Patuloy na pagpapatayo ng mga imprastruktura para lalong sumigla ang ekonomiya

ni Bong Go @Bisyo Magserbisyo | April 01, 2023

Ang patuloy na pagpapatayo ng mga imprastruktura sa iba’t ibang bahagi ng ating bansa ay napakahalaga upang mabilis tayong makabangon mula sa pandemya at sumigla ang ating ekonomiya. Naghahatid din ito ng balanseng oportunidad para sa pag-unlad ng bawat komunidad.

Maganda ang naging bunga ng Build, Build, Build (BBB) Program ng administrasyong Duterte, na prayoridad ang pagpapatayo ng iba’t ibang imprastruktura gaya ng mga highway, airport, seaport, atbp. Importanteng maipagpatuloy ang programang ito upang matiyak ang patuloy na pag-unlad ng ating bansa.

Malaki ang pasasalamat natin kay Pangulong Ferdinand “Bongbong” Marcos, Jr., dahil ipinagpapatuloy niya ang programa sa pamamagitan ng inisyatibang “Build Better More”. Kamakailan, inapbrubahan ng National Economic and Development Authority (NEDA) ang 194 high-impact priority projects sa ilalim ng Build Better More program na nagkakahalaga ng P9 trilyon. Lilikha ito ng maraming oportunidad at trabaho para sa ating mga kapwa Pilipino, mapaganda ang serbisyo ng gobyerno, at magkakaroon ng komportableng buhay ang ating mga kababayan.

Ito ang dahilan kaya suportado natin ang pagpapatayo ng New International Airport sa Bulacan.Isa itong oportunidad sa ating mga kababayan sa labas ng Metro Manila, at para na rin pagaanin ang daloy ng trapiko sa Kamaynilaan. Isang paraan din ito para masolusyonan ang mga problemang nararanasan ng mga pasahero ru’n.

Isa naman sa mga proyekto ng BBB program ay ang Calapan Port Passenger Terminal Building ng Philippine Ports Authority sa Calapan City, na dinaluhan natin ang inagurasyon, noong Marso 27, bilang guest speaker, world-class ang disenyo, at ito ang pinakamalaking passenger terminal building sa ating bansa.

Sa mga nakalipas na araw, nabisita rin natin at nainspeksyon ang ilan sa infrastructure projects na isa tayo sa naging instrumento para mapondohan, gaya sa San Jose del Monte City Convention Center sa Bulacan; dalawang palapag na public market sa Don Salvador Benedicto, Negros Occidental; dalawang multi-purpose buildings sa Bgy. Batasan at Bgy. Commonwealth sa Quezon City; bagong Provincial Administration Building sa Sta. Cruz, Laguna; at ang Santo Domingo-Aliaga Road and Bridge sa Nueva Ecija. Ilan lamang ito sa handog ng gobyerno sa taumbayan para mas maisaayos ang serbisyo-publiko sa kanilang komunidad.

Bago ang Semana Santa, tuluy-tuloy naman ang ating mga gawain sa loob at labas ng Senado.

Nasaksihan kahapon ang inagurasyon ng dalawang Multi-Purpose Building sa Quezon City, Promise, Bgy. Bagong Silangan at Kasundan Extension, Bgy. Commonwealth.

Instrumento tayo para mapondohan ang dalawang proyektong ito. Pinangunahan din natin ang pamamahagi ng ayuda para sa 1,000 mahihirap na residente mula sa dalawang barangay.Noong Marso 30, ay nasa Surigao naman tayo at sinaksihan ang blessing, inauguration at turnover ng Bgy. Mangagoy Evacuation Center sa Bislig City.

Naging instrumento rin tayo para mapondohan ito, malaking tulong ito sa mga residenteng walang pansamantalang matutuluyan kapag may kalamidad o sakuna.

Nagbigay din tayo ng tulong sa mga residente sa nasabing barangay.

Matapos ito ay dumiretso tayo sa Agusan del Sur para saksihan naman ang groundbreaking ng Sta. Josefa Super Health Center, turnover ng road concreting project sa Bgy. Poblacion na natulungan din nating mapondohan, at nag-abot din tayo ng tulong sa mahihirap na mga residente ru’n.

Samantala, dinaluhan din namin ang 32nd Annual Convention ng Prosecutor’s League of the Philippines, Inc. (PLP), kasama si ex-P-Duterte, noong Marso 29 sa Davao City.

