order noon ay dahil sa sakripisyo ng ating mga pulis at dating Pangulong Duterte. Ayaw nating masayang ang ating magandang naumpisahan.

Kapag kumalat ang droga sa daan, marami na namang pamilya ang masisira at ilang buhay na naman ang masasayang. Kapag may biktima ng droga sa isang pamilya, buong pamilya na rin ang apektado. Iwan n’yo ang pitaka n’yo, bukas ay wala nang laman dahil nanakawin na. Kaya hindi katanggap-tanggap kung mamamayagpag na naman ang ilegal na droga sa ating lipunan.

Proteksyunan natin ang bawat buhay at bawat pamilyang Pilipino.

Hiniling ko sa mga pulis at lahat ng kasama sa pagbaka sa droga at kriminalidad na ipagpatuloy ang kanilang paglilingkod nang buong katapatan. Ibibigay namin ng mga kasamahan ko sa Senado ang aming buong suporta sa kanila sa abot ng aming makakaya, basta gampanan nila ang kanilang tungkulin at nararapat na nakaayon sa ating mga batas.

Samantala, sa labas naman ng ating mga gawain sa Senado, naging abala tayo sa maraming aktibidad at paghahatid ng serbisyo sa iba’t ibang lugar sa ating bansa. Bilang lingkod-bayan, ilapit natin ang serbisyo ng gobyerno sa mga nangangailangan.

Kahapon, Marso 17, bumiyahe tayo sa Mawab, Davao de Oro at sinaksihan ang groundbreaking ng itatayong Super Health Center du’n. Nagkaloob din tayo ng tulong sa 500 mahihirap na residente sa lugar. Matapos ang aktibidad ay dumiretso tayo sa Davao City para daluhan ang ribbon cutting ceremony para sa itinayong water system at ng road concreting project sa Bgy. San Isidro, Bunawan District. Naging instrumento tayo para mapondohan ang mga nasabing proyekto.

Namahagi rin tayo ng tulong para sa mga residenteng apektado ng pagbaha sa nasabing barangay.

Naging panauhin naman tayo noong Huwebes sa ginanap na 122nd Foundation and 78th Liberation Anniversaries ng lalawigan ng Romblon at pinangunahan ang wreath laying ceremony bago opisyal na nagsimula ang mga programa. Nagpapasalamat tayo sa kanilang pamahalaang panlalawigan dahil sa pamamagitan ng isang Sangguniang Panlalawigan Resolution ay naging adopted son ako ng Romblon Province.

Sinamantala na rin natin ang pagkakataon para sa iba pang aktibidad kaugnay ng ating inisyatibang pagpapalakas sa healthcare system ng lalawigan. Sinaksihan natin ang groundbreaking ng itatayong Romblon Super Health Center. Nagsagawa rin tayo ng monitoring visit sa Malasakit Center na nasa Romblon Provincial Hospital sa bayan ng Odiongan. Nagbigay din tayo ng tulong sa mga pasyente at frontliners du’n.

Kinumusta rin natin ang itinayong three-storey evacuation center, bagong equipment sa ospital du’n, at ang bagong ambulansya na ating natulungang mapondohan noon.

Pinangunahan din natin ang pamamahagi ng ayuda sa 500 mahihirap na residente ng Romblon, Romblon.

Patuloy din ang aking tanggapan sa isinasagawang relief effort sa iba pa nating kababayan na nahaharap sa iba’t ibang krisis. Noong Marso 15, personal kong kinumusta at binigyan ng tulong ang 119 pamilyang nasunugan sa Cainta at Taytay, Rizal. Umalalay naman ang aking team sa mga naging biktima ng magkakahiwalay na insidente ng sunog gaya ng 40 residente mula sa apat na barangay sa Puerto Princesa City, Palawan; tatlo sa Lapu-Lapu City; at dalawa pa mula sa Cebu City. Hindi rin natin kinaligtaan ang 166 mahihirap na residente ng Concepcion, Tarlac na mabigyan ng karampatang tulong at suporta.

Sa loob at labas man ng Senado ay iisa ang aking hangarin—ang magkaroon ang bawat Pilipino ng ligtas at komportableng buhay at mailapit sa kanila ang mga serbisyo ng pamahalaan. Ipagpapatuloy ko ito sa abot ng aking makakaya upang marating natin nang sama-sama ang ating iisang hangarin na mabigyan ng mas magandang kinabukasan ang ating mga anak.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo, patuloy na ilalapit sa mahihirap na Pilipino

ni Bong Go @Bisyo Magserbisyo | March 15, 2023

Mahalagang tandaan nating lahat na ang mga halal na opisyal, sa national man o local, ay may iisang layunin— ang maglingkod sa taumbayan. Kahit may pagkakaiba ang ating mga posisyon at trabaho, isa lang ang ating layunin— ang mapabuti ang pamumuhay ng bawat Pilipino. Iisa ang ating bisyo, ang magserbisyo.

Noong Marso 10 ay dumalo tayo sa National Convention ng Philippine Councilors League.

Binanggit ko sa mga kapwa ko halal na opisyal na malapit sa aking puso ang mga isyung para sa kapakanan ng mahihirap. Inilahad ko ang mga hakbang na ating ginagawa para mailapit sa tao ang serbisyo ng gobyerno.

Bilang principal author at sponsor ng Republic Act 11463 o Malasakit Centers Act, nakita ko mismo ang paghihirap ng mga Pilipino sa pagkuha ng tulong medikal sa mga tanggapan ng gobyerno, lalo na ang mahihirap na hindi alam kung saan kukunin ang pambili ng gamot o pambayad sa doktor at ospital. Ito ang dahilan kaya itinaguyod natin ang Malasakit Centers program, na sa loob ng limang taon ay mayroon na ngayong 156 centers sa iba’t ibang rehiyon sa buong bansa, mula Batanes hanggang Tawi-Tawi.

Nagsisilbi itong one-stop shops ng tulong medikal ng pamahalaan, at milyun-milyong Pilipino na ang natulungan at patuloy na tinutulungan.

Ipinaglalaban din natin ang pagtatayo ng Super Health Centers sa iba't ibang parte ng bansa. Sa ating pagsisikap bilang Vice Chair ng Senate Committee on Finance, at sa suporta ng Department of Health (DOH), Local Government Units (LGUs) at mga kapwa ko mambabatas, nagkaroon ng sapat na pondo sa ating 2022 national budget ang pagtatayo ng 307 Super Health Centers at 322 centers naman ngayong taon. Sana ay tuluy-tuloy ang pagtatayo ng mga ito upang hindi na kailanganin ng ating mga kababayan sa mga liblib na lugar na bumiyahe para lang makapag-avail ng basic na serbisyong medikal.

Isa rin sa prayoridad natin ay ang hangarin ng administrasyon ni Pangulong Bongbong Marcos na maglagay ng specialty centers sa iba’t ibang parte ng bansa para hindi na kailangang maglakbay ng ating mga kababayan sa Maynila para magpaopera o magpagamot tulad ng mga may sakit sa puso.

Sa nakaraang Kongreso, naipasa naman natin ang 69 batas para sa upgrading at pagtatayo ng mga bagong ospital. Ilan lang ito sa mga prayoridad natin para ilapit sa tao ang serbisyo medikal ng gobyerno, lalo na sa mahihirap at walang ibang matatakbuhan.

Kabilang din ako sa may-akda at nag-co-sponsor ng paglikha sa Department of Migrant Workers (DMW) sa pamamagitan ng RA 11641. Nar’yan din ang RA 11861 na nag-amyenda sa Solo Parents' Welfare Act of 2000 para mabigyan ng dagdag na benepisyo ang solo parents. Naging instrumento rin tayo sa RA 11466 o ang Salary Standardization Law 5, na nagkakaloob sa civilian government employees ng dagdag na suweldo.

Marami pa tayong batas na naipasa noong nakaraang Kongreso kabilang ang National Academy of Sports, Doktor Para sa Bayan Act, BFP Modernization, Allowances and Benefits for Healthcare Workers, Metropolitan Davao Development Authority at ang Marawi Siege Victims Compensation.

Sa ngayon ay marami pa tayong isinumite na mga panukala sa 19th Congress tungo sa pangkabuuang layunin na gawing mas ligtas at maginhawa ang buhay ng bawat Pilipino.

Habang pinag-aaralan pa ang mga panukalang ating isinusulong, patuloy akong tutulong sa mga nangangailangang lugar at pupuntahan ko, lalo na kapag may bagyo, sunog, lindol, baha, kahit buhawi, basta kaya ng panahon at katawan ko para masolusyunan ang mga problema ng mga komunidad na apektado at mag-iwan ng ngiti sa oras ng kanilang pagdadalamhati.

Hindi ako pulitiko na nangangako, ngunit tinitiyak ko na gagawin ko ang lahat ng aking makakaya upang mabigyan ng pansin ang kapakanan ng mga mahihirap nating kababayan.

Kaugnay nito, noong Lunes, sa paanyaya ng lokal na pamahalaan ay sinaksihan natin ang inagurasyon ng Laguna Provincial Admin building sa Santa Cruz, Laguna na ating sinuportahang mapondohan nitong nakaraang mga taon. Pinangunahan ko rin ang pamamahagi ng tulong sa 500 mahihirap na residente sa lugar.

Nag-inspeksyon naman ako noong Linggo sa itinatayong Super Health Center sa Maayon, Capiz; at nagkaloob ng tulong sa 1,000 residente na naapektuhan ng Bagyong Paeng. Inalalayan din ng aking tanggapan ang 1,355 mahihirap na pamilya sa Passi City, Iloilo bago makilahok sa All-Star festivities ng Philippine Basketball Association—na kaugnay rin ng ating adbokasiya na i-promote ang sports para mailayo ang mga kabataan sa masasamang bisyo tulad ng droga.

Noong Sabado naman ay nasubaybayan ko ang groundbreaking ng Super Health Centers sa bayan ng Lupon at Mati City, kasabay ng pagpapaabot ng tulong sa 1,000 na residente ng Lupon at 500 pa sa Mati City sa Davao Oriental.

Tuluy-tuloy din ang aking opisina sa pagbahagi ng tulong sa mga nasalanta ng sunog, lalo na sa apat na pamilya sa M’lang, Pikit and Datu Salibo, North Cotabato; at isang pamilya sa Mainit, Surigao del Norte.

Binigyan tayo ng mandato upang maglingkod sa bayan kaya unahin natin ang pagseserbisyo sa tao. Hindi ko sasayangin ang pagkakataon na ibinigay n’yo sa akin.

Kaya tayong mga nasa gobyerno na dapat mismo ang lalapit at maglalapit ng serbisyo sa nangangailangan, lalo na sa mga hopeless at helpless nating mga kababayan na walang matakbuhan kundi ang pamahalaan. Ibalik natin sa kanila ang tiwala na ibinigay nila sa atin. Maging tapat tayo sa ating tungkulin at ilagay ang kapakanan ng bawat Pilipino sa ating mga prayoridad.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.