Binanggit ko rito ang isa sa mahalagang batas na kung saan naging co-author ako, at ito ang Republic Act No. 11643 na kung saan nagkakaloob ng survivorship benefits sa naiwang legitimate spouse and dependent children ng namayapang retired members ng National Prosecution Service. Ito ay bilang pagkilala sa mga sakripisyo ng mga prosecutors sa kanilang naging tungkulin.

At noong Marso 28, dinaluhan naman natin ang ribbon cutting ceremony at blessing ng 256-Slice CT Scan Machine, at bagong renovate na auditorium sa HQ AFP Health Services Command, Camp V. Luna sa Quezon City.

Matapos ito, personal nating tiningnan ang sitwasyon at pinagkalooban ng tulong ang 114 residente ng Parola Compound, Binondo sa Maynila na nasunugan.

Bukod naman sa pagdalo sa inagurasyon ng Calapan Port Passenger Terminal Building noong Lunes, na aking naunang nabanggit, sinaksihan din natin ang groundbreaking ng itatayong Guinobatan Super Health Center sa Calapan City.

Nag-inspeksyon din tayo sa itinatayong Sentrong Pangkabataan sa naturang siyudad, na ating ipinaglabang mapondohan, at nagsagawa rin tayo ng monitoring visit sa Malasakit Center na nasa Oriental Mindoro Provincial Hospital.

Nag-abot din tayo ng tulong sa mga apektado ng oil spill sa mga bayan ng Pola at Roxas. Nauna na nating natulungan ang mga apektado sa Gloria at Pinamalayan.

Naglibot naman sa iba’t ibang komunidad ang aking relief team upang mamahagi ng tulong sa mga kababayan nating apektado ng iba’t ibang krisis. Maagap tayong umalalay sa mga nasunugan sa Bulacan gaya ng 39 residente ng Calumpit, 10 sa Obando at 1 sa Malolos. Naalalayan din ang 24 nasunugan sa Bgy. Tambo, Parañaque City; 6 sa Bgy. San Francisco, Pampanga at 1sa Bataan. Nabigyan din ng tulong ang 333 mahihirap na residente ng Dinagat Island, 166 sa Tanauan, Batangas, 127 sa Bacolod City, siyam dito ang nasunugan, at 100 pa sa Pulupandan, Negros Occidental.

Mga kapwa ko Pilipino, Semana Santa na sa susunod na linggo. Sama-sama nating gawing panata ang makatulong sa ating mga kapwa Pilipino sa abot ng ating makakaya. Magdasal tayo at magpasalamat sa buhay na ibinigay ng Panginoon sa atin.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Unahin lagi ang kapakanan ng mga Pilipinong mahihirap na walang ibang malalapitan

ni Bong Go @Bisyo Magserbisyo | March 29, 2023

Ang paglubog ng barkong MT Princess Empress na may kargang 900,000 litro ng industrial fuel sa karagatang malapit sa Oriental Mindoro noong February 28 na nagdudulot ngayon ng oil spill ay may malaking epekto, hindi lang sa kapaligiran kundi maging sa buhay at kabuhayan ng mga apektadong residente. Agad tayong nanawagan sa mga kinauukulan na magsagawa ng mabilisang aksyon para matugunan ang insidente at huwag nang kumalat pa sa ibang isla o lalawigan. Hindi na dapat maulit ito.

Kailangang mapanagot kung sino ang dapat managot, at kung sino ang may kasalanan.

Naghatid na ang aking tanggapan ng tulong sa mga apektadong residente sa mga bayan ng Pinamalayan at Gloria sa Oriental Mindoro, kamakailan. Noong Lunes, Marso 27, personal naman akong bumisita sa Pola para tingnan ang lawak ng pinsala at ginagawang paglilinis, at namahagi ng tulong sa mga taga-roon. Sa araw ding ‘yun, pinangunahan ng aking opisina ang pamamahagi ng tulong sa bayan naman ng Roxas.

Ako naman bilang Senador, ay handang tumulong sa abot ng aking makakaya, lalo na sa mahihirap nating kababayan. Sa ating kapasidad, magkakaloob din ang aking tanggapan ng tulong sa iba pang lugar na apektado ng oil spill sa mga susunod na araw.

Hindi lang ang pag-alam sa kalagayan ng mga residenteng apektado ng oil spill ang naging sadya natin sa Oriental Mindoro. Nang araw ding ‘yun, sa imbitasyon ng lokal na pamahalaan at Philippine Ports Authority, pinangunahan natin ang inagurasyon ng Port of Calapan-Passenger Terminal Building. May kapasidad na 3,500 pasahero at world-class ang disenyo, ito na ang pinakamalaking port terminal ngayon sa ating bansa.

Bahagi ito ng Build, Build, Build program ng nakaraang administrasyon na dinaluhan namin ni dating Pangulong Rodrigo Duterte ang groundbreaking noong 2021.

Nagpapasalamat ako sa kasalukuyang administrasyon ni Pangulong Bongbong Marcos dahil ipinagpatuloy nila at balak na palawakin pa ang magagandang nasimulan ng nakaraang administrasyon.

Bilang miyembro ng Senate Committee on Public Services, mahalaga para sa akin ang mga ganitong imprastruktura sa bawat lalawigan sa bansa para maging mas komportable ang paglalakbay at mas napapabilis nito ang pag-usad ng mga produkto at nakalilikha ng maraming trabaho.

Sinaksihan ko rin ang groundbreaking ceremony ng itatayong Guinobatan Super Health Center sa nasabing siyudad. Bahagi ito ng ating adhikain na mapalakas ang ating healthcare system, na suportado ng aking mga kapwa mambabatas at Department of Health (DOH). Layunin ng SHCs na mailapit ang serbisyong medikal sa taumbayan, lalo na sa mga liblib na lugar na malayo sa mga ospital. Kayang tugunan ng SHCs ang mga emergency, eye, ear, nose, and throat (EENT) service; oncology centers; physical therapy and rehabilitation center. Kabilang sa iba pang serbisyo nito ang database management, out-patient, birthing, isolation, diagnostic (laboratory: X-ray, ultrasound), pharmacy, at ambulatory surgical unit. Puwedeng rin itong magsilbing vaccination center laban sa mga sakit, hindi lang COVID-19 kundi pati sa tigdas at iba pang kinakailangan ng bakuna.

Bilang Chair ng Senate Committee on Health at pangunahing may-akda at sponsor ng Malasakit Centers Law, binisita ko rin ang Malasakit Center na nasa Oriental Mindoro Provincial Hospital sa Calapan City. Ito ay isa sa 157 na Malasakit Center sa bansa at nabuksan noong Setyembre 18, 2020. Pinangunahan din natin ang pagkakaloob ng tulong sa medical frontliners at mga pasyente ng ospital. May hiwalay na tulong din ang Department of Social Welfare and Development (DSWD) para sa mga pasyente.

Samantala, hindi tayo tumitigil sa paghahatid ng tulong sa iba pa nating kababayan na nahaharap sa iba’t ibang krisis. Nasa Baguio City tayo noong Marso 25, kasama ang ating kapwa mambabatas na si Sen. Robinhood Padilla. Sinaksihan natin ang groundbreaking ceremony ng itatayong Super Health Center sa Atab District, at namahagi ng tulong sa 500 mahihirap na residente ru’n.

Nagsagawa rin ako ng inspeksyon sa Malasakit Center na nasa Baguio General Hospital and Medical Center. Ito ang ika-50 Malasakit Center na naitayo sa bansa at binuksan noong Nobyembre 7, 2019. Namahagi rin tayo ng personal na tulong sa mga mga pasyente at frontliners ng ospital. May nakuha namang dagdag na tulong pinansyal ang 500 in-patients mula sa DSWD.

Kasama si Sen. Robin, binisita at inalam natin ang kasalukuyang sitwasyon ng 1,415 market vendors na naging biktima ng sunog sa Kayang-Hilltop Public Market. Pinangunahan din natin ang pagkakaloob ng tulong sa mga ito. May hiwalay ding ayuda ang DSWD sa mga nasunugang vendor.

Noong Marso 26, sinamahan naman natin si dating Pangulong Duterte sa blessing ng bagong renovate na House of Hope-Margarita Village sa Bajada, Davao City. Ang HOH Foundation ay nagbibigay ng libreng matutuluyan at kalinga para sa mga batang may sakit na cancer, anuman ang antas ng kanilang pamumuhay. Malapit sa puso ni Tatay Digong ang mga batang may sakit na cancer, at kahit noong mayor pa siya ng Davao City ay tumutulong na siya sa HOH.

Ngayon, gusto kong samantalahin ang pagkakataon para batiin muli si Tatay Digong na nagdaos ng kanyang ika-78 kaarawan kahapon, Marso 28. Maligayang kaarawan po, and good health!

Palagi kong sinasabi na si Tatay Digong ang nagbukas ng daan sa akin para pasukin ang serbisyo publiko. Utang ko sa kanya ang lahat kung bakit maaga tayong namulat na maging mapagmalasakit sa kapwa at patuloy sa paghahatid ng serbisyo sa bawat Pilipino. Sa kanya ko natutunan na laging uunahin ang kapakanan ng mga Pilipino, lalo ang mahihirap, hopeless, helpless at walang malalapitan maliban sa pamahalaan, na ang serbisyo sa tao ay serbisyo rin sa Diyos.

Hindi ko sasayangin ang oportunidad na ito para makapagserbisyo pa at makatulong sa kapwa sa abot ng aking makakaya tungo sa mas magandang kinabukasan para sa mga Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Patuloy ang pagtulong para makaahon ang ating mga kapwa Pilipino mula sa hirap

ni Bong Go @Bisyo Magserbisyo | March 25, 2023

Sa ginanap na pagdinig sa Senado noong Miyerkules, Marso 22, sa aking naging mga manipestasyon ay sinuportahan ko ang mga panukalang-batas ng aking mga kasamahan upang matulungan ang mga kapwa natin Pilipino na makaahon sa hirap at krisis. Ilan sa mga panukala ay naging co-author at co-sponsor ang inyong lingkod.

Dahil napakalapit sa aking puso ng ating mga senior citizen, naging co-author at co-sponsor ako ng Centenarians Bill. Sa aking manipestasyon, binigyang-diin ko na kailangan talagang mabigyan ng importansya at masuportahan ang ating senior citizens. Nasa ating kultura na alagaan ang mga nakakatanda bilang family-oriented at mapagmalasakit tayo.

Nakapasa na sa ikalawang pagbasa sa House of Representatives (HOR) ang Centenarians Bills.

Kung tuluyang maisasabatas, layunin nito na magkaloob ng cash gift na P100,000 na matatanggap ng senior citizen sa three equal tranches pagsapit sa edad na 80, 90 at 100. Sa ngayon, ang may cash gift lang ay ang nakakaabot ng 100 years old. Kaya habang puwede pang pakinabangan at ma-enjoy ng senior citizen ang benepisyong ito, ibigay na natin sa kanila. Maganda rin na may inaasahan sila pagsapit sa mga nabanggit na edad. Maliit na halaga, ngunit malaking tulong sa kanilang kalusugan at kapakanan.

Malaking sakripisyo ang ginawa nila noong mas bata pa sila upang maitaguyod ang kanilang mga pamilya na siyang pundasyon ng ating lipunan. Suklian natin sila ng pagmamahal at pag-aaruga sa kanilang pagtanda.

Nag-co-sponsor din ako sa panukalang-batas na magpapalawak sa mga polisiya para sa proteksyon at kapakanan ng Filipino caregivers. Sa aking manipestasyon, kinilala ko ang mga kontribusyon, dedikasyon at husay sa trabaho at pagmamalasakit ng ating caregivers sa kanilang employers, na halos katumbas ng pagmamahal sa kanilang sariling pamilya ang ibinubuhos nilang pangangalaga.

Nararapat lang na mabigyan ang locally employed caregivers ng disenteng trabaho at suweldo, mga benepisyo at proteksyon laban sa pang-aabuso at pagmamalabis. Ang panukala ay pumasa na rin sa ikatlo at pinal na pagbasa sa Mababang Kapulungan.

Ang trabaho namin bilang lingkod-bayan ay alalayan ang ating mga mamamayan, lalo na sa panahon ng krisis. Tulungan natin silang maitaguyod ang kanilang mga sarili sa pamamagitan ng mas pinabuti at mas pinalakas na mga programa ng gobyerno. Ito naman ang binigyang-diin ko sa aking manipestasyons bilang co-sponsor sa panukalang Shared Service Facilities o SSF. Layunin ng panukala na ma-institutionalize ang SSF project sa ilalim ng Department of Trade and Industry (DTI).

Ang micro, small and medium enterprises ang itinuturing na “growth engines” ng ating ekonomiya, lalo ngayong unti-unti na tayong bumabangon, at matutulungan ang mga ito ng SSF.

Mahalagang masuportahan ang ating MSMEs na karamihan ay nasa mga probinsya sa pamamagitan ng pagpapagamit ng mga pasilidad at mga makinarya, at pagsasailalim sa product development and training. Sa ganitong paraan, gaganda ang kalidad ng kanilang mga produkto, tataas ang produksyon na magreresulta sa mas magandang kita ng ating mga kababayan.

Nag-co-sponsor din ako sa panukalang “Trabaho Para sa Bayan”. Sa aking manipestasyon, sinabi ko na kailangan talagang may sapat na pagpaplano at estratehiya upang makalikha ng sapat na trabaho para sa ating mga kababayan. Layunin nito na magtatag ng National Employment Master Plan, o ang Trabaho Para sa Bayan Plan.

Sa nagdaang taon, maraming kababayan natin ang nawalan ng trabaho dahil sa pandemya. Marami sa business sectors natin ang nahinto at nagsara, kaya marami sa kanila ang nawalan ng ikabubuhay. Sa pamamagitan ng panukala, sakaling tuluyang maging batas, mas masosolusyunan ang unemployment rate at mapapasigla ang ekonomiya sa pamamagitan ng pagkakaloob ng suporta at insentibo sa mga kasalukuyan at bagong negosyo para rin makapagbigay sila ng trabaho at pagkakakitaan sa kanilang komunidad.

Samantala, tuluy-tuloy naman ang ating mga gawain sa labas ng Senado. Nitong Biyernes ay nag-inspeksyon tayo sa itinatayong Cordova Super Health Center sa Cebu, at personal na pinangunahan ang pagkakaloob ng tulong sa 1,000 mahihirap na residente sa lugar. Sinaksihan din natin ang groundbreaking ng Toledo City Super Health Center, at pagkatapos ay namahagi ng tulong sa 1,000 mahihirap na residente ru’n.

Nagkaroon din tayo ng paglulunsad ng ika-157 Malasakit Center na nasa Cebu City Medical Center noong araw na ‘yun. Dinalaw at inayudahan din natin ang 108 biktima ng sunog na residente ng Bgy. Inayawan at Bgy. Sapangdaku sa Cebu City. Dumalo rin tayo sa Liga ng mga Barangay sa Pilipinas Clustered General Membership Assembly. Ginanap sa Waterfront Hotel, ang mga dumalo ay mula sa Palawan, Quezon, Davao del Norte, Pasig City at Parañaque City.

Nakarating naman ang aking team sa iba’t ibang komunidad para umalalay sa mga kababayan nating nahaharap sa iba’t ibang krisis. Nakapagsagawa tayo ng medical and dental mission para sa 400 na residente ng Pandan, Antique. Maagap nating inalalayan ang 28 pamilyang nasunugan sa Bgy. Rosario, Pasig City.

Patuloy din tayong tumutulong sa mga naapektuhan ng oil spill sa Oriental Mindoro.

Dinalaw ng aking opisina ang mga apektadong komunidad sa Gloria at Pinamalayan, at sa mga susunod na araw ay tutulong din tayo sa iba pang mga bayan du’n.

Hindi naman kinaligtaan ang mahihirap nating kababayan na ating tinulungan gaya ng 333 sa Buenavista, Guimaras; 252 sa Sto. Domingo, Nueva Ecija; 66 sa San Jose at La Paz sa probinsya ng Tarlac; 366 sa Calumpit, Pulilan at Sta. Maria, Bulacan; 301 sa Sto. Domingo, Gapan City, at Peñaranda, mga lugar sa Nueva Ecija.

Nagpapasalamat naman ako sa Sangguniang Panlungsod ng Cagayan de Oro City, na noong Huwebes, sa pamamagitan ng Resolution No. 14480-2023, ay idineklara ako bilang adopted son ng lungsod bilang pagkilala sa ating mga inisyatiba na mapalakas ang healthcare system at paghahatid ng tulong sa mga komunidad na tinamaan ng mga kalamidad. Kasamang idineklara rin bilang adopted son ang ating mahal na dating pangulong Rodrigo Duterte para sa kanyang kontribusyon sa bansa, lalo na sa Mindanao.

Kami ay nagpapasalamat sa buong sambayanang Pilipino na binigyan kami ng pagkakataon na makapagserbisyo. Hindi magiging matagumpay ang administrasyon ni dating Pangulong Duterte kung hindi sa inyong walang tigil na suporta at kooperasyon.

Hindi ko rin sasayangin ang oportunidad na makapagserbisyo pa sa inyo. Kami ay tao lang na napapagod din, pero tuwing nakikita ko na masaya kayo at nakakatulong kami, nakakawala talaga ng pagod at mas ginaganahan akong paglingkuran kayong lahat sa abot ng aking makakaya.

Kaya wala tayong tigil sa pagtupad sa ating sinumpaang tungkulin sa loob man o labas ng Senado, na patuloy akong magmamalasakit at maghahatid ng serbisyo sa bawat Pilipino sa abot ng aking kapasidad.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.